यवतमाळ : यवतमाळ-वाशिम लोकसभा मतदारसंघासाठी काल झालेल्या निवडणूकीत ५८.८० टक्के इतके मतदान झाले. सर्वाधिक मतदान राळेगाव विधानसभा मतदारसंघात झाले असून या मतदारसंघाची मतदानाची टक्केवारी ६५.३२ इतकी आहे.
जिल्ह्यात एकूण १७ लाख ४ हजार २३८ इतके मतदार असून त्यापैकी १० लाख ३१ हजार ५३३ इतक्या मतदारांनी मतदानाचा अधिकार बजावला. त्यात पुरुष  ५ लाख ६४ हजार २७६ तर ४ लाख ६७ हजार २५७ स्त्री मतदारांचा समावेश आहे. वाशिम विधानसभा मतदारसंघात १ लाख  ८३ हजार १४६ इतके मतदान झाले असून या मतदारसंघातील मतदानाची टक्केवारी ५७.७२ इतकी आहे. कारंजा विधानसभा मतदारसंघात १ लाख ५० हजार १५४ (५३.४१टक्के), राळेगाव विधानसभा मतदारसंघात १लाख ७२ हजार ६३३ (६५.३२ टक्के), यवतमाळ विधानसभा मतदारसंघात १ लाख ७८ हजार ५०८ (५४.१८ टक्के), दिग्रस विधानसभा मतदारसंघात १ लाख ८५हजार ९२४ (६४.४६ टक्के) तर पुसद विधानसभा मतदारसंघात १ लाख ६१ हजार १६८ (५८.९१ टक्के) इतके मतदान झाले. राळेगाव पाठोपाठ दिग्रस मतदारसंघात ६४. ४६ इतके मतदान झाले. उवर्रीत चार विधानसभा मतदारसंघात मतदानाची टक्केवारी ही ६० टक्केच्या आत राहीली.

यवतमाळ  – गारपिटीनंतर खुद्द मुख्यमंत्र्यांनी भेट दिलेल्या कंझारा येथील शेतात शेतकºयाने एका पक्षाच्या प्रचारार्थ जंगी पार्टी दिल्याने त्याच्याविरूद्ध लाडखेड पोलिसांनी आचारसहिता भंग केल्याचा गुन्हा दाखल केल्याने खळबळ उडाली आहे.
मार्च महिन्यात झालेल्या गारपिटीमुळे जिल्ह्यातील शेतकºयांचे मोठ्या प्रमाणात नुकसान झाले होते. त्यामध्ये बोरी अरब येथील विष्णू गजानन ठाकरे या यांच्या शेतातील पपई बाग उन्मळून पडल्याने लाखो रुपयाचे नुकसान झाले होते. दरम्यान मुख्यमंत्री पृथ्वीराज चव्हाण यांनी या शेतकºयाच्या शेतात भेट देऊन मदत करण्याचे आश्वासन दिले होते. दरम्यान लोकसभा निवडणुकीच्या प्रचाराला चालना मिळण्यासाठी या शेतकºयाच्या शेतात ९ एप्रिल रोजी रात्री ८.३० वाजता खास पार्टीचे आयोजन करुन परिसरातील नागरिकांना भोजनासाठी आमंत्रित केले. अनेक नागरिक भोजनावर ताव मारत असल्याची माहिती जिल्हाधिकारी कार्यालयातील निवडणूक भरारी पथकाला मिळाली होती. त्यावरुन पथकाने या शेतात धाड टाकून व्हिडीओ चित्रीकरण केले. याप्रकरणी भरारी पथक प्रमुख नायब तहसीलदार व्ही.बी. काळे यांनी दिलेल्या तक्रारीवरुन लाडखेड पोलिसांनी गुन्हे दाखल केले.

नागपूर – विदर्भातल्या दहा लोकसभा मतदार संघात मतदारांनी मोठ्या उत्साहात मतदान केले आहे. मागील निवडणूकीशी तुलना केल्यास विदर्भात मतदानाचा टक्का वाढला असून येथे सरासरी ६२.३६ टक्के मतदान झाले आहे. २००९ मध्ये हेच प्रमाण ५७.७ इतके होते.
सर्वाधिक मतदान हे गडचिरोली, भंडारा, अकोला आणि अमरावती या मतदार संघात झाले आहे. विशेष म्हणजे नक्षलवाद्यांचा विरोध झुगारून गडचिरोली आणि चंद्रपूरमध्ये मोठया प्रमाणात मतदार मतदानासाठी बाहेर पडले होते. राज्यातील पहिल्या टप्प्याचे मतदान विदर्भातील १० लोकसभा मतदार संघात झाले. काही तुरळक घटना वगळता सर्वच मतदार संघात मतदान हे शांततेत झाले. उन्हाचा कडाका लक्षात घेता सुरूवातीच्या मतदानावर त्याचा परिणाम दिसून आला. दुपारपर्यंत मतदान अगदीच संथ गतीने सुरु होते. सरासरी २५ टक्केच मतदानाची नोंद दुपारी तीन वाजेपर्यंत झाली होती. त्यामुळे मतदान मागील वेळे पेक्षा कमी होते की काय अशी शंका सर्वांनाच वाटत होती. मात्र संध्याकाळी मतदानाला वेग आला. विशेष म्हणजे मागील वेळ पेक्षा जास्त मतदान यावेळी विदर्भातील दहाही लोकसभा मतदार संघात झाले आहे. त्यात अकोला, अमरावती, भंडारा आणि नक्षलग्रस्त असलेल्या गडचिरोलीमध्ये सर्वाधिक ६५ टक्के मतदान झाले आहे. तर बुलढाणा मतदारसंघात सर्वात कमी म्हणजेच ५८.६६ टक्के मतदान झाले. तर बीग फाईट असलेल्या नागपूर मतदार संघात ५९ टक्के मतदानाची नोंद झाली आहे. सर्वात जास्त मतदान झालेल्या अमरावती मतदारसंघात दुपापर्यंत केवळ १५ टक्केच मतदान झाले होते. मात्र संध्याकाळी येथील मतदानाचा वेग वाढला होता.
दरम्यान नागपूर मध्ये भाजप उमेदवार नितीन गडकरी यांनी टाऊन हॉल येथे जाऊन मतदान केले. नागपूरात विलास मुत्तेमवार, भंडा-यात प्रफुल्ल पटेल, मुकुल वासनिक, अकोल्यात प्रकाश आंबेडकर, अमरावतीत नवनित कौर राणा, शिवाजीराव मोघे, संजय देवतळे, सागर मेघे या प्रमुख उमेदवारांनी आपला मतदानाचा हक्क बजावला.
विदर्भात झालेल्या मतदानानंतर या प्रमुख उमेदवारांसह जवळपास २०१ उमेदवारांची भवितव्य आता मतदान यंत्रात बंद झाले आहे.

विदर्भातील दहा लोकसभा मतदारसंघ
मतदानाची टक्केवारी
बुलढाणा ५८.६६
अकोला ६५.००
अमरावती ६५.००
वर्धा ६१.००
रामटेक ६२.००
नागपूर ५९.००
भंडारा ६५.००
गडचिरोली-चिमूर ६५.००
चंद्रपूर ६३.००
यवतमाळ ६०.००
सरासरी- ६२.३६

गडचिरोली- जिल्ह्यातील एटापल्ली तालुक्यात मतदानाची प्रक्रिया आटोपून परतत असलेल्या पोलिंग पार्टीवर नक्षलवाद्यांनी हल्ला केल्याचे वृत्त आहे. या हल्ल्याला सुरक्षा जवानांनी चोख प्रत्युत्तर दिले. तालुक्यातील जरदेवाडा येथे ही घटना घडली. हल्ल्याचे लक्ष्य ठरलेले निवडणूक निर्णय अधिकारी, कर्मचारी तसेच मतपेट्या सुरक्षित असल्याचे पोलिसांनी सांगितले. नक्षली कारवायांमुळे गडचिरोली जिल्हा हा संवेदनशील मानला जातो. त्यामुळे या भागात फक्त दुपारी ३ पर्यंत मतदानाची वेळ ठेवण्यात आली होती. मतदान संपल्यानंतर मतपेट्या परत नेतांना अधिकाऱ्यांवर हा हल्ला करण्यात आला.

अहमदाबाद- भाजपचे पंतप्रधानपदाचे उमेदवार नरेंद्र मोदी यांची संपत्ती केवळ दीड कोटी रुपये इतकी आहे. वडोदरा आणि वाराणसी अशा दोन लोकसभा मतदारसंघातून निवडणूक लढवणा-या मोदी यांच्याकडे स्वतःचे असे एकही वाहन नाही.
मोदी यांनी बुधवारी वडोदरा लोकसभा मतदारसंघातून अर्ज दाखल केला. उमेदवारी अर्जासोबत दिलेल्या प्रतिज्ञापत्रात त्यांनी संपत्ती एक कोटी ५१ लाख इतकी संपत्ती असल्याचे म्हटले आहे. यातील ५१ लाख ५७ हजार ५८२ कोटी रुपये बँकेतील खात्यात आणि फिक्स डिपॉझिट स्वरुपात आहेत. त्याच्या हातात केवळ २९ हजार ७०० रुपये आहेत. तर एक लाख ३५ हजार रुपयांच्या चार अंगठ्या असल्याचे मोदी यांनी प्रतिज्ञापत्रात म्हटले आहे.विशेष म्हणजे त्यांच्याकडे स्वतःची अशी एकही गाडी नाही. तसेच गेल्या दोन वर्षात त्यांनी कोणतेही दागिने विकत घेतलेले नाही.मोदीचे गांधीनगरमध्ये स्वतःचे घर आहे. त्याची किमत एक कोटी असल्याचे त्यांनी म्हटले आहे. याशिवाय आपल्याकडे अन्य कोणताही मालमत्ता नसल्याचे त्यांनी प्रतिज्ञापत्रात सांगितले आहे. २०१२च्या विधानसभा निवडणुकीदरम्यान मोदींनी सादर केलल्या प्रतिज्ञापत्रात त्यांची संपत्ती एक कोटी ३३ लाख रुपये इतकी दाखवण्यात आली होती.
गेल्या दोन वर्षात मोदींनी विविध योजनांमध्ये गुंतवलेल्या रक्कमेतून त्यांना १८ लाख रुपये मिळाले आहेत.
मोदींचे उत्पन्न- २०१२-१३: चार लाख ५४ हजार ०९४ – २०११-१२: एक लाख ५० हजार ६३०

रायपूर – लोकसभा निवडणुकीच्या पार्श्वभूमीवर छत्तीसगडमधील बस्तर भागात गुरुवारी दहा मतदान केंद्रावरील सुरक्षा रक्षकांवर नक्षलवाद्यांनी गोळीबार केला. बस्तर मतदारसंघात दुपारपर्यंत ३० टक्के मतदानाची नोंद झाली आहे.
बस्तरमधील दहा मतदान केंद्रावर मतदान सुरु असताना नक्षलवाद्यांनी सुरक्षा रक्षकांवर हवेत गोळीबार केला. मात्र या घटनेमध्ये कोणीही जखमी झाले नसल्याची माहिती पोलिस अधिका-यांनी दिली. दरम्यान, याआधी सुरक्षा रक्षकांनी विविध ठिकाणांहून तीन बॉम्ब आणि १५ आयईडी स्फोटके हस्तगत केली.सुकुमा जिल्ह्यातील कोरा आणि आमिरगढ, दंतेवाडा येथील सामोली आणि थानिकारा, नारायणपूर जिल्ह्यातील नेडनार आणि कोंडागाव जिल्ह्यातील पाडेली आणि रायगाबो़डी या मतदान केंद्रांवर नक्षलवाद्यांनी गोळीबार केला. त्यानंतर काही वेळासाठी मतदान थांबवण्यात आले होते. बस्तर मतदारसंघातून दोन महिलासह आठ उमेदवार निवडणुकीच्या रिंगणात आहेत.

इस्लामाबाद – पाकिस्तानची राजधानी इस्लामाबादमध्ये बुधवारी सकाळी शक्तीशाली बॉम्बस्फोट झाला. इस्लामाबादमधील फळ-भाज्यांच्या बाजारपेठेत हा बॉम्बस्फोट झाला. या शक्तीशाली स्फोटात २३ नागरिक ठार झाले असून, ४० जण जखमी झाल्याची माहिती अधिका-यांनी दिली.
मृतांना आणि जखमींना जवळच असलेल्या पाकिस्तानी इन्स्टिटयूट ऑफ मेडिकल सायन्सच्या रुग्णालयात दाखल करण्यात आले असून, मृतांचा आकडा वाढण्याची शक्यता असल्याचे डॉक्टरांनी सांगितले. सकाळच्या वेळी ग्राहक बाजारात खरेदी करत असताना हा स्फोट झाला.
फळ-भाज्यांच्या खोक्यांमध्ये लपवून हा बॉम्ब आणला असावा अशी शक्यता आहे. स्फोट होताच फळ-भाज्यांच्या टोपल्या उंच हवेत उडाल्या. चित्रफीतीमध्ये सर्वत्र रक्ताचा सडा पडलेला दिसत होता. टोप्या, चप्पला विखरुन पडलेल्या होत्या. सुरक्षापथकांनी घटनास्थळाला घेराव घातला असून, बॉम्ब तज्ञ परिसरात शोध घेत आहेत.

इस्लामाबाद – पाकिस्तानची राजधानी असलेले इस्लामाबाद शहर बुधवारी सकाळी बॉम्बस्फोटाने हादरले. शहरातील एका गजबजलेल्या बाजारपेठेत फळे आणि भाज्या विक्री विभागात आज सकाळी बॉम्बस्फोट झाला. या स्फोटात २३ जण ठार झाले आणि ४० ते ५० जण जखमी झाल्याचे प्राथमिक वृत्त आहे. जखमींना जवळच्या हॉस्पिटलमध्ये दाखल केले आहे. स्फोटाचे स्वरुप पाहता, मृतांच्या संख्येत वाढ होण्याची भीती व्यक्त होत आहे.
पोलिसांनी घटनास्थळाला घेराव घातला असून बॉम्ब एक्स्पर्टच्या सहकार्याने कोणती स्फोटके वापरण्यात आली याचा तपास सुरू आहे. एका फळांच्या खोक्यात लपवलेला पाच किलो वजनाचा बॉम्ब जप्त करण्यात आला आहे. हा बॉम्ब निकामी करण्याचे काम सुरू आहे, असे पोलिसांनी सांगितले. येत्या दहा एप्रिलपासून तेहरिक-ई-तालिबान ही दहशतवादी संघटना शस्त्रसंधी करणार आहे. ही शस्त्रसंधी सुरू होण्याआधीच स्फोट झाला आहे. मात्र तेहरिकसह पाकमधील कोणत्याही दहशतवादी संघटनेने या हल्ल्याची जबाबदारी घेतलेली नाही.

नागपूर (सुरेश चरडे ) – कॉंग्रेस ओबीसी यात्रा तर काढू शकते. परंतु ओबीसीला पंतप्रधान करू शकत नाही. म्हणूनच भाजपाने पंतप्रधानपदाचे उमेदवार म्हणून ओबीसी वर्गातील गुजरातचे मुख्यमंत्री नरेंद्र मोदी यांना घोषित केल्यानंतर कॉंग्रेसची पंचाईत झाली आहे. कारण कॉंग्रेस एखाद्या शिखाला पंतप्रधान करू शकेल. एखाद्या मुसलमानाला करू शकेल. परंतु ओबीसीला पंतप्रधान करू शकणार नाही.
कारण आता तर राहुलला पंतप्रधान करायचा आहे. त्यामुळे एका ओबीसीला पंतप्रधानपदाचा उमेदवार जाहीर केल्यानंतर त्याला पर्याय ते देऊ शकत नाही. असे जर करेल तर मग कॉंग्रेसच्या राजकुमाराचा राज्याभिषेक कसा होऊ शकेल? संघ, भाजप हे वर्णवर्चस्ववादी आहेत, त्यांनी ओबीसीला पाताळात गाडले. त्यांचा विकास गोठवला, त्यांना कर्मकांडात गुंतवून ठेवले. त्यामुळे जातीयवादी, धर्मवादी भाजपापासून दूर राहण्याचे आवाहन करीत धर्मनिरपेक्ष असलेल्या कॉंग्रेसच्या मतदाराला मतदान करण्याचे आवाहन करण्यात येत आहे. या त्यांच्या आवाहनावरून लोकांचा असा समज होतो की कॉंग्रेसचे कार्यकर्ते, नेते किती परिवर्तनवादी किंवा समतावादी आहेत. ब्राम्हणी व्यवस्थेला माणणारे नाहीत. त्यांना पूजेसाठी ब्राम्हण लागत नाही. ते ज्योतिष पाहात नाही. कुंडली पाहात नाहीत. अशाप्रकारचे किती कॉंग्रेसी आहेत? जर नाहीत तर त्यांना मग अशाप्रकारचा कांगावा करण्याची गरज काय आहे? भाजपा वर्णवर्चस्ववादी असली तरी त्यांना आता ओबीसीशिवाय दुसरा पर्याय नाही. कॉंग्रेसमध्ये अशी स्थिती आहे काय? तिथे राजकुमार तयार गुडघ्याला बाशिंग बांधून. तिथे दुसºयाला काय संधी आहे? म्हणून मग त्यांना आता ओबीसी यात्रा काढत आहे. ओबीसींना आपल्याकडे वळवण्यासाठी कॉंग्रेसकडे याशिवाय दुसरा पर्याय नाही. ओबीसींची मते घेण्यासाठी यात्रा काढण्याशिवाय दुसरे करणार तरी काय?
———-
मुत्तेमवारांची हातघाई
नागपुरात कॉंग्रेसचे उमेदवार विलास मुत्तेमवार पाचव्यांदा नागपुरातून खासदारकीसाठी उभे आहेत. चारवेळा जिंकून आल्यानंतर या खासदाराने नागपूरच्या विकासासाठी काय केले, हा प्रश्न आहे. तरीपण यावेळेसही पाचव्यांदा नागपुरातून ते लोकसभेची लढाई लढत आहे. याआधी ते चिमुरमधून तीनवेळा निवडणूक लढले. एवढे सारे असताना या खासदाराने विदर्भात कोणते
विकास कामे केली हा प्रश्नच आहे. ज्या जनवादच्या भरोश्यावर राजकारणात काही भव्य दिव्य केले नसले तरी टिकून राहिले त्या जनवाद या वृत्तपत्राला हा खासदार चालवू शकला नाही. इतर विकासकामे तर सोडून द्या. असे असतानाही हा व्यक्ती पुन्हा खासदार बनण्याचे स्वप्न पाहात आहे. नागपूरकर त्यांना निवडून देणार का, लवकरच स्पष्ट होणार आहे.

नागपूर – महाराष्ट्रात लोकसभा निवडणुकीच्या पहिल्या टप्प्याच्या प्रचाराच्या तोफा आज म्हणजे मंगळवारी संध्याकाळी पाच वाजता थंडावणार आहेत. महाराष्ट्रात विदर्भातील दहा लोकसभा मतदारसंघात पहिल्या टप्प्यात मतदान होत आहे.
महाराष्ट्रात पहिल्या आणि देशात तिस-या टप्प्याचे मतदान दहा एप्रिल रोजी होणार असून, विदर्भातील दहा जागांसाठी एकूण २०१ उमेदवार रिंगणात आहेत. देशाच्या राजकरणातील प्रमुख नेत्यांचे भवितव्य या निवडणुकीत निश्चित होणार आहे. प्रथमच लोकसभेची निवडणूक लढवणारे भाजपचे माजी राष्ट्रीय अध्यक्ष नितीन गडकरी आणि काँग्रेस नेते विलास मुत्तेमवार या लढतीकडे सगळयांचे लक्ष लागले आहे. ‘आप’च्या अंजली दमानियाही नागपूरमधून निवडणूक लढवत आहेत त्यांच्यामुळे ही निवडणूक चुरशीची बनली आहे.
केंद्रीय अवजड उद्योग मंत्री आणि राष्ट्रवादी काँग्रेसचे नेते प्रफुल पटेल भंडारा-गोदिंयामधून रिंगणात आहेत. त्यांच्यासमोर भाजपचे नाना पाटोले यांचे आव्हान आहे. काँग्रेसचे वरिष्ठ नेते मुकुल वासनिक रामटेकमधून, राज्य सरकारमधील काँग्रेसचे मंत्री शिवाजीराव मोघे यवतमाळ-वाशिममधून, संजय देवतेळ चंद्रपूरमधून रिंगणात आहेत. वर्धा, अकोला, गडचिरोली, अमरावतीमधून काँग्रेस, राष्ट्रवादी काँग्रेसचे उमेदवार आपले नशीब आजमवत आहेत. २०१ उमेदवारांमध्ये ९० अपक्ष उमेदवार असून यामध्ये १५ महिलांचा समावेश आहे. ८० नोंदणीकृत राजकीय पक्षांचे उमेदवार आहेत. एकूण १ कोटी २१ लाख ७५ हजार ६६२ मतदार या उमेदवारांचे भवितव्य निश्चित करणार आहेत. विदर्भातील दहा जागांसाठी काँग्रेसने सात, राष्ट्रवादीने तीन, भाजपने सहा, शिवसेनेने चार, सीपीआयने एक आणि बसपने सर्वच्या सर्व दहा जागांवर आपले उमेदवार उभे केले आहेत.नागपूर लोकसभा मतदारसंघातून सर्वाधिक ३३ आणि अकोल्यातून सर्वात कमी म्हणजे सात उमेदवार रिंगणात आहेत. प्रचाराचा अंतिम टप्पा असल्याने सर्वच पक्षांचे प्रमुख नेते विदर्भात आपआपल्या उमेदवारांचा जोरदार प्रचार करत आहेत.
देशात दुस-या टप्प्यात म्हणजे दहा एप्रिलला महाराष्ट्र दहा , ओरिसा दहा , उत्तर प्रदेश दहा, अंदमान आणि निकोबार एक, चंदीगड एक, लक्षद्वीप एक, दिल्ली सात जागा, बिहारच्या सहा, छत्तीसगड एक, हरियाणा दहा, जम्मू आणि काश्मीर एक, झारखंड चार, केरळ वीस आणि मध्यप्रदेशच्या नऊ जागांवर मतदान होईल.