नवी दिल्ली – अखेर लालकृष्ण अडवाणी यांनी नाराजी दूर करण्यात भाजप नेत्यांना यश आले. दिवसभरातील भेटी आणि चर्चेनंतर अडवाणी यांनी गुजरातमधील गांधीनगरमधून निवडणूक लढवणार असल्याचे सांगितले.
लोकसभा निवडणुकीसाठी अडवाणी गांधीनगर ऐवजी मध्य प्रदेशमधील भोपाळ मतदारसंघातून इच्छूक होते. मात्र पक्षाने त्यांना गांधीनगर मतदारसंघातून उमेदवारी दिली होती. यामुळे नाराज झालेल्या अडवाणींची अखेर समजूत काढण्यात पक्षातील नेत्यांनी बुधवारी रात्रीपासून त्यांची भेट घेण्यास सुरुवात केली होती. दरम्यान, मतदारसंघाच्या निवडीचा अधिकार पूर्णपणे अडवाणींना असल्याचे भाजप अध्यक्ष राजनाथ सिंग यांनी गुरुवारी सांगितले.गुजरातमधील गांधीनगर अथवा मध्यप्रदेशातील भोपाळ यापैकी त्यांना हव्या त्या मतदार संघातून अडवाणी निवडणूक लढवू शकतात. तो अधिकार त्यांना आहे, असे सिंग यांनी पत्रकार परिषदेदरम्यान स्पष्ट केले. भाजपच्या केंद्रीय मंत्रिमंडळाच्या बैठकीत हा निर्णय घेण्यात आल्याचेही ते म्हणाले. त्यानंतर त्यांनी गांधीनगरमधून निवडणूक लढवणार असल्याचेे जाहीर केले. त्याआधी गांधीनगरमधून निवडणूक लढवण्यास अडवाणींनी राजी व्हावे यासाठी भाजपचे पंतप्रधानपदाचे उमेदवार नरेंद्र मोदी यांनी गुरुवारी सकाळी अडवाणींची त्यांच्या निवासस्थानी भेट घेऊन त्यांचे मन वळवण्याचा प्रयत्न केला होता. त्यानंतर सुषमा स्वराज आणि अरुण जेठली यांनीही अडवाणी यांची भेट घेतली होती.

सौंदर्य प्रसाधनांचे अनेक दुष्परिणाम आता पुढे यायला लागले आहे. या सौंदर्य प्रसाधनांमध्ये वापरली जाणारी काही रसायने चक्क कर्करोगाला निमंत्रण देणारी असतात हे कळल्यापासून तर शास्त्रज्ञांनी लोकांना सौंदर्य प्रसाधनांच्या बाबतीत अतिशय सावध राहण्याचा इशारा द्यायला सुरुवात केली आहे. अमेरिकेतल्या कॅलिङ्गोर्निया विद्यापीठातील शास्त्रज्ञांनी या संबंधात लिपस्टीकवर काही संशोधन केले तेव्हा असे आढळले की, लिपस्टीकमध्ये वापरल्या जाणार्‍या काही द्रव्यांमुळे हृदयविकार जडू शकतो किंवा स्नानू शैथिल्याचा विकार होऊ शकतो. लिपस्टीक मध्ये वापरले जाणारे हे द्रव्य हॅन्डवॉश आणि त्याच कामासाठी वापरल्या जाणार्‍या काही साबणांमध्येही वापरले जात असते. हे द्रव्य म्हणजे ट्रायक्लोसान. ट्रायक्लोसानमुळे हृदयाच्या स्नायूंवर गंभीर परिणाम होऊ शकतो. हे सिद्ध करण्यासाठी या शास्त्रज्ञांनी केवळ ट्रायक्लोसानचा हृदयावर काय परिणाम होऊ शकतो याची चाचणी घेतली तेव्हा असे आढळले की, हृदय या द्रव्याच्या संपर्कात केवळ २० मिनिटे आले तरी हृदयाच्या कार्यकलापावर २५ टक्के परिणाम होतो. म्हणजे लिपस्टीक आणि हॅन्डवॉशमध्ये वापरले जाणारे हे द्रव्य किती धोकादायक आहे हे यावरून लक्षात येते. त्या परिणामांचा हा सज्जड पुरावाच आहे. असे असले तरी या संशोधनाच्या आणि निष्कर्षाच्या बाबतीत सौंदर्य प्रसाधनांची इंडस्ट्री सावध झालेली आहे.
अमेरिकेत सौंदर्य प्रसाधनांमध्ये लिपस्टीकचा वापर मोठा आहे आणि त्यातल्या या द्रव्याच्या संदर्भात अशा प्रकारचे निष्कर्ष जाहीर झाले तर लिपस्टीकच्या विक्रीवर मोठा गंभीर परिणाम होईल अशी भीती या उद्योगातल्या जाणकारांना वाटायला लागली आहे. म्हणून या उद्योगात काम करणार्‍या काही संशोधकांनी ट्रायक्लोसानच्या संबंधातील या संशोधनाला आक्षेप घेतला आहे. कॅलिङ्गोर्निया विद्यापीठा तील शास्त्रज्ञांनी हे निष्कर्ष काढताना दोन चुका केल्या आहेत, असे त्यांचे म्हणणे आहे. पहिली गोष्ट म्हणजे ट्रायक्लोसानचा हृदयाच्या स्नायूंवर होणारा परिणाम पडताळून पाहण्यासाठी विद्यापीठातल्या संशोधकांनी उंदरांचा वापर केला आहे. म्हणजे हा प्रयोग उंदरांवर केला आहे. तो करताना ट्रायक्लोसान ची मात्रा जास्त वापरली आहे. प्रत्यक्षात लिपस्टीकमध्ये ट्रायक्लोसान त्यापेक्षा कमी प्रमाणात वापरले जात असते आणि विशेष म्हणजे ही लिपस्टीक ओठाला लावली जात असते. तिचा हृदयाशी काही संबंध येत नाही.
ओठापासून हृदय खूप लांब असते. तेव्हा ट्रायक्लोसानच्या हृदयावर होणार्‍या परिणामां बाबतचे हे निष्कर्ष अतिशयोक्तीपूर्ण आहेत असे त्यांचे म्हणणे आहे. परंतु विद्यापीठातल्या शास्त्रज्ञांना हा आक्षेप मंजूर नाहीत. उंदरांवर प्रयोग करताना मात्रा जास्त वापरली आहे परंतु निष्कर्ष लवकर हाती यावेत म्हणून ती जास्त वापरली आहे. प्रत्यक्षात लिपस्टीकमध्ये ती कमी असते ही गोष्ट खरी, परंतु एकदा ओठाला लिपस्टीक ङ्गासली की, तिचा परिणाम केवळ २० मिनिटे नव्हे तर २४ तास रहात असतो आणि तो कमी असला तरी अधिक काळ होत असतो. दुसरी महत्वाची गोष्ट म्हणजे ओठाला लावलेल्या लिपस्टीकचा हृदयाशी काही संबंध नाही हे म्हणणे चूक आहे. ओठाला लावलेली लिपस्टीक केवळ हृदयापर्यंतच नव्हे तर तिथून झिरपत झिरपत शरीराच्या सगळ्याच अवयवापर्यंत जात असते. म्हणजे ती हृदयाला तर त्रासदायक ठरतेच, तर शरीराच्या इतर अवयवांच्या स्नायूंनाही शिथिलता आणत असते.

क्वालालंपूर- दहा दिवसांपूर्वी बेपत्ता मलेशियन एअरलाइन्सच्या विमानाचे गूढ अजूनही कायम आहे. या विमानाने बेपत्ता झाल्यानंतर तालिबानी भागातून प्रवास केल्याचा अंदाज व्यक्त केला आहे. यासाठी हे विमान अवघ्या पाच हजार फूट उंचीवरून उडवण्यात येत होते. दरम्यान, विमानातील संदेशवहन यंत्रणा बंद झाल्यानंतर या विमानाच्या सहवैमानिकाने अखेरचा संदेश पाठवल्याचा पुरावा सापडला आहे.
या बेपत्ता विमानाचा शोध २६ देशांच्या शोध पथकांद्वारे घेतला जात आहे. तरीही या विमानाचा थांगपत्ता लागलेला नाही. या विमानाच्या कॉकपिटमधून सहवैमानिकाने अखेरचा संदेश पाठवल्यानंतर या विमानाची स्वयंचलित प्रणाली कार्यरत करण्यात आली, असे एअरलाइन्सचे मुख्य कार्यकारी अधिकारी जोहरी याह्या यांनी सांगितले.या विमानाचे वैमानिक कॅप्टन जहारी अहमद शहा आणि प्रथम अधिकारी फारिक अब्दुल हमीद यांच्यावर संशय असून त्यादृष्टीने तपास सुरू झाला आहे. सहवैमानिकाच्या अखेरच्या संभाषणानंतर १२ मिनिटांनी विमानाच्या संदेशवहन यंत्रणेने शेवटचा संदेश पाठवला. या विमानाच्या प्रमुख वैमानिकाच्या अत्याधुनिक फ्लाइट सिम्युलेटरची तपासणी सुरू केली आहे. विमानाची संदेशवहन यंत्रणा बंद करण्याचे काम केवळ अत्यंत प्रशिक्षित वैमानिकच करू शकतो. त्यामुळेच हे विमान रडारवर दिसू शकले नाही, असे मलेशियाच्या अधिका-यांनी सांगितले.

मराठी चित्रपटांनी गेल्या काही वर्षांत उमटवलेला ठसा तसेच बॅाक्स आॅफिसवर मिळवलेले घवघवीत यश त्यामुळे हिंदीतले अनेक मराठी चेहरे मराठी चित्रपटांकडे वळले आहेत. गेली काही वर्षे हिंदीत रमलेला सुमीत राघवनही आता मराठी चित्रपटांत पदार्पण करण्यास सज्ज झाला आहे. ‘ओरँजेन एंटरटेनमेंट’चे विशू गायकवाड आणि मंदार केणी यांची निर्मिती असलेल्या ‘संदूक’मधून सुमीत मराठी चित्रपटांत प्रथमच नायकाच्या भूमिकेत झळकणार असून आजवर अनेक यशस्वी मराठी चित्रपटांचा अनुभव गाठीशी असलेला अतुल काळे याचे दिग्दर्शन या चित्रपटाला लाभणार आहे.
१९४०च्या दशकातील गोष्ट मांडणारा ‘संदूक’ विनोदी चित्रपट आहे. मराठी रंगभूमीवरून पदार्पण केलेला आणि नंतर हिंदीत आपला ठसा उमटवणारा सुमीत राघवन ‘संदूक’मधून प्रथमच मराठीत नायकाच्या भूमिकेत दिसणार आहे. एप्रिल महिन्यात या चित्रपटाच्या चित्रीकरणाला सुरुवात होणार असून सुमीतला शरद पोंक्षे, अरुण नलावडे यांसारख्या कसदार अभिनेत्यांची भक्कम साथ लाभणार आहे. ‘मातीच्या चुली’, ‘दे धक्का’, ‘शहाणपण देगा देवा’, ‘तिचा बाप त्याच बाप’ आणि ‘असा मी अशी ती’ यांसारख्या यशस्वी चित्रपटानंतर ‘संदूक’मधून प्रथमच गतकाळ उभा करणारा दिग्दर्शक अतुल काळे म्हणतो, “‘संदूक’ हे माझं ब-याच वर्षांपासूनचं स्वप्न आहे. शक्य असतं तर माझा पहिला चित्रपट म्हणून ‘संदूक’च बनवणं मला आवडलं असतं. माझं हे स्वप्न सत्यात उतरण्यासाठी १२ वर्षं लागली आहेत. त्यामुळे मी अर्थातच आनंदी आहे आणि आघाडीचे कलाकार आणि तंत्रज्ञांची साथ या स्वप्नाला लाभणं हा माझ्यासाठी दुग्धशर्करा योग आहे. सुमीतशी माझी गेल्या दोन दशकांहून अधिक काळ मैत्री असून ‘संदूक’साठी अन्य कोणत्याच नावाचा विचार करणं मला अशक्य होतं.” यासंदर्भात सुमीत म्हणतो, “‘संदूक’ माझ्यासाठी वैशिष्ट्यपूर्ण आहे. एकतर हा माझा पहिला मराठी चित्रपट आहे. दुसरं म्हणजे माझा बालपणापासूनचा मित्र अतुल काळे याच्या दिग्दर्शनात मला काम करायला मिळणार आहे. आणि हा खूप भव्य, महत्त्वाकांक्षी चित्रपट आहे. माझ्या समविचारी सहका-यांसोबत लवकरात लवकर चित्रीकरण सुरू करण्यासाठी मी उत्सुक आहे. इतक्या वर्षांची प्रतीक्षा फळाला आली, असं मी म्हणेन.” विशू गायकवाड म्हणाले, “३ फेब्रुवारी २०१२ रोजी प्रदर्शित झालेल्या येड्यांची जत्रा या आमच्या पहिल्या चित्रपटाला प्रेक्षकांनी भरभरून प्रतिसाद दिल्यानंतर आमची ‘ओरँजेन एंटरटेनमेंट’ ही कंपनी चांगल्या संहितेच्या शोधात होती. गेली दोन वर्षे आम्ही शोधात होतो, पण आता ‘संदूक’ ज्या प्रकारे आकाराला येतोय, ते पाहाता प्रेक्षकांना हाही चित्रपट आवडेल, याची आम्हाला खात्री आहे. ‘संदूक’मध्ये सकस आशय आहे, विनोदाचा शिडकावा आहे, अॅक्शन आहे, पण याचं सर्वात मोठं वैशिष्ट्य म्हणजे ही गोष्ट १९४०च्या दशकातील आहे. ‘संदूक’ची सर्वांनाच भुरळ पडेल, असा आम्हाला विश्वास आहे.” ‘संदूक’ची पटकथा अतुल काळे, आशिष रायकर आणि सुबोध खानोलकर यांनी लिहिली असून हृषिकेश जोशी याचे संवाद आहेत. छायालेखनाची जबाबदारी अजित रेड्डी पार पाडणार असून कला दिग्दर्शन महेश कुडाळकर यांचे असेल. गुरू ठाकूरच्या गाण्यांना अजित-समीर ही संगीतकार जोडी संगीतबद्ध करणार असून वेशभूषा महेश शेर्ला यांची, तर अॅक्शन संकल्पना प्रद्युम्नकुमार यांची असणार आहे.

नागपूर – कारगिल युद्धात महत्त्वाची भूमिका बजावलेल्या ‘शोल्डर फायर बॉम्ब’ची निर्मिती आता नागपुरात होत आहे. तोफगोळा निर्मितीत अग्रेसर असलेल्या येथील अंबाझरी ऑर्डनन्स फॅक्टरीला हे महत्त्वाचे काम मिळाले आहे. १८ मार्चच्या ऑर्डनन्स फॅक्टरी दिनानिमित्ताने ही महत्त्वाची घडामोड आहे.
लष्कराच्या तिन्ही दलांसह सर्वच सुरक्षा दलांना युद्धसामग्री उपलब्ध करून देणाऱ्या ऑर्डनन्स फॅक्टरीला २१३ वर्षे जुना इतिहास आहे. आज देशात ४१ फॅक्टरी आहेत. मात्र, त्यामध्ये येथील अंबाझरी ऑर्डनन्स फॅक्टरीची सर्व प्रकारच्या हार्डवेअर निर्मितीसाठी स्वतंत्र ओळख आहे.अंबाझरी ऑर्डनन्स फॅक्टरी ही विविध प्रकारच्या तोफगोळ्यांच्या हार्डवेअर निर्मितीसाठी ओळखली जाते. याच फॅक्टरीला आता ८४ मि.मी. तोफगोळ्यांची ऑर्डर मिळाली आहे. हे तोफगोळे खांद्यावरील रायफलद्वारे डागले जातात. यामुळेच त्याला ‘शोल्डर फायर रिकॉयलेस रायफल’ म्हणतात. ७०० ते १ हजार मीटरपर्यंत याची मारक क्षमता असते. वर्षाला असे ६० ते ८० हजार गोळे अंबाझरी ऑर्डनन्स फॅक्टरीत तयार होत आहेत.लष्करातील तोफखाना विभागातील सैनिकांच्या प्रशिक्षणासाठी वापरल्या जाणाऱ्या १०५ मीमी तोफेचे गोळेदेखील नागपुरात तयार होतात. मात्र, येथील वैज्ञानिकांनीच त्यावर अतिरिक्त संशोधन करून त्याची मारक क्षमता १७ वरुन २०.५ कि.मी.पर्यंत नेली. यामुळे या श्रेणीत असा गोळा तयार करणारा भारत हा जगातील पाचवा देश ठरला आहे. ‘हाय एक्स्ल्पोसिव्ह एक्सटेन्डेड रेंज’ अर्थात ‘हीर’ नाव असलेल्या या तोफगोळ्याचे ५००-५०० चे दोन पायलट लॉट तयार असून ते लवकरच चाचणीसाठी लष्कराकडे पाठविले जात आहेत.
उद्या शस्त्र प्रदर्शन
देशातील पहिल्या ऑर्डनन्स फॅक्टरीतून १८ मार्च १८०२ ला उत्पादन सुरू झाले. त्यानिमित्ताने हा दिवस ऑर्डनन्स फॅक्टरी दिन म्हणून साजरा केला जातो. तर अंबाझरी ऑर्डनन्स फॅक्टरी ९ मार्च १९६६ ला सुरू झाली. ऑर्डनन्स फॅक्टरी दिनानिमित्त अमरावती मार्गावरील येथील फॅक्टरीत मंगळवारी, १७ मार्च रोजी दुपारी ३ वाजता शस्त्र प्रदर्शन आयोजित करण्यात आले आहे. याशिवाय अन्य कार्यक्रमदेखील आठवडाभर होत आहेत.

मुंबई – होळी रे होळी पुरणाची पोळी..’ होळी हा सण मुंबईसह देशभरात रंगपंचमीची मोठी धामधूम सुरु आहे. संपूर्ण देशभरात रंगपंचमीचे रंगमय वातावरण पसरले आहे. रुसवे फुगवे विसरुन एकमेकांवर रंगांची उधळण केली जात आहे.
लोकसभा निवडणूकीच्या धामधुमीत नेते लोकही या धुळवडीत सामील झाले आहेत. त्याचबरोबर मराठी कलाकार, बॉलीवूडचे कलाकारही रंगांच्या या खेळात धुंद होऊन मोठ्या उस्साहात नाच, गाणी करत हा सण साजरा करत आहेत.दिल्लीतही राजकीय नेत्यांनी एकमेकांना रंग लावून रंगपंचमीच्या शुभेच्छा दिल्या. काँग्रेस अध्यक्ष सोनिया गांधी, भाजपचे राष्ट्रीय अध्यक्ष राजनाथ सिंग यांनीही कार्य़कर्त्यांसोबत होळी साजरी केली. पर्यावरणास हानीकारक ठरणार नाही असे नैसर्गिक रंग वापरुन ब-याच ठिकाणी धुळवड साजरी केली जात आहे. त्याचप्रमाणे काहींनी तर यावेळी गारपिटग्रस्तांना मदतनिधी देण्याचाही निर्धार केला आहे.रंगपंचमीमध्ये कोणताही अनुचित प्रकार घडू नये यासाठी सर्व ठिकाणी कडेकोट बंदोबस्त ठेवण्यात आला आहे.

नवी दिल्ली- आगामी लोकसभा निवडणुकीत आम आदमी पक्षाचा फारसा प्रभाव पडणार नाही असे मत काँग्रेसचे उपाध्यक्ष राहुल गांधी यांनी व्यक्त केले.
दिल्ली विधानसभा निवडणुकीत ‘आप’ने मोठे यश मिळवले होते. मात्र लोकसभा निवडणुकीत त्यांचा फारसा प्रभाव पडणार नाही. दिल्लीत काँग्रेसच्या पाठिंब्यावर ‘आप’ने सरकार स्थापन केले होते. मात्र त्यांना त्यांनी राजीनामा दिला. दिल्लीत सत्तेत आल्यानंतर जी आश्वासने त्यांनी दिली होती, ती त्यांना पूर्ण करता आली नाहीत असा आरोप राहुल गांधी यांनी केला.
सरकार स्थापन करणे ही वेगळी जबाबदारी आहे आणि दिल्लीत सत्ता मिळाल्यानंतर त्यांनी जबाबदारीपासून पळ काढल्याचे ते म्हणाले. तसेच दिल्लीत सत्तेत असताना ‘आप’ने काहीच काम केले नसल्याची टीका त्यांनी केली.त्यामुळेच लोकसभा निवडणुकीत ‘आप’चा फारसा प्रभाव पडणार नाही.

मुंबई – विविध रंगाची उधळण केला जाणारा होळी हा सण फक्त भारतातच नाही तर परदेशातही ठिकठिकाणी साजरा केला जातो. मग गुगलही याला अपवाद कसे काय ठरु शकेल?
होळीच्या निमित्ताने गुगलच्या होमपेजवर खास रंगीत डूडल बनवण्यात आले आहे. डूडलमध्ये रंगाची उधळण करणारी पिचकारी दाखवण्यात आली आहे. याआधी गुगलने २००१ मध्ये होळीसाठी विशेष डूडल तयार केले होते. त्यानंतर २०१० आणि २०११ मध्ये गुगलने रंगीबेरंगी डू़डल तयार केले होते.याआधीही गुगलने जागतिक महिलादिनी गुगलकडून खास डूडल तयार करण्यात आले होते. यामध्ये विविध देशातील महिलांच्या शुभेच्छा देणारा व्हिडीओ तयार केला होता.