नवी दिल्ली- गेल्या ६४वर्षाचा इतिहास असलेला नियोजन आयोग मोडीत काढून त्याजागी नव्याने निर्माण करण्यात आलेल्या ‘निती’ आयोगाच्या उपाध्यक्षपदी कोलंबिया विद्यापीठातील प्राध्यापक व नामवंत अर्थतज्ज्ञ अरविंद पानगरिया यांची नेमणूक करण्यात आली आहे.
या आयोगामध्ये अर्थतज्ज्ञ विवेक देबरॉय आणि माजी संरक्षण सचिव डॉ.व्ही.के.सारस्वत यांची पूर्ण वेळ सदस्य म्हणून नियुक्त करण्यात आली आहे. तर केंद्रीय मंत्री राजनाथ सिंह, अरुण जेटली, सुरेश प्रभू आणि राधा मोहनसिंह, नितीन गडकरी, स्मृती इराणी, थावरचंद गेहलोत हे आयोगातील अन्य सदस्य असणार आहेत.
पंतप्रधान नरेंद्र मोदी यांनी स्वातंत्र्यदिनी केलेल्या भाषणात ६४ वर्षाचा इतिहास असलेला नियोजन आयोग मोडीत काढण्याची घोषणा केली होती. ही व्यवस्था कालबाह्य झाली असून त्याऐवजी सध्याच्या गरजांसाठी लवकरच नवीन संस्था त्याची जागा घेईल, असे त्यांनी सांगितले होते.
सात डिसेंबरला पंतप्रधान मोदींनी यासंबंधी मुख्यमंत्र्यांची बैठक बोलावली होती. या बैठकीत काही जणांनी नियोजन आयोगाच्या ऐवजी दुसरी नवीन यंत्रणा तयार करण्याचा निर्णयाला सहमती दर्शवली तर काही काँग्रेसच्या मुख्यमंत्र्यांनी यास विरोध केला होता.
तसेच यापूर्वी नियोजन आयोगाच्या जागी उभारण्यात येणा-या नव्या संस्थेबाबत पंतप्रधानांनी लोकांना नव्या कल्पना सुचविण्यास पंतप्रधान मोदींनी सांगितले होते. नव्या संस्थेबाबत नवीनवीन संकल्पना तुम्ही आमच्यापर्यंत पोहोचवाव्यात’, असे मोदींनी ट्विटरद्वारे सांगितले होते. तसेच यासाठीची लिंकही त्यांनी ट्विटरवर पोस्ट केली होती.

नवी दिल्ली- देशातील लोकशाही बळ करण्यात महत्त्वाची भूमिका बजावणा-या राजकीय पक्षांनी आपल्या जमिनी व बंगले संदर्भातील सर्व कागदपत्रे जाहीर करावीत, तसेच ही माहिती वेबसाइटवर टाकावी, असे आदेश केंद्रीय माहिती आयोगाने केंद्रीय नगरविकास खात्याला दिले आहेत.
राजकीय पक्षांच्या नावावरील जमीन व बंगले असल्यास त्यांनी त्याची माहिती वेबसाइटवर टाकणे बंधनकारक केले आहे. केंद्रीय माहिती आयोगाने केंद्रीय सार्वजनिक माहिती अधिका-याला सर्व नोंदणीकृत राजकीय पक्षांशी संबंधित सर्व कागदपत्रे, पत्रव्यवहार, मार्गदर्शक तत्वे आणि अधिसूचना आदींची माहिती चार आठवडयात सादर करण्याचे आदेश दिले. तसेच नगरविकास खात्याकडून सर्व पक्षांची माहिती जाहीर करण्यास सांगितले आहेत.
सामाजिक कार्यकर्ते सुभाष अग्रवाल यांनी राष्ट्रीय जनता दलाच्या मुख्यालयाचे नामकरण ‘राबडी भवन’ केल्याप्रकरणी केंद्रीय माहिती आयोगाकडून माहिती मागवली होती. त्याला पक्षाचे नेते नवलकिशोर राय यांनी हरकत घेतली होती. त्यामुळे अग्रवाल यांना माहिती मिळाली नाही. त्यामुळे त्यांनी नगरविकास खात्याकडे धाव घेतली. तेथेही त्यांची निराशा झाली. बिहार सरकारने राजद पक्षाला पाटणा किंवा अन्य राज्यांमध्ये भूखंड दिला आहे का याची माहिती अग्रवाल यांना हवी होती. नगरविकास खात्याने दिलेल्या माहितीनुसार, नवी दिल्लीत राजदला कोणताही भूखंड दिलेला नाही, अशी माहिती मिळाली.

रत्नागिरी – रेल्वेमंत्री सुरेश प्रभू यांच्या विरोधात घोषणाबाजी करत त्यांच्या गाड्यांचा ताफा अडवू पाहणारे काँग्रेस नेते निलेश राणे आणि त्यांच्या ५० कार्यकर्त्यांना रत्नागिरी पोलिसांनी ताब्यात घेतले आहे. चौकशी करून त्यांना सोडण्यात येईल माहिती मिळते आहे.
रत्नागिरी येथे रेल्वेमंत्री सुरेश प्रभू यांचा जाहीर सत्कार कार्यक्रम आयोजित करण्यात आला आहे. या कार्यक्रमासाठी सुरेश प्रभू रत्नागिरी शहरात सकाळी दाखल होणार हे लक्षात घेऊन निलेश राणे यांच्या नेतृत्वाखाली ५० काँग्रेस कार्यकर्त्यांनी सकाळपासून आंदोलन केले. कोकण रेल्वेच्या प्रश्नांकडे सुरेश प्रभू दुर्लक्ष करत असल्याचा आरोप त्यांनी यावेळी केला. सकाळी दहाच्या सुमारे निलेश राणे आणि त्यांच्या कार्यकर्त्यांनी मार्ग रोखून धरण्याचा प्रयत्न केला. यावेळी रत्नागिरी पोलिसांनी कारवाई करत निलेश राणे यांच्यासह ५० जणांना ताब्यात घेतले.

बाभुळगाव, दि. ४ – येथील स्टेट बँक आॅफ इंडियाचे अज्ञात चोरट्यांनी दोन कुलपे तोडून चोरीचा प्रयत्न केल्याची घटन काल मध्यरात्री घडली.
३ जानेवारीच्या मध्यरात्रीनंतर अज्ञात चोरट्यांनी येथील स्टेट बँक शाखेच्या मागील लोखंडी ग्रील व दाराचे कुलुप तोडून बँकेच्या आत प्रवेश केला. मात्र त्यांच्या हाती काहीच लागले नाही. आज सकाळी संदेश वाहक राजगडकर यांच्या निदर्शनात हा प्रकार आला. त्यांनी त्वरीत शाखा व्यवस्थापक विश्वकांत निमजे यांना फोनद्वारे माहिती दिली. विश्वकांत निमजे यांनी दिलेल्या तक्रारीवरून पोलिसांनी भादंवि कलम ४५७, ३८०, ५११ अन्वये चोरट्यांविरोधात गुन्हा दाखल केला. घटनास्थळी ठाणेदार महिपालसिंग चांदा यांनी भेट दिली. विषेश म्हणजे या बँकत रात्रीच्या वेळी कुठलाही चौकीदार ठेवण्यात आला नाही. एक चतुर्थ श्रेणी कर्मचारी वगळता कुठलाही कर्मचारी, अधिकारी मुख्यालयी राहत नाही. सर्वजण बाहेर गावाहुनच अप-डाऊन करतात. त्यामुळे सदर बँक रामभरोसे सोडली असल्याची चर्चा आज दिवसभर परिसरात होती.

यवतमाळ, दि. ४ – जिल्हा परिषदेच्या वतीने घेण्यात आलेल्या परिचरपदाच्या लेखी परीक्षेचा पेपर ११ हजार उमेदवारांनी सोडविला. जिल्ह्यातील ९० केंद्रावर दुपारी २ ते ३.३० वाजताच्या दरम्यान ही परीक्षा पार पडली. परीक्षेदरम्यान अनुचित घटना घडू नये म्हणून परीक्षा केंद्रावर कडेकोट पोलीस बंदोबस्त ठेवण्यात आला होता.
यापूर्वी पेपर फुटल्यामुळे आजच्या परीक्षेकडे तब्बल सात हजार उमेदवारांनी पाठ फिरविली. यापूर्वी २२ नोव्हेंबर रोजी परिचरपदासाठी लेखी परीक्षा घेण्यात आली होती. मात्र विस्तार अधिकाºयाने पेपर फोडल्यामुळे परीक्षा रद्द करण्याची नामुष्की जिल्हा परिषद प्रशासनावर ओढवली होती. रद्द करण्यात आलेली परीक्षा पुन्हा घेण्यात येत असल्याने प्रशासनावर कमालीचा ताण आला होता. या परीक्षेला कुठल्याही प्रकारचे गालबोट लागू नये म्हणून प्रशासनाकडून योग्य ती खबरदारी घेण्यात आली. परिचरपदाच्या ४५ जागांसाठी १८ हजार १५३ उमेदवार लेखी परीक्षेसाठी पात्र ठरले होते. त्यापैकी ११ हजार २६४ उमेदवारांनी परीक्षा दिली. तब्बल ६ हजार ८८९ उमेदवारांनी परीक्षेकडे पाठ फिरविली. पेपर फुटीमुळे उमेदवारांनी परीक्षेला गैरहजर राहने पसंत केल्याचे सांगण्यात येते. उपस्थित विद्यार्थ्यांची टक्केवारी ४० च्या घरात आहे. बंदुकधारी पोलीस व संपर्क अधिकारी यांच्या सुरक्षेत पेपर परीक्षा केंद्रावर पोहोचवण्यात आले. यवतमाळ शहरात ४३ परीक्षा केंद्र होते. तर कळंब, बाभूळगाव, राळेगाव, घाटंजी, आर्णी, दारव्हा, नेर तालुक्यात ४७ केंद्रावर परीक्षा घेण्यात आली.

लखनऊ – जर केंद्र सरकार मालवीय यांना मरणोत्तर भारतरत्न देऊ शकते तर महात्मा जोतिबा फुले आणि कांशीराम यांनाही मरणोत्तर भारतरत्न देऊन गौरविण्यात यावे अशी मागणी बहुजन समाज पक्षाच्या अध्यक्षा मायावती यांनी लखनऊ येथे पत्रकार परिषदेत केली.
भाजप हा जातीयवादी पक्ष आहे. केंद्रातल्या भाजपच्या सरकारने एकाच जातीच्या दोन व्यक्तींना भारतरत्न हा देशातील सर्वोच्च नागरी सन्मान जाहीर केला आहे. मात्र दलित किंवा अन्य मागासवर्गीयांचा या पुरस्कारासाठी विचार केलेला नाही, असे मायावती म्हणाल्या. डॉ. बाबासाहेब आंबेडकर यांच्यानंतर दलितांच्या उद्धारासाठी कांशीराम भरपूर काम केले. त्यामुळे हे योगदान लक्षात घेऊन कांशीराम यांना मरणोत्तर भारतरत्न पुरस्कार देण्याची मागणी मायावती यांनी केली. दलित, मागासवर्गीय आणि महिलांच्या शिक्षण तसेच समानतेसाठी अखेरच्या श्वासापर्यंत अविरत काम करणा-या महात्मा जोतिबा फुले यांचाही मरणोत्तर भारतरत्न पुरस्काराने गौरव करण्याची मागणी मायावती यांनी केली.
माजी पंतप्रधान अटलबिहारी वाजपेयी आणि पंडित मदनमोहन मालवीय यांना २५ डिसेंबर २०१४ रोजी भारतरत्न पुरस्कार जाहीर झाला आहे. प्रजासत्ताक दिनी हा भारतरत्न प्रदान केला जाणार आहे. या पार्श्वभूमीवर बसपच्या अध्यक्षा मायावती यांनी केंद्रातल्या मोदी सरकारच्या भारतरत्न संदर्भातल्या निर्णयावर टीका केली.

नेर – येथे  राष्ट्रीय महाराष्ट्र पत्रकार संघाचे वतीने ६ जानेवारी रोजी मंगळवारला पत्रकार दिनाचे औचित्य साधुन स्पर्धा परिक्षा मार्गदर्शन शिबिर व वादविवाद स्पर्धेचे आयोजन स्वागत मंगल कार्यालय येथे केले आहे.
या कार्यक्रमाचे अध्यक्षस्थानी नगराध्यक्ष पवन जयस्वाल हे राहणार आहे. उद्घाटक म्हणून जिल्हाधिकारी राहूल रंजन महिवाल हे राहणार आहे. कार्यक्रमाला प्रमुख अतिथी म्हणून लोकमतचे कार्यालय प्रमुख किशोर दर्डा, राष्टÑीय मराठी पत्रकार संघाचे विदर्भाध्यक्ष तथा परिवर्तन समाचारचे आवृत्ती संपादक संदीप खडेकर, नेहरू शिक्षण संस्थेच अध्यक्ष परमानंद अग्रवाल उपस्थित राहणार आहे. कार्यक्रमाला मार्गदर्शन महणून प्रा. संजय नाथे, अचलपूरचे उपविभागीय अधिकारी श्यामकांत म्हस्के, उपविभागीय पोलीस अधिकारी कल्पना मराडे, उपजिल्हाधिकारी संदीप कुमार अपार, उपविभागीय पोलीस अधिकारी विजय लगारे, ठाणेदार गणेश भावसार, पत्रकार संघाचे अध्यक्ष गजानन काळे, सहाय्यक पोलीस निरीक्षक सुनिता पवार, पोलिस उपनिरीक्षक डॉ. रंगनाथ जगताप इत्यादी मान्यवर विद्यार्थ्यांना मार्गदर्शन करणार आहे.
कार्यक्रमाचे दुसºया सत्रात वादविवाद स्पर्धेचे आयोजन केले आहे. ‘वाढत्या भ्रष्टाचाराला जनता तारक की मारक’ हा वादविवाद स्पर्धेचा विषय आहे. स्पर्धेतील विजयी स्पर्धकाला प्रथम बक्षीस ३,००१ रुपये, द्वितीय बक्षीस २,००१ रुपये तर तृतीय बक्षीस १,००१ रुपये ठेवण्यात आले आहे. या कार्यक्रमाच्या अध्यक्षस्थानी संदीप खडेकर तर उद्घाटक म्हणून दैनिक हिंदुस्थानचे आवृत्ती संपादक नागेश गोरख हे उपस्थित राहणार आहे. प्रमुख अतिथी म्हणून राजेंद्र माहूरे, श्रमीक पत्रकार संघाचे जिल्हाध्यक्ष नितीन पखाले, झी २४ तासचे जिल्हा प्रतिनिधी श्रीकांत राऊत, गटविकास अधिकारी गौतम भगत, दै. पुण्य नगरीचे उपसंपादक तथा महाराष्टÑ न्युज नेटवर्कचे संपादक राहुल वासनिक, भाजपाचे तालुकाध्यक्ष पुरूषोत्तम लाहोटी, नगरसेवक भाऊराव ढवळे, पत्रकार संघाचे तालुकाध्यक्ष गजानन काळे, अविनाश बन्सोड, मिना सावळकर, जेष्ठ पत्रकार नारायण वंजारी, दै. दिव्य मराठीचे जिल्हा प्रतिनिधी नितीन भागवत, नगरसेवक संजय दारव्हटकर, अंधश्रध्दा निर्मुलन समितीचे बंडू बोरकर, नगर परिषदचे बांधकाम सभापती शालीक गुल्हाणे, नगरसेविका अ‍ॅड. रश्मी पेटकर, भाजपाचे जिल्हा सचिव राजेंद्र देऊळकर, वैष्णवी गुल्हाणे, पंचायत समिती सभापती भरत मसराम, वसंत महल्ले, प्रा. शांतरक्षीत गावंडे इत्यादी उपस्थित राहणार आहे. या कार्यक्रमाला उपस्थित राहण्याचे आवाहन पत्रकार संघाचे अध्यक्ष गजानन काळे, कार्याध्यक्ष अरूण राऊत, सचिव किशोर वंजारी, उपाध्यक्ष अशोक इसाळकर, कोषाध्यक्ष संजय राऊत, संघटक प्रवीण पाटमासे, संघटक विनोद कापसे, मार्गदर्शक प्रा. सदाशिव जरोटे, पांडूरंग भोयर, रमेश दिक्षीत, नदिम खान, निलेश वंजारी, वसीम शेख, बिस्मिला पठाण, अमीन पठाण, राहुल सोहर यानी केले आहे.

सोलापूर – जिल्ह्यातील करमाळा तालुक्यात कोर्टी येथील श्री छत्रपती शिवाजी हायस्कूलमध्ये सुमारे ३५० विद्यार्थ्यांना विषबाधा झाल्याचे वृत्त आहे. या विद्यार्थ्यांपैकी २० ते २२ मुलांची प्रकृती खालावल्याने त्यांना उपजिल्हा रुग्णालयात दाखल करण्यात आले. दरम्यान, या सगळ्यांच्या प्रकृतीत सुधारणा होत असल्याची माहिती मिळते आहे.
श्री छत्रपती शिवाजी हायस्कूलमध्ये आज सकाळी साडे नऊच्या सुमारास विद्यार्थ्यांना मध्यान्न भोजन योजने अंतर्गत पुरण्यात येणारी खिचडी देण्यात आली. त्यानंतर अनेकांना मळमळ, तसेच अस्वस्थ वाटू लागले. त्यानंतर एकापाठोपाठ एक असे सगळेच विद्यार्थी पोट दु:खी आणि मळमळ झाल्याची तक्रार करू लागले. या विद्यार्थ्यांना प्रथम स्थानिक रुग्णालयात उपचारासाठी नेण्यात आले. ज्या २० ते २० मुलांची प्रकृती खालावली त्यांना तत्काळ जिल्हा रुग्णालयात दाखल करण्यात आले. तेथील उपचारानंतर मुलांच्या प्रकृतीत सुधारणा होत असल्याची माहिती देण्यात आली आहे. या सर्व प्रकाराची चौकशी सुरू असून अन्न पदार्थांचे नमूने प्रशासनाकडून गोळा करण्यात आले आहेत. तपाणी अहवाल आल्यानंतर दोषींवर कारवाई करण्यात येणार असल्याचे कळते.

नवी दिल्ली- भारताच्या सागरी हद्दीत घुसखोरी करत असताना तटरक्षक दलाच्या जवानांनी अडवलेल्या पाकिस्तानी बोटीतील चार जणांनी गुजरातमधील पोरबंदरजवळ स्वतःला उडवून घेत स्फोट घडवून आणला. नौदलाच्या सतर्कतेमुळे दहशतवादी हल्ल्याचा कट उधळल्याचे धक्कादायक वृत्त आहे. विशेष म्हणजे मुंबईवरील २६/११ च्या हल्ल्याला सहा वर्ष पूर्ण झाल्यानंतर महिन्याभरातच ही बातमी समोर आली आहे.
गुजरातच्या समुद्र हद्दीत एका संशयित पाकिस्तानी जहाजातून मोठ्या प्रमाणावर विस्फोटके वाहून नेत असल्याची माहिती नौदलाला मिळाली होती. ३१ डिसेंबरला याबाबतची माहिती गुप्तचर यंत्रणेने दिली होती. त्यानुसार एक जानेवारीला पहाटे या पाकिस्तानी मच्छिमारी बोटीच्या संशयित हालचाली लक्षात आल्यानंतर भारतीय नौदलाने चौकशीसाठी या बोटीला अडवण्याचा प्रयत्न केला. मात्र जहाजाने आपला वेग वाढवत पळून जाण्याचा प्रयत्न केला. मात्र नौदलाने पोरबंदरपासून ३६५ किलोमीटर अंतरावर असताना या बोटीला चारही बाजूंनी घेरले. आपण घेरलो गेल्याचे निदर्शनास येताच बोटीवर असलेल्यांनी स्वतःला उडवून घेत स्फोट घडवून आणला. त्यात चार जण मृत्यूमुखी पडल्याचे वृत्त आहे.
Fishing boat intercepted by coast guardडोर्नियर एयरक्राफ्टच्या मदतीने हे ऑपरेशन करण्यात आले. डोर्निअर विमानाने शोध घेत दिवे न लावता लपत लपत जाणारी ती संशयित बोट शोधून काढली. त्यानंतर तटरक्षक दलाच्या गस्त घालणा-या नौकेला वर्दी देण्यात आली. कराची येथील केती बंदरातील ही मच्छिमार बोट होती. संशयित हालचाली लक्षात येताच त्यांना रोखण्याचा प्रयत्न केला असता ते पळू लागल्याने संशय आणखी बळावला, असे नौदल्या अधिका-यांनी शुक्रवारी बोलताना सांगितले.