केंद्रीय लोकसेवा आयोग यांच्यावतीने सहयोगी प्राध्यापक (संगणक) (4 जागा), सहाय्यक प्राध्यापक (रसायन शास्त्र) (2 जागा), सहाय्यक प्राध्यापक (प्रसुतिशास्त्र आणि स्त्रीरोग तज्ञ) (21 जागा), सहाय्यक प्राध्यापक (प्लास्टिक सर्जरी ) (6 जागा), संचालक (संस्था) या पदांकरिता पात्र उमेदवारांकडून ऑनलाईन अर्ज मागविण्यात येत आहेत. यासंबंधीची जाहिरात एम्प्लॉयमेंट न्यूजच्या 10-16 जानेवारी 2015 च्या अंकात आली आहे. अर्ज करण्याची अंतिम तारीख 29 जानेवारी 2015 आहे. अधिक माहिती http://www.upsconline.nic.in या संकेतस्थळावर उपलब्ध आहे.

अलाहाबाद : नरेंद्र मोदी यांना पुन्हा पंतप्रधान करण्यासाठी हिंदूंनी प्रत्येकी १० मुले जन्माला घालावी, असा नवा संदेश बद्रीकाश्रमचे शंकराचार्य स्वामी वासुदेवानंद सरस्वती यांनी हिंदू समाजाला दिला आहे.
येथील संगमावर ‘माघ मेळ्या’त बोलताना वासुदेवानंद सरस्वती शनिवारी रात्री म्हणाले की, हिंदूंच्या ऐक्यामुळेच मोदी पंतप्रधान झाले आहेत. भारतातील हिंदूंची बहुसंख्य समाज म्हणून स्थिती कायम राखण्यासाठी प्रत्येक हिंदू कुटुंबाने १० अपत्ये जन्माला घालायला हवीत.
एवढेच नव्हेतर, संघ परिवाराशी संबंधित संघटनांनी ‘घर वापसी’च्या नावाने हाती घेतलेल्या धर्मांतर कार्यक्रमाचेही शंकराचार्यांनी समर्थन केले. ते म्हणाले की, ख्रिश्चन, इस्लाम व शीख या धर्मांची उत्पत्ती हिंदू धर्मातूनच झाली आहे. त्यामुळे प्रत्येकाने आपल्या मूळ धर्मातच परत यायला हवे. ‘घर वापसी’वर कोणताही प्रतिबंध असता कामा नये व धर्मांतराविरुद्धही कोणतीही कायदेशीर कारवाई करता कामा नये, असेही ते म्हणाले. हिंदूंनी चार मुले जन्माला घालावी, या भाजपा खासदार साक्षी महाराज यांच्या विधानाने उठलेले वादळ शमलेले नसतानाच शंकराचार्य वासुदेवानंद सरस्वती यांनी आता हे १० अपत्यांचे खूळ काढले आहे.

नवी दिल्ली- १९६२ मध्ये चीनने आक्रमण केल्यानंतर १५ हजारांची एक अशा सहा तुकड्या भारत-चीन सीमेवर भारताने तैनात केल्या होत्या. आता भारताच्या ६५व्या प्रजासत्ताक दिनानिमित्त प्रमुख पाहुणे म्हणून येणारे अमेरिकेचे अध्यक्ष बराक ओबामा यांच्या सुरक्षेसाठी विविध सुरक्षा संस्थांचे ९० हजार सैनिक तैनात केले जाणार आहेत. त्याचबरोबर अमेरिकेचे १६ हजार सैनिक, सीआयएचे एजंट, सिक्रेट सव्‍‌र्हिस एजंट आदी सुरक्षेचा लवाजमा असेल.
या सुरक्षेसाठी खास ३५ श्वान तैनात केले असून, त्यांना २० आठवड्यांचे खास प्रशिक्षण दिले आहे. या श्वानांच्या तोंडाला खास प्रकारचा मास्क लावला आहे. या मास्कमुळे साध्या गोळ्यांचा कोणताही परिणाम त्या श्वानांवर होणार नाही. तसेच व्हीव्हीआयपी गाड्या पार्किंग करताना त्या एकाच दिशेने कराव्या लागतील. या गाड्या पार्क केल्यानंतर त्यांच्या चाव्या अमेरिकन एजन्सी ताब्यात घेतील. ओबामा यांच्यासमवेत सहा विमाने येणार आहेत.
तसेच ओबामा यांच्यासारख्या दिसणा-या दोन व्यक्ती या विमानात असतील. २६ जानेवारी रोजी राजपथावर जिथे मुख्य संचलन होणार आहे, तिथे भारताच्या राष्ट्रपतींसमवेत, अमेरिकेचे राष्ट्राध्यक्ष ओबामा, त्यांच्या पत्नी उपस्थित राहणार आहेत. व्यासपीठाच्या भोवती ३०० मीटरपर्यंत सुरक्षा कवच तयार करण्यात आले आहे. राष्ट्रपती आणि अमेरिकेचे राष्ट्राध्यक्ष, भारताचे पंतप्रधान, संरक्षणमंत्री यांच्या खेरीज अन्य कोणालाही त्या व्यासपीठावर प्रवेश दिला जाणार नाही.
दिल्लीमधील सुरक्षा व्यवस्थेचा आढावा अमेरिकन सिक्रेट एजन्सी आणि सीआयएच्या अधिका-यांनी आज रविवार असूनही घेतला. दिल्ली मेट्रोच्या सर्व स्टेशनांभोवती खडा पाहरा सोमवारपासून तैनात करण्यात येणार आहे. राजपथाकडे येणारे सर्व मार्ग उद्यापासून सील केले जाणार आहेत. त्या मार्गावरून जाणा-या वाहनांची कडक तपासणी केली जाणार आहे. दिल्ली विमानतळाच्या भोवती कडक सुरक्षाव्यवस्था रविवारपासून लागू करण्यात आली आहे. दिल्लीत कडाक्याच्या थंडीमुळे अनेक लोकांना जाकीट घातल्याशिवाय रस्त्यावरून फिरणे शक्य होत नाही. अशा जाकिटांची तपासणीही करण्याचे आदेश दिले आहेत.
प्रजासत्ताक दिनी अमेरिकेचे अध्यक्ष बराक ओबामा यांच्या सुरक्षेसाठी सात स्तरीय सुरक्षा व्यवस्था ठेवली आहे. प्रजासत्ताक दिनी विमानांवर लक्ष ठेवण्यासाठी खास रडार आहे. जमिनीपासून हवाई मार्गावर कडेकोट सुरक्षा ठेवल्याने राजधानीला लष्करी छावणीचे रूप आले आहे. या सुरक्षा व्यवस्थेसाठी मल्टी एजन्सी नियंत्रण कक्ष स्थापन केला आहे. यातून राजधानीतील प्रत्येक भागावर लक्ष ठेवण्यात येईल. अमेरिकेच्या सिक्रेट सव्‍‌र्हिसचे एजंट भारतात पोहचले असून, त्यांनी दिल्ली व आग्रा येथे तपासणी सुरू केली आहे. तसेच प्रजासत्ताक दिनाच्या कार्यक्रमाला येताना ओबामा हे स्वत:च्या बुलेटप्रूफ लिमोझिनमधूनच येण्याची शक्यता आहे. ओबामा बसल्यानंतर व्हीव्हीआयपी कक्षाला भारताच्या स्पेशल प्रोटेक्शन ग्रुप आणि सिक्रेट सव्‍‌र्हिसेस एजंटचे कडे असेल. त्याचबरोबर केंद्रीय सुरक्षा दलांनी दहशतवाद विरोधी पथक तयार केले आहे. हे पथक राजधानीतील कोणत्याही हॉटेल, गेस्ट हाऊसमध्ये जाऊन अचानक तपासणी करणार आहे.

नवी दिल्ली – भाजपाने तुम्हाला मत देण्यासाठी पैसे देऊ केले तर ते पैसे घ्या, पण मत मात्र आपच्या उमेदवारालाच द्या असे विधान आम आदमी पक्षाचे प्रमुख अरविंद केजरीवाल यांनी रविवारी केले.
दिल्ली विधानसभा निवडणुकीसाठी आपने आयोजित केलेल्या प्रचारसभेत ते बोलत होते. दिल्लीमधील राजकीय वातावरण तापत चालले असून, सर्वच पक्षांच्या नेत्यांमध्ये आरोप-प्रत्यारोपाचे राजकारण रंगले आहे.
निवडणुकीच्या काळात भाजपवाले तुमच्याजवळ येतील तुम्हाला पैसे देऊ करतील. नाही म्हणून नका ते पैसे घ्या पण मत मात्र आपच्याच उमेदवाराला द्या असे विधान केजरीवाल यांनी केले.
केजरीवाल एवढयावरच थांबले नाहीत तर, काही पक्ष तुमच्याजवळ आले नाहीत तर, तुम्ही त्यांचे कार्यालय गाठा आणि त्यांच्याकडून पैसे घ्या असे वक्तव्य त्यांनी केले. केजरीवालांच्या या विधानाचा भाजपानेही चांगलाच समाचार घेतला. भ्रष्टाचार विरोधी लढयाचे कार्यकर्ते आता स्वत:चा भ्रष्टाचाराला पाठिंबा देत आहेत. अरविंद केजरीवालांनी त्यांच्या विधानाबद्दल माफी मागावी अशी मागणी भाजपाने केली.

यवतमाळ, दि. १८ – पल्स पोलिओ लसिकरण मोहिमेच्या पहिल्या टप्प्याचा शुभारंभ पालकमंत्री संजय राठोड यांच्याहस्ते शासकीय वैद्यकीय महाविद्यालयीत मातोश्री प्रतिक्षालयात आयोजित कार्यक्रमाप्रसंगी झाला. यावेळी पालकमंत्र्यांनी काही बालकांना लस पाजून मोहिमेची सुरूवात केली.
यावेळी नगराध्यक्ष सुभाष राय, जिल्हाधिकारी राहुल रंजन महिवाल, मुख्य कार्यकारी अधिकारी डॉ.मल्लिनाथ कलशेट्टी, जिल्हा शल्य चिकित्सक डॉ.प्रेमानंद निखाडे, डा.पांडे, डॉ.मनोज सक्तेपार, डॉ.विजय कावलकर, आयएमएचे जिल्हाध्यक्ष डॉ.देशमुख आदी उपस्थित होते. यासह जिल्ह्यात ठिकठिकाणी जिल्हा परिषद अध्यक्ष डॉ.आरती फुफाटे तसेच उपाध्यक्ष व सभापतींच्याहस्ते शुभारंभ करण्यात आला. सदर मोहिम जिल्हाभर राबवित असतांना एकही बालक सुटणार नाही याची काळजी घेण्याच्या सुचना पालकमंत्र्यांनी यावेळी केल्या. पहिल्या टप्यात जिल्ह्यात एकूण २ लाख ६६ हजार बालकांना पोलिओ लस देण्यात येत आहे. त्यासाठी ग्रामीण भागात २३४३, शहरी भागात २७५ असे २६१७ बुथ सुरू करण्यात आले आहे. तसेच ग्रामीण व शहरी भागात ५१९ ट्रांझीट टिम तसेच ११४ मोबाईल पथके नेमण्यात आली होती. या पथकांनी ठिकठिकाणी बालकांचा शोध घेऊन त्यांचे लसिकरण केले. लसिकरणापासून सुटलेल्या बालकांना पुढे काही दिवस लस देण्याचा कार्यक्रम राबविण्यात येणार आहे.

माहुर (नांदेड), दि. १८ – विदर्भ-मराठवाड्याच्या सिमेवरील बहुचर्चीत निम्न पैनगंगा प्रकल्पात शेतजमिन गेलेल्या शेतकºयाची ७ लाखाने फसवणूक केली आहे. या प्रकरणी कृषी उत्पन्न बाजार समितीचे माजी उपसभापती व सरपंचाविरूद्घ गुन्हे दाखल करण्याचे आदेश न्यायालयाने मांडवी पोलिसांना दिले आहे. त्यावरून पोलिसांनी खंबाळ््याचे माजी सरपंच तथा किनवट बाजार समितीचे उपसभापती बळीराम दुलसिंग राठोड (४०), माजी सरपंच गणपत अमरसिंग आडे (५५) याच्याविरूद्घ गुन्हे दाखल केले.
निम्न पैनगंगा प्रकल्पाची मुख्य भिंत ही खंबाळा गावात असून तीन वर्षापासून काम सुरू झाले आहे. येथील शेतकरी बाब्या जाब्या राठोड यांची ४ एकर ०.७ आर शेती या प्रकल्पाच्या भिंतीमध्ये गेली आहे. त्या मोबदल्यात शेतकºयाला ७ लाख ८ हजार ३४३ रुपये १९ मार्च २००९ रोजी भारतीय स्टेट बँक शाखा मांडवी येथील खात्यात जमा करण्यात आले. त्यानंतर बाजार समितीचे उपसभापती बळीराम राठोड, माजी सरपंच गणपत आडे या दोघांनी संगणमत करून शेतकºयांस भूलथापा देऊन तुमच्या नावे एवढी रक्कम जमा राहील्यास सरकारला कर द्यावा लागणार म्हणून तुम्ही एवढी रक्कम जमा ठेऊ नका असे सांगितले. त्यानंतर बॅकेतून स्वत:च्या खात्यात सात लाख रुपये वर्ग करून घेतले. सात लाख रुपयाचे पाच वर्षात दुप्पट पैसे देण्यात येईल असे आश्वासन दिले होते. मात्र सहा वर्ष होऊनही डिपॉझीटची पावती व पैसे मिळाले नाही. त्यामुळे शेतकºयाने मांडवा पोलीस ठाणे गाठून तक्रार दिली मात्र पोलीसांनी धुडकावून लावले होते. शेवटी शेतकºयाने किनवट येथील प्रथमश्रेणी न्यायालयात धाव घेतली. या प्रकरणाची सखोल चौकशी करून त्यात मांडवी येथील स्टेट बँकेचे सुनील नुरसिंग राठोड, अशोक भाटु राठोड यांनी साक्ष ग्राह्य धरण्यात आली. न्यायालयाने बळीराम राठोड व गणपत आडे याच्याविरूद्घ फसवणुकीचे गुन्हे दाखल करण्याचे आदेश मांडवी पोलिसांना दिले असून गुन्हा दाखल करण्यात आला.

 
यवतमाळ, दि. १८ (विशेष प्रतिनिधी) – कुटुंबीयानी लग्नाला विरोध केल्याने प्रेमीयुगुलाने आत्महत्या केल्याची घटना आज रविवारी १८ जानेवारी रोजी सकाळी घाटंजी तालुक्यातील घाटी येथे उघडकीस आली. या घटनेने परिसरात एकच खळबळ उडाली आहे.
सुवर्णा भास्कर नारनवरे (२१) रा. बेलोरा , श्रीकांत अवधुत डगमल (२५) रा. घाटी घाटंजी असे मृतक प्रेमीयुगुलाचे नाव आहे. सुवर्णा ही घाटंजी येथील गिलाणी महाविद्यालयात बि.ए.भाग एक ची विद्यार्थीनी होती. तर श्रीकांत हा सेन्ट्रींगचे काम करीत असून युवती त्याची मामेबहीण होती. नातेवाईक असल्याने दोघांचेही एकमेकांच्या घरी जाणे येणे होते. अशातच दोघेही एकमेकांच्या प्रेमात पडले होते. त्यांनी साथ जीयेंगे साथ मरेंगेची शपथ घेतली होती. अशातच त्यांनी आपल्या कुटुंबीयाना लग्न करुण देण्याची मागणी केली होती. यावेळी नातेवाईकांनी लग्नास विरोध केला होता. दरम्यान नारनवरे कुटुंबीयांनी सुवर्णासाठी विवाहयोग्य वर शोधणेही सुरू केले होते. त्यामुळे त्या दोघांनीही आपली जीवनयात्रा संपविण्याच निर्णय घेतला . काल रात्री त्यांनी ओळणीने एकमेकांना बांधून गुरांचा बाजार भरत असलेल्या परिसरातील विहीरीत उडी टाकुन आत्महत्या केली. दरम्यान आज सकाळी ते दोघेंही घरी न आल्याने नातेवाईकांनी शोधाशोध सुरू केल्यानंतर विहीरीत मृतदेह आढळून आले. या घटनेची माहिती मिळतााच घाटंजी पोलिसांनी घटनास्थळ गाठून पंचनामा करून मृतदेह शवविच्छेदनासाठी ग्रामण रुग्णालयात पाठविण्यात आले. या प्रकरणी पोलिसांनी अकस्मात मृत्यूची नोंद केली असून बेलोरा व घाटी घाटंजी परिसरात खळबळ उडाली आहे.

पुणे – पुण्यात चिड आणणारी एक घटना घडलीय. मॅक्डोनाल्डमधल्या एका आऊटलेटमध्ये गरीब असल्याच्या कारणावरून मुलाला धक्के मारून बाहेर काढणयात आलं. हा मुलगा मॅक्डोनाल्डमध्ये सॉफ्टड्रींक घेण्यासाठी गेला होता. हा सगळा प्रकार एका महिलेने आपल्या फेसबूकवर टाकलेल्या पोस्टवरून समोर आलाय. ही महिला त्या मुलाला मॅक्डोनाल्डमध्ये घेऊन गेली होती.
संबंधित महिला आपल्या मित्रांसह मॅक्डोनाल्डमध्ये सॉफ्टड्रींक घेण्यासाठी गेली होती. त्यावेळी मॅक्डोनाल्डच्या बाहेर असलेल्या एका गरीब मुलाने त्यांच्याकडे तशाच सॉफ्टड्रींकची मागणी केली. सॉफ्टड्रींक देण्यासाठी ती महिला त्याला मॅक्डीमध्ये घेऊन गेली. त्यावेळी मॅक्डीच्या स्टाफने त्या गरीब मुलाला पाहून धक्के मारून बाहेर काढलं. आणि स्टाफने संबंधित महिलेलाही वाईट वागणूक दिली.
मुलाला हव्या असलेल्या सॉफ्ट ड्रींकचे पैसे मी देतेय. तरी तुम्ही त्याला का बाहेर काढताय, असं त्या महिलेने मॅक्डीच्या स्टाफला बजावलं. पण त्या महिलेचं मॅक्डीच्या स्टाफने ऐकलं नाही. उलट त्या महिलेशी असभ्य वर्तवणूक केली. ‘अशा लोकांना आतमध्ये येण्याची परवानगी नाहीए’, असं ते म्हणाले. यासगळ्या प्रकारानंतर संबंधित महिलेने बाहेर येऊन त्या मुलाला सॉफ्टड्रींक दिलं. पण सगळा संतापजनक प्रकार तिने फेसबूकवर पोस्ट केला.
पुण्यात जेएम रोडवर असलेल्या मॅक्डोलनाल्डच्या आऊटलेटमध्ये हा प्रकार घडला. पण त्यावेळी या प्रकारावर स्पष्टीकरण देण्यास मॅक्डीतील स्टाफने नकार दिला. मात्र, हा प्रकार सोशल मीडियावर व्हायरल झाला आणि मॅक्डोनाल्ड इंडियाला यावर स्पष्टीकरण द्यावं लागलं. ‘या घटनेत तथ्य असेल तर संबंधित स्टाफवर योग्य ती कारवाई केली जाईल’, असं कंपनीने सांगितलं.

नागपूर – शहरात गुन्हेगारीने चांगलेच डोके वर काढले आहे. चोरी व लुटीच्या दोन घटनांची नोंद एकाच दिवशी झाली, तर यशोधरानगर हद्दीत तांदूळ व्यापाऱ्यावर सशस्त्र हल्ला करीत तोडफोडही करण्यात आली. या वाढत्या घटनांमुळे शहरात कायदा व सुव्यवस्थेवर प्रश्नचिन्ह निर्माण झाले आहे.
पेट्रोल पंप संचालक अलीस शब्बर इस्माइल भाई (७०, रा. गोंडवाना चौक) यांच्याकारमधून चोरट्यांनी अडीच लाखांची रोख व धनादेश लंपास केला. ही घटना कॉटन मार्केट परिसरात शुक्रवारी रात्री ८ वाजताच्या सुमारास घडली. अलीस व त्यांचा चालक कारने जात होते. कॉटन मार्केट परिसरात त्यांची कार पंक्चर झाली. ते व चालक स्टेफनी बदलवित होते. यादरम्यान चोरट्याने कारमधील रोख रक्कम असलेली सुटकेस चोरली. गणेशपेठ पोलिसांनी चोरीचा गुन्हा दाखल करून तपास चालू केला आहे.
दुसऱ्या एका घटनेत चाकूचा धाक दाखवून मोटरसायकलवर आलेल्या चौघांनी सतीश चैत्यानंद डोंगरे (२४, रा. मित्रविहारनगर) याच्याकडील दोन मोबाइल, सोनसाखळी व रोख हिसकावली. ही घटना १४ जानेवारीला रात्री ८ वाजताच्या सुमारास हसनबाग ते खरबी मार्गावर घडली. याप्रकरणी नंदनवन पोलिसांनी जबरी चोरीचा गुन्हा दाखल केला आहे.
अन्य एक घटना यशोधरानगर हद्दीत घडली. प्रकाश ट्रेडिंगमधून तांदूळ न खरेदी केल्याने सात जणांनी तांदूळ व्यापारी संजित श्योमल सोम (४२) यांच्यावर सशस्‍त्र हल्ला केला. मदतीसाठी गेलेले त्यांचे मित्र कालिदास डे यांनाही मारहाण करून घरासमोरील कार व पानठेल्याची तोडफोड केली. शुक्रवारी रात्री ९ वाजताच्या सुमारास घडलेलया या घटनेमुळे विनोबा भावेनगर येथील रहिवाशांमध्ये दहशतीचे वातावरण आहे. याप्रकरणी यशोधरानगर पोलिसांनी प्रकाश ट्रेडिंग कंपनीचा संचालक प्रकाश, जितू, शिवशक्ती बारमध्ये काम करणार रफिक अन्य चौघांविरुद्ध गुन्हा दाखल केला आहे.