फुलसावंगी (यवतमाळ),दि. २ – विद्युत खांबाच्या तंगाव्याच्या ताराला स्पर्श होऊन बालकाचा जागीच मृत्यू झाल्याची घटना रामुनाईक तांडा (नारळी)येथे आज सोमवारी सकाळी घडली. यावेळी संतप्त नागरिकांनी बालकाचा मृतदेह घेऊन महावितरण कार्यालयावर धडक देऊन बेजबाबदार कर्मचाºयांवर कठोर कार्यवाही करण्याची मागणी केली.
भोला गजानन आडे (४) असे मृतक बालकाचे नाव आहे. तर कल्पना बाळू राठोड ही महिला जखमी झाली असून प्राथमिक आरोग्य केंद्रामध्ये उपचार सुरू आहे. सकाळी आजोबाच्या घराकडे जात असताना वाटेत असलेल्या विद्युत खांबाच्या तंगाव्याला स्पर्श होऊन विजेचा धक्का लागला. ही बाब लक्षात येताच त्याला उपचारासाठी प्राथमिक आरोग्य केंद्र फुलसावंगी येथे दाखल केले. यावेळी डॉक्टरांनी सदर बालकाला मृत घोषित केले. यावेळी संतप्त जमावाने बालकाचा मृतदेह घेऊन थेट महावितरण कार्यालयात धडक देऊन सहाय्यक वीज तंत्रज्ञ जि. एच. पारसकर यांच्यावर विविध गुन्हे दाखल करून बडतर्फ करण्यांची मागणी केली. उघड्या सताड रोहित्र त्यामध्ये फिऊज नसने, ताराणा गार्डिग नसने ही बाब जागो जागी पहावयास मिळत आहे. याबाबतची तक्रार विजय आडे यांनी महावितरणकडे केली होती. मात्र या गंभीर बाबीकडे सदर कर्मचाºयांनी दुर्लक्ष केल्यामुळे ही घटना घडल्याचा आरोप करण्यात आला आहे. या घटनेची माहिती मिळताच महागावचे उप. कार्यकारी अभियंता गजभीय हे येथे दाखल झाले. त्यांनी संतप्त जमावाला दोषी कर्मचाºयांवर येत्या तीन दिवसात कारवाई करण्याचे आश्वासन दिले.

मुंबई- महाराष्ट्र काँग्रेसच्या प्रदेशाध्यक्षपदी माजी मुख्यमंत्री व खासदार अशोक चव्हाण यांची नियुक्ती करण्यात आली आहे तर मुंबई शहर काँग्रेसच्या अध्यक्षपदी उत्तर भारतीय नेते व माजी खासदार संजय निरूपम यांच्या नावाची घोषणा झाली. 2008 पासून महाराष्ट्र काँग्रेसचे प्रदेशाध्यक्ष माणिकराव ठाकरे भूषवत होते. तर, मुंबई शहर काँग्रेस अध्यक्षपदावरून अॅड. जनार्दन चांदूरकर यांची दोन वर्षातच तेथून हकालपट्टी केली आहे.
प्रमुख राज्यांत काँग्रेसच्या नेतृत्वात बदल करण्याच्या मोहिमेला वेग आला आहे. पक्षाच्या कार्यकारिणीतही मोठे बदल होणार असून तरुण नेत्यांना सरचिटणीसपदी नियुक्ती केले जाण्याचे संकेत मिळत आहेत. या बदलात उपाध्यक्ष राहुल गांधी यांची महत्त्वाची भूमिका बजावत आहेत. महाराष्ट्रासह जम्मू-काश्मीर, पंजाब, हरियाणा तेलंगणाचे प्रदेशाध्यक्ष बदलण्याचे संकेत आहेत. काही राज्यांतील राहुल गांधी समर्थक नेत्यांची कार्यकारिणीवर वर्णी लागू शकते.काँग्रेस संघटनेत मोठ्या प्रमाणावर फेरबदल होणार असल्याचे संकेत गेल्या काही दिवसातून मिळत होते. त्याचीच ही झलक असल्याचे मानले जात आहे. दिल्ली काँग्रेसच्या प्रदेशाध्यक्षपदी अजय माकन यांची नियुक्ती झाली आहे. राहुल गांधींकडे पक्षाध्यक्ष जाण्याची ही चाहूल मानली जात आहे.
गुजरातच्या प्रदेशाध्यक्षपदी रविवारी भरतसिंह सोलंकी यांची निवड जाहीर झाली आहे. सोलंकी यांनी केंद्रात मंत्रिपद भूषवले आहे तर 2006 ते 2008 या काळात प्रदेशाध्यक्षपदही भूषविले आहे. गेल्या वर्षी गुजरातमध्ये लोकसभेला एकही जागा मिळाली नसल्याने अर्जून मोढवाडिया यांच्यावर पक्षनेतृत्त्व नाराज होते. भरतसिंह सोलंकी यांचे वडील गुजरातचे मुख्यमंत्री राहिले आहेत. त्यांच्या कार्यकाळात गुजरातमधील सर्व समाजाला काँग्रेससोबत जोडण्याचे काम सोलंकी यांनी केले होते. आता राहुल यांनी त्यांच्या मुलाला संधी दिली आहे.

दिग्रस (यवतमाळ), दि. १ – पैशाच्या वादातून युवकाची निर्घुन हत्या करण्यात आल्याची घटना काल शनिवारी रात्री ८ वाजताच्या सुमारास आर्णी नाक्यावर घडल्याने खळबळ उडाली आहे. गोळीबाराच्या अफवेचेही शहरात पेव फुटल्यानंतर बाजारपेठेतील प्रतिष्ठाने क्षणातच बंद झाली होती. मोहम्मद हसन पप्पूवाले (२६) रा. मोतीनगर असे मृतकाचे नाव आहे.
शहरात गुन्हेगारीने डोकेवर काढले आहे. दोन वर्षापूर्वी आर्णी चौकात घडलेल्या घटनेनंतर पुन्हा एकदा चौकाला खूनाचे गालबोट लागले आहे. गाडी भाडे देण्याच्या वादातून मोहम्मद हसन पप्पूवाले या युवकाला शे. फिरोज शे. मोबीन, शे. मतीन शे. मोबीन, मुन्ना नागपूरवाला, शे. बबलू शे. मोबीन, शे. इमरान शे. मोबीन, शे. शोहेब शे. फिरोज, शे. मोहसीन शे. मोेबीन, बिलाल, शाहीन, सलीमा मोबीन, यासीन, अख्तर लाला यांनी आर्णी नाक्यावर गाठले. सांयकाळी ७ वाजतापासूनच युवकाच्या हत्येसाठी यांनी सापळा रचला होता. युवक आर्णी नाक्यावर पोहचताच शे. फिरोज शे. मोबीनसह त्याच्या साथीदारांनी त्याच्यावर हल्ला केला. तलवार व गुप्ती सारख्या धारदार शस्त्राने युवकावर १४ वार करण्यात आले. यावेळी रक्ताच्या थारोळ््यात युवक खाली पडल्यानंतर आरोपी पसार झाले. खुनाची वार्ता शहरात रात्रीच पसरताच मुख्य बाजारपेठेत बंद झाली. आर्णी चौकात गोळीबार झाल्याच्या अफवेने तर दिग्रसकरांमध्ये भिती निर्माण झाली. खूनाची माहिती पोलिसांना मिळताच त्यांनी घटनास्थळ गाठून युवकाला ग्रामीण रुग्णालयात भरती केले. मात्र उपचारावेळी त्याचा मृत्यू झाला. पोलीस निरीक्षक संजय देशमूख यांनी घटनेचे गांभीर्य पाहून नागरीकांना शांत राहण्याचे आवाहन केले. याबाबत मृतकाची आई तस्लीम हसन पप्पूवाले यांनी पोलीस स्टेशनला १२ जणा विरुद्घ तक्रार नोंदविल्यानंतर पोलिसांनी खूनाचा गुन्हा नोंद करून शे. मोहसीन शे. मोबीन यास अटक केली आहे. तर उर्वरीत आरोपी पसार असून, त्यांचा शोध घेण्यासाठी पोलिसांचे पथक रवाना झाले आहे. या घटनेच्या पार्श्वभूमीवर अतिरीक्त पोलीस कुमक तैनात करण्यात आली आहे.

जिल्हा नियंत्रण कक्ष 24 तास सुरु
यवतमाळ, दि. 1 : कालपासून जिल्ह्यात सर्वत्र अवकाळी पाऊस सुरु आहे. ठिकठिकाणी या पावसामुळे शेतपिकांचे नुकसान झाले आहे. या पिकांच्या नुकसानीचे सर्वेक्षण विहित वेळेत पुर्ण करण्याचे सुचना जिल्हाधिकारी राहुल रंजन महिवाल यांनी संबंधीत सर्व अधिकारी व विभागांना केल्या आहे.
आज सकाळपर्यंत यवतमाळ तालुक्यात 53.8, बाभुळगाव 40, दिग्रस 31, नेर 29, आर्णी 28, उमरखेड 21, पांढरकवडा 18.5, राळेगाव 18 मिलीमीटर इतक्या पावसाची नोंद झाली होती. अन्य तालुक्यातसुध्दा थोड्या प्रमाणात पावसाची नोंद आहे. काल झालेल्या पावसामुळे बिटरगाव येथील पांडुरंग मल्हारी चिकणे या व्यक्तीचा विज पडून मृत्यु झाला. त्यांची मुले मनोज व विशाल ही विजेमुळे जखमी झाली असून त्यांच्यावर ढाणकी येथे उपचार सुरु आहे. उमरखेड तालुक्यातीलच पिंपळगाव येथील शंकर सुर्यभान मालतकर यांच्या मालकीची म्हैस विज पडल्याने मरण पावली.
ठिकठिकाणी झालेल्या या नुकसानीची सर्वेक्षण करण्याच्या सुचना जिल्हाधिकाऱ्यांनी जिल्हा अधीक्षक कृषी अधिकारी व संबंधीत विभागांना केल्या आहे. या सर्वेक्षणातून शेतीपीके, पिकांचे, घरांचे व जनावरांचे नुकसान तसेच जनावरांच्या गोठ्याचे नुकसान सर्वेक्षणातून सुटु नये अशा सुचनाही करण्यात आल्या आहे. जिल्हाधिकारी कार्यालयात नियंत्रण कक्ष 24 तास सुरु असून निवासी उपजिल्हाधिकारी राजेश खवले हे या कक्षाचे प्रमुख आहे.
जिल्हा आपत्ती व्यवस्थापन अधिकारी मिनल जगताप, सहकारी एकनाथ बिजवे, यु.ए.जुमडे, मंगेश सुळके, नितीन मांडेकर, नितीन पाटकुरवार हे या कक्षात कार्यरत आहे. नियंत्रण कक्षाचा दुरध्वनी क्रमांक 255077, 240720 व टोल फ्री क्रमांक 1077 अशा आहे. जिल्ह्यात कुठेही नुकसान झाल्यास या क्रमांकावर माहिती कळवावी, असे जिल्हाधिकाऱ्यांनी कळविले आहे. शेतकऱ्यांनी नुकसानीमुळे खचुन जावू नये, असे आवाहनही जिल्हाधिकाऱ्यांनी केले आहे.

श्रीनगर – जम्मू-काश्मीरमध्ये विधानसभा निवडणुकांचे निकाल जाहीर झाल्यानंतर तब्बल दोन महिन्यांनी पीडीपी-भाजपा आघाडीचे सरकार अस्तित्वात आले आहे.
पीडीपीचे सर्वेसर्वा मुफ्ती मोहोम्मद सईद यांना राज्यपाल एन.एन.व्होरा यांनी रविवारी राज्याच्या मुख्यमंत्रीपदाची शपथ दिली. जम्मूमध्ये एका सभागृहात हा शपथविधी सोहळा झाला. भाजपा नेते निर्मल सिंह यांनी जम्मू-काश्मीरच्या उपमुख्यमंत्रीपदाची शपथ घेतली.
फुटीरतावादाकडून राजकारणाच्या मुख्य प्रवाहात आलेले सज्जाद लोन यांनीही मंत्रीपदाची शपथ घेतली. या शपथविधी कार्यक्रमाला पंतप्रधान नरेंद्र मोदी, भाजपचे ज्येष्ठ नेते लालकृष्ण अडवाणी, मुरली मनोहर जोशी, भाजपा अध्यक्ष अमित शहा आणि पीडीपीच्या मेहबूबा मुफ्ती उपस्थित होत्या.
नऊ वर्षाच्या प्रदीर्घ कालावधीनंतर सईद राज्याच्या मुख्यमंत्रीपदाची धुरा संभाळत आहेत तसेच ते दुस-यांदा आघाडी सरकारचे नेतृत्व करणार आहेत. याआधी २००२ मध्ये त्यांनी पीडीपी-काँग्रेस आघाडीचे नेतृत्व केले होते. त्यावेळी तीनवर्ष ते राज्याचे मुख्यमंत्री होते.
पूर्णपणे परस्परविरोधी विचारांचे हे पक्ष सत्तेसाठी एकत्र आले आहेत. त्यासाठी दोघांनी कलम ३७० आणि लष्कराला विशेषधिकार देणा-या कायदा या मुद्यांवर एक एक पाऊल मागे घेतले आहे. भाजपाने तूर्तास काश्मीरमधून कलम ३७० रद्द करण्याचा आग्रह सोडला आहे तर, पीडीपीने लष्कराला विशेषधिकार देणा-या एएफएसपी कायदा रद्द करण्याचा हट्ट तूर्तास बाजूला ठेवला आहे.

वेलिंग्टन – ‘अ’ गटातील श्रीलंका विरुध्द इंग्लंड या तुल्यबळ संघांमधील लढतीत श्रीलंकेने इंग्लंडवर नऊ गडी राखून दणदणीत विजय मिळवला.
इंग्लंडने दिलेले ३१० धावांचे लक्ष्य श्रीलंकेने लहिरु थिरिमने आणि कुमार संगकारा यांच्या शानदार शतकाच्या बळावर आरामात पार केले.
थिरिमने आणि संगकारा श्रीलंकेच्या विजयाचे शिल्पकार ठरले. थिरिमनेने नाबाद (१३९) आणि संगकाराने नाबाद (११७) धावा केल्या. दोघांनी इंग्लिश गोलंदाजांना अजिबात दाद न देता चौफेर फटकेबाजी केली आणि धावा वसूल केल्या.
इंग्लंडला दिलशानच्या रुपाने श्रीलंकेचा फक्त एकमेव गडी बाद करता आला. यावरुन इंग्लंडची गोलंदाजी किती निष्प्रभ आणि निस्तेज होती ते स्पष्ट झाले.
श्रीलंकेने गटात सलग तीन विजयांची हॅट्रीक केली असून, लंकेचा संघ गटात दुस-या स्थानावर पोहोचला आहे. सलामीच्या सामन्यात न्यूझीलंडकडून दारुण पराभव झाल्यानंतर अफगाणिस्तान विरुध्द विजयासाठी संघर्ष करणा-या श्रीलंकेने हळूहळून आपली कामगिरी उंचावली आहे. शतकी सलामी दिल्यानंतर तिल्करत्न दिलशान ४४ धावांवर बाद झाला. मोईन अलीने त्याला मॉर्गनकरवी झेलबाद केले.
‘अ’ गटातील इंग्लंड विरुध्द श्रीलंका सामन्यात प्रथम फलंदाजी करणा-या इंग्लंडने श्रीलंकेला विजयासाठी ३१० धावांचे लक्ष्य दिले होते. ज्यो रुटची शानदार शतकी खेळी (१२१), इयान बेलच्या (४९) धावा आणि शेवटच्या षटकांमध्ये बटलरने केलेल्या फटकेबाजीमुळे (३९) इंग्लंडने पन्नास षटकात सहाबाद ३०९ धावांचा डोंगर उभारला होता.
इंग्लंडच्या डावात तीन महत्वपूर्ण भागीदा-या झाल्या. सलामीवीर मोईन अली आणि इयान बेलने ६२ धावांची सलामी दिली. त्यानंतर कर्णधार इयॉन मार्गन आणि रुटमध्ये चौथ्या विकेटसाठी ६० धावांची भागीदारी झाली.
मॉर्गन (२७) धावांवर बाद झाला. त्यानंतर टेलर आणि रुटची जोडी जमली. दोघांमध्ये पाचव्या विकेटसाठी ९८ धावांची भागीदारी झाली. टेलरने (२५) धावा केल्या. अखेरच्या षटकांमध्ये धावा वेगाने जमवताना बटलरने १९ चेंडूत (३९) धावा फटकावल्या. यात सहा चौकार आणि एका षटकाराचा समावेश होता.

मुंबई – मुंबईही देशाची आर्थिक राजधानी आहे. या शहरात जागतिक वित्त केंद्र उभारण्याची गरज असताना ते पंतप्रधान मोदींनी गुजरातला पळवल्याचे या अर्थसंकल्पातून उघड झाले आहे.
गुजरात आंतरराष्ट्रीय वित्त टेकसिटी (जीआयएफटी) हे केंद्र गुजरातमध्ये ‘आंतरराष्ट्रीय वित्त केंद्र’ या नावाने विकसित करण्यात येणार असल्याची घोषणा अर्थमंत्री अरुण जेटली यांनी केली.
महिन्यापूर्वी झालेल्या परिसंवादात मुंबईत जागतिक वित्त केंद्र उभारण्याची घोषणा केंद्रीय अर्थराज्यमंत्री जयंत सिन्हा यांनी केली होती. मुख्यमंत्री देवेंद्र फडणवीस यांनीही त्याला दुजोरा दिला होता. मात्र, अर्थसंकल्पातून हे केंद्र गुजरातमध्ये उभारण्याचे निश्चित झाले आहे.
या जागतिक वित्त केंद्रासाठी लागणा-या सर्व नियमन मंजु-या मार्चमध्ये देण्यात येणार आहेत. या केंद्राच्या पहिल्या टप्प्याला लवकरच प्रारंभ होणार आहे.
दुबई आणि सिंगापूरला आंतरराष्ट्रीय वित्त केंद्र म्हणून जगभरात मान्यता आहे. या शहरातील सुविधा आता नवीन जागतिक वित्त केंद्रात उभारण्यात येणार आहेत. या केंद्राला कर, नियामकांबाबतच्या सर्व सुविधा पुरवण्यात येईल.