यंगून : वायव्य म्यानमातील समुद्रात घडलेल्या भीषण बोट दुर्घटनेत ३३ जण ठार झाले असून जवळपास १२ जण बेपत्ता आहेत. लाटांच्या तडाख्याने ही दुमजली बोट (आंग तागुन-३) शुक्रवारी बुडाली. बचाव पथकाला १६७ लोकांना वाचविण्यात यश आले असून यापैकी बऱ्याच लोकांना त्यांच्या घरी रवाना करण्यात आल्याचे म्यानमा रेडक्रॉस आपत्ती व्यवस्थापन विभागाचे प्रमुख माऊंग खिन यांनी सांगितले. या दुर्घटनेत ३३ जण ठार झाले असून अनेक जण बेपत्ता आहेत. बचाव पथक त्यांचा शोध घेत आहेत. शुक्रवारी रात्री स्थानिक वेळेनुसार साडेआठ वाजता ही बोट क्याऊक्फू येथून रवाना झाली होती. ८० किलोमीटरचा प्रवास केल्यानंतर लाटेच्या तडाख्याने ही दुर्घटना घडली. मृतांची संख्या वाढविण्याची शक्यता आहे.

यवतमाळ, दि. १४ – नगर परिषद क्षेत्रांतर्गत शासनाच्या विविध घरकुल योजनांची तात्काळ अंमलबजावणी करून बांधकामास सुरुवात करावी यासाठी समाजकल्याण मंत्री राजकुमार बडोले यांना निवेदन देण्यात आले.
नॅशनल आंबेडकराईट गार्ड (नागा) या संघटनेचे प्रमुख आनंद गायकवाड यांनी विधान भवन मुंबई येथे समाजकल्याण मंत्र्यांना निवेदन देऊन समस्त घरकुल योजनाच्या विलंबाची माहिती दिली. अशोकनगर, डोर्लीपुरा, पाटीपुरा, अंबिकानगर या भागात समाजकल्याण विभागाची रमाई आवास योजना २०११-१२ मध्ये लागू झाली मात्र ३१३ लाभार्थ्यांपैकी केवळ ५९ घरांचे बांधकाम प्रगतीपथावर आहे तर २५४ घरकुलांची प्रकरणे अजुनही थंडबस्त्यात आहे. यवतमाळ नगर परिषदेकडून लाभार्थ्यांच्या जागेचे अजुनही मोजमाप करणेच सुरू आहे. याबाबतीत जिल्हाधिकारी रंजनकुमार महिलवार यांना निवेदन देऊन उपोषणाची सूचना दिली असता न. प. ने ताबडतोब कार्यवाही करण्याची लेखी हमी दिली परंतु न. प. अभियंत्यांकडे पूर्ण न. प. ची कामे असल्याने घरकुल योजनेकडे सातत्याने दुर्लक्ष होत आहे. याचीही कल्पना मंत्र्यांना देण्यात आली. रमाई आवास योजनेतील पात्र लाभार्थी ठरवितांना अजुनही चालढकल सुरू आहे. अशोकनगर येथील योजना आराखड्यातील रस्ता वगळण्याची कारवाई तब्बल दोन वर्षांपासून सुरू आहे. वस्तुत: आवास योजनेला केवळ नगररचना संचालकाच्या मंजुरीचीच गरज असताना प्रकरण उगीचच वाढविण्यात येत असल्याची माहिती मंत्र्यांना देण्यात आली. ३१ मार्च पर्यंत संपूर्ण लाभार्थी पात्र ठरवून घरकुलाच्या प्रत्यक्ष बांधकामास सुरुवात झाली नाही तर उग्र आंदोलन छेडण्यात येईल असा इशारा निवेदनातून देण्यात आला आहे.

नवी दिल्ली – दिल्ली पोलिसांनी काँग्रेस उपाध्यक्ष राहुल गांधी यांच्या अनुपस्थितीत त्यांच्या निवासस्थानी जाऊन चौकशी केल्याबद्दल काँग्रेसने भाजपावर जोरदार टिका केली आहे.
काँग्रेसने यासाठी भाजपाला जबाबदार धरले असून, सरकारने विरोधकांच्या आयुष्यात हेरगिरी चालवल्याचा आरोप काँग्रेसने केला आहे. दिल्ली पोलिस राजकीय हेरगिरी करत असून, राजकीय विरोधकाच्या आयुष्यात अशा प्रकारची हेरगिरी, टेहळणी आणि अतिक्रमण हे गुजरात मॉडेल असू शकते पण हे भारतीय मॉडेल नक्कीच नाही अशा शब्दात काँग्रेसचे प्रवक्ते अभिषेक मनु सिंघवी यांनी भाजपावर टिका केली.
दुस-या बाजूला दिल्ली पोलिसांनी आपल्या कृतीचे समर्थन करताना ही सुरक्षा तपासणी असल्याचे सांगितले. राहुल गांधी यांना एसपीजीचे विशेष सुरक्षा कवच आहे हे नेहमीचे सुरक्षा ऑडिट होते.
कायदा-सुव्यवस्थेचा भाग म्हणून चौकशी करण्यात आली यात दुसरा कोणताही चुकीचा हेतू नव्हता असे दिल्ली पोलिस आयुक्त बी.एस.बासी यांनी पत्रकारांना सांगितले. दिल्ली पोलिसांनी शुक्रवारी राहुल गांधी यांच्या तुगलक रोडवरील निवासस्थानी जाऊन त्यांच्याबद्दल चौकशी केली होती.

नवी दिल्ली – तुमचा मुलगा कसा दिसतो?, उंची किती?, रंग?, कोणत्या रंगाचे कपडे घातले होते?, काही जन्मखूण वगैरे?, फोटो-बिटो आणलाय का?, असे प्रश्न पोलीस हरवलेल्या व्यक्तीविषयी विचारताना आपण बऱ्याच सिनेमांमध्ये पाहिलंय, काहींनी प्रत्यक्ष अनुभवलंही असेल. सामान्य व्यक्तीच्या बाबतीत ही माहिती घेणं गरजेचंही आहे. पण, देशातील सर्वात जुन्या राजकीय पक्षाचे दुसऱ्या क्रमांकाचे नेते, अर्थात काँग्रेस उपाध्यक्ष राहुल गांधी यांच्याबाबतही असेच प्रश्न विचारण्याचा ‘पराक्रम’ दिल्ली पोलिसांनी केलाय. त्यावरून काँग्रेस भलतीच खवळली आहे.
काही दिवसांपूर्वी दिल्ली पोलिसांचं एक पथक राहुल गांधींच्या ऑफिसमध्ये जाऊन धडकलं. ते नेमके कशासाठी आलेत, हे कुणालाच कळेना. ते काही सांगायलाही तयार नव्हते. उलट, राहुल गांधी कसे दिसतात?, त्यांच्या डोळ्यांचा रंग कसा आहे?, केस कसे आहेत? असे प्रश्न विचारायलाच त्यांनी सुरुवात केली. ते ऐकून सगळेच चक्रावले. आता, दिल्ली पोलिसांच्या या चौकशीची तक्रार काँग्रेसनं पोलीस आयुक्तांकडेच केली आहे.
काँग्रेसचे राष्ट्रीय उपाध्यक्ष राहुल गांधी काही आठवड्यांची रजा घेऊन ‘आत्मचिंतना’साठी अज्ञातवासात रवाना झाले आहेत. २३ फेब्रुवारीपासून त्यांचं दर्शन कुणालाच घडलेलं नाही. राहुलबाबा देशात आहेत, की विदेशात, हे काँग्रेस नेत्यांनाही ठाऊक नाही. तसंच, ते खरंच आत्मचिंतनासाठी गेलेत आणि कुणावर नाराज होऊन गेलेत, याबद्दलही उलटसुलट चर्चा सुरू आहे. या पार्श्वभूमीवरच, दिल्ली पोलिसांनी राहुल गांधींच्या रंगरूपाची चौकशी करून सगळ्यांनाच बुचकळ्यात पाडलंय.
राहुल गांधींची सगळी माहिती, फोटो इंटरनेटवर आहेत. ते खासदार असल्यानं संसदेतही त्यांच्याविषयीच्या सगळ्या नोंदी आहेत. असं असतानाही, दिल्ली पोलिसांना त्यांच्या ऑफिसमध्ये जाऊन नसती चौकशी करायची गरजच काय होती?, असा संतप्त सवाल काँग्रेसनं केला आहे. या चौकशीमागे काहीतरी कारस्थान किंवा खोडसाळपणा असावा, असं त्यांना वाटतंय. म्हणूनच, दिल्ली पोलीस आयुक्तांकडून त्यांनी याबाबतही माहिती मागितली आहे. याबाबत ‘टाइम्स’नं वरिष्ठ पोलीस अधिकाऱ्याशी संपर्क साधला असता, त्यांनी प्रतिक्रिया देण्यास नकार दिला. त्यामुळे आता या प्रकरणाचं काय होतं, पोलिसांनी ही चौकशी का केली असावी, याबद्दल सगळ्यांनाच उत्सुकता लागून राहिली आहे.

पुणे : संगणक अभियंता तरुणीच्या मित्राने तिची अश्लील चित्रफीत तयार करून फेसबुक तसेच व्हॉट्स अ‍ॅपवर ती टाकली. तसेच तरुणीला बदनामीची धमकी देऊन दोन लाखांची खंडणी मागितली. तरुणीने यासंदर्भात पोलीस आयुक्तांकडे तक्रार केल्यानंंतर गुन्हे शाखेच्या खंडणीविरोधी पथकाने सायबर शाखेच्या मदतीने आरोपीला जेरबंद केले. त्याच्याकडून मोबाईल जप्त करण्यात आला आहे.
गिरीश श्याम सुगंध (वय ३५, रा. शांतीनगर, नागपूर) असे अटक आरोपीचे नाव आहे. या प्रकरणी वानवडी पोलीस ठाण्यात पीडित तरुणीने फिर्याद दिली आहे. पीडित तरुणी वानवडी भागात राहण्यास आहे. ती मगरपट्टा येथील संगणक कंपनीत नोकरी करते. तिचे वानवडी भागात आईस्क्रीम पार्लर आहे. या आईस्क्रीम पार्लरमध्ये आरोपी व्यवस्थापक म्हणून काम करीत होता. या तरुणीशी झालेल्या ओळखीचा गैरफायदा घेत त्याने तिची अश्लील चित्रफीत काढली. दरम्यान, आरोपी एक दिवस दारू पिऊन दुकानावर आल्यामुळे तिने त्याच्या कानाखाली मारली होती. तसेच त्याला नोकरीवरून काढले होते.
त्यामुळे चिडलेल्या गिरीशने ही चित्रफीत मित्रांना व्हॉट्स अ‍ॅपवर पाठवली. तसेच फेसबुकवरही टाकली. याबाबत तिने त्याला विचारणा केल्यावर त्याने ही चित्रफीत फेसबुकवरून काढली. ती पुन्हा फेसबुकवर टाकण्याची धमकी द्यायला त्याने सुरुवात केली होती. तिच्याकडे वारंवार दोन लाख रुपयांची मागणी तो करू लागल्यावर पीडित मुलीने पोलीस आयुक्त सतीश माथूर यांच्याकडे तक्रार केली. त्यांच्या सूचनांनुसार खंडणी विरोधी पथकाचे पोलीस निरीक्षक अनिल पाटील, सायबर शाखेच्या सहायक निरीक्षक सीमा साठे यांनी आरोपीबाबत माहिती गोळा करायला सुरुवात केली. दरम्यान, तो पीडित मुलीला सारखे दिल्ली, मनमाड, लोणावळा अशा वेगवेगळ्या ठिकाणी पैसे घेऊन बोलावीत होता. पीडित मुलीने त्याला आपल्याला लांब येणे शक्य नसल्याचे सांगून पुण्याला बोलावले. तो पुणे रेल्वे स्थानक परिसरात येणार असल्याची माहिती मिळताच निरीक्षक अनिल पाटील यांनी उपनिरीक्षक मारुती भुजबळ, प्रशांत पवार, संजय काळोखे, गणेश माळी, प्रमोद मगर, सचिन अहिवळे, रमेश गरुड, सिद्धार्थ लोखंडे, आनंद दळवी, हृषीकेश महल्ले यांनी सापळा लावला. स्टेशन परिसरात आलेल्या आरोपीला पोलिसांनी जेरबंद केले.

यवतमाळ : गुंगीचे औषध देऊन तरूणीला पळविल्याची घटना वडकी येथे उघडकीस आली असून, प्रितम शंकर ढवळे (२६) व अन्य तीन रा. चंद्रपूर अशी तरूणीस पळविणाºयांची नावे आहे. चंद्रपूर येथील प्रितमने युवतीशी लग्न करण्यासाठी गळ घातली होती. यावेळी तरूणीने त्याला विरोध केला. त्याने दोन मित्रांच्या मदतीने वडकी येथे येऊ न मुलीला बोलायचे आहे, असा बहाणा करून गुंगीचे औषध दिले व तिला पळवून नेले. याबाबत पोलीस स्टेशनला तक्रार देण्यात आली असून, याप्रकरणी पोलिसांनी गुन्हा नोंद करून तपास सुरू केला आहे.

ठाणे – गेल्या 47 वर्षांपासून पुनर्वसनाच्या प्रतिक्षेत असलेल्या भातसा धरण प्रकल्पग्रस्तांना अखेर न्याय मिळालाय. आता या प्रकल्पग्रस्तांच्या पुनर्वसनाचा निर्णय महापालिकेनं घेतलाय.
भातसा धरण प्रकल्पग्रस्तांना अखेर न्याय मिळाला. गेली 47 वर्ष भातसा धरण प्रकल्पग्रस्तांचं पुनर्वसन झाले नव्हतं. त्यांचं आता मुंबई महापालिका पुनर्वसन करणार आहे. तसंच त्यांच्या कुटुंबातल्या एका व्यक्तीला मुंबई महापालिकेत नोकरीही देण्यात येणार आहे. येणार्‍या भरतीमध्ये भातसा प्रकल्पग्रस्तांना नोकरी देणार आहे. ठाणे जिल्ह्याचे पालकमंत्री एकनाथ शिंदे यांनी मुंबई महापालिकेत आयुक्त आणि महापौर यांच्या सोबत बैठक घेऊन हा निर्णय घेतला. बैठकीनंतर भातसा धरण प्रकल्पग्रस्तांनीही समाधान व्यक्त केलंय.

अहमदनगर – गावातील मुलीवर प्रेम केले, म्हणून गावातीलच एका तरुणाची भर बाजारपेठेतून मारहाण करीत कपडे फाडून धिंड काढण्यात आली. ही घटना आज सकाळी वांबोरी (ता. राहुरी) येथे घडली. मुलीचे कुटुंबीय आणि नातेवाईकांनी हे कृत्य केले. ग्रामस्थांनी मात्र केवळ बघ्याची भूमिका घेतली. शेवटी सरपंचाने हास्तक्षेप केल्याने त्या तरुणाची जमावाच्या तावडीतून सुटका झाली. या घटनेच्या निषेधार्थ व्यापाऱ्यांनी बंद पाळला आहे. पोलिस गावात दाखल झाले असून आरोपींची धरपकड सुरू झाली आहे.
गावात बाजारपेठेत राहणाऱ्या एका तरुणाचे त्याच गावात वस्तीवर राहणाऱ्या एका तरुणीवर प्रेम होते. काही दिवसांपूर्वी दोघेही पळून गेले होते. हा प्रकार तरुणाच्या घरच्यांना अजिबात रुचला नव्हता त्यामुळे त्यांनी शोध सुरू केला. काल सायंकाळी त्यांनी या दोघांना शोधून काढले. मुलीलाही मारहाण केली. रात्री वस्तीवर बैठक घेऊन प्रेम करणाऱ्या मुलाला धडा शिकविण्याचे ठरविण्यात आले. त्यानुसार शुक्रवारी सकाळी पंधरा-वीस जणांचा जमाव तरुणाच्या घरी आला. त्यांनी कुटुंबातील सर्वांना मारहाण केली. तरुणाला घराबाहेर ओढत नेले. त्याच्या अंगावरील कपडे फाडण्यात आले. त्याला चपलांचा हार घालून मारहाण करीत बाजारपेठेतून फिरविण्यात आले. हा प्रकार सुरू असताना बाजारपेठेतील नागरिक केवळ बघ्याची भूमिका घेत होते, हे विशेष. काही वेळाने हा प्रकार समजल्यावर गावचे सरपंच उदसिंह पाटील तेथे आले. त्यांनी जमावाच्या तावडीतून तरुणाची सुटका केली. घटनेची पोलिसांना माहिती दिली. पोलिस येईपर्यंत धिंड काढणारे पळून गेले होते. तरुण-तरुणी विभिन्न जातीचे असल्याने विरोध अधिक कडवा असल्याचे सांगण्यात आले.
या घटनेनंतर गावात तीव्र पडसाद उमटले. मुलगा व्यापारी कुटुंबातील असल्याने व्यापाऱ्यांनी बैठक घेऊन या घटनेचा निषेध केला. बाजारपेठही बंद ठेवण्यात आली. घटनेचे गांभीर्य लक्षात आल्यावर गावात जादा पोलिस पाठविण्यात आले. त्यांनी जमावाचा शोध सुरू केला आहे. तरुणासह त्याच्या कुटुंबातील सर्व सदस्य जखमी झाले आहेत. त्यांना राहुरी येथे हलविण्यात आले आहे.

शेतकर्‍यांनो सर्वेक्षणात सहभागी व्हा – ना. संजय राठोड
यवतमाळ, दि. १३ – राज्यात सातत्याने शेतकर्‍यांच्या आत्महत्या होत असल्याने या आत्महत्यांमागील कारणे शोधून त्यावर ठोस उपाययोजना करण्यासाठी शासनातर्फे विदर्भातील यवतमाळ आणि मराठवाड्यातील उस्मानाबाद या दोन जिल्ह्यांत शेतकर्‍यांच्या सर्वेक्षणाचा पथदर्शी प्रकल्प राबविला जात आहे. या सर्वेक्षणात शेतकर्‍यांची सविस्तर माहिती संकलित करून त्यातून निघणार्‍या निष्कर्षांमधून शेतकर्‍यांसाठी ठोस उपाय योजले जाणार आहेत. जिल्ह्यातील सर्व शेतकर्‍यांनी या सर्वेक्षणात सहभागी होऊन संपूर्ण माहिती द्यावी, असे आवाहन महसूल राज्यमंत्री व यवतमाळ जिल्ह्याचे पालकमंत्री संजय राठोड यांनी केले आहे.
महसूल मंत्रालयाच्या वतीने ११ फेब्रुवारी रोजी एक परिपत्रक काढून यवतमाळ व उस्मानाबाद जिल्ह्यात शेतकर्‍यांचे शंभर टक्के सर्वेक्षण करण्याचे निर्देश जिल्हाधिकार्‍यांना दिले. या सर्वेक्षणासाठी जिल्ह्यातील सर्व तालुक्यांमध्ये तहसीलदारांच्या अध्यक्षतेखाली गटविकास अधिकारी, तालुका कृषी अधिकारी इत्यादी तालुकापातळीवरील अधिकार्‍यांची समिती गठीत करण्यात आली. या समितीकडे तालुक्यातील प्रत्येक गावाचे सर्वेक्षण सुरळीतपणे पार पाडण्यासाठी देखरेख व मार्गदर्शन करण्याची जबाबदारी सोपविण्यात आली आहे. मंडळस्तरावर मंडळ निरीक्षकाच्या अध्यक्षतेखाली गाव पातळीवरील कृषी विभाग, ग्रामविकास विभाग आदी अधिकार्‍यांचा समावेश असलेली समिती गठीत करून, या समितीने त्यांच्या अखत्यारित सर्व गावांच्या शेतकर्‍यांचे सर्वेक्षण करण्याचे निर्देश देण्यात आले आहेत.
या सर्वेक्षणात शेतकर्‍याची संपूर्ण वैयक्तिक माहिती, जमिनीचा तपशील, शेतीचा प्रकार, कौटुंबिक माहिती, पत्नी व मुलांची माहिती, शेतीशिवाय उत्पन्नाचे इतर साधन असल्यास त्याची माहिती, गुरे, शेळ्या, मेंढ्या, गाई, म्हशी आदी जनावरांचा तपशील, राष्ट्रीयकृत बँक, विविध कार्यकारी सोसायटी, सहकारी संस्था, नागरी पतसंस्था, खासगी बँकेच्या कर्जाची माहिती, नियमित परतफेड आहे किंवा नाही याचा तपशील, खासगी व्यक्ती, नातेवाईक यांच्याकडून घेतलेले कर्ज, उसनवारीची माहिती, मुलांच्या शिक्षणासाठी शैक्षणिक कर्ज घेतले असल्यास त्याचा तपशील, घरातील धार्मिक कार्य, विवाह आदींसाठी असलेले आर्थिक नियोजन, कुटुंबातील व्यक्तींचा विमा उतरविला असल्यास त्याची माहिती, घरात कमावती व्यक्ती असल्यास त्याची माहिती व अनुषंगाने मिळणारी इतर सर्व माहिती गोळा करून ती या सर्वेक्षणात संकलित केली जाणार आहे.
हे सर्वेक्षण दीड महिन्यात पूर्ण करून आयुक्तांमार्फत अहवाल शासनाकडे पाठविण्याचे निर्देशही देण्यात आले आहे. हे सर्वेक्षण करताना शेतकर्‍यांची वस्तुस्थिती समोर येईल याची अधिकार्‍यांनी दक्षात घेण्याची सूचना करून, शेतकर्‍यांनी आपल्या गावात हे सर्वेक्षण सुरू असताना परिपूर्ण माहिती सादर करावी, असे आवाहन महसूल राज्यमंत्री संजय राठोड यांनी केले आहे.

कोची, दि. १३ – केरळमध्ये आज राज्याचा अर्थसंकल्प सादर होताना सभागृहात अभूतपूर्व गोंधळ माजला. अर्थमंत्री अर्थसंकल्प सादर करत असताना मार्क्सवादी कम्युनिस्ट पक्षाच्या आमदारांनी गोंधळ घालत अर्थमंत्री के. एम. मणी यांना धक्काबुक्की केल्याने देशातील सर्वात सुशिक्षितांचे राज्य अशी ओळख मिरवणा-या केरळची मान खाली गेली.
अर्थमंत्री मणी यांच्यावर लाच घेतल्याचा आरोप असून त्यांना सभागृहात प्रवेश करू देणार नाही असा इशारा विरोधकांनी दिला होता.हा विरोध पाहून मणी यांच्यासह ७० हून अधिक आमदारांनी काल रात्रीपासून सभागृहातच मुक्काम केला. या सर्व गोंधळातच आज अर्थसंकल्प सादर करणे सुरू झाले असता विरोधकांनी निदर्शने करत गोंधळ माजवला, विधानसभा अध्यक्षांची खुर्चीही उखडून फेकून दिली तसेच मणी यांना धक्काबुक्कीही केली. परिस्थिती नियंत्रणात आणण्यासाठी पोलिसांना थोडा लाठीमारही करावा लागला. या सर्व गोंधळातच मणी यांनी त्यांचे भाषण कसेबसे पूर्ण केले.
केरळमध्ये बारच्या नुतनीकरण परवाने देण्यासाठी मणी यांनी एक कोटी रुपयांची लाच घेतली असा आरोप विरोधकांनी त्यांच्यावर लावला आहे. केरळमध्ये छोटी व मध्यम हॉटेल्स व वाईन शॉपमध्ये दारू विक्रीवर बंदी असून थ्री, फोर व फाईव्ह स्टार हॉटेलमध्ये दारू विक्री करता येते. त्यामुळे या हॉटेल्सच्या परवान्यांचे नुतनीकरण करण्यासाठी अर्थमंत्री मणी यांना लाच मागितली असा आरोप विरोधकांनी केला आहे.