तोफखाना सेंटर नासीक रोड कॅम्प-2 येथे दिनांक 20 ते 22 नोव्हेबर 2014 या कालावधीत आजी / माजी सैनिकांची मुले, राज्य व देश पातळीवरील खेळाडू यांची सोल्जर जीडी, सोल्जर एसएचजीडी, सोल्जर ट्रेडसमन, या पदासाठी सैन्य भरती मेळाव्याचे आयोजन केले आहे.

नागपूर  – भाजपा आणि शिवसेनेमध्ये युती व्हावी यासाठी राष्ट्रीय स्वयंसेवक संघाचे सरसंघचालक मोहन भागवत यांनी पुढाकार घेतल्याचे वृत्त आहे. सरकार वाचवण्यासाठी राष्ट्रवादी काँग्रेसचा टेकू घेण्यावरुन भाजपावर चोहोबाजूंनी टीका होत असतानाच आता मोहन भागवत मैदानात उतरल्याने भाजप – शिवसेनेमध्ये पुन्हा युती होण्याच्या आशा पल्लवीत झाल्या आहेत.
सत्ता स्थापनेत शिवसेनेसोबतची चर्चा फिस्कटल्यावर भाजपाने आवाजी मतदानाने विश्वासदर्शक ठराव जिंकून सरकारला तारले आहे. भाजपाने उघडपणे राष्ट्रवादीचा पाठिंबा घेण्याची नाचक्की टाळली असली तरी भविष्यात राष्ट्रवादीच्या टेकूने सरकार चालवण्यास भाजपातील एक गट विरोधात आहे. तर शिवसेनेतील अनेक आमदारही सत्तेत सहभागी होण्यासाठी तयार आहेत.  अखेरीस सरसंघचालक मोहन भागवत यांनी शिवसेना – भाजपमध्ये पुन्हा युती व्हावी यासाठी प्रयत्न सुरु केल्याचे समजते. यासंदर्भात उद्धव ठाकरे आणि भागवत यांच्यामध्ये फोनवर चर्चा झाल्याचे सूत्रांनी सांगितले. पंतप्रधान नरेंद्र मोदी ऑस्ट्रेलिया दौ-यावरुन परतल्यावर याविषयी सकारात्मक निर्णय घेतला जाईल असे आश्वासनही भागवत यांनी दिल्याचे एका वृत्तवाहिनीने म्हटले आहे. त्यामुळे भागवत शिवसेना – भाजपामध्ये समेट घडवण्याच यशस्वी होतात का याकडे सर्वांचे लक्ष लागले आहे.

नेल्लोर(आंध्रप्रदेश) – भारताचा मास्टर ब्लास्टर आणि राज्यसभा खासदार सचिन तेंडुलकरने आदर्श ग्राम योजनेंतर्गत आंध्रप्रदेशमधील एक गाव दत्तक घेतले आहे. आंध्रमधील पुत्तमराजूवरी कंद्रिका या दत्तक घेतलेल्या गावास सचिनने रविवारी भेट दिली.
आंध्रप्रदेशातील नेल्लोर जिल्ह्यात हे पत्तूमराजूवरी कंद्रिका गाव वसलेले आहे. सकाळी नऊ वाजता सचिनचे या गावात आगमन झाले. यावेळी मोठ्या उत्साहात गावातील नागरिकांनी सचिनचे स्वागत केले. गावात सचिनच्या स्वागतासाठी मोठी पोस्टर्स लावण्यात आली होती. तसेच गावातील नागरिकांसोबतच शेजारच्या गावातील महिला, मुलांनीही कंद्रिका गावात सचिनची छबी टिपण्यासाठी एकच गर्दी केली होती.
जगभरात सचिनचे मोठ्या प्रमाणावर चाहते आहेत. त्याला पत्तूमराजूवरी कंद्रिका गावही कसे अपवाद असणार. तेथेही सचिनचे अनेक चाहते आहेत. तेथील वेंकटेश्वरलू या चाहत्याने सचिन येणार असल्याने त्याच्या चेह-याचे एक हजार मुखवटे त्याने वाटले होते. ‘पुत्तमराजूवरी कंद्रिका हे गाव सचिनमुळे प्रकाशझोतात आले आहे. याआधी शेजारच्या गावांनाही आमच्या गावाबद्दल माहिती नव्हती. मी याआधी कधीही सचिनला पाहिले नव्हते. मात्र आज मला ही संधी मिळाली. मी खूप खूश आहे.’ अशी प्रतिक्रिया सचिनचा चाहता वेंकटेश्वरलू याने दिली.
यावेळी सचिनने गावातील नागरिकांशीही मनमोकळा संवाद साधला. त्यांच्या समस्या जाणून घेण्याचा प्रयत्न केला. रस्त्यांची कमतरता, शौचालयांची स्थिती तसेच वीजपुरवठा यासांरख्या अनेक या समस्या गावातील नागरिकांना भेडसावत आहेत. यासाठी सचिनने खासदारासांठी असणा-या स्थानिक क्षेत्र विकास योजनेतून तीन कोटी रूपयांची तरतूद केली आहे.

जर्काता – पूर्व इंडोनेशियातील मलुकु बेट शनिवारी सकाळी ७.३ रिश्टर स्केल तीव्रतेच्या भूंकपाच्या धक्क्याने हादरले. या भूकंपामुळे कुठलीही जिवीतहानी झाली नसली तरी, त्सुनामीचा इशारा देण्यात आला आहे.
कोटा टर्नेटपासून १५४ कि.मी. अंतरावर उत्तरपश्चिमेला असलेल्या समुद्रात ४६ कि.मी. आत या भूकंपाचा केंद्रबिंदू होता. केंद्रबिंदूपासून ३०० कि.मी. च्या किनारपट्टी भागात त्सुनामीच्या लाटा उसळण्याची शक्यता असल्याचा इशारा पॅसिफित त्सुनामी इशारा केंद्राने दिला आहे.
इंडोनेशिया, फिलिपाईन्स, जपान, तैवान आणि दक्षिण प्रशांत महासागारातील बेटांना त्सुनामीच्या लाटा धडकू शकतात असे पॅसिफिक त्सुनामी इशारा केंद्राने म्हटले आहे. तीस सेंटीमीटर ते एक मीटर उंचीच्या लाटा इंडोनेशियाच्या बेटांना धडकू शकतात तर, फिलिपाईन्समध्ये तीस सेंटीमीटर पेक्षा कमी उंचीच्या लाटा उसळण्याची शक्यता वर्तवण्यात आली आहे.

बिलासपूर – काँग्रेस उपाध्यक्ष राहुल गांधी यांनी शनिवारी छत्तीसगडला जाऊन नसबंदी शस्त्रक्रिय़ेनंतर मरण पावलेल्या महिलांच्या कुटुंबियांची भेट घेतली.
राहुल गांधी यांनी या घटनेसाठी राज्य सरकारला जबाबदार धरले आहे. राज्य सरकार आपल्यावरील जबाबदारी टाळत असून, रमण सिंह सरकार लपवाछपवी करत आहे. ही निव्वळ दुर्लक्षाने घडलेली घटना नाही. यात भ्रष्टाचार असून बनावट औषधांचा वापर झाल्याचा आरोप राहुल यांनी केला.
बिलासपूरमधील ज्या शिबिरात नसबंदी शस्त्रक्रिया झाल्या तेथे चांगली व्यवस्था नव्हती येथे आलेल्या अनेकांना इजा झाली होती. राज्य सरकार या संपूर्ण प्रकरणाची जबाबदारी टाळत असून, लपवा छपवी सुरु असल्याचे राहुल म्हणाले.
राहुल यांनी रुग्णालयालाही भेट देऊन तेथे उपचार घेत असलेल्या महिलांच्या प्रकृतीची विचारपूस केली. बिलासपूरमधील नसबंदी शिबिरात शस्त्रक्रिया करुन घेणा-या १३ महिलांचा मृत्यू झाला असून, १३८ महिला आजारी आहेत. आरोग्य विभागाच्या निष्काळजीपणामुळे ही घटना घडली. या प्रकरणी छत्तीसगड पोलिसांनी  नसबंदी शस्त्रक्रिया पार पाडणारे डॉ. आर.के. गुप्ता यांना अटक केली आहे. डॉ. गुप्तांना मदत करणारे डॉक्टर आणि सहका-यांचा पोलिस शोध घेत आहेत.

मुंबई -विधानभवनात गाडी अडवण्याचा केलेला प्रकार आणि त्या गदारोळात झालेल्या धक्काबुक्कीबद्दल काँग्रेस आमदारांनी आज राज्यपाल सी. विद्यासागर राव यांची क्षमा मागितली आहे. राज्यातील भाजप सरकारला पुन्हा बहुमत सिद्ध करायला सांगावं, या मागणीसाठी काँग्रेसच्या शिष्टमंडळानं राज्यपालांची भेट घेतली, तेव्हाच झाल्या प्रकाराबद्दल त्यांनी दिलगिरी व्यक्त केली.
गेल्या बुधवारी, मुख्यमंत्री देवेंद्र फडणवीस यांच्या नेतृत्वाखालील सरकारनं विधानसभेत ‘विश्वास’ जिंकला. परंतु, त्यांनी आवाजी मतदानानं बहुमत सिद्ध केल्यानं राजकारणात वादाची ठिणगी पडली आहे. भाजपनं नैतिकता गुंडाळून ठेवली, राष्ट्रवादीचा पाठिंबा घेतल्याचा ठपका बसू नये म्हणून आवाजी मतदानाची खेळी केली, अशी टीका शिवसेना आणि काँग्रेसनं त्याच दिवशी केली. या विश्वासमताच्या विरोधात राज्यपालांकडे दाद मागून, सरकारला पुन्हा बहुमत सिद्ध करण्याची मागणी करणार असल्याचं काँग्रेसनं जाहीर केलं होतं. त्यानुसारच, माजी मुख्यमंत्री पृथ्वीराज चव्हाण, विधिमंडळ गटनेते राधाकृष्ण विखे-पाटील, प्रदेशाध्यक्ष माणिकराव ठाकरे यांच्या नेतृत्वाखाली काँग्रेस आमदारांच्या शिष्टमंडळानं राजभवनवर सी. विद्यासागर राव यांची भेट घेतली.
देवेंद्र फडणवीस सरकारला विधानसभेत बहुमत सिद्ध करता आलेलं नाही. त्यामुळे विश्वासदर्शक ठरावावर पुन्हा मतदान घेण्याचे आदेश आपण द्यावेत, अशा आशयाचं निवेदन काँग्रेसनं राज्यपालांना दिलंय. बहुमत सिद्ध होईपर्यंत कुठलाही धोरणात्मक निर्णय घेण्यास त्यांना संमती देऊ नये, अशी आग्रही सूचनाही त्यांनी केली आहे. त्याचवेळी, विधानभवन परिसरात केलेल्या गोंधळाबद्दल काँग्रेसनं राव यांची माफी मागितली. भाजपनं आवाजी मतदानानं बहुमत सिद्ध केल्याच्या निषेधार्थ काँग्रेस आमदारांनी राज्यपालांची गाडी अडवली होती आणि त्यांना धक्काबुक्कीचाही प्रयत्न केला होता. या प्रकरणी पाच काँग्रेस आमदारांवर निलंबनाची कारवाईही करण्यात आली आहे.

यवतमाळ : येथील तहसिल चौकातील दगडी प्रशासकीय ईमारत परिसरात आज स्वच्छता मोहिम राबविण्यात आली. स्वच्छ भारत मिशन अंतर्गत राबविण्यात आलेल्या या मोहिमेत ईमारतीच्या सातही शासकीय कार्यालयातील अधिकारी कर्मचारी मोठ्या प्रमाणावर सहभागी झाले होते. यवतमाळ नगर परिषदेच्या सहकार्याने ही मोहिम राबविण्यात आली. यावेळी नगर परिषदेचे मुख्याधिकारी रविंद्र पांढरे, जिल्हा महिला व बालविकास अधिकारी अर्चना इंगोले, प्र. जिल्हा माहिती अधिकारी मंगेश वरकड, सहाय्यक जिल्हा सैनिक कल्याण अधिकारी वसंत मते, जिल्हा ग्रंथालय अधिकारी प्रमोद रामशेट्टीवार, सहकार विभागाचे कार्यालय अधिक्षक गजानन वडेकर यांच्यासह सातही कार्यालयाचे सर्व कर्मचारी सहभागी झाले होते. यावेळी सर्व अधिकारी कर्मचाऱ्यांनी स्वत: हातात झाडू घेवून संपूर्ण
ईमारत परिसराची साफसफाई केली. नगर परिषदच्यावतीने परिसरात जमा झालेला कचरा ट्रॅक्टरमध्ये टाकुन  परिसरात साचलेला जाळण्यायोग्य कचरा यावेळी कर्मचाऱ्यांनी जमा करुन जाळून नष्ट केला. आज राबविण्यात आलेल्या स्वच्छता मोहिमेमुळे परिसर स्वच्छ झाला असून यापुढे परिसर रोज स्वच्छ करण्याचा
संकल्प सर्व अधिकारी, कर्मचाऱ्यांनी यावेळी केला. या अभियानात जिल्हा उपनिबंधक सहकारी संस्था कार्यालय, जिल्हा महिला व बालविकास अधिकारी कार्यालय, जिल्हा माहिती कार्यालय, जिल्हा सांख्यिकी कार्यालय, जिल्हा सैनिक कल्याण कार्यालय, शासकीय जिल्हा ग्रंथालय, ॲन्टी करप्शन कार्यालय आदी कार्यालये सहभागी झाले होते.

कोलकाता – शारदा चिटफंड घोटाळ्यातील आरोपी आणि तृणमूल काँग्रेसचे निलंबित खासदार कुणाल घोष यांनी गुरुवारी रात्री अलिपूर तुरुंगात झोपेच्या गोळ्या घेऊन आत्महत्येचा प्रयत्न केला. यानंतर त्यांना तातडीने रुग्णालयात दाखल करण्यात आले असून त्यांची प्रकृती स्थिर आहे. या प्रकरणी पश्चिम बंगालच्या मुख्यमंत्री ममता बॅनर्जी यांनी गृहसुधार निरीक्षक, तुुरुंगातील डॉक्टर आणि या प्रकरणात हात असलेल्या तुरुंगातील कर्मचा-यांना निलंबित करण्याचे आदेश दिले आहेत.कुणाल घोष यांनी आत्महत्या करण्यासाठी झोपेच्या गोळ्या घेतल्या. काही वेळाने त्यांनी हे डॉक्टरांना सांगितले. त्यानंतर त्यांना ताबडतोब एसएसकेएम रुग्णालयात दाखल करण्यात आल्याचे पश्चिम बंगाल गृहसुधार मंत्री एच.के.स्वाफी यांनी सांगितले. १० नोव्हेंबर रोजी घोष यांनी स्थानिक न्यायालयात हजर करण्यापूर्वी येत्या तीन दिवसांत जर सीबीआयने या घोटाळ्यात सहभागी असलेल्या अन्य आरोपींवर योग्य कारवाई केली नाही तर मी आत्महत्या करेन अशी धमकी दिली होती. या घोटाळ्यात सहभागी असलेले इतर आरोपी स्वतंत्रपणे फिरत आहे आणि मी मात्र येथे तुरुंगात आहे. मी तीन दिवसांची मुदत देतो, जर या तीन दिवसांत घोटाळ्यातील इतर सहभागी लोकांवर योग्य कारवाई झाली नाही तर मी आत्महत्या करेन असे घोष यांनी न्यायदंडाधिकारी अरविंद मिश्रा यांना सांगितले होते.कुणाल घोष हे शारदा ग्रुपचे माजी सीईओ आहेत. कोट्यावधीच्या शारदा चिटफंड घोटाळ्यातील ते आरोपी आहेत. गेल्या एक वर्षांपासून ते तुरुंगात आहेत.