श्रीनगर – कुपवाडा जिल्ह्यातील पंचगाम येथे भारतीय लष्कराचे जवान आणि दहशतवाद्यांमध्ये झालेल्या चकमकीत दोन जवान शहीद झाले असून दोघा दहशतवाद्यांना यमसदनी धाडण्यात जवानांना यश आले आहे. या भागात अजूनही दोन्ही बाजूने अधून-मधून गोळीबार सुरू आहे.
प्रत्यक्ष नियंत्रण रेषेपासून जवळच ही चकमक झडली. गेल्या १२ तासांपासून गोळीबार सुरू आहे. त्यात एक निरीक्षक तसेच एक जवान शहीद झाल्याची माहिती पोलिसांनी दिली. सोमवारी रात्री ९ च्या सुमारास ही चकमक सुरू झाली. पंचगाम गावात काही अतिरेकी लपून बसल्याची माहिती मिळाल्यानंतर जवानांनी या भागाला घेरले होते. यावेळी दहशतवाद्यांनी अचानक गोळीबार सुरू केला आणि जोरदार चकमक झडली. गोळीबारात पाच पोलीस जखमी झाले असून दोन पोलीस बेपत्ता असल्याचे सांगण्यात येत आहे. या दोघा पोलिसांचे अतिरेक्यांकडून अपहरण करण्यात आले असावे, अशी भीतीही व्यक्त करण्यात आली आहे.

नवी दिल्ली – आम आदमीच्या कल्याणासाठी राजकारणाच्या आखाड्यात उतरलेले आम आदमी पक्षाचे नेते अरविंद केजरीवाल आज (मंगळवार) पुन्हा आम आदमीच्या संतापाचे लक्ष्य ठरले. दिल्लीच्या सुलतानपूर भागात रोड शो करणाऱ्या केजरींना एका सामान्य रिक्षावाल्याने कानफाटात हाणली. दिल्ली विधानसभेच्या निवडणुकीआधी दिलेली आश्वासने पूर्ण न केल्याच्या रागातून रिक्षावाल्याने हे कृत्य केल्याचे बोलले जात आहे.
उत्तर-पश्चिम दिल्लीतील लोकसभा मतदारसंघातील ‘आप’च्या उमेदवार राखी बिडलान यांचा प्रचार करण्यासाठी केजरीवाल दुपारी सुलतानपूर येथे गेले होते. रोड शोच्या माध्यमातून वाजतगाजत त्यांचा प्रचार सुरू होता. त्याचवेळी गर्दीतील एक व्यक्ती हार घालण्याच्या निमित्ताने केजरीवालांच्या जवळ आला आणि त्याने केजरींच्या गालात जोरदार थप्पड हाणली. यामुळे केजरींच्या डोळ्याला दुखापत झाली आहे. हा प्रकार लक्षात येताच ‘आप’च्या कार्यकर्त्यांनी केजरींवर हात उगारणाऱ्या व्यक्तीला चोप दिला आणि पोलिसांच्या ताब्यात दिले. या व्यक्तीचे नाव लाली असून तो दिल्लीतील अमन विहार परिसरात राहतो. लाली हा रिक्षाचालक आहे. दिल्लीकरांना मोठमोठी आश्वासने देऊन केजरीवाल यांच्या पक्षाने विधानसभा निवडणुकीत २८ जागा जिंकल्या होत्या. योगायोगाने, काँग्रेसच्या पाठिंब्यावर दिल्लीत केजरीवालांचे सरकारही स्थापन झाले. त्यामुळे त्यांच्याकडून दिल्लीकरांच्या अपेक्षा उंचावल्या होत्या. मात्र, जनलोकपालचे निमित्त करत अवघ्या ४९ दिवसांत केजरींनी सत्ता सोडली. त्यामुळे दिल्लीकरांमध्ये प्रचंड नाराजी आहे. लोकसभा निवडणुकीच्या निमित्ताने या नाराजीला तोंड फुटू लागल्याचे बोलले जात आहे.याआधी वाराणसी येथे प्रचार करताना केजरीवाल यांच्यावर ‘शाईहल्ला’ झाला होता. त्यानंतर दिल्लीतील दक्षिणपुरी भागात गाडीवर चढून एकाने केजरींना ठोसा लगावला होता. आज याचीच पुनरावृत्ती झाली. विशेष म्हणजे, याआधी केजरींवर हल्ला करणारे दोघेही ‘आप’चे कार्यकर्ते होते.

यवतमाळ : राज्यातील  शेतकरी गारपिटीच्या तडाख्याने उद्ध्वस्त झाल्यानंतर केंद्रीय कृषीमंत्री शरद पवार, मुख्यमंत्री पृथ्वीराज चव्हाण हे आपापल्या पक्षाचे मतदारसंघ असलेल्या भागात पाहणी करण्यासाठी गेले.  सत्ताधाºयांनी गारपिटीचेही राजकारण केले, असा आरोप मनसे अध्यक्ष राज ठाकरे यांनी केला.  यवतमाळ-­वाशीम लोकसभा मतदारसंघातील मनसेचे उमेदवार राजू पाटील राजे यांच्या प्रचारार्थ येथील पोस्टल मैदानावर  आयोजित सभेत बोलत होते. यावेळी मनसेचे राज्य उपाध्यक्ष आनंद एंबडवार, हेमंत गडकरी, प्रवीण बरडे, श्रीधर जगताप, विठ्ठल लोखंडकर, उमेदवार राजू पाटील राजे, मनसेचे जिल्हाप्रमुख राजू उंबरकर, अभय गडम, अशोक पुरी यांच्यासह मनसेचे सर्व पदाधिकारी, कार्यकर्ते उपस्थित होते.
पुढे बोलताना म्हणाले की,  सर्वाधिक शेतकरी आत्महत्या ही जिल्ह्यासाठी भूषणावह गोष्ट नाही. दु:ख प्रत्येकालाच असतं, पण आत्महत्या कोणत्याही संकटाला पर्याय होऊ शकत नाही, असा धीर राज ठाकरे यांनी शेतकºयांना आपल्या भाषणातून दिला. गेल्या ६५ वर्षांपासून त्याच त्या प्रश्नांवर निवडणुका लढविल्या जात आहेत. रस्ते, वीज, पाणी आणि नोकरीची आश्वासने यातच काँग्रेसने आजपर्यंत मतदारांना जखडून ठेवल्याचा आरोप केला. राज्यात दररोज उत्तरप्रदेश, बिहार आणि झारखंडमधून तब्बल ४८ ट्रेन खचाखच भरून येतात. रेल्वेमधील नोकरीपासून रेल्वे कॅँटीनपर्यंत सर्व ठिकाणी परप्रातीयांनी अतिक्रमण केले आहे. आमच्या महाराष्टÑातील मराठी तरूण काम करत नाही, म्हणून रेल्वेसह अन्य ठिकाणी परप्रांतीय बाजी मारतात, असा आरोप केला जातो. हा आरोप साफ चुकीचा असून, आपण ज्यांना दिल्लीत खासदार म्हणून निवडून पाठविले ते लोकप्रतिनिधी रेल्वेसह केंद्राच्या इतर विभागात कधी, कोणत्या रिक्त जागांसाठी भरती होणार आहे, याची माहितीच आपल्यापर्यंत पोहचवित नसल्याचा आरोप त्यांनी केला. मनसेने रेल्वे भरतीसाठी सहा लाख मराठी तरूणांचे अर्ज भरले पण आजपर्यंत एकही कॉल आला नाही, अशी खंत व्यक्त केली. सभेला विक्रमी गर्दी झाली होती.

नवी दिल्ली – ‘एक भारत, श्रेष्ठ भारत’ असा नारा देत भाजपनं अखेर आज आपला ‘संकल्पनामा’ जाहीर केला आहे. त्यात देशाचा विकास आणि आर्थिक सक्षमतेवर भर देऊन भाजपनं तरुणाईला साद घातली आहे, तर रामनामाचा गजर करून हिंदुत्वाच्या मुद्द्यावर आपल्या पारंपरिक मतदारांकडे मतांचा जोगवा मागितला आहे.
देशाबाहेरचा काळा पैसा परत आणणार, राम मंदिर उभारण्याच्या दृष्टीनं घटनात्मकदृष्ट्या जे-जे शक्य आहे ते करणार, रिटेल क्षेत्रात एफडीआय येऊ देणार नाही, भ्रष्टाचाराला आळा घालण्यासाठी ई-गर्व्हनन्सला प्रोत्साहन देणार, महागाई रोखण्यासाठी विशेष निधी स्थापन करणार, संपूर्ण देश बुलेट ट्रेननं जोडणार, निवडणूक प्रक्रियेत आणि न्याय प्रक्रियेत सुधारणा करणार, अशी काही प्रमुख आश्वासनं भाजपनं आपल्या जाहीरनाम्यात दिली आहेत.
लोकसभा निवडणुकीच्या प्रचाराला वर्षभर आधीच सुरुवात करणा-या भाजपचा जाहीरनामा मात्र भारीच रखडला होता. भाजप नेतृत्वात राम मंदिराच्या मुद्द्यावरून मतभेद असल्यानं हा विलंब झाल्याचं बोललं जात होतं. त्यावर बराच खल झाल्यानंतर अखेर आज, लोकसभा निवडणुकीच्या पहिल्या टप्प्यातील मतदानाच्या दिवशीच आपला जाहीरनामा प्रसिद्ध करण्यास भाजपला मुहूर्त मिळाला. नरेंद्र मोदी, लालकृष्ण अडवाणी, राजनाथ सिंह, सुषमा स्वराज या प्रमुख नेत्यांच्या उपस्थितीत जाहीरनामा मसुदा समितीचे अध्यक्ष मुरली मनोहर जोशी यांनी आपला ‘संकल्पनामा’ जाहीर केला. सर्वांची साथ, सर्वांचा विकास, असं ब्रीदवाक्य असलेल्या या संकल्पनाम्यात सुशासन आणि विकास हे महत्त्वाचे मुद्दे आहेत.
भाजपचे प्रमुख ‘संकल्प’:
* राम मंदिर उभारण्यासाठी घटनात्मक चौकटीत राहून प्रयत्न  * समान नागरी कायदा बनवण्याचा विचार  * कलम ३७० हटवण्यासाठी सर्वपक्षीय चर्चा  * महागाई रोखण्यासाठी विशेष निधी
* काळाबाजार रोखण्यासाठी विशेष न्यायालये  * राष्ट्रीय कृषी बाजार बनवणार  * कापड, इलेक्ट्रोनिक्स बाजार आणि कृषिउत्पादनांवर आधारित उद्योग विकसित करून रोजगारनिर्मिती
* गुजरात सरकारची ई ग्राम-विश्वस ग्राम योजना देशभरात लागू करणार  * भ्रष्टाचारावर नियंत्रण ठेवण्यासाठी ई-गव्हर्नन्सचा वापर  * कररचना सोपी करणार * महत्त्वाच्या विषयावर निर्णय घेताना मुख्यमंत्र्यांना सहभागी करून घेणार  * काश्मिरी पंडितांना सन्मानानं घरी परत आणण्याचा प्रयत्न  * प्रत्येक राज्यात विशेष महिला पोलीस दल * स्वातंत्र्याला ७५ वर्षं पूर्ण होईपर्यंत प्रत्येक कुटुंबाला पक्कं घर देणं  * देशभरात बुलेट ट्रेनचं जाळं विणणार  * शेतक-यांसाठी रेल्वेचं विशेष जाळं * प्रत्येक राज्यात एम्ससारखी संस्था बनवणार

नवी दिल्ली- अनिवासी भारतीय नागरिकांना आता इंटरनेटच्या माध्यमातून मतदान करण्याची संधी मिळण्याची शक्यता आहे. अनिवासी भारतीय मतदारांना इंटरनेटच्या माध्यमातून मतदान करता येईल का यासंदर्भातील शक्यता पडताळल्या जात असल्याची माहिती केंद्रीय निवडणूक आयोगाने सर्वोच्च न्यायालयात सोमवारी दिली आहे.
मात्र १६व्या लोकसभेसाठीच्या मतदान प्रक्रियेत अनिवासी भारतीय नागरिकांना अशा प्रकारची सुविधा देणे अवघड असल्याचे आयोगाने न्यायमूर्ती के.एस.राधाकृष्णन यांच्या अध्यक्षतेखालील खंडपीठापुढे झालेल्या सुनावणीत सांगितले. सध्या सुरु असलेल्या लोकसभा निवडणुकीत सर्व मतदारसंघातील मतदारांची अंतिम यादी तयार झाल्याचे आयोगाने म्हटले आहे.यावर न्यायालयाने आयोगाला स्वतःहून प्रयत्न करण्यास सांगितले. सध्या सुरु असलेल्या मतदानप्रक्रियेत अनिवासी भारतीय नागरिकांना सहभागी करून घेण्यासाठी आयोगाकडे अद्याप वेळ आहे. परदेशातील जे भारतीय नागरीक मतदार आहेत त्यांना पोस्टाद्वारे मतदान करण्याचा आधिकार देता येऊ शकतो असे मत न्यायालयाने व्यक्त केले. सध्या अकरा हजार ८४४ अनिवासी भारतीय नागरिकांनी मतदारयादीत आपले नाव नोंदवले आहे.निवडणूक आयोग किमान यासंदर्भात प्रयत्न करु शकेत असेही खंडपीठाने म्हटले आहे.  यासंदर्भात न्यायालयाने आयोगाला ११ एप्रिल रोजी होणा-या सुनावणी दरम्यान आपले मत मांडण्यास सांगितले आहे.अनिवासी भारतीय नागरीक असलेल्या शमशीर व्हीपी यांनी यासंदर्भात जनहित याचिका दाखल केली होती. सध्याच्या नियमानुसार प्रत्यक्षात मतदान केंद्रावर येवूनच अनिवासी नागरिक मतदानाचा अधिकार बजावू शकतात. मात्र या नियमामुळे त्यांच्या मूलभूत अधिकारावर अतिक्रमण होत असल्याचे याचिकेत म्हटले आहे.परदेशात राहणा-या नागरिकांना जर मतदानाचा अधिकार दिला तर तब्बल एक कोटी भारतीय नागरीक मतदान करु शकतील असे शमशीर यांनी म्हटले आहे. जगभरातील ११४ देशांनी अशा प्रकारे मतदानाचा अधिकार दिला आहे. त्यात २० आशियाई देश असल्याचे शमशीर यांनी याचिकेत म्हटले आहे. शमशीर गेली १२ वर्षे युएईमध्ये राहतात. त्याचे मुळ गाव केरळमधील कोईकोड येथे आहे. भारतात असताना ते नियमीतपणे मतदान करत होते. मात्र अनिवासी भारतीय नागरीक असल्यामुळे नंतर मतदान यादीतून त्यांचे नाव वगळण्यात आले.

यवतमाळ – महाराष्टÑ नवनिर्माण सेनेचे संस्थापक अध्यक्ष राज ठाकरे ७ एप्रिल रोजी यवतमाळातील पोस्टल मैदानावर प्रचारसभेचे आयोजन केले आहे. यवतमाळ-वाशीम लोकसभेचे मनसे पक्षाचे उमेदवार राजू पाटील राजे यांच्या प्रचारार्थ मनसे प्रमुख राज ठाकरे यांची प्रचारसभा सायंकाळी ५ वाजता होणार आहे. मनसे प्रमुख राज ठाकरे यांची यवतमाळात पहिल्यांदाच जाहीर सभा होत असून ते काय बोलतात याकडे सर्वाचे लक्ष लागले आहे. मनसेचे उमेदवार राजू पाटील राजे यांच्या प्रचारार्थ राज ठाकरे येणार असल्याने मनसे ने त्यांच्या सभेची जय्यत तयारी केली आहे. सायंकाळी ५ वाजता होणाºया या सभेला मनसे कार्यकर्त्यांसह राज ठाकरे समर्थक व जनतेने आवर्जून उपस्थित राहावे, असे आवाहन मनसेचे जिल्हाप्रमुख अशोक पुरी, राजू उंबरकर, अभय गडम, अनिल हमदापूरे आदींनी केली आहे.

बिजनौर –  ‘देशाच्या विकासाचा नुसता ‘मॅप’ बनवण्यासाठी काँग्रेसच्या शहजाद्यांना ६० वर्षे लागली; आता विकास प्रत्यक्षात आणायसाठी आणखी ६०० वर्षे लागतील,’ अशी घणाघाती टीका एनडीएचे पंतप्रधानपदाचे उमेदवार नरेंद्र मोदी यांनी केली.
उत्तर प्रदेशातील बिजनौर येथे आज (रविवार) झालेल्या प्रचारसभेत मोदी बोलत होते. ‘काँग्रेस आतापर्यंत फक्त वोट बँकेचे राजकारण करत आली आहे. त्यामुळे देश खिळखिळा बनला आहे. काँग्रेसमधील सर्व नेते एकाच परिवाराचे गुणगान गाण्यात गुंतले आहेत. या परिवाराच्या नादात काँग्रेसचे देशाकडे लक्ष राहिले नाही. एवढेच काय पंतप्रधानांकडेही लक्ष राहिले नाही. काँग्रेसचा कुठलाही नेता पंतप्रधानांना आपला नेता म्हणण्यास तयार नाही, अशी बोचरी टीकाही त्यांनी केली.
‘मोठमोठ्या गप्पा मारण्यासाठी मी इथे आलेलो नाही. मी स्वतः चहा विकला आहे. त्यामुळे गरिबी काय असते याची मला जाणीव आहे, असे सांगतानाच, ‘गेल्या अनेक वर्षांपासून देशाला लुटणाऱ्या सत्ताधाऱ्यांना देशातील युवक माफ करणार नाहीत,’ असेही ते म्हणाले.

हैदराबाद- आंध्रप्रदेश व तेलंगणमधील आगामी लोकसभा व विधानसभा निवडणुकांच्या पार्श्वभूमीवर तेलगू देसम पक्षाने (टीडीपी) भारतीय जनता पक्षाबरोबर (भाजप) युती करण्याचा निर्णय घेतला आहे. टीडीपीचे अध्यक्ष चंद्राबाबू नायडू आणि भाजप नेते प्रकाश जावडेकर यांनी रविवारी संयुक्त पत्रकार परिषद घेऊन आपला निर्णय जाहिर केला. टीडीपीच्या या निर्णयामुळे राष्ट्रीय लोकशाही आघाडीत (एनडीए) आणखी एक घटक पक्ष सहभागी झाला आहे. अकाली दलाचे खासदार नरेश गुजराल यांनी यासाठी विशेष मेहनत घेतली.
या दोन्ही पक्षांनी एकत्र येऊन लोकसभा व विधानसभा निवडणूक लढवण्याचा निर्णय घेतला आहे. मात्र अद्याप जागावाटपाबाबत निर्णय घेण्यात आलेला नाही. भाजप आंध्रप्रदेशमध्ये ५ तर तेलंगणमध्ये ८ जागांवर निवडणूक लढवणार असल्याचे समजते. या युतीमुळे दोन्ही पक्षांच्या नेत्यांमध्ये मात्र नाराजीचे वातावरण पसरले आहे. १९९९ ते २००५ पर्यंत चंद्राबाबू नायडू एनडीएत होते. मात्र २००५ मध्ये विधानसभा निवडणुकीतील पराभवासाठी भाजपला जबाबदार ठरवत त्यांनी एनडीएला सोडचिठ्ठी दिली होती. तेलंगणमध्ये ३० एप्रिल तर सीमांध्रमध्ये ७ मे रोजी विधानसभा निवडणूक होणार आहे.

मुंबई – सतत प्रयोगशील असणा-या गुगलने रविवारी रंगणा-या आयसीसी टी२० विश्वचषकानिमित्त खास डूडल बनवले आहे. बांगलादेशमधील मिरपूर येथे भारत आणि श्रीलंका दरम्यानचा अंतिम सामना जोरदार रंगणार आहे.
गुगलच्या या खास डूडलमध्ये जल्लोष करणारे चाहते, फलंदाजी आणि गोलंदाजी करणारा खेळाडू दाखवण्यात आले आहे. तसेच बॉलरच्या हातातील बॉल, क्रिकेटमध्ये महत्त्वाचे असणारे स्टॅम्प दिसत आहेत.याआधी २००७ मध्ये भारताने आयसीसी टी२० विश्वचषक जिंकला होता. आतापर्यंत तीन वेळा विश्वचषकाच्या अंतिम फेरीत प्रवेश केलेल्या श्रीलंकेला मात्र अद्यापही विश्वचषक जिंकता आलेला नाही. त्यामुळे विश्वचषकावर पुन्हा एकदा नाव कोरण्यासाठी भारतीय संघ सज्ज झाला आहे.