नागपूर – उन्हाळ्यात सर्वत्र पर्यटनाची चाहूल लागते. अशावेळी विदर्भात पर्यटनाची अमाप संधी असतानाही वैदर्भीयांना बाहेरील पर्यटनस्थळे खुणावतात. मात्र, येथील पर्यटकांना येथेच थांबवून ठेवण्यासाठी वन विभागाने पुढाकार घेतला आहे. दोन महत्त्वाची अभयारण्ये खास उन्हाळ्यासाठी २१ मार्चपासून वैदर्भीयांच्या सेवेसाठी खुली करण्यात आली आहेत.
२५० चौरस किमी क्षेत्रफळावर विस्तारलेल्या उमरेड-कऱ्हांडला या वन्यजीव अभयारण्याला केंद्र सरकारने मागीलवर्षीच व्याघ्र प्रकल्पाचा दर्जा दिला. त्यानंतर अनेकांची या अभयारण्याला भेट देण्याची इच्छा होती. त्यामुळे वन विभागाने खापरी प्रवेशद्वारातून हे अभयारण्य खुले केले आहे. यानुसार, सकाळी ६.३० ते ८.३० दरम्यान प्रवेश घेऊन ११ वाजतापर्यंत बाहेर यावे लागेल. त्यानंतर दुपारी २.३० ते ४.३० दरम्यान प्रवेश घेऊन सायंकाळी ६ वाजता परत यावे लागेल. अभयारण्याजवळील पवनी येथे शनिवारी आठवडी बाजार असल्याने तो दिवस सोडून अन्य दिवशी हे अभयारण्य सुरू असेल. यासोबतच देवलापार येथील मानसिंगदेव वन्यजीव अभयारण्य हा तब्बल ७५७ चौरस कि.मी .क्षेत्रफळाच्या पेंच व्याघ्र प्रकल्पाचा भाग आहे. हे अभयारण्यदेखील आता निसर्गप्रेमींसाठी सुरू करण्यात आले आहे. या अभयारण्यातदेखील वाहनांना उमरेड-कऱ्हांडलाच्या वेळेनुसारच खुर्सापार प्रवेशद्वारातून प्रवेश दिला जाणार आहे. अभयारण्याजवळील पवनी येथे बुधवारी आठवडी बाजार असल्याने तो दिवस सोडून अन्य दिवशी हे अभयारण्य सुरू असेल

वाराणसी – एनडीएचे पंतप्रधानपदाचे उमेदवार नरेंद्र मोदी यांच्या प्रचारासाठी उत्तर प्रदेशात दिल्या जाणाऱ्या ‘हर हर मोदी… घर घर मोदी…’ या घोषणेचा वाद आता न्यायालयात पोहोचला आहे. सेंट्रल बार असोसिएशनचे माजी अध्यक्ष मनोजकुमार दुबे यांनी याप्रकरणी याचिका दाखल करून भाजप नेत्यांवर गुन्हा नोंदवण्याचे आदेश देण्याची मागणी केली आहे.
नरेंद्र मोदी हे वाराणसी लोकसभा मतदारसंघातून निवडणूक लढविण्याची घोषणा झाल्यापासून यूपीतील भाजप कार्यकर्त्यांमध्ये प्रचंड उत्साह आहे. याच उत्साहातून कार्यकर्ते ‘हर हर मोदी… घर घर मोदी…’ ही घोषणा देत आहेत. मात्र, त्यामुळे बिथरलेल्या काँग्रेस, सपा व आम आदमी पक्षाने या घोषणेस हरकत घेतली आहे. हा देवाचा अपमान असल्याचा आरोप त्यांनी केला आहे. त्याच पार्श्वभूमीवर ही याचिका करण्यात आली आहे. नरेंद्र मोदी, यूपी भाजपचे प्रभारी अमीत शहा, वाराणसीचे महापौर रामगोपाल मोहले यांना यात प्रतिवादी करण्यात आले आहे. मतांसाठी भाजप ‘हर हर महादेव, घर घर महादेव आणि कण कण महादेव’ या घोषणेचे विकृतीकरण करत असून त्यामुळे धार्मिक भावना दुखावल्या जात आहेत, असा दावा याचिकेत करण्यात आला आहे. ही घोषणा पक्षाची अधिकृत घोषणा नसल्याचे भाजपने आधीच स्पष्ट केले आहे. नरेंद्र मोदी यांनी स्वत: ट्विटरवरून कार्यकर्त्यांनी अशी घोषणा देऊ नये, असे आवाहन केले आहे. त्यानंतरही याप्रकरणी याचिका दाखल करण्यात आली आहे.

नवी दिल्ली – भारताच्या प्रमुख शहरांत झालेल्या दहशतवादी हल्ल्यांतील मुख्य आरोपी व इंडियन मुजाहिदीनचा म्होरक्या तहसीन अख्तर ऊर्फ मोनू याला अटक करण्यात आली आहे. पश्चिम बंगालच्या काकडविट्टा येथून दिल्ली पोलिसांनी त्याला ताब्यात घेतले. ‘बॉम्बमेकर’ वकास याच्या अटकेनंतर लगेचच अख्तर जाळ्यात अडकल्याने मुजाहिदीनचे कंबरडे मोडले आहे.
वकास याच्या अटकेनंतर सैरभैर झालेला मोनू पाकिस्तानात पळून जाण्याच्या तयारीत होता. त्याआधीच त्याला बेड्या ठोकण्यात आल्या. मोनू हा एनडीएनचे पंतप्रधानपदाचे उमेदवार नरेंद्र मोदी यांच्या पाटणा येथील सभेत झालेल्या साखळी बॉम्बस्फोटाचा सूत्रधार होता. यासीन भटकळ याच्या अटकेनंतर इंडियन मुजाहिदीनची सर्व सूत्रे तहसीनकडे आली होती. तोच या संघटनेचा म्होरक्या होता. मुंबईत २०११ साली झालेले बॉम्बस्फोट, बोधगया स्फोट आणि पुणे बॉम्बस्फोटांतही तहसीनचा हात होता, अशी सूत्रांची माहिती आहे.

बारमेर – पक्षाकडून लोकसभा निवडणूकीसाठी तिकीट न मिळाल्याने नाराज झालेले भाजपचे ज्येष्ठ नेते जसवंत सिंग यांनी सोमवारी बारमेरमधून अपक्ष म्हणून उमेदवारी अर्ज दाखल केला. याआधी रविवारी त्यांनी आपण अपक्ष म्हणून निवडणूक लढवणार असल्याचे स्पष्ट केले होते.
बारमेरमधून निवडणूक लढवण्याची आपली इच्छा असताना आपल्याला डावलून काँग्रेसमधून भाजपात आलेल्या कर्नल सोनाराम चौधरींना पक्षाने उमेदवारी दिली. त्यामुळे सिंग यांनी बंडाचा पवित्रा घेतला होता.सध्याच्या भाजप या पक्षात बाहेरून आलेल्या लोकांनी अतिक्रमण केल्याचा आरोप जसवंत सिंग यांनी केला होता. तसेच आपल्या बाबतीत पक्षाने दुसर्‍यांदा असे केले असल्याचे जसवंतसिंग म्हणाले होते.

देशात लोकसभा निवडणुकीचे वारे जोरात वाहू लागले आहेत. या निवडणुकीबाबत परदेशातील अनिवासी भारतीयांमध्ये उत्सुकता आहे. हे अनिवासी भारतीय केवळ टीव्ही किंवा वर्तमानपत्रातील बातम्यांवर समाधान मानतात. मात्र, दुबईतील केरळ मुस्लीम कल्चरल सेंटरने (केएमसीसी) केरळमध्ये मतदान करण्यासाठी जाऊ इच्छिणा-या नागरिकांसाठी खास चार्टर्ड विमानाची सोय करण्याचे ठरवले आहे.
दुबईत केरळ मुस्लिम कल्चरल सेंटरचे ५०,३०० सदस्य आहेत. या संस्थेने केरळमध्ये सात एप्रिल रोजी होणा-या मतदानात सहभागी होऊ इच्छिणाऱ्या मतदारांसाठी चार्टर्ड विमान करण्याचे ठरवले आहे. विशेष म्हणजे कोझिकोडे जिल्ह्यातील नागरिकांना एका फेरीचे तिकीट सवलतीत मिळणार आहे. या मतदारांना भारतात आणण्यासाठी खासगी विमान कंपन्यांसह एअर इंडिया, एअर इंडिया एक्स्प्रेसकडून चार्टर्ड विमान भाडयाने घेण्याची चर्चा सुरू आहे. ही सुविधा केवळ केरळातील मतदारांसाठी आहे, असे केएमसीसीचे महासचिव इब्राहिम इलेत्तिल यांनी सांगितले.
मतदानासाठी भारतात जाऊ इच्छिणा-या नागरिकांच्या संख्येवर विमानांची संख्या अवलंबून राहणार आहे. १६५ प्रवाशांसाठी खासगी कंपनीचे विमान भाडयाने घेतल्यास प्रति प्रवाशामागे ८३१९ रुपये तिकीट राहणार आहे. तर अन्य दोन कंपन्यांनी भारतातून दुबईसाठी १८० प्रवाशांसाठी प्रति प्रवाशामागे १२,४७७ आणि ९९८१ रुपये तिकीट आकारण्याचे ठरवले आहे. विशेष म्हणजे मतदारांवर कोणताही प्रभाव टाकण्याचा हा प्रकार नाही. मतदार त्यांच्या इच्छेनुसार मतदान करू शकतात, असे इलेत्तिल यांनी सांगितले.

पत्रलेखन मागे पडून आता जमाना झाला. आता प्रत्येक पत्र ‘ई-मेल’द्वारे लिहिले जाते. या ‘ई-मेल’ने जगात क्रांती घडवली आहे. जगभरातील इंटरनेटवर लक्ष ठेवणा-या अमेरिकेच्या राष्ट्रीय सुरक्षा कार्यक्रमाने खळबळ उडाली. कारण आपले ‘ई-मेल’ अकाउंट सुरक्षित नसल्याने सर्वच नेट वापरणा-यांमध्ये घबराट पसरली. आपण लिहिलेले पत्र कोणीही वाचत असल्याचे लक्षात आल्याने प्रत्येक या सेवेविषयी साशंक राहू लागला. आता जगातील सर्वाधिक लोकप्रिय सर्च इंजिन गुगलने आपल्या ‘ई-मेल’ना अधिक सुरक्षेचे कवच पुरवले आहे. त्यामुळे ही सेवा वापरणाऱ्यांना खात्रीशीर सुरक्षेचा अनुभव मिळणार आहे.
तुमचे ‘ई-मेल’ अकाउंट तुमच्यासाठी अत्यंत महत्त्वाचे आहे. त्यामुळे ते अधिक सुरक्षित असावे अशी तुमची इच्छा असते. ही बाब आमच्यासाठी अधिक महत्त्वाची आहे, असे ‘जी-मेल’चे सुरक्षा अभियंता निकोलस लिडबोरस्की यांनी सांगितले. गुगलने ‘जी-मेल’ची सेवा सुरू केली तेव्हापासून ती कायम ऌळळढर’चा वापर करते. आजपासून या ई-मेल अकाउंटला अधिक सुरक्षा कवच पुरवले आहे. त्यामुळे तुमचा संदेश कोणीही वाचू शकणार नाही. तुम्ही सार्वजनिक ठिकाणी ‘वाय-फाय’ सेवा वापरून संगणक, फोन आणि टॅब्लेट वापरल्यावरही सुरक्षेबाबत काहीच अडचण येणार नाही.
तुम्ही पाठवलेला प्रत्येक ‘ई-मेल’ हा १०० टक्के सुरक्षित आहे. याची माहिती केवळ तुम्ही आणि जी-मेलच्या सव्र्हरलाच असते. तसेच ही माहिती गुगलच्या डेटा सेंटरला असते. २०१३ मध्ये जी-मेल वापराचे प्रमाण ९९.९७८ टक्के होते. वर्षभरात केवळ दोन तास ही सेवा बंद राहिली होती. आमचे अभियांत्रिकी तज्ज्ञ आठवडयाचे सात दिवस व २४ तास यंत्रणेवर लक्ष ठेवून असतात. कोणतीही अडचण उद्भवल्यास ते तत्काळ त्यातून मार्ग काढतात. तसेच यंत्रणेत एखादा दोष निर्माण झाल्यास भविष्यात तो उद्भवू नये, म्हणून आमचे तज्ज्ञ त्याचे पूर्णपणे विश्लेषण करतात, असे लिडबोरस्की यांनी सांगितले.

नागपूर – ‘आप’चे नेते अरविंद केजरीवाल हे काँग्रेसाध्यक्ष सोनिया गांधी यांना दहा वर्षांतील कारभाराबद्दल का विचारत नाहीत? त्यांनाही हिशेब विचारा ना, असे आव्हान गोव्याचे मुख्यमंत्री मनोहर पर्रिकर यांनी रविवारी येथे ‘आप’ला दिले.
‘फ्रेण्ड्स ऑफ बीजेपी’च्यावतीने ‘व्हिजन ऑफ बीजेपी फॉर डेव्हलप्ड इंडिया’ या​ विषयावर शंकरनगरातील साई सभागृहात संवाद आयोजित करण्यात आला होता. भाजपचे नितीन गडकरी यांच्या प्रचारानिमित्त नागपूरकरांशी संवाद साधताना पर्रिकर यांनी सहज शैलीत नरेंद्र मोदींच्या नेतृत्वाचे गुणगान करून गोव्याच्या विकासाकडे उपस्थितांचे लक्ष वेधले. पक्षाची लहान राज्यांची भूमिका असल्याचे सांगत वेगळ्या विदर्भाचे समर्थन करताना त्यांनी सावध पवित्रा घेतला. ‘अरविंद केजरीवाल यांनी आघाडी उघडताच माझी अचानक किंमत वाढली. देशभरातून आमंत्रणे येऊ लागली’, असे सांगून मनोहर पर्रीकर यांनी केजरीवाल यांचे उपरोधिक आभार मानले व त्यांच्या साधेपणावर टोले लगावले. पत्रकारांशी बोलतानाही त्यांनी केजरीवाल यांच्यावर टीका केली. साधेपणासोबत एखादी बाब घडवणे व तिची योग्य अंमलबजावणी करण्याची क्षमता आवश्यक आहे. त्यासाठी चांगल्या माणसाची गरज आहे. सद्यस्थितीत नरेंद्र मोदी सोडल्यास कुणीही अशी क्षमतावान व्यक्ती नाही, असा दावाही पर्रिकर यांनी केला. आयआयटीयन्सचे वैशिष्ट्य अधोरेखित करताना त्यांनी एक किस्साही सांगितला. १८ वर्षांपासून राजकारणात असलो तरी, अद्याप राजकारणी झालो नाही, असे पर्रिकर म्हणाले. यानंतर त्यांनी श्रोत्यांच्या प्रश्नांना उत्तरे दिली. भाजपच्या कोषाध्यक्ष शायना एन.सी. मॉडरेटर होत्या. ‘वेद’चे देवेंद्र पारेख, नाग-विदर्भ चेम्बर ऑफ कॉमर्सचे अध्यक्ष दीपेन अग्रवाल, रमेश मंत्री आदी उपस्थित होते. संचालन नितीन रोंघे यांनी केले.

नागपूर – विदर्भात गारपीटीनंतर नैराश्यग्रस्त कर्जबाजारी शेतकºयांच्या आत्महत्येचे सत्र पुन्हा सुरू झाले असून मागील पाच दिवसात १६ शेतकºयांनी आत्महत्या केल्याने सरकारच्या मदतीचे सर्व दावे फोल ठरले आहे. आत्महत्याग्रस्त शेतकरी कर्ज वसुलीला त्रस्त होऊन अचानक आलेल्या प्रचंड नुकसानीमुळे अन्नापासूनही वंचित राहिल्याने आत्महत्या करत असल्याचा आरोप विदर्भ जनआंदोलन समितीचे अध्यक्ष किशोर तिवारी यांनी केला आहे.
मागील ५ दिवसात यशवंत मुळे रा. पंचाळा जि. वाशीम, विजय धोटे रा. बोरगाव जि. नागपूर, दमडू राठोड, रा. दत्तापूर जि. यवतमाळ, योगेश्वर लढी रा. हिवरा जि. वर्धा, माधवराव लांजेवार, रा. निलागोंदी जि. भंडारा, अभिमान काळे रा. बोरगाव जि. चंद्रपूर, कृष्णा वानखडे रा. साखरा जि. यवतमाळ, सुधाकर पोटे, रा. नवरगाव, राजू घोटेकार रा. वडनेर जि. वर्धा, भगवंत महाजन, रा. धानोरा, जि. वर्धा, वासुदेव घुले, रा. पळसाड, जि. नागपूर, सुरेश भुसार रा. गंगापूर जि. नागपूर, विजय कस्तुरे रा. बोथली जि. चंद्रपूर, पंतय्या रेंगुडवार, रा. आंबेधानोरा जि. चंद्रपूर, शंकर गडमडे रा. वरुड (इजारा), जि. यवतमाळ, सुभाष भोगेकर रा. धानापूर जि. चंद्रपूर, संतोष लिचडे रा. कासारखेडा, जि.वर्धा या १७ शेतकºयांनी आत्महत्या केल्यानंतर यांच्या आत्महत्येची स्वतंत्र चमुद्वारे कारणमिंमासा केली. त्यामध्ये सदर शेतकरी प्रचंड कर्जबाजारीला तोंड देत असून मागील जुलै -आॅगस्ट महिन्याच्या अतिवृष्टीत सोयाबीन गमाऊन आता नव्या उमेदीने रब्बी मध्ये हरभरा व गहू लाऊन जीवन जागण्याचा प्रयत्न करीत होते. मात्र गारपीटीने त्यांचे जीवन उद्ध्वस्त केले असून सरकारने घोषित केलेली मदतही ५० टक्क्याच्यावर नापिकी या अटी खाली हे सर्व शेतकरी मदतीपासून वंचित राहणार आहे. बँक आणि खासगी सावकारांनी यांचे जगणे कठीण केले आहे. अनेक शेतकºयांच्या घरी अन्नही नसून यावर्षी मुलीचे लग्न सुध्दा करावयाचे आहे, अशा कठीण परिस्थितीमध्ये मदत तर सोडा कोणताही सरकारी प्रतिनिधी वा राजकीय नेता मदत घेऊन त्यांच्या दारावर आलेला नाही. एकीकडे राजकीय नेते निवडणूकीत कोट्यावधीचा खर्च करत असून दुसरीकडे विदर्भात २ वेळेचे अन्न नसल्यामुळे शेतकरी आत्महत्या करत आहे, अशा परिस्थितीमध्ये समाजाने समोर येऊन या शेतकºयांना दिलासा द्यावा, असे आवाहन सुध्दा किशोर तिवारी यांनी केले आहे.