नवी दिल्ली – आयपीएल स्पॉट फिक्सिंग आणि सट्टेबाजी प्रकरणावर सर्वोच्च न्यायालय शुक्रवारी अंतरिम आदेश देणार आहे. या संपूर्ण प्रकरणावर अंतिम निकाल येईपर्यंत एन.श्रीनिवासन यांच्या जागी सुनील गावस्कर यांची बीसीसीआयचे हंगामी अध्यक्ष म्हणून नियुक्त करावी असे सर्वोच्च न्यायालयाने सांगितले.
तसेच चेन्नई सुपर किंग्स आणि राजस्थान रॉयल्स या दोन संघांनी आयपीएल-सात मध्ये सहभागी होऊ नये असा प्रस्ताव सर्वोच्च न्यायालयाने दिला. इंडिया सिमेंटशी संबंधित कुठल्याही व्यक्तीने बीसीसीआयमध्ये राहू नये असेही सर्वोच्च न्यायालयाने सांगितले. सर्वोच्च न्यायालयाने आपल्या या मतांवर बीसीसाआयकडून उद्यापर्यंत उत्तर मागितले आहे.
त्याआधी बुधवारी सर्वोच्च न्यायालयाने बीसीसीआय अध्यक्ष एन.श्रीनिवासन यांना पदावरुन पायउतार होण्याचा इशारा दिला होता. त्यावर बीसीसीआयने गुरुवारी सर्वोच्च न्यायालयात न्यायाधीश मुकूल मुदगल समितीच्या शिफारशींची अंमलबजावणी करण्याचा प्रस्ताव दिला. अहवालात ज्यांच्यावर ठपका ठेवण्यात आला आहे त्यांच्यावर कारवाई करु असे बीसीसीआयने सर्वोच्च न्यायालयाला सांगितले. त्यावर सर्वोच्च न्यायालयाने क्रिकेटच्या भल्यासाठी आम्हाला कठोर विचार करुन तसे आदेश द्यावे लागतील असे सांगितले. एन.श्रीनिवासन बीसीसीआयच्या अध्यक्षपदावर असेपर्यंत आयपीएल स्पॉट फिक्सिंग आणि सट्टेबाजी प्रकरणाची निष्पक्ष चौकशी होऊ शकत नाही त्यामुळे श्रीनिवासन पदावरुन पायउतार व्हा, नाही तर तसे आदेश द्यावे लागेल असा सर्वोच्च न्यायालयाने इशारा दिला होता.

२०१४ लोकसभा निवडणुकीसाठी मतदान जनजागृती अभियानांतर्गत भाग घेतलेले मोरादाबादमधील शालेय विद्यार्थ्यी

नवी दिल्ली – अनेक घोटाळ्यांनी बदनाम झालेल्या यूपीए सरकारच्या तोंडाला काळं फासणा-या कोळसा खाणवाटप घोटाळ्याप्रकरणी सीबीआयनं दाखल केलेल्या दुस-या आरोपपत्रात राज्यसभेचे खासदार विजय दर्डा यांचं नाव आल्यानं लोकसभा निवडणुकीच्या तोंडावरच महाराष्ट्र प्रदेश काँग्रेसला मोठा झटका बसलाय.
विजय दर्डा आणि त्यांचे चिरंजीव देवेंद्र दर्डा यांच्याविरोधात आयपीसीच्या कलम १२० ब , ४२० अन्वये गुन्हे दाखल करण्यात आले आहेत. २०१२ पासून कोळसा खाणवाटप घोटाळ्याची चौकशी सीबीआय करत आहे. या कोळसा घोटाळ्यात खासदार विजय दर्डा यांचेही हात काळे झाल्याचा आरोप याआधी झाला होता. चुकीची आकडेवारी आणि सादरीकरण करून कोळसा खाणी मिळवल्याचा ठपका त्यांच्यावर ठेवण्यात आला होता. त्यामुळे विजय दर्डा प्रमोटर असलेल्या जेएलडी यवमताळ एनर्जी लिमिटेडवर सीबीआयनं छापेही टाकले होते. तसंच, या कंपनीसह पाच कंपन्यांच्या २० आजी-माजी संचालकांवर एफआयआरही दाखल केला होता. त्यात एएमआर आयर्न अँड स्टीलचे संचालक अरविंद कुमार जैसवाल, मनोज जैसवाल, रमेश जैसवाल, देवेंद्र दर्डा, अज्ञात सरकारी कर्मचारी आणि खासगी व्यक्तींचा समावेश होता. या कोळसा घोटाळ्यातील पाच प्रकरणांबाबतच्या तपासाची माहिती सीबीआय शुक्रवारी सुप्रीम कोर्टात देणार होतं. परंतु, त्याआधीच त्यांनी आज दिल्ली कोर्टात दुसरं आरोपपत्र दाखल केलं. त्यात विजय दर्डा आणि देवेंद्र दर्डा यांचं नाव आल्यानं प्रदेश काँग्रेसच्या वर्तुळात खळबळ उडाली आहे.

गुडगाव – आम आदमी म्हणून सर्वत्र वावरणा-या ‘आप’चे पक्षनिधीचे नवनवीन फंडे मात्र चांगलेच महाग आहेत. आधी बीजेपीने ‘नमो चाय’ म्हणून निवडणुकीच्या प्रचारसभेत रंगत निर्माण केली होती. त्यापाठोपाठ भाजपच्या पावलावर पाऊल ठेवत आम आदमी पक्षाकडूनही अशाच प्रकारची चहा पार्टीचे आयोजन केले जात आहे. मात्र हा ‘आम’ चहा काही साधासुधा नाही आहे तर या चहाच्या एका कपाची किंमत आहे तब्बल पाच हजार रुपये.
गुडगावमध्ये येत्या २९ मार्चला आम आदमी पक्षाची चहा पार्टी रंगणार आहे. या चहा पार्टीत सहभागी व्हायचे असल्यास पाच हजार रुपये मोजावे लागणार आहेत.गुडगावमधील ‘आप’चे उमेदवार योगेंद्र यादव या पार्टीच्या निमित्ताने मतदारांशी संवाद साधणार आहेत. ही पार्टी कुठे होणार आहे याबाबत काही सांगण्यात आलेले नाही. याआधी खाजगी मॅनेजमेंट महाविद्यालयात अशी पार्टी आयोजित करण्यात आली होती. त्यावेळी १५० लोकांनी भाग घेतला होता. या पार्टीच्या निमित्ताने अधिक निधी गोळा करण्याचा आमचा प्रयत्न असणार आहे, असे ‘आप’चे संयोजक संजय कुमार यांनी सांगितले. निवडणुकीच्या प्रचार सभेचा खर्च अधिक असतो त्यामुळे अशा प्रकारे पक्षाला निधी गोळा करावा लागतो असेही कुमार म्हणाले.याआधी आपने दहा हजार द्या आणि केजरीवालांसोबत जेवा हा अनोखा फंडा वापरला होता. पक्षनिधी वाढवण्यासाठी आपने खास डिनर पार्टी आयोजित केली होती. मात्र आपच्या या फंड्यावर चहूबाजूंनी टीकाकारांनी टीका केली होती

लखनऊ – उत्तरप्रदेश पोलिसांच्या दहशतवाद विरोधी पथकाने बुधवारी गोरखपूर रेल्वे स्टेशन जवळून दोन संशयित दहशतवाद्यांना अटक केली. दोन्ही दहशतवाद्यांची भाजपचे पंतप्रधानपदाचे उमेदवार नरेंद्र मोदी यांच्यासह काही प्रभावी नेत्यांच्या प्रचार सभांमध्ये आत्मघातकी दहशतवादी हल्ला करण्याची योजना होती.
बरकत आणि मुझम्मील अशी अटक केलेल्या दोन दहशतवाद्यांची नावे असून, ते पाकिस्तानी नागरिक आहेत. लखनऊच्या एटीएस मुख्यालयात दोघांची कसून चौकशी सुरु आहे. अटक केलेल्या दोन्ही दहशतवाद्यांना मोठया निवडणूक प्रचारसभांमध्ये आत्मघातकी दहशतवादी हल्ला करण्याच्या सूचना देण्यात आल्या होत्या अशी माहिती तपास अधिका-यांनी दिली.दिल्ली पोलिसांच्या गुन्हे शाखेकडून मिळालेल्या माहितीच्या आधारावर उत्तरप्रदेश एटीएसने ही कारवाई केली. एटीएसचे प्रमुख राजीव सब्बरवाल यांनी अटकेच्या वृत्ताल दुजोरा दिला मात्र त्यापेक्षा अधिक माहिती देण्यास नकार दिला.

यवतमाळ – मनसेचे यवतमाळ वाशिम लोकसभेचे उमेदवार राजू पाटील राजे यांच्या प्रचाराचा २७ मार्च रोजी प्रचाराचा शुभारंभ होणार आहे. श्री संत सेवालाल महाराज, श्री संत मुंगसाजही महाराज यांचे चरणी नारळ फोडून पोहरा देवी ते धामणगाव देव पर्यंत रॅली काढण्यात येणार आहे. या रॅलीत सहभागी व्हावे असे आवाहन केले आहे. लोकसभे 

गुन्हेगार सहजासहजी आपल्या गुन्ह्याची कबुली देत नाहीत. गुन्हा कबूल करण्यासाठी विविध पद्धती राबवल्या जातात. प्रसंगी गुन्हेगारांना शारीरिक मारहाण व मानसिक छळ केला जातो. व्यक्तीचा खरे-खोटेपणा जाणून घेण्याची कुवत माणसाच्या सुप्त मनात असते असे एका संशोधनात आढळले आहे.
अट्टल खोटे बोलणा-या व्यक्तींकडून खरे काढून घेणे सोपे नसते. मात्र, त्यांच्या सुप्त मनाचा मागोवा घेतल्यावर त्यांचा खोटेपणा उघड होऊ शकतो. व्यक्ती खरी बोलते की खोटे यासाठी ‘लाय डिटेक्टर’ टेस्ट घेतली जाते. मात्र, या टेस्टच्या यशस्वीपणाची खात्री केवळ ५४ टक्के असते. स्वत: व्यक्तिमत्त्व, विचार करण्याची पद्धत याबाबत माणसे ही अत्यंत संवेदनशील असतात, असे कॅलिफोर्निया विद्यापीठातील मानसशास्त्रज्ञ लीन टेन ब्रिंके यांनी सांगितले. त्यांच्या या संशोधनात डायना स्टिमसन, डाना कार्नी यांनी सहभाग घेतला होता.
या संशोधकांनी नवीन चाचणी विकसित केली आहे. एखादी व्यक्ती खोटे बोलत असल्यास सुप्त मन ते ओळखू शकते. विशेष म्हणजे सुप्त मन हे ओळखण्यात अपयशी ठरल्यावरही ही चाचणी यशस्वी होऊ शकते, असा दावा संशोधकांनी केला आहे.या संशोधनासाठी ७२ स्वयंसेवकांची निवड करण्यात आली होती. त्यांना संशयित आरोपींच्या मुलाखतींची चित्रफीत दाखवण्यात आली. काही व्यक्तींनी पुस्तकातून १०० डॉलर्स चोरले होते. मात्र या चोरीची कबुली मुलाखत देणा-यांना देऊ नये असे बजावले होते. आरोपींमध्ये काही जणांना खरे बोलण्यास सांगितले तर काही जणांना खोटे बोलण्यास सांगितले. त्यानंतर या ७२ जणांना मुलाखतीतील व्यक्तींचा खरे-खोटेपणा सिद्ध करण्यास सांगण्यात आले. त्यांनी तत्काळ ४३ टक्के जण खोटे बोलत असल्याचे सांगितले तर ४८ जण खरे बोलत असल्याचे सांगितले. या चाचणीचे निष्कर्ष ‘सायकॉलॉजिकल सायन्स’ या जर्नलमध्ये प्रसिद्ध झाले आहेत. व्यक्तीचे सुप्त मन खरी माहिती देत असते, असे चाचणीत आढळले.

नवी दिल्ली (वृत्तसंस्था ) – दोन वेळा मतदान करा, साता-यात मतदान केल्यानंतर पुन्हा मुंबईत मतदान करा आणि दु-यांदा मतदान करताना शाई पुसायला विसरु नका असे धक्कादायक वक्तव्य केल्याबद्दल राष्ट्रवादी काँग्रेसचे अध्यक्ष शरद पवार यांनी बुधवारी निवडणूक आयोगाकडे माफी मागितली आहे. अशा प्रकारचे वक्तव्यकरून संभ्रम आणि गैरसमज निर्माण केल्याबद्दल त्यांनी माफी मागितली आहे. तसेच आयोगाने हे प्रकरण बंद करावे अशी विनंती ही त्यांनी आयोगाकडे केली आहे.
रविवारी २३ मार्च रोजी नवी मुंबईत माथाडी कामागाराच्या मेळाव्यात बोलताना शरद पवार यांनी राष्ट्रवादीच्या कार्यकर्त्यांना तीन टप्प्यात होणा-या निवडणूकीचा फायदा घ्या, दोनवेळा मतदान करा असा सल्ला दिला होता. या विधानावरुन शरद पवारांवर टीका सुरु झाल्यानंतर त्यांनी आपण हे विधान गंमतीने केले अशी सारवासारव केली. पवारांच्या या विधानावर भाजपचे नेते किरीट सोमय्या यांनी निवडणूक आयोगाकडे तक्रार दाखल केली होती. त्यावर आयोगाने पवारांना गुरुवारपर्यंत स्पष्टीकरण देण्याचे आदेश दिले होते.

औरंगाबाद – भीमशक्तीचे जिल्हा संघटक राजू जाधव यांचा चाणक्यपुरी भागात चाकूने वार करुन निर्घृण खून करण्यात झाला आहे. ही घटना सोमवारी रात्री साडेदहा वाजता घडली. जाधव यांनी भाचीला छेडणाऱ्या एकाला मारहाण केली होती. त्याचा राग मनात धरून आरोपीने दोन साथीदारांच्या मदतीने हा खून केल्याचा संशय आहे. या प्रकरणी तीन आरोपींना अटक करण्यात आली असून जवाहरनगर पोलिस ठाण्यात खुनाचा गुन्हा दाखल करण्यात आला आहे.
मिल‌िंदनगर भागातील रहिवासी राजू यादवराव जाधव (वय ४४) हे सोमवारी रात्री दुचाकीवर विभागीय क्रीडा संकुलाकडून उस्मानपुरा भागाकडे जात होते. यावेळी त्यांना पाठीमागून दुचाकीवर आलेल्या सचिन सुरेश पगारे (वय २८), अनिल प्रल्हाद बदाडे (वय २० सर्व रा. मिल‌िंदनगर) व एका १७ वर्षाच्या तरुणाने अडवले. या तरुणांनी चाकूने राजू जाधव यांच्यावर सपासप वार करणे सुरु केले. गंभीर जखमी अवस्थेत राजू जाधव याना सोडून आरोपीनी पलायन केले. दरम्यान नागरिकांनी हा प्रकार जवाहरनगर पोलिसांना कळवला. पोलिस निरीक्षक हेमंत कदम यांनी सहकाऱ्यासह घटनास्थळी धाव घेतली. जखमी अवस्थेत राजू जाधव यांना घाटी हॉस्पिटलमध्ये हलवण्यात आले. या दरम्यान जाधव यांनी हल्ला करणाऱ्यांची नावे पोलिसांना सांगितली. उपचार सुरू असताना मध्यरात्री दीड वाजता राजू जाधव यांचा मृत्यू झाला. जवाहरनगर पोलिस ठाण्यात या प्रकरणी पोलिस निरीक्षक कदम यांच्या तक्रारीवरुन खुनाचा गुन्हा दाखल करण्यात आला. पोलिसांनी रात्रीतून तिन्ही आरोपींना ताब्यात घेतले. सचिन पगारे याने काही दिवसापुर्वी राजू जाधव यांच्या भाचीची छेड काढली होती. त्यावरून जाधव यांनी त्याला मारहाण केली होती व पुन्हा छेड काढल्यास ‘गेम’ करतो अशी धमकी दिली होती. या घटनेचा राग तसेच ठार मारल्याची धमकी दिल्याने ‌भिती सचिनच्या मनात निर्माण झाली होती. पोलिसांनी घटनास्थळावरुन जाधव यांची दुचाकी, चाकूची मुठ तसेच दुचाकीची लोखंडी चैन जप्त केली.