यवतमाळ, दि. ९ – येथील शासकीय वैद्यकीय महाविद्यालय चौकातील निक्स कॅफेत महाविद्यालयीन तरूण तरूणींची रासलीला सुरू असताना उपविभागीय पोलीस अधिकाºयांच्या पथकाने धाड टाकुन महाविद्यालयीन विद्यार्थ्यांसह १२ जणांना ताब्यात घेतले आहे. आज सोमवारी ९ मार्च रोजी ही कार्यवाही केली असून युवकांजवळून गर्भनिरोधक साहित्य जप्त केले आहे.
सहा तरूणीसह पराग पुडके (२१) रा. जगदंबा मंदीरजवळ पुसद, शुभम राजेंद्र जयस्वाल (२०) रा. समर्थवाडी यवतमाळ, प्रवर मुनींद्र सहीर (१९) रा. पाटीपूरा, अतूल विनय राऊत (२१) रा. बांगरनगर, कौस्तूक प्रकाश बगमारे रा. जयप्रभात चौक माळीपूरा, स्वप्नील हरीभाऊ रामगीरवार (२५) रा. विदर्भ हाऊसिंग सोसायटी व कॅ फे चालक स्वप्नील मधूकर उजवणे (२२) रा. चापनवाडी इत्यांदीना पथकाने ताब्यात घेतले आहे. स्थानिक जिल्हा शासकीय रुग्णालय चौकातील निक्स कॅफेत गेल्या अनेक महिन्यापासून महाविद्यालयीन तरूण, तरूणींचे अश्लील चाळे सुरू असल्याची माहितीा आज उपविभागीय पोलीस अधिकाºयांच्या पथकाला मिळाली होती. त्यावरून पथकाने सापळा रचून दुपारच्या सुमारास कॅफेवर धाड टाकली. यावेळी सहा तरूणी व सहा तरूण अश्लील चाळे करताना आढळून आले. कॅफेतून गर्भनिरोधक साहित्य देखील जप्त करण्यात आले आहे. या कॅफेला अधिकृत परवानगी देखील नसून, केवळ महाविद्यालयीन तरूण, तरूणींसाठी हा कॅफे चालविल्या जात होता. पथकाने बारा तरूणतरूणीसह कॅफे चालकाला ताब्यात घेण्यात आले आहे. यामध्ये इंजिनियरींग, लॉ चे विद्यार्थी असून, त्यांच्यावर प्रतिबंधात्मक कारवाई करण्यात आली आहे. शहरात अन्य ठिकाणी देखील असाच प्रकार सुरू असून, यासाठी डिवाएसपीचे पथक विशेष मोहिम राबविणार आहे. हि कारवाई उपविभागीय पोलीस अधिकारी राहुल मदने, पोलीस निरीक्षक संग्राम ताटे, इकबाल शेख, संतोष मडावी, प्रमोद मडावी, रूतूराज मेढवे, परेश मानकर, शांता जांभूळकर, रेखा खंडाळकर आदींनी केली.

यवतमाळ, दि. ९ – भरधाव वाहनाने धडक दिल्याने लासीना येथील युवकाचा मृत्यू झाला होता. त्यामुळे नागरिकांनी गतीरोध बसविण्याची मागणी केली होती. मात्र सबंधित विभागाने दुर्लक्ष केल्याने संतप्त नागरिकांनी आज सोमवारी लासीना येथे चक्का जाम केला.
सिमेंट घेऊन जाणाºया ट्रकने चिरडल्याने अभय गौतम सोनोने (२२) रा. लासिना या युवकाचा मृत्यू झाला होता. यावेळी नागरिकांनी रोष व्यक्त करून गतीरोधक बसविण्याची मागणी केली होती. मात्र तीन दिवसानंतरही सार्वजनीक बांधकाम विभागाने दुर्लक्ष केले होते. दरम्यान आज नागरिकांनी आज सोमवारी सकाळी १२ वाजता पासून चक्का जाम आंदोलन केले. या बाबतची माहिती मिळताच यवतमाळ येथील सार्वजनिक बांधकाम विभागाचे अधिकारी, दारव्हा येथील उपविभागीय पोलीस अधिकारी कल्पना भराडे, परिविक्षाधिन पोलीस उपअधिक्षक विजय लघारे, नेरचे ठाणेदार गणेश भावसार, जिल्हा वाहतुक शाखेचे पोलीस निरीक्षक विलास वांदिले तेथे दाखल झाले. सायंकाळी सहा वाजता गतिरोधक तयार केल्याने नागरिकांनी आंदोलन मागे घेतले. या आंदोलनाने यवतमाळ-अमरावती मार्गावरील वाहतुक सहा तास खोळंबली होती.

नवी दिल्ली, दि. ९ – फुटीरतवादी नेता मसरत आलमच्या सुटकेच्या निर्णयाविरोधात विरोधकांनी लोकसभेत गदारोळ माजवल्याने सभागृहाचे कामकाज काही काळासाठी तहकूब करण्यात आले. आलमच्या सुटकेबाबत पंतप्रधानांनी संसदेत स्पष्टीकरण द्यावे अशी मागणी विरोधकांनी सभागृहात केली. मसरतच्या सुटकेचा निर्णय मुफ्तींनी एकट्याने घेणे शक्य नाही, त्यांनी पंतप्रधान नरेंद्र मोदींशी चर्चा केली असावी असे काँग्रेस नेते मल्लिकार्जुन खर्गे यांनी म्हटले. मात्र आलमच्या सुटकेच्या निर्णयाबाबत केंद्र सरकारशी कुठलीही चर्चा झालेली नाही, त्याबद्दल सरकारला कुठलीही माहिती नव्हती व सराकार या निर्णयात केंद्र सरकार सहभागी नव्हते असे संसदीय कामकाज मंत्री व्यंकय्या नायडू यांनी स्पष्ट केले. दरम्यान याप्रकरणी केंद्रीय गृहमंत्री राजनाथ सिंह दोन्ही सभागृहात निवेदन देणार आहेत.
जम्मू काश्मीरचे मुख्यमंत्री मुफ्ती मोहम्मद सईद यांनी सर्व राजकीय कैद्यांची सुटका करण्याचे आदेश दिले होते. यानुसार मसरत आलमचीही शनिवारी सुटका करण्यात आली. २०१० मध्ये आंदोलनादरम्यान आंदोलकांना भडकावल्याप्रकरणी आलमविरोधात गुन्हा दाखल होता. आलमची माहिती देणा-या तत्कालीन सरकारने १० लाख रुपयांचे पारितोषिकही जाहीर केले होते. अशा वादग्रस्त नेत्याची सुटका केल्याने सईद सरकारवर चोहोबाजूंनी टीका होत आहे.

मुंबई : गड-किल्ले हा महाराष्ट्राच्या सांस्कृतिक आणि ऐतिहासिक परंपरेचा अमूल्य ठेवा असून आमचे सरकार गड- किल्ल्यांच्या संवर्धनासाठी कटिबद्ध आहे. या अमूल्य ठेव्याचे संवर्धन करण्यासाठी सरकारतर्फे समिती स्थापन करण्यात येणार असल्याची घोषणा सांस्कृतिक कार्यमंत्री विनोद तावडे यांनी केली.
महाराष्ट्रात तब्बल ३५० किल्ले आहेत. यापैकी ४९ किल्ले राज्य संरक्षक स्मारक म्हणून घोषित करण्यात आले आहेत तर केंद्र सरकारने संरक्षक स्मारक घोषित केलेल्या किल्ल्यांची संख्या ही ४७ इतकी आहे, अशी माहिती विनोद तावडे यांनी दिली. राज्यातील किल्ल्यांच्या संवर्धनासाठी राज्य सरकार आवश्यक निधी उपलब्ध करुन देईल तसेच केंद्र सरकारकडून मिळणाऱ्या निधीबाबतही योग्य पाठपुरावा करेल असे सांगतानाच किल्ल्यांच्या संवर्धनासाठी एक समिती स्थापन करण्यात येणार असून, यामध्ये निनाद बेडेकर, ऋषिकेश यादव आदी तज्ज्ञ मंडळींचा समावेश असेल, असेही तावडे यांनी स्पष्ट केले. केंद्राकडे किल्ल्यांसाठी मोठ्या प्रमाणात निधी असून केंद्राच्या अखत्यारीतील किल्ल्यांसाठी राज्याकडून नक्कीच पाठपुरावा करणार असून, खासगी किल्ले जनतेसाठी खुले करण्याचा प्रयत्न करण्यात येतील, तसेच कायद्यांमध्ये आवश्यक बदल करण्याचा विचार करण्यात येईल, असे विनोद तावडे यांनी स्पष्ट केले.

यवतमाळ, दि. 8 : शिवाजी चौक माळीपुरा येथून मोटारसायकल रॅलीने प्रभातफेरी काढण्यात आली. जागतिक महिला दिनाच्या औचित्याने या रॅलीचे नेतृत्व तरूणींनी केले. या रॅलीत पालकमंत्री संजय राठोड यांची ‘बुलेट राईड’ विशेष आकर्षण ठरली. स्वत: पालकमंत्री रॅलीत बुलेट घेऊन सहभागी झाल्याने कार्यकर्त्यांमध्येही उत्साह संचारला. यावेळी शेकडो शिवशैनिक आपल्या बाईक्सला भगवे झेंडे लावून या रॅलीत सहभागी झाले. यावेळी संपूर्ण शहर जय भवानी, जय शिवाजीच्या जयघोषांनी निनादून गेले. पाटीपुरा, कळंब चौक, आठवडी बाजार, अँग्लो हिंदी हायस्कूल, माईंदे चौक, दाते कॉलेज चौक, शिवाजी नगर, बसस्थानक चौक, हनुमान आखाडा चौक, स्टेट बँक चौक, वंजारी फैल, कॉटन मार्केट अशी मार्गस्थ होत या रॅलीचा माळीपुर्‍यात समारोप झाला. या मोटारसायकल रॅलीत पालकमंत्री संजय राठोड हे आपले चिरंजीव सोहम याला घेऊन पूर्णवेळ बुलेटने फिरले. पालकमंत्र्यांची ही बुलेट राईड शहरवासींयांसाठी औत्सुक्याचा विषय ठरली. याप्रसंगी मार्गातील सर्व महामानवांच्या पुतळ्यांना, प्रतिमांना पुष्पहार घालून अभिवादन करण्यात आले. या संपूर्ण कार्यक्रमाच्या यशस्वीतेसाठी श्री शिवाजी मंडळाच्या कार्यकर्त्यांसह शिवसैनिकांनी अथक परिश्रम घेतले. शिव छत्रपती दौड स्पर्धेसाठी संयोजक प्रा. अनंत पांडे, राजू जॉन, जितेंद्र सातपूते, मनोज येंडे यांच्यासह विविध शाळा, महाविद्यालयातील शारीरिक शिक्षकांनी सहकार्य केले. कार्यक्रमासाठी पोलिसांनी चोख व्यवस्था ठेवली होती.

नवी दिल्ली – महिलांविरोधातील अत्याचाराचा तीव्र शब्दांत निषेध नोंदवित पंतप्रधान नरेंद्र मोदी यांनी आज (रविवार) अडचणीत सापडलेल्या महिलांसाठी “मोबाईल हेल्पलाईन‘ व विशेष केंद्राची स्थापना करण्याची घोषणा केली. जागतिक महिला दिनानिमित्त सरकारची भूमिका स्पष्ट करताना पंतप्रधानांनी महिलांच्या आयुष्यात सकारात्मक बदल आणण्याचे ध्येय हे केंद्र सरकारच्या विकासात्मक धोरणाच्या केंद्रस्थानी असल्याचे सांगितले.
“महिलांविरोधातील अत्याचाराच्या घटना पाहिल्यानंतर मान लाजेने खाली जाते. महिलांविरोधील सर्व प्रकारचा अन्याय संपविण्यासाठी आपण एकत्रितरित्या प्रयत्न करावयास हवा. आज आपल्या विकासाच्या प्रवासामध्ये महिलांना सामावून घेऊन, त्यांना समान स्थान देण्याच्या आमच्या प्रतिज्ञेचा पुनरुच्चार करावयास हवा. महिलांच्या आयुष्यामध्ये सकारात्मक बदल घडवून आणण्यासाठी माझ्या सरकारने काही उपाययोजना केल्या आहेत. हिंसाचार वा इतर स्वरुपाच्या अत्याचाराचा सामना करावयास लागलेल्या महिलांना कायदेशीर सल्ला व मानसिक समुपदेशनाची सुविधा देण्यासाठी सरकार विशेष केंद्रे स्थापन करत आहे. याचबरोबर महिलांसाठी 181 या क्रमांकावर विशेष हेल्पलाईन सुरु करण्यात आली आहे. विविध योजनांच्या माध्यमामधून महिलांच्या आयुष्यात सुधारणा घडवून आणण्याप्रति सरकार कटिबद्ध आहे,‘‘ असे मोदी यांनी म्हटले आहे.
याचबरोबर, प्रधान मंत्री सुरक्षा बीमा योजना, प्रधान मंत्री जीवन बीमा योजना आणि अटल पेन्शन योजना या नुकत्याच संसदेत मांडलेया अर्थसंकल्पात सादर करण्यात आलेल्या योजनांमुळेही महिलांना मोठी मदत मिळणार असल्याचे निरीक्षण मोदी यांनी यावेळी नोंदविले.

नवी दिल्ली,दि. ८ – तत्कालीन अर्थमंत्री प्रणव मुखर्जी यांनी २००८ – ०९ च्या काळात भारतीय अर्थव्यवस्थेला चालना देण्यासाठी प्रोत्साहन पॅकेजची घोषणा केली होती. मात्र या नादात महागाई गगनाला भिडली व परिणामी गेल्या वर्षी लोकसभा निवडणुकीत युपीएचा पराभव झाला असे मत काँग्रेसचे ज्येष्ठ नेते व माजी अर्थमंत्री पी. चिदंबरम यांनी मांडले आहे.
चेन्नईतील एका महाविद्यालयात अर्थसंकल्पसंदर्भात संमेलनाचे आयोजन करण्यात आले होते. या संमेलनात विद्यार्थ्यांना मार्गदर्शन करताना पी. चिदंबरम यांनी यूपीएचा व वाढत्या महागाईचे कारण यावर भाष्य केले. चिदंबरम म्हणता, २००८ – ०९मध्ये यूपीएतील तत्कालीन अर्थमंत्री प्रणव मुखर्जी यांनी अर्थव्यवस्थेला गति देण्यासाठी प्रोत्साहन पॅकेज दिले. पण यामुळे फिस्कल कन्सोलिडेशन नॉर्म्सचे उल्लंघन झाले. याचा फटका म्हणजे महागाई गगनाला भिडली, रुपयांचा भावही घसरला असे चिदंबरम यांनी नमूद केले. अखेरीस २०१४ च्या लोकसभा निवडणुकीत मतदारांनी काँग्रेसला नाकारले व यूपीएचा पराभव झाला असेही त्यांनी म्हटले आहे.

दिमापूर – दिमापूरमध्ये बलात्का-याला तुरुंगातून बाहेर काढून भर चौकात फाशी दिल्याच्या घटनेप्रकरणी १२ जणांना अटक करण्यात आली आहे. याआधी सहा जणांना याप्रकरणी अटक करण्यात आली होती. तसेच आणखी काही जणांना अटक होण्याची शक्यता आहे.
या शहरात लागू करण्यात आलेली संचारबंदी तीन वाजेपर्यंत शिथिल करण्यात आली आहे. मात्र मोबाईल, इंटरनेट आणि एसएमएस सेवा पुढील ४८ तासांपर्यंत बंद ठेवण्यात आल्या आहेत. दिमापूरमधील जनजीवन हळूहळू पूर्वपदावर येत आहे.
नागालँडमधील दिमापूर शहरात शुक्रवारी एका बलात्का-याला भर चौकात फाशी देण्यात आल्याची घटना घडली. नागा समुदायाच्या मुलीवर बलात्काराचा आरोप असलेल्या सय्यद फरीद खानला दिमापूरमधील नागरिकांनी खेचतच तुरुंगाबाहेर आणले. त्यानंतर त्याची शहरभर धिंड काढण्यात आली. तसेच त्याला मारहाणही केली. यातच त्याचा मृत्यू झाला. त्यानंतर नागरिकांनी त्याला भर चौकात फाशी दिली. आरोपी सय्यद खानचे अंत्यविधी त्याच्या आसाममधील जन्मगावी करिमगंज येथे आज पार पडणार आहेत. आरोपीच्या कुटुंबियांनी या प्रकरणी न्यायाची मागणी केली आहे.

सुरतमध्ये लोकांनी तंबाखू आणि तंबाखूजन्य उत्पादनांची पाकीटे जाळून होळी साजरी केली.

शूटींगच्या व्यस्त शेड्युलमुळे कलाकारांना सण साजरे करण्याची संधी मिळत नाही. मात्र आगामी ‘मर्डर मेस्त्री’ या मराठी चित्रपटाच्या टीमने सेटवरच रंगपंचमी साजरी करण्याची संधी साधली.