यवतमाळ – शहरातील टिळकवाडी येथील फोटो ग्राफरचे घर फोडून सात लाखाचा मुद्देमाल चोरुन नेल्याची घटना गुरुवारी रात्री उजेडात आली. अश्विन आनंद वगारे रा. टिळकवाडी हे आपल्या कुटुंबीयासह कापड खरेदी करण्यासाठी गुरुवारी अमरावती येथे गेले होते. अशातच चोरट्याने घरफोडून कपाटातील सोन्याच्या पाटल्या, मंगळसूत्र, अंगठी, पोत, चांदीचे दागिने, नगदी १० हजार रुपये असा एकुण सात लाख ५०० रुपयाचा माल चोरुन नेला. रात्री १२.३० वाजताच्या सुमारास घरी परत आल्यानंतर ही घटना उजेडात आली. या घटनेची माहिती मिळताच यवतमाळचे उपविभागीय पोलीस अधिकारी राहुल मदणे, स्थानिक गुन्हे शाखेचे पोलीस निरीक्षक प्रल्हाद गिरी, वडगाव रोडचे ठाणेदार सुर्यकांत राऊत, डी.बी. पथकाने भेट देऊन पाहणी केली. तसेच श्वान पथक व अंगुली मुद्रा तज्ञांना पाचारण केले होते. याप्रकरणी वडगाव रोड पोलिसांनी अज्ञात आरोपीविरुद्घ गुन्हा  दाखल केला.

अमरावती- निवडणुकीची आदर्श आचारसंहिता सुरू असताना शहरात ७६ लाख रुपये रोख सापडल्याने महापालिकेच्या निवडणुकीची पुनरावृत्ती झाल्याचे दिसून येत आहे. अमरावती महापालिकेच्या निवडणुकीच्या वेळीही असेच एक कोटी रुपये अमरावतीत एका वाहनातून जप्त करण्यात आलेले होते. तथापि, ही रक्कम कोणत्या उमेदवाराची, हीच चर्चा आज सर्वत्र होती. वृत्त लिहीपर्यंत या रकमेचा उद्देश व ती कुणासाठी अमरावतीत आली, याचा उलगडा होऊ शकला नाही. अर्जुननगर सीलिंग पॉइंटवर पोलिसांनी एका कारमधून ७५ लाख ६४ हजार ६०० रुपये एवढी रोख जप्त केली. चालकासह रक्कम घेऊन येणा-या तिघांना पोलिसांनी पकडले. हे तिघेही नागपूरचे आहेत. महापालिकेच्या निवडणुकीच्या वेळी अशाच स्वरूपात एक कोटी रुपयांची रोख पोलिसांनी पकडलेली होती. त्या रकमेवर आजपर्यंत कोणीही दावा केलेला नसल्याने ही रक्कम आधी अनेक महिने ट्रेझरीत व त्यानंतर बँकेत पडून आहे.

मुंबई – सांताक्रूझ पूर्वेला वाकोला यशवंतनगरमधील शंकरलोक ही सात मजली इमारत शुक्रवारी सकाळी साडेअकराच्या सुमारास कोसळली. या दुर्घटनेत सुधा श्रीधरन या ३२ वर्षीय महिलेचा मृत्यू झाला आहे. तर चार जण जखमी झाले असून, त्यांना जवळच्या व्ही.एन.देसाई रुग्णालयात दाखल करण्यात आले आहे.
पोलिस, अग्निशमन दल आणि पालिकेचे पथक घटनास्थळी दाखल झाले असून, मदतकार्य सुरु आहे. या इमारतीचा काही भाग शेजारच्या झोपडयांवरही कोसळला आहे. त्यामुळे जखमींचा आकडा वाढण्याची शक्यता आहे. ढिगा-याखाली अजून चार ते पाच जण अडकल्याची भिती आहे. रोहिणी जगताप(४७), अक्षय केसरकर(१८) आणि सीता केसरकर(६०) ही जखमी व्यक्तींची नावे आहेत.मुंबई महापालिकेने आधीच ही इमारत धोकादायक इमारत म्हणून जाहीर केल्याने या इमारतीतील बहुतांश कुटुंबांनी अन्यत्र स्थलांतर केले होते. फक्त दोन कुटुंबे या इमारतीत रहात होती. डिसुझा कुटुंब आणि एका वकिलाचे कुटुंब इमारतीच्या तळमजल्यावर आणि दुस-या मजल्यावर रहात होते.आतापर्यंत चार जणांना ढिगा-याखालून बाहेर काढले असून, अजून सहाजण आत अडकल्याची भिती आहे. गेल्यावर्षी सप्टेंबर महिन्यात डॉकयार्ड रोड येथील मुंबई महापालिका कर्मचा-यांची इमारत कोसळली होती. या दुर्घटनेत ६१ रहिवाशांचा मृत्यू झाला होता. त्याआधीही मुंबई-ठाण्यामध्ये अनेक धोकादायक इमारती कोसळून निष्पाप नागरिकांचा मृत्यू झाला आहे.

रत्नागिरी- रत्नागिरी शहरानजीक फणसोप येथे अल्पवयीन अपंग युवतीवर सहा नराधमांनी बलात्कार केल्याची घटना समोर आली आहे. वडिलांना व भावाला ठार मारण्याची धमकी देत मागील वर्षभर हा प्रकार सुरू होता. पीडित युवती चार महिन्यांची गर्भवती राहिल्यानंतर तिच्या नातेवाइकांनी याबाबतची तक्रार शहर पोलिस ठाण्यात दिली. शहर पोलिसांनी या प्रकरणातील सहाही संशयित आरोपींना अटक केली आहे.
या बलात्कार प्रकरणी शहर पोलिसांनी दीपक वासुदेव बोरकर (४४), सचिन वासुदेव बोरकर (३५), पप्या ऊर्फ प्रसाद बळवंत फडणवीस (३८), राजू ऊर्फ शशिकांत अनंत पवार (३३), चंदन वसंत शिंदे (२३) आणि योगेश संजय मुरकर (२७, सर्व राहणार मागलाड, फणसोप) या सहा संशयित आरोपींना मंगळवारी रात्री अटक केली आहे. या सहा जणांना न्यायालयात हजर केले असता न्यायालयाने त्यांना पोलिस कोठडी सुनावली आहे.
पीडित तरुणीच्या आईचा मृत्यू झाला असून ती वडील आणि भावासह फणसोप येथे राहते. वरील सहा जणांनी वडील आणि भावाला ठार मारण्याची धमकी देत २०१२ पासून अनेक वेळा ठिकठिकाणी बलात्कार केला. वडिलांना व भावाला ठार मारण्याची धमकी दिल्याने अल्पवयीन युवतीने ही गोष्ट कोणाला सांगितली नाही. मात्र युवती चार महिन्यांची गर्भवती राहिल्याने ही बाब उजेडात आली. या प्रकरणी पीडित युवतीच्या नातेवाइकांनी शहर पोलिस ठाण्यात तक्रार दिल्यानंतर गुन्हा नोंदवण्यात आला आहे.

मुंबई (दि. १३ मार्च) – लोकसभा निवडणुकीसाठी राष्ट्रवादी काँग्रेसकडून उमेदवारी जाहीर झालेल्या नवनीत कौर – राणा यांच्याविरोधात फसवणूक केल्याप्रकरणी मुंबईतील मुलुंड पोलिस स्थानकात गुन्हा दाखल करण्यात आला आहे. राष्ट्रवादीचे आमदार रवी राणा यांच्या पत्नी नवनीत कौर यांना अमरावती मतदार संघातून उमेदवारी जाहीर करण्यात आली आहे.
कौर यांनी बोगस प्रमाणपत्र तयार केल्याबाबत जयंत वंजारी यांनी मुलुंड न्यायदंडाधिका-यांपुढे तक्रार केली होती. त्यावर न्यायालयाने सहा मार्चला कौर यांच्याविरोधाच गुन्हा दाखल करण्याचे आदेश दिले होते. गुरुवारी नवनीत यांच्यावर भारतीय दंड विधानानुसार कलम ४२०, ४६८ आणि ३४ अंतर्गत गुन्हा दाखल करण्यात आला आहे.गुन्हा दाखल करण्यात आल्यामुळे नवनीत यांच्या अडचणीत आणखीनच भर पडली आहे. कौर यांच्या उमेदवारीबाबतही मोठे प्रश्नचिन्ह निर्माण झाले आहे. प्रमाणपत्राची वैधता रद्द झाल्यास नवनीत यांची उमेदवारीही रद्द होऊ शकते.

यवतमाळ (दि. १३ मार्च) – कोणतेही कथानक, सामाजिक संदेश नसताना अनेक हिंदी चित्रपट हिट होतात. मात्र चांगल्या कथानक असलेले मराठी चित्रपट हिट होत न होता पडतात. प्रेक्षकांनी ठरविले तरच मराठी चित्रपट मोठा होऊ शकतो असे, मत प्रसिद्ध अभिनेत्री मृणाल कुळकर्णी यांनी व्यक्त केले.
येथील जगदंबा अभियांत्रिकी महाविद्यालयात आयोजित ‘विंग्ज’ या वार्षिक स्नेहसंमेलनाच्या उद्घाटनासाठी यवतमाळात आल्या असता, त्या पत्रकार परिषदेत बोलत
होत्या. मी कथा लिहिलेला ‘प्रेम म्हणजे प्रेम असतं’हा पहिला चित्रपट तर ‘राजा की आयेगी बारात’ हा नकारात्मक भूमिका असलेला एकमेव चित्रपट आहे. २२ हिंदी मालिकांत काम केल्याचे सांगून मराठी चित्रपट क्षेत्रातच पुष्कळ काम असल्याने हिंदी चित्रपट आणि मालिका यांना देण्यासाठी माझ्याकडे आता वेळ नसल्याचे त्या म्हणाल्या. खर्च परवडत नसल्याने मराठी चित्रपटाची जाहिरात हिंदीच्या तुलनेत नगण्य आहे. मराठीत चांगल्या कथा असल्यानेच गेल्या पाच वर्षांत तीन चित्रपट आॅस्करसाठी गेल्याचे सांगून आज मराठी चित्रपट तयार करताना कोणत्या विषयावर आणि कोणत्या वर्गावर बनवायचा, हा मोठा प्रश्न पडत असल्याची चिंता व्यक्त केली. मराठी चित्रपट चालावे यासाठी शासनाने प्रत्येक सिनेमागृहात एक शो प्राईम टाईममध्ये दाखवावा, अशी मागणी यावेळी कुळकर्णी यांनी केली.यावेळी पत्रकार परिषदेला जगदंबा अभियांत्रिकी महाविद्यालयाचे सचिव शीतल वातीले उपस्थित होते़.

नुकसानीचा घेतला आढावा
यवतमाळ (दि.१३ मार्च)- गेल्या काही दिवसांपासून जिल्ह्यात सतत पाऊस व गारपीट होत आहे. या गारपीटीत जिल्ह्यातील बहुतांश तालुक्यात रब्बी पिकांचे मोठ्या प्रमाणावर नुकसान झाले. आज जिल्ह्यात आलेल्या केंद्र शासनाच्या एक सदस्यीय समितीने नुकसानग्रस्त भागाची पाहणी केली तसेच ठिकठिकाणी नुकसानग्रस्त शेतकºयांशी चर्चा करुन नुकसानीचा आढावा घेतला.
गेले काही दिवस सतत झालेला पाऊस व गारपीटीमुळे झालेल्या नुकसानीचा आढावा घेण्यासाठी केंद्र शासनाच्या वेगवेगळ्या समित्या विदर्भातील वेगवेगळ्या जिल्ह्यांमध्ये फिरुन पाहणी करीत आहे. यामध्ये केंद्रीय जल आयोगाचे संचालक असलेले डॉ.डी.एम.रायपुरे यांच्या एक सदस्यीय समितीने आज जिल्ह्यात विविध भागांना भेटी देवून पाहणी केली. डॉ. रायपुरे यांनी विश्रामभवन येथे अप्पर जिल्हाधिकारी इंद्रसेन तिटकारे, निवासी उपजिल्हाधिकारी राजेंद्र देशमुख, जिल्हा अधिक्षक कृषी अधिकारी दत्तात्रय गायकवाड यांच्यासह उपविभागीय अधिकाºयांसोबत बैठक घेवून नुकसानीची माहिती घेतली. त्यानंतर आर्णी, दिग्रस, दारव्हा व नेर यातालुक्यातील काही गावांना भेटी देवून प्रत्यक्ष पाहणी केली. आर्णी तालुक्यातील काठोडा येथे दिगांबर एकघरे यांच्या शेतातील खराब झालेल्या हरभरा पिकाची पाहणी केली. दिग्रस तालुक्याती तुपटाकळी येथे विष्णू ठाकरे, दीपक आनंदवार या शेतºयांचे गहू, हरभरा, संत्रा, मोसंबी पिकांची पाहणी करण्यासोबतच शेतकºयांसोबत चर्चा दारव्हा तालुक्यात पळशी येथे भेट दिल्यानंतर गारपीटीत जनावरे दगावलेल्या शेतकºयांशी त्यांनी संवाद साधला. लाख खिंड येथे अन्नाजी चौधरी यांच्या संत्रा पिकाच्या नुकसानीची पहाणी डॉ.रायपुरे यांनी केली. त्यानंतर नेर विश्रामभवन येथे तालुक्यातील नुकसानीची माहिती त्यांनी जाणून घेतली. यावेळी संबंधित उपविभागीय अधिकारी, उपविभागीय कृषी अधिकारी, तहसीलदार आदी अधिकारी उपस्थित होते. जिल्ह्यातील नुकसानीची पाहणी केल्यानंतर समिती अमरावती जिल्ह्याकडे रवाना झाली.