जम्मू – अमेरिकी राष्ट्राध्यक्ष बराक ओबामा भारतात दाखल होण्यापूर्वी पाकिस्तानी रेंजर्सनी जम्मूमधील आंतरराष्ट्रीय सीमारेषेवर पुन्हा एकदा शस्त्रसंधीचे उल्लंघन केले.
पाकिस्तानी रेंजर्सनी मध्यरात्रीच्या सुमारास आर.एस.पूरा सेक्टरमधील जोगवानमधील सीमा सुरक्षा दलाच्या चौकीवर गोळीबार केला. पाकिस्तानी रेंजर्सनी रात्रीच्या एकच्या सुमारास छोटया शस्त्रास्त्रामधून काही मिनिटे गोळीबार केला. सीमा सुरक्षा दलाच्या जवानांनीही या गोळीबाराला चोख प्रत्युत्तर दिले.
या गोळीबारात भारताच्या बाजूला जीवितहानी झाली नाही. २२ जानेवारीलाही पाकिस्तानने शस्त्रसंधीचे उल्लंघन करुन, सांबा जिल्ह्यातील सीमा सुरक्षा दलाच्या चौकीवर गोळीबार केला होता.
२१ जानेवारीला बीएसएफने अर्णियामध्ये घुसखोरीचा कट उधळून लावला होता. बराक ओबामा यांच्या तीन दिवसीय भारत दौ-याच्या पार्श्वभूमीवर अमेरिकेने पाकिस्तानला भारतात कुठेही दहशतवादी कृत्य करु नका असे बजावले आहे.

मुंबई – भारतरत्न डॉ. बाबासाहेब आंबेडकर यांचे लंडन येथील निवासस्थान राज्य सरकार विकत घेणार असून, त्याचे रूपांतर स्मारकामध्ये केले जाणार आहे. डॉ. आंबेडकर यांनी निवास केलेले हे घर मूळ मालकाने ३५ कोटी रुपयांना विक्रीस काढले होते. त्यानुसार हे घर विकत घेण्याचा निर्णय राज्य सरकारने घेतला आहे. डॉ. आंबेडकर यांच्या १४ एप्रिलच्या जयंतीला हे घर स्मारक म्हणून जनतेसाठी खुले केले जाणार आहे.
१९२१ ते २२ अशी दोन वर्ष डॉ. आंबेडकर यांचे वास्तव्य लंडन येथील या घरात होते. हे घर विक्रीस काढले होते. याबाबत बुद्धिस्ट फोरमच्या संतोष दास पाठपुरावा करत होत्या. जागतिक शिक्षणमंत्र्यांच्या परिषदेसाठी शिक्षणमंत्री विनोद तावडे लंडन येथे गेले आहेत. यावेळी तावडे यांनी यासंदर्भात फोरमच्या अध्यक्षा दास यांच्याशी संपर्क साधून व्यवहाराची माहिती घेतली.
त्यानंतर मुख्यमंत्री देवेंद्र फडणवीस यांच्याशी चर्चा करून हे घर विकत घेण्याचा निर्णय घेतला. यावेळी तावडे यांनी बुद्धिस्ट फोरम आणि भारतीय उच्चायुक्तालयातील अधिकारी यांच्यासमवेत डॉ. बाबासाहेब आंबेडकर यांच्या निवासस्थानाला भेट दिली.
त्यानंतर इंडिया हाऊसमध्ये ब्रिटिश उच्चायुक्त रंजन मथाई, बुद्धिस्ट फोरमच्या संतोष दास, तेथील उच्च अधिकारी यांची संयुक्त बैठक घेण्यात आली. या घर खरेदीसाठी कायदेशीर आणि परदेशातील खरेदीचे नियम पूर्ण करून २ महिन्यांत प्रक्रिया पूर्ण करण्याचे बैठकीत ठरविण्यात आले, अशी माहिती सूत्रांनी दिली.

नवी दिल्ली, दि. २३ – भारतीय जनता पक्षाचे ज्येष्ठ नेते लालकृष्ण आडवाणी, अभिनेते अमिताभ बच्चन, योगगुरू रामदेव बाबा आणि अध्यात्मिक गुरू श्री. श्री. रविशंकर यांचा ‘पद्म’ पुरस्काराने गौरव करण्यात येणार आहे. भारताचे माजी पंतप्रधान अटलबिहारी वाजपेयी यांना ‘भारतरत्न’ सन्मान जाहीर केल्यानंतर आता मोदी सरकार भाजपाचे ज्येष्ठ नेते लालकृष्ण आडवाणी ‘पद्मविभूषण’ पुरस्कार देऊन सन्मान करणार आहे.
प्रजासत्ताक दिनाच्या पूर्वसंध्येला ‘पद्म’ पुस्कारांची घोषणा करण्यात येते. यावेळी या यादीत एकूण १४८ जणांची नावे आहेत. लालकृष्ण आडवाणी व पंजाबचे मुख्यमंत्री प्रकाश सिंग बादल या दोन राजकीय नेत्यांचा या यादीत समावेश आहे. तर अभिनेता अमिताभ बच्चन, ज्येष्ठ अभिनेते दिलीप कुमार, दिग्दर्शक संजय लीला भन्साळी, अभिनेता सलमान खानचे वडील व लेखक सलीम खान तसेच गीतकार प्रसून जोशी यांचेही यादीत नाव आहे.
बॅटमिंटनपटू पी.व्ही. सिंधू, हॉकी टीम कप्तान सरदारा सिंग, चेस ग्रँडमास्टर शशीकिरण कृष्णन, कुस्तीपटू सुशीलकुमार व त्याचे प्रशिक्षक सत्पाल आणि माऊंट एव्हरेस्ट पादाक्रांत करणा-या अरुणिमा सिन्हा या क्रीडा क्षेत्रातील व्यक्तींनाही पुरस्काराने गौरवण्यात येईल.अर्थतज्ज्ञ विवेक देब्रॉय, पत्रकार रजत शर्मा, स्वप्न दासगुप्ता, हरीशंकर व्यास आणि अभिनेते प्राण ( मरणोत्तर) यांचाही पुरस्काराच्या यादीत समावेश आहे.

नागपूर – देशात वाघांच्या संख्येत ५२० ने वाढ झाली असली तरी वाघांची कथित राजधानी म्हणून ओळखल्या जाणा-या विदर्भात वाघ विशेष वाढलेले नाहीत.
महाराष्ट्रात फक्त २१ वाघ वाढले आहेत. वन खात्याने व्याघ्र गणनेच्या जाहीर केलेल्या ताज्या आकडेवारीनुसार, महाराष्ट्रात १९० वाघ आहेत. त्यातील १७० ते १७५ वाघ विदर्भात असतील. ताडोबा, पेंच आणि मेळघाट व्याघ्र प्रकल्पांमध्ये हे वाघ आहेत.
यातील सर्वाधिक १०५ वाघ ताडोबाच्या जंगलात आहेत. महाराष्ट्रातील वाघांच्या संख्येत इतर राज्यांच्या संख्येत फार कमी वाढ आणि टक्केवारीत सांगायचे तर फक्त १२ टक्के वाढ आहे. विदर्भातील वन्यप्रेमींनी चिंता करावी, अशी परिस्थिती विदर्भात आहे.
जंगल आणि वाघांच्या रक्षणावर कोटय़वधी रुपये खर्च झाले असताना ही कामगिरी निराशाजनक आहे, असे वन्यप्रेमींचे मत पडले. विदर्भात वाघांच्या शिकारीचे प्रमाण वाढले आहे. गेल्या चार वर्षात २२ वाघांची शिकार झाली.
कर्नाटकात वाघ वाढले. विदर्भात वाढू शकले नाहीत याला हे बेकायदा शिकारी कारण असल्याचे सांगितले जाते. कर्नाटकात ४०८ वाघ आहेत. आठ वर्षापूर्वी तिथे २९० वाघ होते. मध्य प्रदेशात ३०८ वाघ झाले आहेत. चार वर्षापूर्वी २५७ वाघ होते.

मुंबई – शिवसेनाप्रमुख दिवंगत बाळासाहेब ठाकरे यांच्या स्मारकासाठी परळ येथील हाफकीन संशोधन संस्थेची जागा घेण्याचा राज्य सरकारचा प्रयत्न निष्फळ ठरला आहे. ‘हाफकीनच्या विस्तारासाठी आम्हालाच आणखी जागा हवी आहे. त्यामुळं अन्य कोणत्याही कारणासाठी एक इंचही जागा देणार नाही,’ असं संस्थेच्या व्यवस्थापनानं स्पष्ट केलं आहे.
बाळासाहेब ठाकरे यांच्या जयंतीदिनी स्मारकाची घोषणा करण्याचा राज्य सरकारचा मानस होता. त्यासाठी राज्य सरकार व महापालिकेने सात जागांची यादी बनविली आहे. त्यात परळ येथील हाफकीन संस्थेच्या तीन एकर जागेचा समावेश आहे. ही जागा स्मारकासाठी मिळावी म्हणून कोकण विभागीय आयुक्त राधेश्याम मोपलवार, महापालिकेचे वरिष्ठ अधिकारी व शिवसैनिकांनी मंगळवारी संस्थेच्या अधिकाऱ्यांची भेट घेतली आणि तीन एकर जागेचा प्रस्ताव ठेवला. मात्र, व्यवस्थापनाने तो स्पष्ट शब्दांत धुडकावून लावला.
‘हाफकीनच्या कॅम्पसमध्ये थोडीफार मोकळी जागा आहे. मात्र, भविष्यात आम्हाला संस्थेचा विस्तार करायचा आहे. ही जागा गेल्यास आमच्या अनेक महत्त्वाकांक्षी योजना पाण्यात जातील. सरकारी पथकाला आम्ही हे सांगितल्याचं हाफकीनचे महाव्यवस्थापक सुभाष शंकर राव यांनी सांगितलं.
‘सध्या हाफकीन ४५ देशांना पोलिओ प्रतिबंधक लसींचा पुरवठा करते. हे प्रमाण वाढवून आणखी काही देशांना लसी पुरविण्याचा आमचा प्रयत्न आहे. त्यामुळं जमिनीचा प्रत्येक तुकडा आमच्यासाठी महत्त्वाचा आहे,’ असं राव यांनी सांगितलं.
संसर्गजन्य आजारांवर व त्यावरील उपायांवर संशोधन करणारी हाफकीन ही संस्था १८९९ मध्ये स्थापन झाली. सुरुवातीला संस्थेकडं २७ एकर जागा होती. मात्र, २०१२ साली राज्य सरकारनं यातील ५ एकर जागा टाटा कॅन्सर हॉस्पिटलला देऊन टाकली. त्यामुळं आता हाफकीनकडं २२ एकर जागा आहे. त्यातील काही जागा रिकामी आहे. या जागेवर टीबी, डायरिया, टिटॅनस आणि डीटीपीसह अन्य रोगप्रतिबंधक लसींसाठी संशोधन प्रकल्प सुरू करण्याची हाफकीनची योजना आहे.

जिल्हा नियोजन समितीची बैठक,  पुढील वर्षासाठी 399 कोटींचा आराखडा मंजूर
यवतमाळ, दि. 22 : दुषित पाण्यामुळे अनेक आजार संभवतात. जिल्ह्यात काही ठिकाणी फ्लोराईडयुक्त तर काही ठिकाणी अन्य दुषित घटक आढळून येतात. अशा ठिकाणचे पाणी आरोग्यास अपायकारक असल्याने अशा सर्व ठिकाणी जलशुध्दीकरणाची विशेष व्यवस्था करण्यात येणार असून त्यासाठी निधी उपलब्ध करून दिला जातील. याबाबतचा प्रस्ताव संबंधित विभागाने तातडीने तातडीने तयार करून शासनास सादर करावा, अशा सुचना पालकमंत्री संजय राठोड यांनी केल्या.पालकमंत्री राठोड यांच्या अध्यक्षतेखाली जिल्हा नियोजन समितीची बैठक बचत भवन येथे पार
पडली. त्यावेळी त्यांनी या सुचना केल्या. बैठकीस जिल्हा परिषद अध्यक्षा डॅा.आरती फुफाटे, खा.भावना गवळी, खा.राजीव सातव, आ.मनोहर नाईक, आ.मदन येरावार, आ.डॅा.अशोक उईके, आ.संजीवरड्डी बोदकुरवार, आ.राजु नजरधने, आ.राजु तोडसाम, आ.हरिभाऊ राठोड, आ.ख्वाजा बेग, जिल्हाधिकारी राहुल रंजन महिवाल,मुख्य कार्यकारी अधिकारी डॅा.मल्लिनाथ कलशेट्टी, अप्पर जिल्हाधिकारी लक्ष्मण राऊत, निवासी उपजिल्हाधिकारी राजेश खवले यांच्यासह नियोजन समितीचे सदस्य, विभागप्रमुख अधिकारी उपस्थित होते. बैठकीत पुढील वर्षाचा सन 2015-16 साठी एकूण 399 कोटी 85 लाख 91 हजार रुपयाच्या वार्षीक आराखड्यास मान्यता देण्यात आली. त्यात सर्वसाधारण योजनेअंतर्गत 177 कोटी 43 लाख, आदिवासी उपयोजना 157 कोटी 21 लाख, अनुसूचित जाती उपयोजना 64 कोटी 22 लाखांच्या आराखड्याचा समावेश आहे.
सदर आराखडा सर्वसंमतीने बैठकीत मंजुर करण्यात आला. तसेच चालु वर्षातील खर्चाचा पुर्नविनियोजन आराखड्यासही मान्यता देण्यात आली.
जिल्हा परिषदेच्यावतीने दुषित पाणीस्त्रोतांच्या काही ठिकाणी जलशुध्दीकरण यंत्र (आरओ) लावण्यात आले होते. यापैकी काही यंत्र सुरू आहे. जिल्ह्यात अशा स्त्रोतांच्या ठिकाणी आरोग्याच्यादृष्टीने जलशुध्दीकरणाची कायम यंत्रणा उभारणे आवश्यक आहे. त्यामुळे यासाठी प्रस्ताव सादर करण्यासोबतच निधी उपलब्ध करून देण्यात येणार असल्याचे पालकमंत्री म्हणाले. जिल्हा नियोजन समितीमधून स्मशानभूमीसारखी जनसुविधेची कामे केली जातात. परंतु यासाठी अपुरा निधी मिळत कामे चांगल्या पध्दतीने करता येत नाही. त्यामुळे दरवर्षी काही ठराविक गावांची निवड करून त्याठिकाणी शेड, रस्ता, बगीचा, झाडे, बसण्याची चांगली जागा आदी प्रकारच्या सुविधा करण्यावर भर देण्यात येईल. येत्या पाच वर्षात सर्वच स्मशानभूमिचा विकास करण्यात येणार असल्याचे पालकमंत्री म्हणाले.  पुरसंरक्षक भिंतीसाठी निधी उपलब्ध आहे. परंतु या कामांना पाहिजे तशी गती नाही. त्यामुळे अशा भिंती उभारण्याचा कामासाठी स्वतंत्र यंत्रणा निर्माण करण्याच्या सुचना पालकमंत्र्यांनी केल्या. जिल्ह्यात 48 भिंतींसाठी 12 कोटी रुपये उपलब्ध आहे. दुष्काळी स्थिती पाहता शेतकऱ्यांचे विज कनेक्शन कापल्या जावू नये. जुने कापलेले कनेक्शन कसे जोडता येईल यासाठी शासनस्तरावर प्रयत्न करू, असे ते म्हणाले. जिल्ह्यात पाणी पुरवठा योजनेची अनेक कामे केवळ कंत्राटदारांचा हलगर्जीमुळे प्रलंबित आहे. त्यामुळे अर्धवट कामे सोडून जाणाऱ्या सर्व कंत्राटदारांवर गुन्हे दाखल करा. तसेच शेतकऱ्यांना मदत वाटप करतांना त्यांच्याकडून
पैसे मागणाऱ्या तलाठ्यांना पाठीशी न घालता त्यांचावर निलंबनाची कार्यवाही करा, अशा सुचनाही पालकमंत्र्यांनी यावेळी केल्या.यावेळी पालकमंत्र्यांनी पाणी वापर संस्था, अरुणावती प्रकल्पावरील मच्छ बिज केंद्र, मागील मदत वाटपाचा आढावा, क्रीडा संकुल बांधकामाची सद्यस्थिती, निम्न पैनगंगा प्रकल्पामुळे खरेदी विक्रीचे थांबलेले व्यवहार आदींबाबतही माहिती जाणून घेतली. यावेळी सर्व लोकप्रतिनिधी तसेच जिल्हा नियोजन समितीच्या सदस्यांनी वेगवेगळ्या विषयांवर मुद्दे उपस्थित करून बैठकीत चर्चा केली. सुरुवातीस जिल्हाधिकारी राहुल रंजन महिवाल यांनी सर्व उपस्थितांचे रोपटे भेट देवून स्वागत केले. बैठक संपल्यानंतर उपस्थितांचे आभारही त्यांनीच मानले.

सॅन फ्रॅन्सीस्को – जगातील सर्वात लोकप्रिय मेसेजींग अॅप्लिकेशन असणारे व्हॉट्सअॅपवर आता कंप्युटरवरुनही वापरता येणार आहे. व्हॉट्सअॅपने आपली वेबबेस सेवा सुरु केली असून त्यामुळे आता लहानश्या मोबाईल स्क्रीनवर बोटे चालवून थकलेल्यांना कंप्युटरच्या मोठ्या स्क्रीनवरुन व्हॉट्सअॅपचा आनंद घेता येणार आहे.
५०० दशलक्ष युझर्स असणा-या व्हॉट्सअॅपने आपल्या या वेब सेवेला फोनवरील व्हॉट्सअॅपची डेस्कटॉपवरील मिरर अवृत्ती असल्याचे म्हटले आहे. आमच्या वेब ब्राऊसरवरुन आता मोबाईलवरील व्हॉट्सअॅप कनेक्ट करुन थेट कंप्युटरवर व्हॉट्सअॅप वापरता येणार असल्याचे व्हॉट्सअॅपने आपल्या ब्लॉगमध्ये नमूद केले आहे. त्यामुळे एकाच वेळी युझर्सला वेब आणि मोबाईलवरुन व्हॉट्सअॅप वापरता येईल आणि कुठूनही केलेला संवाद दुस-या डिव्हाइसवर दिसेल.
व्हॉट्सअॅपची ही सेवा सध्या गुगल क्रोमच्या ब्राऊसरवर वापरता येणार आहे. तर अॅपल प्लॅटफॉर्मवरील मर्यादेमुळे आयफोन युझर्सला ही सेवा वापरता येणार नसल्याचे व्हॉट्सअॅपकडून स्पष्ट करण्यात आले आहे.ऑक्टोबर महिन्यामध्ये २२ अब्ज डॉलरला फेसबुकने व्हॉट्सअॅपला विकत घेतले होते. त्यानंतर व्हॉट्सअॅपच्या युझर्सच्या संख्येत वाढ झाली असली तरी फेसबुकने व्हॉट्सअॅपसाठी मोजलेली किंमत योग्य आहे का याबाबत टेक जाणकारांमध्ये दुमत आहे. या वेबबेस सेवे व्यतिरीक्त लवकरच व्हॉट्सअॅपवर फ्री कॉलिंगची सेवा देण्यात येणार असल्याचेही वृत्त आहे.

नवी दिल्ली- पंतप्रधान नरेंद्र मोदी आणि अमेरिकेचे राष्ट्राध्यक्ष बराक ओबामा २७ जानेवारीला ‘मन की बात’ या कार्यक्रमाद्वारे भारतीय नागरिकांशी रेडियोवरुन एकत्रितपणे संवाद साधणार आहेत. स्वत: पंतप्रधान नरेंद्र मोदी यांनी ट्विटरद्वारे ही माहिती दिली.
बराक ओबामा २५ जानेवारीला भारत भेटीवर येत आहेत. ओबामा हे प्रजासत्ताकदिनी प्रमुख पाहुणे म्हणून उपस्थित राहणार आहेत. नरेंद्र मोदी देशवासियांशी ‘मन की बात’द्वारे संवाद साधतात. यावेळी २७ जानेवारीला होणा-या ‘मन की बात’ या कार्यक्रमामध्ये अमेरिकेचे राष्ट्राध्यक्ष बराक ओबामा व मी आमचे विचार एकत्रितरित्या मांडणार आहोत, असे मोदी यांनी म्हटले आहे.

मुंबई- मुंबई शेअर बाजारात बुधवारी सकाळच्या सत्रातही तेजीचे वातावरण आहे. निर्देशांकाने २८ हजार ९०० अंकांची पातळी गाठली. तर निफ्टीनेही ८ हजार ७३०.४५ या नवीन उच्चांकी पातळीला स्पर्श केला.
शेअर बाजारात पैशांचा ओघ सुरू असून सलग पाचव्या दिवशी शेअर बाजार वधारला आहे.
गेल्या चार सत्रात निर्देशांकाने एक हजार ४३८ अंकांनी वधारला आहे. बुधवारी सलग पाचव्या दिवशी सेन्सेक्समध्ये १५५.२५ अंकांची वाढ होऊन २८ हजार ९३९.९२ हा नवीन उच्चांक गाठला. तर निफ्टीही २० अंकांनी वधारला असून ८,७१५ अंकावर पोहचला.
मंगळवारी, मुंबई शेअर बाजाराने ५२२.६६ अंकांची झेप घेत २८,७८४.६७, तर निफ्टी १४४.९० अंकांच्या वाढीसह ८,६९५.६० या शिखरावर बंद झाला. निफ्टीने मंगळवारी नवीन विक्रमी उच्चांक गाठला होता. निफ्टीने इतिहासात पहिल्यांदाच ८,७००ला स्पर्श केला.