अमेठी- जनमत चाचण्यांमधून काँग्रेस पक्षाच्या पराभवाचे भाकीत केले जात असले तरी अशा जनमत चाचण्यांना काँग्रेसने नेहमीच चुकीचे ठरवले आहे आणि या वेळीही या चाचण्यांना चुकीचे ठरवत काँग्रेसलाच विजय मिळणार असल्याचा विश्वास काँग्रेसचे उपाध्यक्ष राहुल गांधी यांनी व्यक्त केला आहे. अमेठी या काँग्रेसच्या बालेकिल्ल्यातून लोकसभा निवडणुकीसाठी उमेदवारी अर्ज दाखल केल्यावर ते पत्रकारांशी बोलत होते.
२००४ आणि २००९ मध्ये जनमत चाचण्यांनी अशाच प्रकारे काँग्रेसच्या विरोधात भाकीत केले होते आणि या दोनही निवडणुकीत काँग्रेसनेच सत्ता मिळवून या चाचण्या चुकीच्या ठरवल्या होत्या. या निवडणुकीतही तसेच होणार असल्याचा विश्वास राहुल गांधी यांनी व्यक्त केला. त्यापूर्वी उमेदवारी अर्ज दाखल करण्यासाठी निघालेल्या राहुल गांधी यांचे अमेठीच्या नागरिकांनी उत्साहात स्वागत केले. या वेळी त्यांच्यासोबत त्यांच्या भगिनी प्रियांका गांधी होत्या. या भावंडांचा ताफा अमेठीच्या रस्त्यावरून जात असताना त्यांना पाहण्यासाठी लोकांनी मोठी गर्दी केली होती. या गर्दीला पाहून दोघांनी हात उंचावून त्यांचे स्वागत स्वीकारले. राहुल आणि प्रियांका यांच्यावर या वेळी गुलाबाच्या पाकळ्यांचा वर्षाव करण्यात आला. प्रियांका गांधींबरोबरच काँग्रेस अध्यक्ष सोनिया गांधी आणि प्रियांका या मतदारसंघात राहुल गांधी यांच्या विरोधात भाजपकडून स्मृती इराणी व ‘आप’चे कुमार विश्वास निवडणूक लढवत आहेत.
राहुल गांधी महाराष्ट्रात
काँग्रेस उपाध्यक्ष राहुल गांधी लोकसभा निवडणुकीच्या प्रचारासाठी १४ आणि १५ एप्रिल रोजी राज्यात येणार आहेत. या दरम्यान ते भाऊसाहेब वाकचौरे, विश्वजीत कदम, राजीव सातव यांच्यासाठी प्रचारसभा घेतील. १४ एप्रिलला शिर्डी व लातूर येथे तसेच १५ एप्रिल रोजी ते पुणे आणि हिंगोलीला प्रचारसभा घेतील. राज्य प्रभारी मोहन प्रकाश, मुख्यमंत्री पृथ्वीराज चव्हाण, प्रदेशाध्यक्ष माणिकराव ठाकरे या वेळी उपस्थित राहणार आहेत.

मुंबई – विक्रमवीर सचिन तेंडुलकर आणि भारताचा माजी कर्णधार सौरव गांगुली आता इंडियन सुपर लीगमध्ये फुटबॉल संघांचे मालक झाले आहे. सचिनने कोची संघ विकत घेतला असून गांगुलीने त्याच्या घरचा म्हणजे कोलकाता संघासाठी यशस्वी बोली लावली. सचिनने पीवीपी वेंचर्ससोबत कोची संघाचे हक्क मिळवले. याउलट गांगुलीने स्पेनमधील आघाडीचा क्लब अ‍ॅटलेटिको माद्रिद, हर्षवर्धन नोटिया, संजीव गोयंका आणि उत्सव पारेख या व्यावसायिकांसोबत संयुक्तपणे कोलकाता संघाचे मालकी हक्क मिळवले.
मुंबई संघाची मालकी मिळवण्यात बॉलिवूड अभिनेता रणबीर कपूरला यश आले. त्याने बिमल पारेखसोबत मुंबई संघ विकत घेतला. बॉलिवूड अभिनेता सलमान खानही पुण्याचा संघ विकत घेण्यात यशस्वी झाला. कपिल वाधवान आणि धीरज वाधवान यांच्या वाधवान ग्रुपसोबत सलमानने ही यशस्वी बोली लावली. बॉलिवूड अभिनेता जॉन अब्राहमने आय-लीग संघ शिलॉँग लॅजॉँगसोबत गुवाहाटी संघ खरेदी केला. दिल्ली संघ घेण्यात समीर मनचंदा यांचा डेन नेटवर्क यशस्वी ठरला. आयपीएलमध्ये सनरायझर्स हैदराबाद संघाची मालकी असलेला सन ग्रुप बंगळूरु संघ यशस्वीपणे खरेदी करू शकला. व्हिडियोकॉनचे वेणुगोपाळ धूत, दत्तराज साळगावकर आणि श्रीनिवास डेंपो यांनी एकत्रितपणे गोवा संघाचे मालकी हक्क मिळवले. स्टार इंडियाच्यावतीने आयएमजी-रिलायन्सने या लीगचे आयोजन केले आहे. अर्थातच त्याला अखिल भारतीय फुटबॉल संघटनेचे (एआयएफएफ) पाठिंबा आहे. यावर्षी सप्टेंबर ते नोव्हेंबर दरम्यान ही लीग होणार आहे.

नवी दिल्ली- राष्ट्रवादी काँग्रेसचे अध्यक्ष शरद पवार यांनी नरेंद्र मोदींवर निशाणा साधला असून मोदी हे हिटलर बनण्याचे स्वप्न पाहात असल्याची टीका त्यांनी ट्विटरवर केली.
या देशात सध्या कोणीतरी हिटलर बनण्याचे स्वप्न पाहात आहे. अशा शक्तींना आपणच आवर घातला पाहिजे. या निवडणुकीत आपल्याला मोदींचा पराभव करावाच लागेल, असे ते म्हणाले. आम्ही संसदेत महिलांना ५० टक्के आरक्षण मिळण्याच्या बाजूने आहोत. मात्र भाजपचे नेते खासगीत याबाबत टिंगल टवाळी करतात. असे नेते देश कसे चालवतील असा टोलाही त्यांनी भाजपला लगावला.

सुकमा – निवडणुकीला विरोध करणा-या माओवाद्यांनी शनिवारी छत्तीसगडमध्ये केलेल्या दोन वेगवेगळया हल्ल्यांमध्ये १३ जण ठार झाले आहेत. ठार झालेल्या मध्ये सीआरपीएफच्या पाच जवानांचा समावेश आहे.
बिजापूरमध्ये माओवाद्यांनी सकळी अकराच्या सुमारास निवडणूक पथकाच्या सदस्यांना घेऊन जाणारी बस स्फोटामध्ये उडवून दिली. या हल्ल्यात निवडणूक पथकातील सात सदस्यांचा मृत्यू झाला. दुस-या एका घटनेत दर्भा घाटीमध्ये सीआरपीएफच्या जवानांना घेऊन जाणारी एक रुग्णवाहिका माओवाद्यांनी भुसुरुंग स्फोटामध्ये उडवून दिली.
या हल्ल्यात पाच जवान शहीद झाले. चार जवान जखमी झाले. बस्तर येथील निवडणूकीचे काम संपवून हे पथक परतीच्या मार्गावर असताना हा हल्ला झाला.
या आठवडयाच्या सुरुवातीला सुकमा जिल्ह्यात सीआरपीएफ आणि माओवाद्यांमध्ये झालेल्या चकमकीत सीआरपीएफचे तीन जवान शहीद झाले होते. माओवाद्यांचे वर्चस्व असलेल्या बस्तर जिल्ह्यात लोकसभेसाठी एकूण ४७ टक्के मतदान झाले आहे. गुरुवारी दहा एप्रिलला छत्तीसग़डमध्ये मतदान होत असताना माओवाद्यांनी दहा मतदान केंद्राजवळ गोळीबारही केला होता.

नवी दिल्ली – अमेरिकेत झालेल्या आयएसएसफ नेमबाजी विश्वचषक स्पर्धेत पुरुषांच्या ट्रॅप प्रकारात भारताच्या मानवजीत सिंह संधूने अचूक निशाणा साधत सुवर्णपदक पटकावले. त्याने दोनवेळच्या ऑलिंपिक सुवर्णपदक विजेत्या मायकल डायमंडवर मात केली.
मानवजीतने पात्रता फेरीत १२१ आणि अंतिम फेरीत १३ गुणांची कमाई करुन सुवर्णपदक पटकावले. डायमंडने पात्रता फेरीत ११९ आणि अंतिम फेरीत नऊ गुणांचा कमाई केली. उपांत्यफेरीत मानवजीतने पंधरापैकी १४ वेळा लक्ष्यभेद केला. रशियाच्या अलेक्सी आलीपोव्हला कास्यपदक मिळाले. त्याने १२१ आणि १२ गुणांची कमाई केली.
जगातल्या सर्वोत्तम नेमबाजांमध्ये स्पर्धा होती. मायकल डायमंड सारख्या प्रतिस्पर्ध्या विरुध्द सामना जिंकणे एक आव्हान होते. मात्र मी अचूक लक्ष्य भेद केला. हिवाळी हंगामात मी या विश्वचषक स्पर्धेची तयारी केली होती असे विजयानंतर मानवजीतने सांगितले.२०१२ च्या लंडन ऑलिंपिकमध्ये मानवजीतकडून पदकाच्या अपेक्षा होत्या. मात्र त्याला अंतिम फेरीत प्रवेश करता आला नव्हता. पात्रता फेरीत त्याला १६ व्या स्थानावर समाधान मानावे लागले होते.

मुंबई – राज्य उत्पादन शुल्क व राज्य सरकारच्या भरारी पथकाने आरामबसमधून मुंबईत छुप्या पद्धतीने आणलेल्या सुमारे ६८ लाख ३७ हजार रुपये किमतीचे परकीय चलन व मद्यसाठा जप्त केला आहे. दाना बंदर येथील सोलापूर स्ट्रीट येथे कारवाईत मुद्देमालासह बसही जप्त करण्यात आली. याप्रकरणी गोव्यातील दोन नागरिकांसह तिघांना अटक करण्यात आली आहे.
जप्त करण्यात आलेल्या मुद्देमालात ग्रेट ब्रीटन पाउंड, अमेरिकन डॉलर, सिंगापूर डॉलर, ऑस्ट्रेलियन डॉलर, युरो, जपानी येन, सौदी रियाल, ओमनी रियाल, युएईचे दि-हाम, फ्रेंच फ्रँक, बहारिनचे दिनार व कुवेतचे दिनार अशा विविध १३ देशांतील चलनांचा समावेश आहे. ही रक्कम भारतीय बाजारभावानुसार ६८ लाख ३७ हजार रुपये इतकी आहे. याशिवाय २१ हजार ४०० किमतीचा मद्यसाठा जप्त केला. लोकसभा निवडणुकीच्या पार्श्वभूमीवर ही कारवाई महत्त्वाची मानली जाते.

वृत्तसंस्था, नवी दिल्ली – तुम्हाला काही संशयित ई-मेल्स, लिंक किंवा ऑडिओ, व्हिडिओ क्लिप्स आल्यात का? या प्रश्नाचे उत्तर होकारार्थी असेल, तर तुमचे पासवर्ड तातडीने बदलून टाका. भारतीय सायबरविश्वात हार्टब्लीड नावाच्या व्हायरसने प्रवेश केला असून, त्यामुळे पासवर्ड, क्रेडिट कार्ड नंबर आणि अन्य महत्त्वाची गुप्त माहिती हॅकर्सच्या ताब्यात जाण्याची भीती आहे. म्हणून, भारतीय सायबर तज्ज्ञांनी सर्व इंटरनेट वापरकर्त्यांना सुरक्षेचा इशारा दिला आहे.
हा व्हायरस खुल्या सिक्युअर सॉकेट लेयरवर (ओपन एसएसएल) हल्ला करतो. ‘ओपन एसएसएल’ हा ऑनलाइन यंत्रणेमधला सर्वांत महत्त्वाचा प्रोटोकॉल असून, माहिती सुरक्षित ठेवणे आणि माहितीचे इंटरनेटवर हस्तांतर करणे, यामध्ये तो प्रोटोकॉल महत्त्वाचे काम करतो. त्यामुळे इंटरनेट वापरकर्त्यांची वैयक्तिक गुप्त माहिती, पासवर्ड आदी हॅकर्सच्या ताब्यात जाण्याची भीती ‘कम्प्युटर इमर्जन्सी रिस्पॉन्स टीम ऑफ इंडिया’ने (सर्ट-इन) व्यक्त केली आहे. ‘सर्ट-इन’ ही हॅकिंग, फिशिंगशी दोन हात करणारी; तसेच भारताच्या इंटरनेट डोमेनशी निगडित सुरक्षा वाढवण्यासाठी कार्यरत असलेली संस्था आहे. या व्हायरसपासून धोका खूप जास्त धोका असून, सर्व असुरक्षित यंत्रणा या व्हायरसला बळी पडू शकतात, असा इशारा या संस्थेने दिला आहे. लाल रंगाचा ‘एक्स’ किंवा स्राव होणाऱ्या हृदयाचे चिन्ह असे संशयित मेसेज आधी येऊ शकतात आणि नंतर व्हायरसचा हल्ला होतो, असे तज्ज्ञांनी म्हटले आहे.
आपण काय करू शकतो?
तज्ज्ञाशी संपर्क साधून ‘ओपन एसएसएल’ची व्हर्जन ‘१.०.१जी’ अशी अपग्रेड करून घ्यावी. अँटीव्हायरस, ऑपरेटिंग सिस्टीम, फायरवॉल सिस्टीम आदी वेळेवर अपग्रेड करून घ्यावे. ई-मेल, बँकिंग यंत्रणा; तसेच महत्त्वाच्या ऑनलाइन अकाउंटचे पासवर्ड वेळोवेळी बदलावेत.

करंदिघी – तृणमूल काँग्रेसच्या प्रमुख ममता बॅनर्जी यांच्यावर मतांचे राजकारण करत असल्याच्या नरेंद्र मोदींच्या आरोपावर ममता यांनी सोमवारी चोख प्रत्युत्तर दिले. रक्ताने हात माखलेल्या लोकांनी देशाबद्दल बोलूच नये अशी बॅनर्जी यांनी मोदींवर नाव न घेता टीका केली. उत्तर दिनापूर येथील सभेदरम्यान त्या बोलत होत्या.
अटलबिहारी वाजपेयींचे सरकार असताना तृणमूल काँग्रेस केंद्र सरकारमध्ये सहभागी होता. तसेच गुजरातमध्ये झालेल्या दंगलीला त्यावेळी कोणीही समर्थन केले नव्हते असे त्यांनी म्हटले.मी कधीही हिंदू मुस्लिम यांच्यात फूट पडू देणार नाही. भाजपकडे जरी मोठ्या प्रमाणात निधी असला तरी पश्चिम बंगालमध्ये त्यांना एकही जागा मिळणार नाही असा विश्वासही त्यांनी यावेळी व्यक्त केला.

मुंबई – मराठीतील पहिले रॉकस्टार नंदू भेंडे (मूळ नाव सदानंद) यांचं आज सकाळी मुंबईत निधन झालं. ते ५८ वर्षांचे होते. मराठी चित्रपटातील ज्येष्ठ अभिनेते आत्माराम भेंडे आणि डॉ. आशा भेंडे यांचे ते चिरंजीव होते.
७०च्या दशकात मराठी संगीतप्रेमींना नाट्यसंगीतानं, भावसंगीतानं वेड लावलं होतं. त्या काळात नंदू भेडे यांनी रॉक म्युझिक मराठीत आणलं होतं. जोश, जल्लोषानं भरलेलं हे संगीत तरुणाईला आवडलं आणि त्यांनी त्या तालावर ठेकाही धरला. ‘तीन पैशाचा तमाशा’ या नाटकातील अंकुशच्या भूमिकेतून नंदू भेडेंनी रसिकांवर आपली छाप पाडली होती. अगदी, पु. ल. देशपांडे यांनीही त्यांच्या पाठीवर कौतुकाची थाप दिली होती. नंदू भेंडे यांनी व्हेलवेट फॉग, सेव्हेज एन्काउंटर आणि ऑटोमिक फॉरेस्ट या बँडमध्ये गाणी गायली होती. त्याचप्रमाणे ‘जिझस क्राइस्ट सुपरस्टार’ या नाटकांमधील त्यांची भूमिकाही जबरदस्त गाजली होती. १९८० मध्ये नंदू भेंडेंनी ‘डिस्को डान्सर’ या हिंदी चित्रपटासाठी पार्श्वगायन केलं होतं आणि ते ‘गोल्ड डिस्क’चे मानकरी ठरले होते. आर. डी. बर्मन, लक्ष्मीकांत प्यारेलाल, बप्पी लहरी यांच्यासोबतही त्यांनी काम केलं होतं. नंदू भेंडे यांचे अनेक अल्बम जुन्या संगीतप्रेमींनी संग्रहात ठेवलेत. सोनी टीव्हीवरची चमत्कार, दूरदर्शनवरील चंद्रकांता, झी टीव्हीवरची जिना इसी का नाम है, दायरे यासारख्या काही मालिकांनाही त्यांनी संगीत दिलं होतं.रॉकमध्ये मराठी माणसाचा झेंडा पहिल्यांदा फडकवणा-या नंदू भेंडे यांच्या निधनाबद्दल संगीतवर्तुळात दुःख व्यक्त होतंय.

भिवंडी – भिवंडी तालुक्यातील दलोडे येथील एका पोल्ट्री फॉर्ममध्ये काम करणाऱ्या नराधम तरुणाने वीट भट्टीवर काम करणाऱ्या अल्पवयीन मुलीला ताडी पाजून तिच्यावर बलात्कार केल्याची घटना समोर आली आहे. अल्पवयीन मुलीवर बलात्कार करणाऱ्या आरोपीला गणेशपुरी पोलिसांनी अटक केली आहे.
१४ वर्षीय पीडित मुलगी आपल्या मावशीसोबत वीट भट्टीवर काम करण्यासाठी आली होती. तिथेच जवळ असणाऱ्या पोल्ट्री फॉर्ममध्ये काम करणाऱ्या कमलाकर जाधव (२६) याच्याशी तिची ओळख झाली. कमलाकर जाधव याने तिला ताडी देऊ केली जसजसा ताडीचा अंमल तिच्यावर चढू लागला त्यानंतर त्याने जबरदस्तीने बलात्कार करुन तो फरार झाला. पीडित तरुणीने घरी परतल्यानंतर घडला प्रकार कुटुंबीयांनाच्या कानावर घातला. पीडित तरुणीच्या कुटुंबीयांना तात्काळ गणेशपुरी पोलीस ठाण्यात धाव घेतली. त्यानंतर पोलिसांनी तात्काळ कारवाई करीत बलात्कारी कमलाकरच्या मुसक्या आवळल्या.