कणकवली -राजकारण हे उद्धव ठाकरे यांच्या उदरनिर्वाहाचं साधन आहे. शिवसेना सत्तेत सहभागी न झाल्यास त्यांचे आमदार फुटतील, अशी भीती त्यांच्या मनात आहे. म्हणूनच, बाळासाहेबांनी शिकवलेला स्वाभिमान सोडून शिवसेनेनं सत्तेसाठी लाचारी पत्करली आहे, अशी बोचरी टीका काँग्रेस नेते नारायण राणे यांनी आज केली आहे.
शिवसेनेला मंत्रिपदं हवी आहेत खरी, पण त्यांच्यापैकी कुणातही मंत्रिपदासाठी लागणारी गुणवत्ता नाही, अशी चपराकही राणेंनी लगावली आहे. शिवसेनेनं कोकणी जनतेची फसवणूक केल्याचा आरोपही त्यांनी केलाय.
शिवसेना पक्षप्रमुख उद्धव ठाकरे कालपासून दोन दिवसांच्या कोकण दौऱ्यावर आहेत. आज ते सिंधुदुर्ग जिल्ह्यातील जनतेशी संवाद साधणार आहेत. हा दौरा सुरू असतानाच, भाजप-शिवसेनेत पॅच-अप झाल्याचीही चर्चा आहे. मंत्रिमंडळ विस्तारात त्यांना महत्त्वाची खाती मिळणार असल्याचं बोललं जातंय. या पार्श्वभूमीवरच, नारायण राणेंनी उद्धव यांच्यावर धारदार ‘प्रहार’ केला.
उद्धव ठाकरेंचा कोकण दौरा म्हणजे पर्यटनच असल्याची खिल्ली उडवून राणे म्हणाले की, कोकणात येणाऱ्या उद्योगांना शिवसेनेचा विरोध आहे. कोकणी माणसानं सेनेला ताकद दिली, पण सेनेनं कोकणी माणसाची फसवणूकच केली आहे. स्वाभिमानाच्या गप्पा मारणारी शिवसेना सत्तेसाठी लाचार झाली आहे. ती कुणाचं काय भलं करणार? राज्यात विरोधात बसणारी शिवसेना केंद्रात भाजपसोबत सत्तेत आहे. कारण, राजकारण हे उद्धव ठाकरेंच्या उदरनिर्वाहाचं साधन आहे, अशी जळजळीत टिप्पणी त्यांनी केली. शिवसेनेचे आमदार फुटतील, या भीतीनेच ते सत्तेसाठी लाचार झाल्याचंही राणेंनी सुनावलं.त्यामुळे आता संध्याकाळी उद्धव ठाकरे कसा पलटवार करतात आणि ‘सामना’ जिंकतात का, याकडे राजकीय वर्तुळाचं लक्ष लागलंय.

यवतमाळ – महागाव तालुक्यातील काळी दौ. पंचायत समिती गणाच्या पंचायत समितीच्या सदस्यपदाची निवडणूक आज रविवारी पार पडली. उद्या सोमवारी २४  नोव्हेंबर रोजी निकाल जाहीर होणार आहे.
काळी दौ पंचायत समिती गण हा भाजप पक्षाचा बालेकिल्ला राहीला आहे. सुनिल टेमकर हे प्रचंड मताने निवडुन आले होते. त्यानंतर हा गण अनुसुचीत जातीच्या प्रर्वगासाठी सुटल्याने व पंचायत समिती सभापती पद महीलेसाठी राखीव झाल्यामुळे भाजपाच्या मालता झिंगरे ह्या विजयी झाल्या. त्याना आडीच वर्षाचा  सभापतीचा कार्यकाळ पुर्ण करता आला नाही. वयाच्या कारनावरून पुसद जिल्हा सत्र न्यालयाने झिंगरे यांचे पद रद्द केले. त्यामुळे आज रविवारी पोटनिवडणूकीसाठी मतदान घेण्यात आले. सात गावातील मतदारांनी मतदानाचा हक्क बजावला. राष्ट्रवादीचे नथ्थु आढाव, भाजपचे संतोष झिंगरे या दोघात चुरशीची लडत झाली. सोमवारी सकाळी आठ वाजता पासुन तहसील कार्यलयात मतमोजणीला सुरूवात होणार असुन दोन तासात निकाल हाती येणार आहे.

यवतमाळ – येथील जिल्हा परिषदेच्या वतीने राबविण्यात येत असलेल्या पदभरतीचा परिक्षेपूर्वीच परिचरपदाच्या पेपर बाहेर आल्याने एकच खळबळ उडाली आहे. वडगाव रोड पोलिसांनी आरोग्य विभागाच्या विस्तार अधिकाºयास चौकशीसाठी ताब्यात घेतले आहे.
जिल्हा परिषदच्या  ४५ परिचर पदाच्या लेखी परीक्षेसाठी १८ हजार उमेदवारांनी अर्ज केले होते. आज २२ नोव्हेंबर रोजी लेखी परीक्षा दुपारच्या सत्रात घेण्यात आली. परीक्षेसाठी शहरातील जिल्हा परिषद शाळेत (काटेबाई) परीक्षा केंद्र देण्यात आले होते. या केंद्रावर पेपर पोहताच तेथे कर्तव्यावर असलेल्या आरोग्य विभागाच्या विस्तार अधिकाºयाने पेपरची  प्रत एका कर्मचाºयाच्या हाताने बाहेर पाठविली. हा पेपर घेवून शहरातील एका कोचिंग क्लास संचालकाच्या हाती लागल्याने हे प्रकरण उघड झाले. या प्रकरणी वडगाव रोड पोलिसांनी विस्तार अधिकारी विक्रम राऊत यास चौकशीसाठी ताब्यात घेतले. यापूर्वी  विस्तार अधिकारी, कनिष्ठ अभियंता, प्रयोगशाळा तंत्रज्ञ, तारतंत्री अशा चार संवर्गाच्या पदासाठी २ नोव्हेंबर रोजी लेखी परीक्षा घेण्यात आली होती. पेपरफुटीमुळे परीक्षार्थ्यांमध्ये संशयाचे वातावरण असताना दुसरी घटना घडल्याने खळबळ उडाली आहे.

नवी दिल्ली – भाजपा नेतृत्वाने शिवसेनेशी जुळवून घेत या सर्वांत जुन्या मित्रपक्षासोबत पुन्हा एकत्र नांदण्याचा निर्णय घेतला. महाराष्ट्रातील शिवसेना असो वा पंजाबमधील शिरोमणी अकाली दल, भाजपाने आपल्या सर्व मित्रपक्षांना एकत्र ठेवून रालोआला बळकट बनविण्याचे ठरविले आहे.
शिवसेनेला विनाविलंब महाराष्ट्र सरकारमध्ये सामील करून घेण्याचा निर्णय पंतप्रधान नरेंद्र मोदी, पक्षाध्यक्ष अमित शहा आणि वित्त व सूचना आणि प्रसारणमंत्री अरुण जेटली या भाजपाच्या ‘त्रिमूर्ती’ने घेतला आहे. याशिवाय केंद्रातील रालोआ सरकारमध्ये शिवसेनेला आणखी एक कॅबिनेट मंत्रिपद देण्याचा निर्णयही घेण्यात आला आहे. सत्तावाटपाच्या या नव्या फॉर्म्युल्यावर आणि सरकारच्या किमान समान कार्यक्रमावर शेवटचा हात फिरविण्यात येत आहे. या नव्या व्यवस्थेचाच भाग म्हणून शिवसेनेनेही नरमाई दाखवीत राज्यसभेचे खासदार संजय राऊत यांना पक्षाच्या प्रवक्तेपदावरून तडकाफडकी हटविले आहे.
महाराष्ट्रातील भाजपा नेत्यांसोबत या नव्या व्यवस्थेवर चर्चा करण्यास खासकरून कौशल्य विकासमंत्री राजीवप्रताप रुडी यांना मुंबईला पाठविण्यात आले. तसेच मागील १० दिवस पंतप्रधान मोदी हे विदेश दौऱ्यावर असतानाच्या काळात अमित शहा आणि अरुण जेटली हे शिवसेना नेत्यांसोबत सतत फोनवर बोलत होते. या दोन्ही नेत्यांची गुरुवारी दिल्लीत मोदींसोबत चर्चा झाली. चर्चेत नव्या योजनेच्या अंमलबजावणीला अंतिम रूप देण्यात आले.

मुंबई : राष्ट्रवादीचे नेते शरद पवार यांच्याशी जवळीक असल्याचा आक्षेप असणा-या खा. संजय राऊत यांच्यासह पक्षाचे ज्येष्ठ नेते मनोहर जोशी, सुभाष देसाई यांना शिवसेनेच्या प्रवक्तेपदावरून दूर करण्यात आले आहे. मनसेतून शिवसेनेत आलेल्या श्वेता परुळेकर यांचेही प्रवक्तेपद काढून घेण्यात आले आहे. शिवसेना पक्षप्रमुख उद्धव ठाकरे यांनी घेतलेल्या या निर्णयाने पक्षात अनेक तर्क-वितर्क लढविले जात आहेत.
पूर्वीच्या प्रवक्त्यांमध्ये आ. नीलम गोऱ्हे यांना कायम ठेवण्यात आले आहे. प्रवक्त्यांच्या नव्या पॅनलमध्ये खा. अरविंद सावंत, अभिनेते डॉ. अमोल कोल्हे, आमदार विजय शिवतरे, अरविंद भोसले आणि भाजपातून आलेल्या डॉ. मनीषा कायंदे यांचा समावेश करण्यात आला आहे.
खा. संजय राऊत यांची प्रवक्तेपदावरील उचलबांगडी चर्चेचा विषय बनली. मध्यावधी निवडणुका होतील, असे भाकीत शरद पवार यांनी करताच खा. संजय राऊत यांनी भाजपाचे सरकार आम्ही पडू देणार नाही, अशी प्रतिक्रिया दिली होती. त्याचवेळी सेनेचे पक्षप्रमुख ठाकरे केईएम हॉस्पिटलमध्ये कार्यक्रमात होते. तेथे त्यांनी आपण विरोधात बसू व हे सरकार टिकवण्याची जबाबदारी आपली नाही, असे सांगितले होते. याआधीदेखील निवडणुकीच्या तोंडावर गुजराती समाजावर अग्रलेखातून राऊत यांनी टीकास्त्र सोडले होते. ‘सामना’तून सातत्याने होणाऱ्या टीकेमुळे भाजपा नेते नाराज आहेत. या सगळ्याचा परिपाक होऊन खा. राऊत यांना प्रवक्तेपदावरून हटविण्यात आल्याचे समजते. मनोहर जोशी यांनी उद्धव ठाकरेंच्या क्षमतेवरच प्रश्नचिन्ह उपस्थित केले होते. पक्षाच्या कार्यक्रमात त्यांचा सक्रिय सहभागही कमी झाला होता; तर सुभाष देसाई आणि परुळेकर हे प्रवक्ते असूनही माध्यमांमधील कोणत्याही चर्चेत फारसे कधीच सहभागी होत नव्हते.

मुंबई- ‘आम्ही भारताचे लोक, भारताचे एक सार्वभौम! समाजवादी धर्मनिरपेक्ष लोकशाही गणराज्य घडवण्याचा’ असा स्वातंत्र्य, समता न्याय आणि बंधुतेचा संदेश देणा-या भारतीय संविधानाचा गौरव करण्यासाठी राज्यभरातील प्रत्येक शाळांत संविधानाच्या प्रास्ताविकाचे सामूहिक वाचन करण्यात येणार आहे. २६ नोव्हेंबर रोजी ‘भारतीय संविधान दिना’चे औचित्य साधून प्रत्येक शाळांत संविधानाचा जागर करण्यात येणार आहे. शालेय शिक्षण विभागाने यासाठी पुढाकार घेऊन ‘संविधान दिनी’ साजरा विविध कार्यक्रमांचे आयोजन करण्याचे आदेश सर्व शाळांना दिले आहेत.
भारतीय संविधानातील मौलिक तत्त्वे, संवैधानिक हक्क आणि कर्तव्ये स्वतंत्र भारताच्या नागरिकांना संस्कारित करणार आहेत. ही तत्त्वे शालेय जीवनात विद्यार्थ्यांच्या मनावर बिंबवणे व त्यांना देशाचे जागरूक बनवणे आवश्यक आहे. संविधानातील तत्त्वांचा प्रसार आणि प्रचार करण्यासोबत शालेय विद्यार्थ्यांना सुरुवातीपासून संविधानाची पुरेशी ओळख व त्यातील तत्त्वांविषयी जागृती करून देण्यासाठी शिक्षण विभागाने संविधान दिवस साजरा करण्याचे ठरवले आहे.
‘संविधान दिना’च्या निमित्त प्रत्येक शाळेत प्रास्ताविकचे वाचन झाल्यानंतर संविधान यात्रा काढण्यात यावी, संविधानावर आधारित प्रश्नमंजुषा, चित्रकला, स्लोगन, पोस्टर्स, समूहगान स्पर्धाचे कार्यक्रम आयोजित करण्यात यावेत, असेही आदेश देण्यात आले आहेत. तसेच शाळांत संविधानातील अधिकार, कर्तव्य आदी विषयांवर तज्ज्ञांची व्याख्याने आणि विविध सांस्कृतिक कार्यक्रमांचे आयोजन करावे. शाळा व गावांत संविधान सभा भरवून विद्यार्थ्यांना आणि सर्वसामान्य नागरिकांनासंविधानाबाबत माहिती होईल, असे कार्यक्रम आयोजित करावेत अशा सूचनाही देण्यात आल्या आहेत.
आदेश डावलणा-यांवर कारवाई
संविधान दिनाच्या दिवशी सर्व शाळांत परिपाठ अथवा प्रार्थनेच्या वेळी संविधानाच्या प्रास्ताविकेचे वाचन दररोज करण्यासाठी मागील आघाडी सरकारने परिपत्रक काढून आदेश दिले होते. मात्र या आदेशाची अद्याप प्रभावी अंमलबजावणी झालेली नाही. यामध्ये अनुदानित, विनाअनुदानित शाळांकडून सर्रास हे आदेश डावलले जात असून अशा शाळांवर यापुढे कारवाई करण्याची तयारी शालेय शिक्षण विभागाकडून करण्यात आल्याची माहिती विभागातील अधिका-यांकडून देण्यात आली.

नवी दिल्ली- अंडरवर्ल्ड डॉन दाऊद इब्राहिमला पाकिस्तान आश्रय देत असून त्याचे वास्तव्य सध्या पाकिस्तान-अफगाणिस्तान सीमेवर असल्याची माहिती केंद्रीय गृहमंत्री राजनाथ सिंह यांनी शनिवारी दिली.
राजधानीत एका वर्तमानपत्राने आयोजित केलेल्या व्याख्यानमालेत ते बोलत होते. सिंह म्हणाले की, दाऊदला भारताच्या ताब्यात देण्याची मागणी वेळोवेळी करण्यात आली. पाकिस्तानचे पंतप्रधान भारतात आले तेव्हाही ही बाब त्यांच्या कानावर घातली होती. आता त्याला पकडण्यासाठी पाकिस्तानावर राजनैतिक दबाव वाढवण्यात येत आहे.
दाऊदला पकडण्यासाठी काही कालावधी द्या. याबाबतच्या धोरणात्मक बाबी जाहीर करू शकत नाही. मात्र, दाऊदला भारताच्या ताब्यात देण्यासाठी आम्ही व्यापक प्रयत्न करत आहोत, असेही ते म्हणाले. भारतात थैमान घालणारे दहशतवादी संकट पूर्णपणे पाकिस्तान पुरस्कृत आहे. पाकिस्तानची गुप्तचर संघटना ‘आयएसआय’ ही दहशतवाद्यांना मदत करत आहे. २००८ मध्ये मुंबई हल्ल्यातील सूत्रधारांना शिक्षा करण्याबाबत पाकिस्तान गंभीर नाही. त्यामुळेच याबाबतचा खटला अत्यंत संथगतीने सुरू आहे, असा आरोप त्यांनी केला. भारताला पाकिस्तानच नव्हे तर शेजारच्या प्रत्येक देशांशी मैत्रीपूर्ण संबंध हवे आहेत. भारताशी मैत्रीचे संबंध ठेवण्यासाठी पाकिस्तानकडूनही प्रयत्न करणे गरजेचे आहे, असे त्यांनी स्पष्ट केले.

हिसार – हरयाणात तब्बल ३३ तासांच्या अथक प्रयत्नानंतर पोलिसांनी सतलोक आश्रमातून बाबा रामपाल याला अटक केली. त्याच्या अटकेनंतर तात्काळ आश्रमात झडती घेण्यात आली. स्वयंघोषित संत असणाऱ्या बाबा रामपालच्या आश्रमात अनेक आक्षेपार्ह गोष्टी सापडल्याने पोलीस देखील चक्रावून गेले आहेत. निरोधाची पाकिटे, महिला स्वच्छतागृहात छुपे कॅमेरे, अमली पदार्थ, तसेच बेशुद्ध अवस्थेत पोहचविण्याचे गॅस आणि यासोबत अनेक अश्लील साहित्य आश्रमात आढळून आले आहे.
सुत्रांच्या माहितीनुसार, ​मागील काही दिवसापासून आश्रमात लैंगिक अत्याचार होत असल्याचाही आरोप अनेक महिलांनी केला. रामपालने पोलिसांना शरण जाण्यापूर्वी पोलिसांना काही अटीही घातल्या होत्या. त्यातील प्रमुख अट म्हणजे अटकेनंतर आश्रमाची झडती घेऊ नये. मात्र, पोलिसांनी त्याच्या या सगळ्या अटी नाकारल्या. पोलिसांच्या कारवाईमध्ये जवळजवळ २० हजार अनुयायींना बाहेर काढल्यानंतर नऊ वाजेच्या दरम्यान रामपालच्या मुसक्या आवळल्या. रामपालने अनुयायांना आश्रमात ओलीस ठेवले असल्याचे आश्रमातून बाहेर पडलेल्यांनी पोलिसांना माहिती दिली.
रामपालच्या अटकेनंतर पोलिसांनी आश्रमातील लोकांना तात्काळ बाहेर काढले. मात्र तरीही काहीजण आश्रमातून बाहेर येणास तयार नसल्याने पोलिसांनी आश्रमाची झडती सुरु केली. सर्वप्रथम पोलिसांनी मेन गेट जवळील महिला प्रसाधनगृहची झडती घेतली. त्यावेळेस पोलिसांना शौचालयात छुपे कॅमेरे आढळून आले. तसेच निरोध देखील सापडले. आश्रमात एका विशिष्ट गॅसचा दुर्गंध येत होता. हा वायू नायट्रोजन गॅस असल्याचे डॉक्टरांच्या अहवालातून समोर आले.
आश्रमातील महिलांनी बाहेर आल्यानंतर आश्रमातील कुकर्मांचा पाढाच वाढण्यास सुरुवात केली. महिलांनी केलेल्या आरोपानुसार, रामपालचे सरंक्षक देखील महिलांना डांबून त्यांच्यावर लैंगिक अत्याचार करीत होते. एका महिलेला सात दिवसापासून आश्रमातून डांबून ठेवण्यात आले होते. तसेच वारंवार लैंगिक अत्याचार केला असल्याचा आरोपही पीडित महिलेने केला आहे.
पोलिसांनी रामपाल सोबत त्याच्या अनेक साथीदारांना अटक केली आहे. रामपालच्या आश्रमाचा संपूर्ण कारभार त्याचा भाऊ पुरुषोत्तम दास, जगदीश ढाका, प्रवक्ता राजकपूर आणि एक महिलेला देखील पोलिसांनी अटक केली आहे. या प्रकरणामुळे रामपालाची काळी बाजू जगासमोर उघड झाली आहे.

यवतमाळ – आर्णी मार्गावर असलेल्या परफेक्टर हार्डवेअर दुकानाला लागलेल्या भिषण आगीत ४० लाखाचे नुकसान झाले. ही घटना काल बुधवारी रात्री दहा वाजता दरम्यान घडली. रवींद्र रतनलाल मुंधडा (४८) रा. वडगाव असे दुकान मालकाचे नाव आहे.
मुंधडा हे रात्री ९ वाजता दुकान बंद करून घरी निघून गेले होते. मात्र रात्री १० वाजता दुकानाला आग लागल्याची घटना उघडकीस येताच आर्णीरोड परिसरात एकच खळबळ उडाली. या घटनेची माहिती मिळताच मुंधडा यांनी तत्काळ घटनास्थळ गाठले. बाजूच्या दुकानदारांनी आगीची माहिती अग्निशमन दलाला दिली. त्यावरून यवतमाळ नगरपालिकेचे बंब घटनास्थळी दाखल झाले. त्यांनी पाण्याचा मारा करून आगीवर नियंत्रण मिळविण्याचा आटोकाट प्रयत्न केला. मात्र आगीने रौद्र रुप धारण केल्यामुळे आग नियंत्रणात आणणे कठीण झाले होते. घटनास्थळी नागरिकांची मोठ्या संख्येने गर्दी झाल्यामुळे पाण्याचा मारा करण्यास अडचण जात होती. अखेर वडगाव रोड पोलीस ठाण्यातील कर्मचारी व चार्ली कमांडोने गर्दी पांगविल्यानंतर रात्री २.३० वाजता आग नियंत्रणात आली. यासाठी १८ बंब पाणी लागल्याची माहिती सूत्रांनी दिली. परफेक्टर हार्डवेअर दुकानात असलेले साहित्य पूर्णपणे जळून खाक झाले. यात टरपेन टाईन, आॅईल पेंट, प्लास्टीक पाईक, नॉयलोन दोरी, फर्निचर, रेकॉर्ड आदी साहित्याचा समावेश आहे. अद्यापत घटनास्थळाचा पंचनामा करण्यात न आल्यामुळे नुकसानीचा हा आकडा वाढण्याची शक्यात रवींद्र मुंधडा यांनी वर्तविली. ही आग नेमकी कशामुळे लागली हे मात्र कळू शकले नाही. या घटनेची तक्रार वडगाव रोड पोलीस ठाण्यात देण्यात आली.