माहुर – शहरातील गणेश नगरस्थित एका प्लॉटमध्ये गुप्तधन सापडल्याची चर्चा आहे. याप्रकरणाची चौकशी करून कार्यवाही करावी अशी मागणी माजी ग्रामपंचायत सदस्य अशोक खडसे यांनी केली आहे.
शहरात पुरातन गणेश मंदिराच्या पायथ्याशी प्रभाग क्र. चार मध्ये मधुसुदन भारती यांंचे नावे प्लॉट असून त्यावर मुन्ना नामक व्यक्तीचा ताबा आहे. १२ फेबु्रवारी रोजी सायंकाळी अनमाळ येथील पायाळू व्यक्ती, विदर्भातील एक मौलवी  याच्या मध्यतीने येथील सोनेरी टोळीने सदर प्लॉटमध्ये खोदकाम केले. त्यामध्ये दोन सोन्याने भरलेले हंडे सापडले असून टोळी घेऊन पसार झाल्याची चर्चा आहे. ही वार्ता शहरात पसरताच गणेश मंदिराजवळ  बघ्याची मोठ्या प्रमाणात गर्दी जमली होती. यापूर्वी शहरातील रामगड किल्ला, सोनापिर दर्गा, पुरातन वास्तुतुन गुप्तधन काढण्याचे प्रकार तचेस त्यासाठी नरबळी दिल्याच्या घटनांची पोलीस दप्तरी नोंद आहे. परिसरात नव्याने सोनेरी टोळी सक्रीय झाली असून गुप्तधन शोधण्याचे काम सुरु आहे. या प्रकरणाची चौकशी करून दोषीवर कारवाई करावी अशी मागणी माजी ग्रामपंचायत सदस्य अशोक खडसे यांनी केली आहे.

नेर – तालुक्यातील वटफळी येथे दोन ट्रकच्या धडकेत एक जण ठार तर तीन जण जखमी झाल्याची घटना  बुधवारी मध्यरात्री घडली. हा अपघात एवढा भयानक होता की दोन्ही ट्रकच्या कॅबीन चकनाचूर झाल्या असून मृतदेह काढण्यासाठी तब्बल सहा तासाचा वेळ लागला.
अमरावती वरून तुर घेऊन ट्रक  (एम.एच. २०/ ए ए ८१९९) यवतमाळ मार्ग आदिलाबाद येथे जात होता. तर यवतमाळकडून दगडी कोळसा घेऊन औरंगाबाद येथे जाणाºया ट्रकची (टि.एन. ७७ / बि ८२३१) वटफळी या गावाजवळ जोरदार धडक झाली. यामध्ये गोविंद पुनास्वामी (४०) रा भरकसरा तामिळनाडू यांचा जागीच मृत्यू झाला. तर सारवनाथ कुमार (३१) रा. शेद्राभट्टी तामीळनाडू, अनिल रामसिंग सोनवाल (२१) रा. औरंगाबाद हे गंभीर जखमी झाले असून अमरावती येथील रुग्णालयात उपचार सुरु आहे. या अपघाताची माहिती मिळताच जमादार श्रीकृष्ण गुल्हाणे, अरविंद जाधव, प्रतापसिंग ठाकुर यांनी घटनास्थळ गाठून जखमींना बाहेर काढून रुग्णालयात दाखल केले. हा अपघात एवढा भयानक होता की, दोन्ही ट्रकच्या कॅबीन चकनाचुर झाल्या असून मृतदेह बाहेरकाढण्यासाठी तब्बल सहा तास लागले. या प्रकरणी नेर पोलिसांनी ेट्रक चालकाविरूद्घ गुन्हा दाखल केला.

सिआयडी मुख्यसुत्रधाराच्या मागावर
यवतमाळ – आर्यरुप टुरिझम कंपनीचा २४ लाखाचा घोटाळा आता ९० लाखावर पोहचला असून पोलिसांनी राज्यात ४३ गुन्हे दाखल केले आहे. या प्रकरणाचा तपास सिआयडी करीत  असून कंपनीच्या फरार चार मुख्य संचालकांचा मागावर आहे.
१ जानेवारी २००९ रोजी आर्यरुप टुरिझम कंपनीची स्थापना सातारा जिल्हयातील खटावा येथील रविंद्र शिवाजीराव देशमुख, त्याच्या पत्नी वसुधा उर्फ वैशाली देशमुख व उदयसिंग नारायण घोरफडे रा. कोरेगाव (बाहुली) जि. सातारा, भाटी यांनी स्थापन केली होती. मुंबई येथे या कंपनीचे मुख्य कार्यलय असून नेट बँकीगद्वारे संपूर्ण व्यवहार सुरु होते. या कंपनीच्या एजंटनी ग्रामीण भागातील नागरिकांना हेरून कंपनीत जमा केलेल्या रक्कमेची दामदुप्पट  देण्याचे आमिष दाखविले. या अमिषाला बडी पडून अनेक व्यक्ती, व्यापारी, व्यावसायीकांनी लाखो रुपये गंतवणूक केली. निर्धारीत कालावधीत ग्राहकांनी नेटवर अकांऊटवरील रक्कम पाहिले असता तेथे दामदुप्पट रक्क्मेची नोंद दिसायची. मात्र बँकेत पैसे काढण्यासाठी गेले असता त्यामध्ये रक्कम जमा केली नसल्याचे उघड होत होते. याप्रकरणी पंजाबराव देशमुख (खडकेकर) यांनी पुसद शहर पोलीस ठाण्यात या कंपनीच्या विरोधात तक्रार दिली होती. यावेळी २४ लाख रुपयाची फसवणूक केल्याप्रकरणी कंपनीचे चारही संचालक, मुंबईचे लेखापाल नितीन गुप्ते, एजंट विनायक गणपत बोन्सले रा. विडूळ  ह.मु. वसंत नगर उमरखेड यांच्यावर गुन्हे दाखल केले होते. याप्रकरणी  प्रथम पुसद शहर पोलिसांनी तपास केला. मात्र या गुन्ह्याची व्याप्ती राज्यभर असल्याने तपास सिआयडीकडे देण्यात आला. राज्यात या कंपनीविरूद्घ ४३ गुन्हे दाखल झाले असून ग्राहकांची ९० लाख रुपयाची फसवणूक केल्याचे उघड झाले आहे. याप्रकरणी लेखापाल गुप्ते याला अटक केली असून मुख्यसुत्रधार देशमुख दाम्पत्य, घोरफडे, भाटी व एजंट बोन्सले हा तेव्हापासून फरार होता. सिआयडीचे पथक त्याच्या मागावर असून कसुन शोध घेत आहे. या पथकाने यापूर्वीच कंपनीचे कार्यालय, शेती, मालमत्ता सिल केले असून बँकेचे खातेही गोठविल्याची माहिती सिआयडीचे पोलीस उपअधिक्षक सुरेश इंगळे यांनी दिली.  सिआयडी पथकाने काल एजंट विनायक गणपत बोन्सलेला  अटक केली व न्यायालयात हजर करून १५ फेबु्रवारी पर्यत सिआयडी कोठडी मिळविली.

मुंबई – ज्येष्ठ सामाजिक कार्यकर्त्या आणि नर्मदा बचाव आंदोलनाच्या नेत्या मेधा पाटकर यांनी आज, गुरूवारी लोकसभा निवडणूक लढविणार असल्याचे जाहीर केले. मात्र अद्याप कोणत्या पक्षाकडून निवडणूक लढविणार हे स्पष्ट केले नाही. येत्या चार ते पाच दिवसांत पक्ष व मतदारसंघाचे नाव सांगणार असल्याचे म्हटले आहे.मेधा पाटकर यांनी अरविंद केजरीवाल यांच्या आम आदमी पक्षाला पाठिंबा जाहीर केला होता. पाटकर यांनी यापूर्वी केजरीवालांसोबत अण्णा हजारे यांच्या भ्रष्टाचारविरोधी मोहिमेत सहभाग घेतला होता. विविध संघटनांचा समूह असलेल्या जनआंदोलनांचा राष्ट्रीय समन्वयाच्या मेधा पाटकर या नेत्या आहेत.

नवी दिल्ली- स्वतंत्र तेलंगण राज्याला मान्यता देणारे विधेयक गुरुवारी लोकसभेत सादर होताच लोकसभेला अक्षरश: युध्दभूमीचे स्वरुप आले. तेलंगण विधेयकावरुन जोरदार गदारोळ सुरु असतानाच, तेलंगण समर्थक आणि विरोधक खासदार एकमेकांना भिडले.  दरम्यान लोकसभा अध्यक्ष मीरा कुमार यांनी गोंधळ घालणा-या आंध्रप्रदेशच्या १८ खासदारांना नियम ३७४ अंतर्गत निलंबित केले आहे.
मिरचीपूड फेकणारे खासदार एल राजगोपाल यांच्यासह ध्वनीक्षेपक तोडणारे टीडीपीचे खासदार एम. वेणूगोपाल रेड्डी यांना निलंबित केले आहे. यांच्यासह सब्बम हरी, अनंथा व्यंकटरामी रेड्डी, रायपती संबासिवा राव, एसपीवाय रेड्डी, एम श्रीनिवासुलु रेड्डी, व्ही अरुण कुमार, ए साई प्रताप, सुरेश कुमार शेतकर, केआरजी रेड्डी, बापी राजू कनुमुरी आणि सुखेंदर रेड्डी (सर्व काँग्रेस) तसेच निरामली सिवाप्रसाद, निम्माला क्रिस्तप्पा, के. नारायणा राव (सर्व टीडीपी) आणि वाय एस जगनमोहन रेड्डी, एम राजामोहन रेड्डी (वायएसआर काँग्रेस) या खासदारांना अधिवेशन संपेपर्यंत निलंबित केले आहे.
लोकसभा अध्यक्षांसमोरच्या मोकळ्या जागेत या खासदारांमध्ये मारामारी झाली.  या दरम्यान विजयवाडाचे निलंबित खासदार एल. राजगोपाल यांनी संसदेत मिरचीपूडचा स्प्रे फवारल्याने काही खासदारांची तब्येत बिघडली. त्यामुळे संसदेत रुग्णवाहिका बोलवून या खासदारांना रुग्णालयात नेण्यात आले. स्प्रे फवारणा-या राजगोपाल यांना अन्य खासदारांनी मारहाण सुरु केल्यानंतर संसदेतील कर्मचा-यांनी मध्ये पडून त्यांची सुटका केली. हा गोंधळ सुरु असताना टीडीपीचे खासदार के. नारायण राव चक्कर येऊन कोसळले. त्यांना तातडीने आरएमएल रुग्णालयात दाखल करण्यात आले आहे. जगनमोहन रेड्डी यांनी तेलंगण विधेयकाविरोधात न्यायालयात जाण्याचा इशारा दिला आहे.  हे विधेयक संसदेत मांडण्यात आल्याने सीमांध्र भागातील तीन काँग्रेस आमदारांनी राजीनामे दिले आहेत. लोकसभेत स्वतंत्र तेलंगणचे विधेयक येताच विरोधक खासादारांनी हे विधेयक हिसकावून फाडून टाकण्याचाही प्रयत्न केला.