लखनौ – उत्तरप्रदेशातील लखनऊ आणि उन्नावमध्ये विषारी दारु पिऊनमृत्यूमुखी पडलेल्या नागरिकांची संख्या ३१ वर पोहोचली आहे. तर १०० हून अधिक जणांवर रुग्णालायत उपचार सुरु आहेत.
सोमवारी रात्री ही घटना घडली. मलिहाबादमधील दातली गावत ही विषारी दारु बनवण्यात आली होती. ही विषारी दारु पिऊन लखनऊमध्ये आतापर्यंत २५ जणांचा मृत्यू झाला तर उन्नाऊमधील सहा जणांचा मृत्यू झाला आहे. पोलिसांनी दारु विक्रेत्याला अटक केली आहे. दरम्यान, गृहमंत्री राजनाथ सिंग यांनी प्रकऱणाची चौकशी करण्याचे आदेश दिले आहेत. तसेच या प्रकऱणातील दोषींवरही तात्काळ कारवाई कऱण्याचे आदेश राज्य सरकारला दिले आहेत.

मुंबई- महाराष्ट्र नवनिर्माण सेनेला जय महाराष्ट्र करणारे प्रवीण दरेकर, वसंत गीते, रमेश पाटील या तीन माजी आमदारांसह मनसेचे नेते अखिलेश चौबे यांनी मंगळवारी प्रदेशाध्यक्ष रावसाहेब दानवे यांच्या उपस्थितीत भाजपामध्ये प्रवेश केला. यामुळे मनसेत मोठे खिंडार पडले आहे.
वसंत गीते यांच्या प्रवेशामुळे नाशिक महापालिकेतील राजकीय गणिते बदलण्याची दाट शक्यता वर्तवण्यात येत आहे. यावेळी राजकारणात अशक्य काहीच नसते, अशी प्रतिक्रीया रावसाहेब दानवे यांनी व्यक्त केली.
विधानसभा निवडणुकीत मनसेच्या निराशाजनक पराभवाची नैतिक जबाबदारी स्विकारुन प्रवीण दरेकर आणि वसंत गीते या दोघांनीही मनसेच्या सरचिटणीसपदाचा राजीनामा दिला होता. त्यानंतर या दोघांनीही पक्षनेतृत्वावर टिका केल्याने मनसे अध्यक्ष राज ठाकरे यांनीही त्यांचा राजीनामा स्वीकारत सर्वांना धक्का दिला होता. तेव्हापासूनच ते भाजपाच्या संपर्कात असल्याचे समोर आले होते. त्यानंतर, प्रवीण दरेकरांनी काही वर्षांपूर्वी दिलेली सुरक्षा जीपही राज ठाकरे यांनी परत पाठवून दिली. त्यामुळे दुखावलेल्या दरेकर यांनी मनसेला सोडचिठ्ठी द्यायचे नक्की केले. प्रवीण दरेकर, वसंत गीते, रमेश पाटील या तीन माजी आमदारांसह मनसेचे नेते अखिलेश चौबे यांनीही मनसेला जय महाराष्ट्र केल्याने मनसेसाठी हा मोठा हादरा समजला जात आहे. दरेकर आणि गीते यांच्या प्रवेशामुळे उत्तर मुंबई, रायगड आणि नाशिकमधील भाजपची ताकद वाढणार आहे.

उमरखेड, दि. १३ – तालुक्यातील अमडापूर (तांडा) फाट्यावर लावलेले शुभेच्छा फलक फाडून एका समाजाच्या धार्मिक भावना दुखावल्या आहे. या प्रकरणी चौकशी करून आरोपींना त्वरीत अटक करा या मागणीसाठी नागरिकांनी उपविभागीय अधिकारी कार्यालयावर धडक दिली.
स्थानिक बाजार समितीच्या प्रांगणातून नागरिकांनी मोर्चा काढून उपविभागीय अधिकारी कार्यालयात सभा घेतली. शुभेच्छा फलक फाडून विटंबना करणाºया समाजकंटकाचा निषेध करून आरोपीच्या अटकेची मागणी केली. यावेळी संजय पालतीया, शिवलाल राठोड, मारोती राठोड, सेवादास महाराज, अविनाश रुढे, भिमदेव चव्हाण, रामू चव्हाण, अरविंद आडे, रमेश चव्हाण, उत्तम जाधव, गोपाल राठोड, अरविंद रूंढे याच्यासह नागरिक उपस्थित होते.

यवतमाळ, दि. १३ – यवतमाळ अर्बन को.आॅप.बॅकेच्या सुवर्ण जयंती वर्षानिमित्त युवक दिनाचे औचित्य साधून निर्धार बहुउद्देशिय संस्था, विशुद्घ विद्यालय संस्था, बाबाजी दाते कला आणि वाणिज्य महाविद्यालय, जिल्हा बॉडी बिल्डर्स अ‍ॅण्ड फिटनेस असोशिएशनच्या वतीने जिल्हास्तरीय शरीर सौष्ठव स्पर्धा घेण्यात आल्या. यामध्ये वणी येथील दिलीप खंडाळकर हा ‘यवतमाळ श्री २०१५’ चा मानकरी ठरला.
स्पर्धेमध्ये ६० किलो आतील वजन गटात अय्युब खान प्रथम, दिनेश राजूरकर दुसरा, राजेश क्षीरसागर तीसरा, विक्की चक्रे चौथा क्रमांक पटकावला. तर वृषभ लोधाया याला प्रोत्साहनपर बक्षीस देण्यात आले. तसेच ६० किलो वरील वजन गटात दिलीप खंडारकर याने प्रथम क्रमांक पटकावला. तर मोहम्मद आवेझ याने दुसरा, रामेश्वर राजूरकर याने तिसरा तर आकाश शेंद्रे याने चौथा क्रमांक पटकावला. प्रोत्साहनपर बक्षीस मो. अकील याना देण्यात आले. ज्यु. मी. इंडीया योगराज शिंगे यांच्या स्टेज शोने प्रेक्षक मंत्रमुग्ध झाले. या कार्यक्रमाच्या अध्यक्षस्थानी यवतमाळ अर्बन बँकेचे अध्यक्ष भाऊसाहेब मारोडकर तर प्रमुख पाहुणे म्हणून सुरेश शिंदे, एन.डी. देशपांडे, राजलक्ष्मी पतसंस्थेचे संचालक क्षीतीज तायडे, सुशिल कोठारी, अमोल बोदडे, प्रदिप वादाफळे उपस्थित होते. बक्षीस तिवरण पालकमंत्री संजय राठोड याच्या हस्ते करण्यात आले.यावेळी हरीहर लिंगनवार, प्रवीण पांडे, राजेंद्र गायकवाड, प्रविण निमोदीया उपस्थित होेते. या कार्यक्रमाचे प्रास्ताविक पराग पिंगळे यांनी तर संचालन अनंत पांडे यानी केले. या स्पर्धेसाठी निर्धार बहुउद्देशिय संस्थेचे अध्यक्ष पराग पिंगळे,विवेक सज्जनवार, विशाल नांदेकर, अमर शिंदे, प्रसाद पिंगळे, संतोष खंडारे, कपील पोनीकर, रवी लोखंडे, रवी बोचरे, प्रकाश सज्जनवार, सुरज जैन, पराग कळंबे, अतुल कुमटकर यानी सहकार्य केले.

झरी (यवतमाळ) ,दि. १३ – तालुक्यातील मुकुटबन येथील जंगलात सरपन जमा करण्यासाठी गेलेल्या महिलांवर वाघिनीने हल्ला केल्याची घटना आज दुपारी दोन वाजता घडली. या हल्ल्यात शकीलाबानो शेख वहाब (५५) ही महिला जखमी झाली.
मुकुटबन येथील पाच महिला आज सरपन जमा करण्यासाठी जंगलात गेल्या होत्या. यावेळी त्यांना जंगलात वाघिन आणि दोन बछडे दिसले. वाघ आपल्या दिशेने येत असल्याचे लक्षात येताच सर्व महिलांनी तेथून पळ काढला. अशातच धावत असताना शकीलाबानो शेख वहाब ही महिला खाली पडल्याने जखमी झाली. जखमी महिलेला तात्काळ वणी येथील शासकीय रुग्णालयात उपचारासाठी भरती करण्यात आले. याबाबत वनपरिक्षेत्र अधिकारी रत्नपारखी यांना विचारले असता त्यांनीही या घटनेला दुजोरा दिला. परिसरातील मार्की, शेकापूर आणि मांगली परिसरात यापूर्वी वाघाने गाई-बैलांवर हल्ला चढवला होता. आता गावालगत असलेल्या जंगलात सरपन जमा करणाºया महिलांवर वाघिनीचा हल्ला झाल्याने परिसरात दहशत पसरली आहे. आता तरी वनविभागाने याकडे गांभीर्याने लक्ष द्यावे अशी गावकºयांनी मागणी केली आहे.

यवतमाळ, दि. १२ – पांढरकवडा रोडवर कर्तव्य बजावत असताना वाहतुक शिपायाचा मृत्यू झाल्याची घटना आज सोमवारी रात्री ७ वाजता घडली. सिंगण दुबे असे मृतकाचे नाव असून ते जिल्हा वाहतुक शाखेत कार्यरत होते. आज दुपारच्या सत्रामध्ये दुबे व जोशी नामक शिपायाची पांढरकवडा बायपासवर ड्युटी लागली होती. त्यामुळे दोन्ही शिपायी बायपासवर कर्तव्यावर गेले होते. अशातच रात्री अचानक हृदयात त्रास होत असल्याने खाली बसले. यावेळी पोलीस शिपायी जोशी यानी दुबे यांना पोलीसांच्या वाहनाने नेऊन येथील कै. वसंतराव नाईक शासकीय रुग्णालयात दाखल केले. मात्र डॉक्टरांनी त्याना मृत घोषित केले. या घटनेची माहीती मिळताच पोलीस कर्मचाºयानी रुग्णालयात गर्दी केली होती. या घटनेमुळे पोलीस दलात हळहळ व्यक्त होत आहे.

ढाणकी ,दि. १२ – टेभेश्वरनगर येथे नाली बांधकामासह अन्य समस्या निकाली काढाव्या या मागणीसाठी तेथील नागरिकांनी ढाणकी ग्रामपंचायत कार्यालयाला कुलूप ठोकून तीन तास ठिय्या मांडला.
टेभेश्वर नगर हे ढाणकी ग्रामपंचायतमध्ये येत असून ग्रामपंचायत प्रशासनाला १८ नोव्हेंबर २०१४ रोजी नागरिकांनी निवदन दिले होते. त्यामध्ये नाली बांधकाम, कचरा सफाई, रस्त्याचे बांधकाम करावे अशी मागणी केली होती. यावेळी ग्रामपंचायत प्रशासनाने आंदोलकांना मागण्या ३० डिसेंबर पर्यंत निकाली काढणार असल्याचे लेखी आश्वासन दिले होते. परंतु दोन महीने होऊनही ग्रामपंचायत प्रशासनाने या मागण्याकडे दुर्लक्ष केले आहे. दरम्यान आज संतप्त टेभेश्वर नगर वासीयांनी ढाणकी ग्रामपंचायतवर धडक दिली. सरपंच, सचिवांनी जनतेची दिशाभूल केली असून त्याच्यांवर कायदेशीर कार्यवाही करण्यात यावी अशी मागणी केली. त्यानंतर ग्रामपंचायत कार्यालयाला कुलूप ठोकून तीन तास ठिय्या मांडून प्रशासनाचा निषेध व्यक्त केला. या आंदोलनाचे नेतृत्व संभाजी ब्रिगेड शहर प्रमुख विजय धोपटे, ग्रामपंचायत सदस्य सुभाष गायकवाड यांनी केले. या आंदोलनात सय्यद अजिम, देवराव शेळके, साहेबराव धोपटे, मुन्ना भंडारे, माधव बाठोरे, शे. इसराईल, लतीम यांच्यासह शेकडो नागरिक सहभागी झाले होते.

बंगळुरू दि. १२ – आम आदमी पक्षाचे राष्ट्रीय संयोजक अरविंद केजरीवाल यांनी दिल्ली विधानसभा निवडणुकीच्या खर्चासाठी रविवारपासून बंगळुरूमध्ये निधी संकलनाची मोहिम सुरु केली आहे.
बंगळुरूमधून १.७५ कोटी किंवा त्यापेक्षा अधिक निधी गोळा होईल असा विश्वास कर्नाटकमधील आपच्या पदाधिका-यांनी व्यक्त केला. आपच्या दोनशे समर्थकांकडून रविवारी मोठया प्रमाणावर निधी गोळा झाला असून, या समर्थकांना अरविंद केजरीवाल यांच्यासोबत दुपारच्या भोजनासाठी विशेष निमंत्रित करण्यात आले होते.
या भोजन कार्यक्रमाला शहरातील बहुतांश तंत्रज्ञ आणि व्यावसायिक उपस्थित होते. लोकसभा निवडणुकीच्यावेळी कर्नाटकमधून आपने अडीच कोटी रुपयांची देणगी गोळा केली होती. रविवारच्या निधी संकलनाला प्रचंड प्रतिसाद मिळाला असून, बंगळुरूमधून आपला भक्कम पाठिंबा असल्याचा दावा पक्षाने केला आहे.
केजरीवाल यांच्यासोबत सेल्फी फोटो काढण्यासाठी एकहजारपेक्षा जास्त लोकांनी नोंदणी केली होती. त्यातील फक्त २५ जणांना सेल्फी फोटो काढता आला. या २५ जणांची ड्रॉ काढून निवड करण्यात आली असे पक्षाकडून सांगण्यात आले.

बीजिंग दि. १२ – चीनची लोकसंख्या आटोक्यात आणण्यात महत्त्वाची भूमिका बजावणा-या ‘एक कुटुंब-एक मूल’ या धोरणाचे दुष्परिणाम जाणवू लागल्यानंतर चीन सरकारने दुस-या मुलाला परवानगी दिली आहे. मात्र चिनी सरकारच्या कडक धोरणामुळे हे दुसरे मूल घेतानाही नोंदणी सक्तीची केली आहे. सरकारने परवानगी दिल्यानंतर चीनमध्ये दुसरे मूल घेण्यासाठी २० लाख जोडप्यांचे अर्ज आले आहेत.
गेल्या तीन दशकात चीनने लोकसंख्या नियंत्रित केली. चीनची सध्याची लोकसंख्या अंदाजे १३० कोटी आहे. मात्र, भविष्यात कामाला सक्षम असणारी तरुणपिढी मिळणार नसल्याने आणि वृद्धांची संख्या वाढत असल्याने मोठी समस्या चीनमध्ये निर्माण झाली आहे. त्यामुळेच आपल्या धोरणात बदल करण्याचा निर्णय चीनने घेतला आहे.
चीनच्या राष्ट्रीय आरोग्य आणि कुटुंब आयोगाचे प्रवक्ते माओ क्यूनन म्हणाले की, आरोग्य विभागाकडे दुसरे मूल घेण्यासाठी २० लाख अर्ज आले आहेत. सरकार लोकसंख्येवर नियंत्रण ठेवण्यासाठी खास यंत्रणा तयार करणार आहे.
चीनने जानेवारी २०१४ पासून झेजियांग प्रांतात दुसरे मूल घेण्याच्या निर्णयास प्रायोगिक तत्त्वावर मंजुरी दिली आहे. आता याची अंमलबजावणी संपूर्ण देशात करण्यात येणार आहे. सध्या एक मूल असलेल्या जोडप्यांना दुसरे मूल घेण्याची परवानगी मिळेल. गर्भवती महिलांच्या आरोग्याबाबत आम्ही माहिती गोळा करणार आहे.

पुणे दि. १२ – ऊसाला एफआरपीनुसार दर न देणा-या कारखान्यांवर कारवाई करावी, या मागणीसाठी स्वाभिमानी शेतकरी संघटनेने खासदार राजू शेट्टी आणि सदाभाऊ खोत यांच्या नेतृत्वाखाली आंदोलन करीत साखर संकुलाची तोडफोड केल्याचा प्रकार सोमवारी पुण्यात घडला. साखर संकुलातील गाडयाही पेटवून दिल्या. तसेच सरकारच्या निषेधाच्या घोषणाही दिल्या गेल्या, असे असतानाही खासदार राजू शेट्टींनी केलेल्या या आंदोलनाबाबत शेतक-यांमध्ये शंकाच आहे. कारण ऊस दराच्या प्रश्नावर गेल्या दोन महिन्यापासून राजू शेट्टी मूग गिळून बसले होते का ? असा सवाल शेतकरी विचारत आहेत. परंतु, खासदार राजु शेट्टींनी केलेले आंदोलन हा केवळ दिखावा आहे की उद्रेक आहे, हे आठवडाभरात स्पष्ट होईल.
गेल्या दोन महिन्यापासून गाजत असलेल्या ऊसदराच्या प्रश्नावर भाजप सरकार काहीच भूमिका घेत नसल्याचे लक्षात येताच स्वाभिमानी शेतकरी संघटनेच्या कार्यकर्त्यांनी खासदार राजू शेट्टी आणि सदाभाऊ खोत यांच्या नेतृत्वाखाली ठिय्या आंदोलन सुरु केले.
दरम्यान, साखर आयुक्त बिपीनकुमार शर्मा यांनी दुपारी एक वाजताची वेळ दिली होती. आयुक्तांच्या केबिनमध्ये न जाता आयुक्तांनीच शेतकरी संघटनेच्या कार्यकत्रे आणि नेत्यांपुढे येऊन म्हणणे ऐकूण घ्यावे, अशी कार्यकर्त्यांनी अपेक्षा होती. मात्र, शर्मा यांनी केवळ खासदार शेट्टी आणि त्यांचा प्रतिनिधी अशा दोनच व्यक्तींनी आपल्या केबिनमध्ये यावे, असा निरोप पाठवला. आयुक्त शर्मा यांनी खाली येण्यास नकार दिल्याने कार्यकत्रे चिडले आणि साखर संकुलची तोडफोड केली. सरकारविरोधात घोषणाबाजी करीत त्यांनी आवारातील गाडीही पेटवून दिली. अनुचित प्रकार घडू नये, म्हणून कडक पोलिस बंदोबस्त ठेवण्यात आला होता.