मुंबई- राज ठाकरे यांच्या महाराष्ट्र नवनिर्माण सेनेने भाजपचे बीड लोकसभा मतदारसंघातील उमेदवार गोपीनाथ मुंडे यांनी पाठिंबा जाहीर केला आहे. मनसे अध्यक्ष राज ठाकरे यांनी मंगळवारी प्रसिद्धपत्रकाद्वारे ही माहिती दिली.
राज्यातील लोकसभा निवडणुकीच्या दुस-या टप्प्यात बीडमध्ये मतदान होणार आहे. १७ एप्रिल रोजी होणा-या मतदानाच्या एक दिवस आधी राज यांनी मनसेच्या कार्यकर्त्यांना मुंडे यांनी निवडूण देण्याचे आदेश दिले आहेत. या मतदारसंघातून राष्ट्रवादी काँग्रसने सुरेश धस आणि आम आदमी पक्षाने नंदू माधव यांना उमेदवारी दिली आहे.
लोकसभा निवडणुकीच्या पार्श्वभूमीवर याआधीही राज यांनी भाजपशी जवळीक केली होती. प्रथम नितीन गडकरी सोबत एकाच व्यासपीठावर असलेल्या राज ठाकरे यांनी भाजपचे नेत्यांची भेट घेतली होती. इतकच नाही तर राज यांनी राज्यातील भाजपच्या उमेदवारांच्या विरोधात एकही उमेदवार उभा केला नाही. तसेच लोकसभा निवडणुकीनंतर मनसेचे खासदार पंतप्रधानपदासाठी नरेंद्र मोदी यांनाच पाठिंबा देतील असे अनेक जाहीर सभांमधून सांगितले होते. दरम्यान मुंबईतील जोगेश्वरी येथील जाहीर सभेतही राज यांनी मुंडे यांना पाठिंबा देत असल्याचे सांगितले. मुंडे यांनी सकाळी आपल्याला फोन केला होता. त्यांनी केलेल्या विनंतीमुळे आपण त्यांना पाठिंबा देत असल्याचे राज यांनी सांगितले.

अमेठी – लोकसभा निवडणूक ही दोन विचारसरणीदरम्यानची लढाई असून कौटुंबिक समारंभ नाही, या शब्दात प्रियंका गांधी यांनी त्यांचे चुलत भाऊ वरुण गांधी यांना मंगळवारी फटकारले. काँग्रेस उपाध्यक्ष राहुल गांधी यांच्या प्रचारासाठी त्या अमेठीत आल्या होत्या. त्या वेळी त्यांनी पत्रकारांशी संवाद साधला.
वरुण गांधी भाजपच्या तिकिटावर निवडणूक लढवत असल्याचा संदर्भ देत प्रियंका म्हणाल्या की, हा लढा दोन विचारसरणीचा असून माझा मुलगा असा वागला असता तरीही मी त्याला माफ केले नसते. वरुण गांधी हे आपला रस्ता भरकटले आहेत, त्यांना योग्य मार्ग तुम्हीच दाखवा. असे वक्तव्य प्रियंका गांधी यांनी एका प्रचारसभेदरम्यान केले होते. या वक्तव्याचा व्हीडिओ उघड झाल्याबद्दल आपण निराश झालो नाहीत, असेही त्यांनी सांगितले.

नवी दिल्ली- तृतीयपंथीयांना ‘थर्ड जेंडर’ म्हणून मान्यता देण्याचा महत्वपूर्ण निकाल सर्वोच्च न्यायालयाने मंगळवारी दिला.
केंद्र व राज्य सरकारला तृतीयपंथीयांचा सामाजिक व आर्थिकदृष्ट्या दुर्बल घटकांत समावेश करून घेण्याचे निर्देश मंगळवारी सर्वोच्च न्यायालयाने दिले. तसेच त्यांना आर्थिक मागास समाज म्हणून विशेष वागणूक द्यावी, असेही सांगितले आहे. यापुढे तृतीयपंथीयांना इतरमागासवर्गीयात समावेश करून त्यांना नोकरी आणि शिक्षणात आरक्षण देण्याचे आदेशही दिले आहेत. तृतीयपंथीयांबद्दल समाजात चांगले विचार रुजवण्यासाठी सरकारने जनजागृती करावी, त्यांच्यासाठी विशेष समाज विकास योजना राबवाव्या, असेही सांगितले आहे. त्याचबरोबर तृतीयपंथीयांसाठी प्रत्येक राज्य सरकारने विशेष शौचालये बांधावी आणि त्यांच्या आरोग्यासंबंधी काळजी घेण्यासाठी रुग्णालयात विशेष व्यवस्था करण्याचे निर्देशही दिले आहेत

नागपूर – विदर्भ राज्य निर्मितीकरिता स्थापन झालेल्या विदर्भ कनेक्ट या संघटनेने महाराष्ट्र दिनी, १ मे रोजी विदर्भ राज्याच्या झेंडा फडकावण्याचे अभिनव आंदोलन करण्याचा निर्णय घेतला आहे. विदर्भात पहिल्यांदाच अकराही जिल्ह्यांत संघटितपणे हे आंदोलन होत असून, ‘विदर्भ कनेक्ट’ने त्यात सुसूत्रता आणली आहे. विदर्भातील अकराही जिल्ह्यांमध्ये एकाचवेळी महाराष्ट्र दिन हा काळा दिवस म्हणून पाळला जाणार आहे.
विदर्भवादी व ज्येष्ठ विधिज्ञ श्रीहरी अणे आणि विदर्भ कनेक्टचे अध्यक्ष अॅड. मुकेश समर्थ यांच्या नेतृत्वाखाली विदर्भातील प्रत्येक जिल्ह्यात अॅक्शन ग्रुप स्थापन करण्यात येत आहे. त्या अॅक्शन ग्रुपच्या माध्यमाने महाराष्ट्र दिनी वेगळ्या विदर्भ राज्याचा झेंडा फडकवण्यात येणार आहे. त्यासंदर्भात ‘मटा’शी बोलताना अॅड. मुकेश समर्थ म्हणाले, ‘विदर्भातील जनतेकरिता महाराष्ट्र दिन हा सदैव काळा दिवस राहिला आहे. गेल्या अनेक वर्षांपासून विदर्भावर सातत्याने अन्याय व भेदभाव होत आहे. विदर्भातील विकास ठप्प पडला असून त्यामागे पश्चिम महाराष्ट्र धर्जिणे धोरण कारणीभूत ठरले आहे. महाराष्ट्रात सहभागी झाल्यानंतरही विदर्भाचा विकास झालेला नाही. त्यामुळेच आता विदर्भ राज्याच्या निर्मितीकरिता विविध संघटना व व्यक्ती एकत्रित येत आहेत. त्या आंदोलनाचे पहिले पाऊल म्हणजे महाराष्ट्र दिनी प्रत्येक जिल्ह्यात प्रतीकात्मक विदर्भाचा झेंडा फडकावण्यात येत आहे.’
व्हॉट्सअॅप व फेसबुकच्या माध्यमाने विदर्भवादी व्यक्ती व संघटना एकत्रित आल्या आहेत. आता ‘विदर्भ कनेक्ट’ नावाने स्वतंत्र वेबसाइटदेखील सुरू करण्यात येत आहे. त्यासोबतच कॉलेजमधील युवकांनाही या आंदोलनाशी जोडण्याचे प्रयत्न होत आहेत. त्याकरिता चर्चासत्रे व इतर उपक्रमदेखील आयोजित होणार आहेत. महाराष्ट्र दिनी होणारे आंदोलन अत्यंत शांततापूर्ण पद्धतीने होईल. नागपुरात विष्णूजी की रसोई येथील लॉनवर विदर्भ राज्याचा झेंडा रोवण्यात येणार आहे. त्यासोबतच अकोला, वर्धा, यवतमाळ, चंद्रपूर, वाशीम, बुलडाणा, अकोला, गडचिरोली, भंडारा आणि गोंदिया येथेही काळा दिन पाळण्यात येणार आहे. या आंदोलनात सहभागी होऊ इच्छिणाऱ्या संघटनांनी विदर्भ कनेक्टच्या माटे चौकातील कार्यालयात संपर्क साधावा अथवा vidarbhaconnect.gmail.com या ईमेलवर संपर्क साधावा, असे आवाहन अॅड. मुकेश समर्थ यांनी केले आहे.

जन्म तुझा केवळ
जन्म नव्हता
या जगासाठी
या युगासाठी
तो तर महोत्सव होता
युगजन्माचा
म्हणूनच तर
पृथ्वी स्वत: भोवती फिरतांना
तुझ्याच जन्माच्या
मंगलकामना
देत धुंद होत असते
सृष्टीतील प्रत्येकाला
आणि
सूर्याला सुद्धा

प्रशांत वंजारे ,,आर्णी
( आगामी काव्यसंग्रहातून )

मथुरा – निवडणूक आचारसंहितेचा भंग केल्याप्रकऱणी बॉलीवूड अभिनेत्री आणि भाजपच्या मथुरा येथील उमेदवार हेमामालिनी यांच्याविरोधात प्राथमिक माहिती अहवाल (एफआयआर) दाखल करण्यात आला आहे.
हेमामालिनी यांनी श्री जी बाबा सरस्वती विद्यामंदिर शाळेत शनिवारी सभा घेतली होती. या सभेत विद्यार्थ्यांचाही समावेश होता. याप्रकरणी त्यांच्याविरोधात एफआयआर दाखल करण्यात आल्याचे निवडणूक धिरेंद्र सचन यांनी सांगितले. निवडणूक आय़ोगाच्या नियमानुसार शाळा सुरु असताना तेथे सभा घेणे आचारसंहिता उल्लंघन केल्यासारखे आहे असेही सचन यावेळी म्हणाले.लोकसभा निवडणुकीत भाजपकडून हेमामालिनी यांना मथुरा येथून उमेदवारी देण्यात आली आहे.

कोरापूट – कट्टर माओवादी कमांडर पूर्णा हुल्का सुरक्षापथकांबरोबर झालेल्या चकमकीत ठार झाला आहे. ओडिसाच्या कोरापूट जिल्ह्यातील नारायणपटणा भागात रविवारी मध्यरात्री माओवादी आणि रक्षापथकांमध्ये जोरदार चकमक झाली. या चकमकीत पूर्णा हुल्का ठार झाला.
आंध्रप्रदेश-ओडिसामधील अनेक नक्षलवादी कारवायांचा तो सूत्रधार होता. श्रीकाकुल्लम-कोरापटू डिव्हीजनचा तो कमांडर होता. ओडिसा सरकारने त्याच्यावर एक लाख रुपयाचे बक्षीस ठेवले होते. हत्येसह अनेक गंभीर गुन्ह्यांची नोंद त्याच्या नावावर होती. नारायणपटना भागात पूर्णा त्याच्या साथीदारांच्या मदतीने घातपाती कारवाया करणार असल्याची पोलिसांना गुप्तचरांकडून माहिती मिळाली होती. त्यामुळे सुरक्षापथकांनी पूर्णा जेथे येणार होता तेथे आधीपासूनच सापळा रचून ठेवला होता. पूर्णा आणि त्याचे साथीदार तेथे आल्यानंतर सुरक्षारक्षकांनी त्यांना शरण येण्याचे आवाहन केले. मात्र त्यांनी उलट सुरक्षापथकांच्या दिशेने गोळीबार सुरु केला. सुरक्षारक्षकांनी प्रत्युत्तरादाखल केलेल्या गोळीबारात पूर्णा ठार झाला. अंधाराचा फायदा घेऊन त्याच्याबरोबर असणारे सहकारी तेथून पसार झाले. घटनास्थळावरुन पोलिसांनी दोन देशी बनावटीच्या पिस्तुल, बंदुका आणि अन्य माओवादी साहित्य जप्त केले आहे.

घरा घरामध्ये नेलं स्वाभिमानी जिनं
हेच काम केलं इथं भीमजयंतीनं !!

कामगिरी केली अशी कामगिरी केली
लाचारी बिचारी सारी दूर दूर गेली
गेलं जुनं काम गेलं पाटलाला भिनं !!

आला नावे जाग आला आली नावे जागं
ठाई – ठाई फुलारली भिमाईची बाग
डोलतात फुलं इथं नव्या टवटवीनं !!

भाकरीची आस होती भाकरीची आस
भाकरीचा घास दिला त्याच घरी खास
जीवनाचं सोनं केलं ह्याच भाकरीनं !!

समाजाचं देणं त्याला समाजात येणं
विचाराचं देणं घेणं करी नम्रतेनं
वामनाचं गीत आलं ह्याच तयारीनं !!

वामनदादा कर्डक
[ मोहोळ ]

यवतमाळ  – दोन दिवसापूर्वी अचानक बेपत्ता झालेल्या दोन युवकांचे मृतदेह शनिवारी सायंकाळी निळोणा धरणात आढळून आल्याने खळबळ उडाली आहे. दोनही युवकांना पोहता येत नसल्याने त्यांच्या मृत्यूचे गुढ कायम असून घातपात झाल्याचा संशय मृतांच्या नातेवाईकांनी व्यक्त केला. आज रविवारी दुपारी इन कॅमेरा दोन्ही युवकाच्या मृतदेहाचे शवविच्छेदन करून प्रेत नातेवाईकांच्या स्वाधीन केले आहे.
अश्वजीत हर्षवर्धन ठमके (२१), पंकज भीमराव राजगडकर (१८) रा. बांगरनगर अशी मृतांची नावे असून अश्वजीत हा वादाफळे महाविद्यालयात बीएसएसी (कृषी) भाग दोन तर पंकज हा जगदंबा विज्ञान महाविद्यालय इयत्ता बारावीचा विद्यार्थी होता. ११ एप्रिल रोजी सकाळी ११ वाजता अश्वजीत हा बँकेत पैसे जमा करण्यासाठी तर पंकज हा चप्पल घेण्यासाठी जात असून अर्ध्या तासात परत येतो असे सांगून घरून निघाले होते. दुपार होऊनही घरी न परतल्याने कुटुंबियांनी दोघांच्याही मोबाईलवर संपर्क साधला. मात्र त्याच्यासोबत संपर्क झाला नाही. त्यानंतर मित्र मंडळीकडे चौकशी केली. मात्र त्यांचा थांगपत्ता लागत नसल्याने शहर पोलिस ठाणे गाठून बेपत्ता असल्याची रितसर तक्रार नोंदविली होती. अशातच काल शनिवारी सायंकाळी निळोणा धरणात दोन युवकांचे मृतदेह तरंगतांना आढळले़ या बाबतची माहिती मिळताच शहर, वडगाव रोड व ग्रामीण पोलिसांनी घटनास्थळ गाठून मृतदेह पाण्याबाहेर काढले. शहर पोलिसात दोन युवक बेपत्ता असल्याची नोंद असल्याने त्यांनी ठमके व राजगडकर कुटुंबियांना ओळख पटविण्यासाठी म्हणून घटनास्थळी बोलावून घेतले. दोन्ही मृतदेह अश्वजीत व पंकजचे असल्याची खात्री पटताच वडीलांनी टाहो फोडला. पंचनामा करून मृतदेह शवविच्छेदनासाठी रात्रीच कै.वसंतराव नाईक शासकीय वैद्यकीय महाविद्यालयात आणण्यात आले. आज दुपारी शवविच्छेदन इन कॅमेरा करावे अन्यथा मृतदेह ताब्यात घेणार नाही असा पवित्रा नातेवाईकांनी घेतल्याने पोलिसांची तारांबळ उडाली होती. शवविच्छेदन गृहासमोर नातेवाईकांची झालेली गर्दी व घटनेचे गांभीर्य ओळखून इन कॅमेरा शवविच्छेदन केले. आज दुसºया दिवशीही या घटनेचे गुढ कायम असून प्रेमप्रकरणातून दोन्ही युवकाचा खून झाल्याची चर्चा सुरू बांगरनगर परिसरात सुरू होती. या प्रकरणी वडगाव रोड पोलिसांनी आकस्मिक मृत्यूची नोंद केली असून अधिक तपास सुरू आहे.
पोलिसांनी परिसर काढला पिंजून
यवतमाळ ग्रामीण, शहर व वडगाव रोड या तीन्ही ठाण्याचे पोलीस अधिकारी व ३० पोलिस कर्मचाºयांच्या पथकाने सकाळी निळोणा धरण गाठले. युवकांचे कपडे व साहित्य शोधण्यासाठी पथकाने तब्बल तीन तास परिसर पिंजून काढला. मात्र या ठिकाणी त्यांच्या हाती काहीही लागले नाही. त्यामुळे त्यांना रिकाम्या हाताने परत यावे लागले.
अश्वजीतला पोहता येत नव्हते: हर्षवर्धन ठमके
अश्वजीत व पंकज या दोघांना पोहता येत नव्हते. त्यामुळे दोघेही पोहण्यासाठी धरणावर जाणे शक्य नाही. त्यांचा मृत्यू पोहताना झाला नसून घातपात झाल्याचा संशय अश्वजीतचे वडील हर्षवर्धन ठमके यांनी दै.‘पुण्यनगरी’शी बोलताना व्यक्त केला. दोघांच्याही मृतदेहावर जखमा दिसून आल्या. बेपत्ता असल्यापासून अश्वजीतचा मोबाईल बंद आहे. मात्र काल सकाळी ११ वाजता दरम्यान नातेवाईकाने मोबाईलवर संपर्क केला असता ३० सेकंद बेल वाजली. त्यानंतर मोबाईल पुन्हा बंद करण्यात आला आहे. या प्रकरणाची सखोल चौकशी करून आरोपींना अटक करण्याच्या मागणीसाठी जिल्हा पोलीस अधीक्षक रंजनकुमार शर्मा यांची भेट घेणार असल्याचे ठमके यांनी सांगितले.