फेसबुक जगातील सर्वात मोठी सोशल मीडिया वेबसाइट आहे. अमेरिकेपासून ऑस्ट्रेलियापर्यंत, फ्रान्सपासून दक्षिण आफ्रिकेपर्यंत, भारतापासून जपानपर्यंत सर्व जण फेसबुकचे वेडे आहेत. पण, प्रत्येक गोष्टीला अपवाद असतोच. त्यामुळे जगाच्या काही दुर्गम भागात इंटरनेट पोहोचलेले नाही. त्यामुळे फेसबुक कंपनीने संपूर्ण पृथ्वीतलावर इंटरनेट पोहोचवण्यासाठी चक्क आकाशमार्गाचा सहारा घेण्याचे ठरवले आहे. विमाने, ड्रोन आणि उपग्रहांवर एक विशेष प्रयोगशाळा उभारली जाणार आहे. त्याद्वारे जगभरात इंटरनेट पोहोचवण्याचा मानस फेसबुकने केला आहे.
जगातील सर्व व्यक्तींना आकाशातून इंटरनेट देण्याचे स्वप्न आम्ही साकारणार आहोत. त्यासाठी आमचे प्रयत्न सुरू आहेत. यासाठी फेसबुक कंपनी इंटरनेट. ऑर्गच्या सहाय्याने ‘कनेक्टिव्हिटी लॅब’ उभारत आहे. या नवीन तंत्रज्ञानाने संपूर्ण जग नक्कीच जोडले जाईल, असे फेसबुकचा सहसंस्थापक-प्रमुख मार्क झुकेरबर्ग यांनी सांगितले.
ही ‘कनेक्टिव्हिटी लॅब’ बांधण्यासाठी अंतराळ विज्ञान आणि कम्युनिकेशन तंत्रज्ञान क्षेत्रातील तज्ज्ञांची मदत घेतली जात आहे. यात नासातील जेट प्रोपल्शन लॅब अ‍ॅँड अ‍ॅम्स रिसर्च सेंटरच्या माजी अधिका-यांचाही समावेश आहे. जगातील दुर्गम भागात राहणा-या लोकसंख्येपर्यंत इंटरनेट पोहोचवण्यासाठी उपग्रहांचा वापर केला जाणार आहे. तसेच शहरांमध्ये राहणा-या नागरिकांना विमानातून इंटरनेटची सुविधा दिली जाणार आहे. ही विमाने वातावरणाच्या बाहेरून प्रवास करणार असून ती सौरऊर्जेवर चालणार आहे. ही विमाने महिनोनमहिने आकाशात राहू शकतात, असे फेसबुकचे अधिकारी येल मॅग्युरी यांनी सांगितले.
ही तर केवळ सुरुवात आहे. आमच्या टीममध्ये अनेक तज्ज्ञ व चांगली संकल्पना असलेले लोक आहेत. हे तंत्रज्ञान विकसित करण्यात काही अडचणी असून त्या निश्चितपणे दूर केल्या जातील, असेही मॅग्युरी यांनी सांगितले.

मुंबई : राज्यात १०, १७ आणि २४ एप्रिल रोजी मतदान होणार आहे. जास्तीत जास्त नागरिकांनी मतदान करण्यासाठी राज्यातील मतदानाची वेळ सकाळी ७ ते सायंकाळी ६ पर्यंत (११ तास) राहील, अशी माहिती मुख्य निवडणूक आयुक्त व्ही. एस. संपत यांनी शुक्रवारी दिली.
राज्यातील निवडणूक पूर्व कामाचा आढावा घेण्यासाठी संपत यांनी विविध राजकीय पक्ष, मुख्य सचिव, पोलिस अधिकाऱ्यांसोबत चर्चा केली. नक्षलग्रस्त भागात सकाळी सात ते संध्याकाळी चार वाजेपर्यंत मतदान करता येईल.

नवी दिल्ली : संयुक्त जनता दलातून हकालपट्टी करण्यात आलेले नेते साबीर अली यांना भाजपमध्ये प्रवेश दिल्याच्या मुद्दय़ावरून भाजपचे ज्येष्ठ नेते मुख्तार अब्बास नक्वी कमालीचे संतप्त झाले असून, यापुढील काळात भाजपमध्ये दाऊद इब्राहिमलाही प्रवेश दिला जाईल, असा घरचा आहेर त्यांनी शुक्रवारी दिला.
मुस्लीम मतदारांना आकर्षित करण्यासाठी साबीर अली यांना भाजपमध्ये मोठा गाजावाजा करून प्रवेश देण्यात आला होता. त्यानंतर काही तासांतच नक्वी यांनी, दहशतवादी भटकळच्या मित्राचा भाजपमध्ये प्रवेश झाला आहे.
लवकरच दाऊदलाही स्वीकारले जाईल.. असे ट्विट केले. काही महिन्यांपूर्वी भटकळला साबीर अलींच्या मुंबईमधील घरातून अटक झाली होती, असे सांगत नक्वी यांनी त्यांच्या दाव्याचे समर्थन केले.

नवी दिल्ली – भाजपचे पंतप्रधानपदाचे उमेदवार नरेंद्र मोदी यांना मारण्याची धमकी देणारे सहारणपूरचे काँग्रेसे उमेदवार इमरान मसूद यांना १४ दिवसांची न्यायालयीन कोठडी सुनावण्यात आली आहे. इमरान मसूदच्या या प्रतापामुळे काँग्रेसची गोचीच झाली असून उपाध्यक्ष राहुल गांधी यांनी आज सहारणपूरमध्ये होणारी आपली सभा रद्द केली आहे.
शुक्रवारी रात्री उशीरा अटक करण्यात आलेल्या इमरान मसूद यांना शनिवार सकाळी देवबंद कोर्टात सादर करण्यात आले. यावेळी कोर्टाने मसूद यांना १४ दिवसांची न्यायालयीन कोठडी सुनावली. या आधी कोर्टाच्या बाहेर मसूद यांच्या कार्यकर्त्यांनी काही काळ गोंधळ घातला. भाजपच्या कार्यकर्त्यांनी मसूद यांच्या विरोधात तक्रारही नोंदवल्याने काँग्रेसने राहुल गांधी यांची सभा रद्द केली आहे. पुढली वेळ मिळाल्याशिवाय येथील सभेचे वेळापत्रक ठरणार नाही, असे काँग्रेसचे नेते प्रदीप माथुर यांनी सांगितले.

नागपूर – विदर्भातील लोकसभेच्या दहा जागांसाठी २०१ उमेदवार निवडणूक रिंगणात आहेत. निवडणूक लढवण्यासाठी एकूण ३१८ उमेदवारांनी अर्ज दाखल केले होते. त्यातील २७१ उमेदवारी अर्ज वैध ठरले. राजकीय तडजोडीनंतर ७० उमेदवारांनी आपले अर्ज मागे घेतले.
विदर्भातील बुलढाणा, अकोला, अमरावती, वर्धा, रामटेक, नागपूर, भंडारा-गोंदिया, गडचिरोली-चिमूर, चंद्रपूर आणि यवतमाळ-वाशिम या दहा जागांसाठी १० एप्रिलला मतदान होणार आहे. सर्वच पक्षाचे प्रमुख नेते विदर्भातून निवडणूक लढवत आहेत. केंद्रीय अवजड उद्योग मंत्री आणि राष्ट्रवादी काँग्रेसचे नेते प्रफुल पटेल भंडारा-गोंदियामधुन तर, भाजपचे माजी राष्ट्रीय अध्यक्ष नितीन गडकरी नागपूरातून रिंगणात उतरले आहेत. त्यांचा थेट सामना काँग्रेस नेते विलास मुत्तेमवार यांच्याशी आहे. काँग्रेस नेते मुकूल वासनिक रामटेकमधुन, राज्य सरकारमधील मंत्री संजय देवतळे चंद्रपूर आणि शिवाजीराव मोघे यवतमाळमधुन निवडणूक रिंगणात आहेत. मागच्या लोकसभा निवडणूकीत नागपूर, वर्धा, गडचिरोली-चिमूर आणि रामटेक या जागा काँग्रेसने जिंकल्या होत्या. राष्ट्रवादी काँग्रेसने भंडारा-गोंदियामधुन विजय मिळवला होता. अकोला, चंद्रपूरची जागा भाजपकडे तर, बुलढाणा, अमरावती आणि यवतमाळमधुन शिवसेनेचे खासदार आहेत.

आली भूमाता घेऊन । लोकशाहीचा सांगावा ।
पाचावर्षाच्या बोलीन । गडी-चाकर नेमावा ॥

लोकप्रतिनिधी नको । म्हणा लोकांचे नोकर ।
जनतेच्या मतावर । यांची शिजते भाकर ॥

होऊ नका लोभापायी । कोण्या पालखीचे भोई ।
करा फक्त तेच ज्याने । सुखावेल काळीआई ॥

धन-द्रव्य घेतल्याने । होते कर्तृत्व गहाण ।
नको स्वत्वाचा व्यापार । राखा आत्म्याचा सन्मान ॥

नशापाणी फुकटाची । आणि खानावळी शाही ।
होते अशा करणीने । कलंकित लोकशाही ॥

धर्म-पंथ-जाती-पाती । यांना देऊ नये थारा ।
मतदान करताना । फक्त विवेकाला स्मरा ॥

पाच वर्ष जनतेची । करू शकेल का सेवा ।
पात्रता नी योग्यतेचा । नीट अदमास घ्यावा ॥

कुणी आला शुभ्रधारी । ढग पांघरुनी नवा ।
आत कलंक नाही ना । गतकाळ आठवावा ॥

कधी गाळला का घाम । त्याने मातीत राबून ।
स्वावलंबी की हरामी । थोडे घ्यावे विचारून ॥

पूर्ती केलेली नसेल । पूर्वी दिल्या वचनांची ।
द्यावे हाकलुनी त्यास । वाट दावा बाहेरची ॥

नको मिथ्या आश्वासने । बोला गंभीर म्हणावं ।
कशी संपेल गरिबी । याचं उत्तर मागावं ॥

कृषिप्रधान देशात । नाही शेतीचे ’धोरण’ ।
कच्च्या मालाच्या लुटीने । होते शेतीचे मरण ॥

शेती रक्षणाकरिता । नाही एकही कायदा ।
फुलतात घामावरी । ऐदी-बांडगुळे सदा ॥

शेतीमध्ये जातो जो जो । मातीमोल होतो तो तो ।
अशी अनीतीची नीती । कोण धोरणे आखतो? ॥

सत्ता लोभापायी होतो । हायकमांडचा नंदी ।
प्रश्न शेतीचे मांडेना । करा त्यास गावबंदी ॥

पाचावर्षातुनी येते । संधी एकदा चालुनी ।
करा मताचा वापर । अस्त्र-शस्त्र समजुनी ॥

स्थिर मनाला करून । ‘अभय’ व्हा निग्रहाने ।
मग नोंदवावे मत । सारासार निश्चयाने ॥

– गंगाधर मुटे ‘अभय’

नवी दिल्ली – लोकसभा निवडणुकांच्या तारखा जसजशा जवळ येत आहेत तसा जनतेचा कलही बदलत चालला असून दिल्लीत आम आदमी पक्षाचा लोकप्रियतेचा ‘ग्राफ’ घसरत चालल्याचे ताज्या जनमत चाचणीमध्ये दिसून आले आहे. ‘आप’ला दिल्लीतील सात पैकी तीन तर भाजपच्याही पारड्यात तीन जागा पडतील असे सध्याचे चित्र आहे. त्याचवेळी काँग्रेसच्या मतांमध्ये मोठी वाढ होऊन एका जागेची लॉटरी त्यांना लागेल, असे ही चाचणी सांगते.
दिल्लीत १० एप्रिल रोजी मतदान होणार असून एबीपी न्यूज आणि नेल्सन यांनी घेतलेली ताजी जनमत चाचणी ‘आप’चे संयोजक अरविंद केजरीवाल यांना जबरदस्त धक्का देणारी आहे. दोन महिन्यांपूर्वी दिल्लीत घेण्यात आलेल्या जनमत चाचणीत दिल्लीत ‘आप’चे वर्चस्व कायम राहिल, असा कौल जनतेने दिला होता. ‘आप’ला त्यावेळी ७ पैकी ६ जागा मिळतील, असा अंदाज व्यक्त करण्यात आला होता. मात्र आता चे चित्र हळू हळू बदलू लागले आहे. जनमत चाचणीनुसार ‘आप’ची लोकप्रियता वेगाने घसरत चालली आहे. मात्र, त्याचवेळी सर्वात जास्त म्हणजे ३४ टक्के मते पदरात पाडण्यात ‘आप’ यशस्वी ठरेल. त्याखालोखाल ३२ टक्के मते भाजपला तर २८ टक्के मते काँग्रेसला मिळणार आहेत. ‘आप’ची घटलेली मते भाजपच्या नाही तर काँग्रेसच्या पारड्यात पडतील. काँग्रेसच्या मतांमध्ये मोठी वाढ पहायला मिळेल, असा अंदाज आहे. जानेवारी महिन्यात झालेल्या जनमत चाचणीत काँग्रेसला केवळ ९ टक्के मते मिळतील, असा अंदाज व्यक्त करण्यात आला होता. त्यात अवघ्या दोन महिन्यात १९ टक्के मतांची वाढ झाल्याचे दिसत आहे. तर याच काळात भाजपच्या मतांमध्ये तीन टक्के वाढ दाखवण्यात आली आहे. ‘आप’ला जानेवारी महिन्यात ५५ टक्के मते मिळतील, असा अंदाज होता त्यात १९ टक्के घसरण होईल, असे सध्याचे चित्र आहे.

अमरावती – लोकसभेच्या सोळाव्या निवडणुकीत काँग्रेस आणि भाजपला सत्तेत येण्यापासून रोखा, असे जाहीर आवाहन बहुजन समाज पक्षाच्या नेत्या, उत्तर प्रदेशच्या माजी मुख्यमंत्री मायावती यांनी अमरावतीत गुरुवारी केले.
विदर्भातील बसपच्या १० उमेदवारांच्या प्रचाराकरिता मायावती यांची अमरावतीच्या सायन्सकोर मैदानावर सभा झाली. या सभेत मायावती यांनी काँग्रेस आणि भाजपला लक्ष्य केले. स्वातंत्र्याला साठ वर्षे होऊनही देशात गरीब आणि मध्यमवर्गीय जनतेची सामाजिक आणि आर्थिक परिस्थिती बदलली नाही. गरीबी वाढली आहे अन् भ्रष्टाचार बोकाळला आहे. विद्यमान सत्ताधा‍र्यांनी राबवलेल्या योजनांचा सवर्सामान्यांना कसलाही फायदा झाला नाही. देशाच्या आजच्या हलाखीच्या परिस्थितीला फक्त काँग्रेस सरकारच जबाबदार आहे. केंद्राच्या चुकीच्या आर्थिक धोरणांमुळे देशाची पत आंतरराष्ट्रीय समुदायात घसरली. अद्यापही विदेशातील काळा पैसा भारतात आणण्यात काँग्रेस सरकारला यश आले नाही. भ्रष्टाचार थांबवण्यासाठी केलेले कायदे कुचकामी आहेत, असे त्या म्हणाल्या. भांडवलदारांच्या हाती सत्तेच्या चाव्या : देशात भांडवलदार, उद्योजक आणि ‘धन्नासेठ’ यांच्याकरिताच कायदे बनवण्यात येतात. त्यांच्या मदतीनेच केंद्रात काँग्रेस, भाजपने आतापर्यंत सत्ता हस्तगत केली. त्यांच्यापासून सुटका करायची असेल, तर आता सोळाव्या लोकसभेत काँग्रेस, भाजप दोघांनाही सत्तेपासून रोखण्याची संधी आहे, असे मायावती म्हणाल्या. डॉ. बाबासाहेब आंबेडकरांनी शोषित, पीडित आणि दलितांकरिता आरक्षण कायदा लागू करून सुविधा दिल्यात. मात्र, सत्तेत असलेल्या काँग्रेस सरकारने नवनवे नियम लादून दलित जनतेचा आरक्षणाचा हक्क हिरावून घेण्याचा प्रयत्न चालवला आहे. दलितांसाठी सरकारी नोकरीत असलेले आरक्षण हळूहळू संपवण्याचा काँग्रेसचा डाव आहे, असा आरोप मायावती यांनी केला.  लोकसभेच्या निवडणुकीत काँग्रेस आणि भाजपच्या जाहीरनाम्यावर विश्वास ठेवू नका, असे आवाहन मायावती यांनी केले. देशात सहा वर्षे भाजपचे सरकार होते, मग त्यावेळी त्यांनी देशात सुधारणा का केल्या नाहीत? बहुजन समाज पक्षाच्या वतीने कधीही निवडणुकीत जाहीरनामा प्रकाशित करण्यात येत नाही. आम्ही विकास करून दाखवतो, असे मायावती यांनी स्पष्ट केले. गुजरातमध्ये दंगे घडवल्याचा आरोप असलेले नरेंद्र मोदी यांना भाजपने पंतप्रधानपदाचा उमेदवार घोषित केले, तर पुढचा पंतप्रधान ‘युवराज’ होईल अशी काँग्रेसला आशा आहे, असे सांगत मायावती यांनी पंतप्रधानपदाच्या दोन्ही उमेदवारांना विरोध दर्शवला.
या जाहीर सभेला विदर्भाती बसपचे उमेदवार गुणवंत देवपारे (अमरावती), बळीराम राठोड (यवतमाळ-वाशीम), बी. सी. कांबळे (अकोला), अ. हफीज अ. अजिज (बुलडाणा), डॉ. मोहन गायकवाड (नागपूर), चेतन पैदाम (वर्धा), किरण पाटणकर (रामटेक), रामराज नन्नावरे (गडचिरोली), संजय नासरे (भंडारा), हंसराज कुंभारे (चंद्रपूर) उपस्थित होते.