पांढरकवडा – पाणी पुरवठाचे बिल काढण्यासाठी लाच मागणाºया कनिष्ठ लिपीकाला एक वर्ष शिक्षा ठोठावली. येथील अतिरीक्त सत्र तथा विशेष न्यायदंडाधिकारी पि.एम. हुणेदार यांनी आज हा निकाल दिला.
अरविंद झाडे असे शिक्षा झालेल्या कनिष्ठ लिपीकांचे नाव असून ते घाटंजी पंचायत समितीमध्ये कार्यरत होते. घाटंजी तालुक्यातील पंगडी येथील इंदुमती जैयस्वाल या महिलेच्या मालकीची विहीर २००३ मध्ये पाणी पुरवठा करण्याठी ग्रामपंचायतने अधिग्रहीत केली होती. विहीरीचे भाड्याचे १५ हजार रुपये बिल काढण्यासाठी जैयस्वाल यांना एक हजाराची लाच या लिपीकाने मांगितली होती. याप्रकरणाची तक्रार जैयस्वाल यांनी लाचलुचपत प्रतिबंधक विभागाकडे तक्रार दिली होती. या विभागाच्या पथकाने सापळा रचुन घाटंजी येथील श्याम उपहारगृहात लाच घेताना झाडे याना रंगेहात पकडले होते. याप्रकरणी पोलिसांनी गुन्हा दाखल करून प्रकरण न्यायप्रविष्ठ केले. पांढरकवडा येथील अतिरीक्त सत्र तथा विशेष न्यायदंडाधिकारी पि.एम. हुणेदार यांच्या न्यायालयात या प्रकरणाची सुनावणी पार पडली. यामध्ये दोषी आढळल्याने झाडे यास एक वर्षाची शिक्षा ठोठावली. सरकारीपक्षाच्या वतीने अ‍ॅड. प्रशांत मानकर यांनी काम पाहिले.

यवतमाळ – जिल्ह्यात गारपिट व विजांच्या कडकडाटासह वादळी पाऊस पडला. त्यामुळे गहु, हरभरा, मका, संत्रासह अन्य पिकाचे नुकसान झाले आहे. अवकाळी पावसाने नुकसान झालेल्या भागाचे सर्वेक्षण करुन तातडीने मदत करावी अशी मागणी जिल्हा काँग्रेस कमिटीने केली आहे.
जिल्ह्यात गारपिट होऊन पिकासह घराची पडझड, मृत जनावर, रस्ते, पुल, विद्युत पोलचे मोठ्या प्रमाणात नुकसान झाले असून प्रशासन आचार संहिता व निवडणूक प्रक्रीयेत व्यस्त आहे. प्रशासनाने जिल्ह्यातील नैसर्गिक क्षतीग्रस्त भागाची पाहणी करून नुकसानग्रस्तांना तातडीने आर्थिक मदत द्यावी अशी मागणी जिल्हा काँग्रेस कमेटीने केली आहे. जिल्हाधिकाºयांना निवेदन देतांनी आ. नंदिनी पारवेकर, जिल्हा परिषदचे विरोधी पक्षनेता देवानंद पवार, जिल्हा परिषद सदस्य बाळासाहेब मांगुळकर, अ‍ॅड. सिमा तेलंगे, योगेश पारवेकर, सिमा देशभ्रतार, मिनाक्ष्ज्ञी राऊत, आर्णी पंचायत समितीचे सभापती राजू विरखेडे, सोनबा मंगाम, अर्चना कोडापे, वैयजंती उगलमुगले, गोदावरी वगारे, उषा दिवटे, मंगला नंदुरकर, विणा नागदिवे, कमल राऊत, मिना सरतापे, मोहीनी गौर, हरिभाऊ जिभकाटे उपस्थित होते.

यवतमाळ – जिल्ह्यात आठवड्यापासून वादळीवाºयासह गारपीटीने थैमान घातले आहे. आज रविवारी ढगफाटल्याने वादळी वाºयासह जोरदार पाऊस पडला. पुसद तालुक्यातील जामनाईक येथील एका युवकाचा मृत्यू झाला. वीज कोसळल्याने दिग्रस तालुक्यातील मांडवा येथील महिला जखमी झाली, शेकडो कोंबड्या दगावल्या तर घाटंजी तहसीलच्या निर्माणाधिन टॉवरवर वीज कोसळून प्रचंड नुकसान झाले.
राळेगांव, बाभुळगाव, घाटंजी, दारव्हा, दिग्रस, पुसद, नेर तालुक्यात सायंकाळच्या सुमारास ढगाळ वातावरण निर्माण होऊन वादळीवाºयासह जोरात पाऊस पडला. गारपीट सुरू होताच भितीपोटी पुसद तालुक्यातील जामनाईक येथील युवक गजानन तुळशीराम कुबडे (२४) हा घराकडे धावत जात होता. अशातच तो खाली पडल्याने त्याचा मृत्यू झाला. दिग्रस तालुक्यातील मांडवा येथील शोभा क्षिरसागर (५०) ही महिलाही गारपीठीमध्ये जखमी झाली. तसेच शेकडो कोंबड्या गारपीटीने दगावल्या असून, घाटंजी येथील तहसील कार्यालयात टॉवर वीज कोसळली.

मुंबई – आगामी लोकसभा निवडणूकीच्या पार्श्वभूमीवर शिवसेनेची मनसेवर आगपाखड सुरु असताना, मनसे मात्र शांत राहून शिवसेनेचा एक एक नाराज मोहोरा आपल्या गळाला लावत आहे. भारतीय विद्यार्थी सेना आणि शिवसेनेच्या चित्रपट सेनेचे माजी अध्यक्ष अभिजीत पानसे यांना मनसेमध्ये आणल्यानंतर शिवसेनेच दुसरे वरिष्ठ नेते रामदास कदम हे ही मनसेच्या वाटेवर असल्याची चर्चा आहे.
रामदास कदम यांनी मनसेचे कोकण संघटक वैभव खेडेकर यांची त्यांच्या निवासस्थानी भेट घेतली. ही कौटुंबिक भेट असल्याचे वैभव खेडेकर यांनी प्रसारमाध्यमांशी बोलताना सांगितले. मात्र येत्या काही दिवसात कोकणातील शिवसेनेच्या अंतर्गत राजकरणात मोठी उलथा-पालथ होणार असल्याचे संकेतही त्यांनी दिले. रामदास कदम गेल्या काही काळापासून शिवसेनेत नाराज असल्याची चर्चा आहे. रामदास कदम यांच्यासारखा वरिष्ठ नेत्यांने शिवसेनेला सोडचिठ्ठी दिली तर, तो सेना नेतृत्वाला एक झटका असेल. आगामी लोकसभा निवडणूकीत भाजपशी मैत्रीचे नाते जपून शिवसेनेला झटका देण्याची मनसेची रणनिती आहे. त्यादृष्टीने मनसे मुंबई, ठाणे, कल्याण आणि नाशिकमध्ये शिवसेना उमदेवारांच्या विरोधात तगडे उमेदवार देणार आहे.

मुंबई – शहरात एकटय़ाने प्रवास करणा-या महिलांच्या सुरक्षेसाठी मुंबई पोलिस व एमटीएनएलतर्फे एसएमएसद्वारे हेल्पलाइन सेवा सुरू केली आहे. तसेच महिला व ज्येष्ठ नागरिकांना तत्काळ टॅक्सी अथवा रिक्षा उपलब्ध करून देण्यासाठी शहरातील प्रमुख रेल्वेस्थानकांबाहेर पोलिसांचे विशेष ‘डेस्क’ तयार केल्याची माहिती पोलिस आयुक्त राकेश मारिया यांनी शनिवारी दिली.
जागतिक महिलादिनी मुंबई पोलिस आणि ‘एमटीएनएल’च्या वतीने ‘ट्रॅव्हल सेफ, व्हेन अलोन’ ही नवीन योजना सुरू करण्यात आली असून, एकटीने प्रवास करणा-या महिलांसाठी एसएमएसद्वारे हेल्पलाइन सेवा उपलब्ध करून देण्यात आली आहे. याशिवाय एकटी प्रवास करणारी महिला व ज्येष्ठ नागरिकांना तत्काळ टॅक्सी अथवा रिक्षा उपलब्ध करून देण्यासाठी शहरातील प्रमुख रेल्वेस्थानकांबाहेर पोलिसांचे विशेष ‘डेस्क’ उपलब्ध असतील, अशी माहिती पोलिस आयुक्त राकेश मारिया यांनी शनिवारी दिली.मुंबईत नुकतेच इस्थर अनुह्या प्रकरणावरून महिलांच्या सुरक्षित प्रवासाबाबत प्रश्नचिन्ह निर्माण झाले होते. त्या पार्श्वभूमीवर पोलिसांनी ही योजना सुरू केली आहे. रात्री-अपरात्री टॅक्सी किंवा रिक्षाने प्रवास करणा-या महिलेला असुरक्षित वाटल्यास ९९६९७७७८८८ या हेल्पलाइनवर ती प्रवास करत असलेल्या वाहनाचा क्रमांक एसएमएस केल्यानंतर महिला नेमक्या कोणत्या ठिकाणी आहे, प्रवासी महिलेचा मोबाइल क्रमांक व महिलेने पाठवलेला एमएमएस सव्‍‌र्हवरवर साठवून ठेवला जाईल. त्यामुळे एखादा अनुचित प्रकार घडल्यास आरोपींपर्यंत सहज पोहोचता येऊ शकेल. ही सेवा विनामूल्य उपलब्ध करण्यात आली आहे. हे एसएमएस सेव्ह करण्यासाठी अद्ययावत सव्‍‌र्हर वापरण्यात येणार असून, एका वर्षात एक कोटी एसएमएस सेव्ह करण्याची त्याची क्षमता आहे.याशिवाय नोकरीव्यवसायानिमित्त एकटय़ा प्रवास करणा-या महिलांच्या सुरक्षा व सुविधेसाठी दादर, वांद्रे, लोकमान्य टिळक टर्मिनस, बोरिवली, मुंबई सेंट्रल, छत्रपती शिवाजी टर्मिनस या प्रमुख रेल्वेस्थानकांबाहेर वाहतूक पोलिस, विभागीय परिवहन विभागाचे अधिकारी (आरटीओ), रेल्वे सुरक्षा दल यांचे संयुक्त विशेष डेस्क उपलब्ध करण्यात येणार असून, या डेस्कच्या माध्यमातून महिलांना प्रवासासाठी तत्काळ टॅक्सी व रिक्षा उपलब्ध करून देण्यात येणार आहे. या डेस्कच्या माध्यमातून महिला व ज्येष्ठ नागरिकांना प्राधान्य देण्यात येणार असल्याचे मारिया यांनी स्पष्ट केले. या वेळी आयोजित छोटेखानी कार्यक्रमात महिला सुरक्षा मार्गदर्शिकेचेही प्रकाशन करण्यात आले. या मार्गदर्शिकेत महिलांचे अधिकार, त्यांच्या सुरक्षेबाबतची माहिती, महिलांविषयीचे कायदे, अदखलपात्र गुन्हा व गुन्ह्यांमधील फरक, लैंगिक अत्याचार, महिलांविरोधातील गुन्हे, अ‍ॅसिड हल्ला आदींची कायदेशीर माहिती देण्यात आली आहे.

नवी दिल्ली- आम आदमी पक्षाचे असंतुष्ट कार्यकर्त्यांनी ‘आप’चे निमंत्रक अरविंद केजरीवाल यांच्या निवासस्थानाबाहेर रविवारी निदर्शने केली. तिकीटवाटपात अनेकांना डावलल्याने ‘आप’च्या असंतुष्टांमध्ये भर पडत आहे.
एकीकडे ‘आप’कडून संपूर्ण स्वराज्यच्या गप्पा मारल्या जात आहेत तर दुसरीकडे पक्षामध्येच त्याची अंमलबजावणी केली जात नाही, असा आरोप ‘आप’च्या राष्ट्रीय परिषदेच्या सदस्य अश्विनी उपाध्याय यांनी केला. या गोष्टी केजरीवाल यांना लक्षात आणून देण्यासाठी येथे जमलो असल्याचे त्यांनी सांगितले. पक्षाने केलेल्या तिकिटवाटपाबाबत आपण समाधानी नाही. मात्र केजरीवाल कार्यकर्त्यांना भेटण्यासाठी वेळही देत नसल्याचे त्या म्हणाल्या.
केजरीवालांचा शपथविधी १३.४१ लाखांत!
अरविंद केजरीवाल यांच्या दिल्लीच्या मुख्यमंत्रीपदाच्या शपथविधी कार्यक्रमाचा तसेच जाहिरातीचा खर्च १३ लाख ४१ हजार रुपये झाला असल्याचे माहितीच्या अधिकारात उघड झाले. रामलीला मैदानात झालेल्या शपथविधीसाठी ६.३३ लाख तर त्याच्या जाहिरातीसाठी ६.७ लाख रुपये खर्च झाल्याचे दिल्ली सरकारच्या प्रशासकीय विभागाने ही माहिती दिली आहे. यामध्ये सार्वजनिक बांधकाम विभाग, उत्तर दिल्ली महानगरपालिका, दिल्ली जलमंडळ, अग्निशमन विभाग आणि विद्युत विभाग या सर्व विभागांचा खर्चाचा समावेश आहे.

यवतमाळ – जिल्ह्यात चोरट्याने थैमान घातला असून एकाच दिवशी पाच ठिकाणी चोरीच्या घटना घडल्या. ढाणकी येथील गोविंद भावसिंग आडे (४६) याचे देशी दारुचे दुकानाची जाळी वाकवून गल्ल्यातून ६२ हजार ५५२ रुपये चोरुन नेले. याप्रकरणी बिटरगाव पोलिसांनी गुन्हा दाखल केला. तसेच पांढरकवडा तालुक्यातील झुंझरपूर शिवारातून मोबाईल टॉवरच्या ५३ बॅटºया (किंमत ५३ हजार) चोरट्याने चोरुन नेल्या. याप्रकरणी लखन प्रेमसिंग चव्हाण रा. अंतरगाव याच्या तक्रारीवरून पांढरकवडा पोलिसांनी गुन्हा दाखल केला. मराठवाकडी येथील वसंता गंगाराम देशट्टीवार यांच्या शेतातून ९ झाडे आरोपी वासुदेव धोंडू टेकाम (३५) रा. गोंडवाकडी याने चोरुन नेले. सवना येथील गजानन रामराव देशमुख याची दुचाकी (एम.एच. २९/ एल ९७४५) चोरट्याने चोरुन नेली. या प्रकरणी पुसद शहर पोलिसांनी गुन्हा दाखल केला. तर परसोडा येथील श्रीधर बालाजी मसे (६३) यांचे नवरगाव येथील गोदाम चोरट्याने फोडले. त्यामधून १८ क्विंटल सोयाबीन चोरुन नेले. या प्रकरणी शिरपूर पोलिसांनी गुन्हा दाखल केला.

क्वालालंपूर – क्वालालंपूरहून २२७ प्रवाशांना घेऊन बीजिंगला निघालेलं आणि १२ तासांपासून गायब असलेलं मलेशिया एअरलाइन्सचं विमान चीनच्या दक्षिणेकडील समुद्रात कोसळल् आहे.बोइंग विमानाचा हा वर्षातील दुसरा अपघात असून, १९ वर्षांमधील ही सगळ्यात मोठी दुर्घटना ठरली आहे. या विमानातील २२७ प्रवाशांमध्ये चेन्नईतील एका महिलेसह पाच भारतीय नागरीकही आहे.
एम एच ३७० या बोइंग विमानानं काल मध्यरात्री १२ वाजून २१ मिनिटांनी (भारतीय प्रमाणवेळेनुसार रात्री १० वाजता) क्वालालंपूर विमानतळावरून ‘टेक ऑफ’ केलं होतं. चीनची राजधानी, बीजिंगला ते सकाळी साडेसहाला पोहोचणं अपेक्षित होतं. परंतु, उड्डाणानंतर दोन तासांनी या विमानाचा एअर ट्रॅफिक कंट्रोलशी संपर्क तुटल्यानं एकच खळबळ उडाली होती. प्रदीर्घ शोधमोहिमेनंतर, हे विमान व्हिएतनामच्या एअर स्पेसमध्ये कुठेतरी हरवल्याचं लक्षात आलं होतं. ही संपूर्ण हद्द पिंजून काढतानाच, हे विमान दक्षिण चीन समुद्रात कोसळल्याचं स्पष्ट झालं आहे.व्हिएतनामच्या नौसैनिकांना अॅडमिरल गो व्हॅन फॅट्ट यांनी तातडीनं घटनास्थळी पोहोचण्याचे आदेश दिल्यानं विमान कोसळल्याच्या वृत्ताला दुजोराच मिळाला आहे. या बातमीनंतर बीजिंग एअरपोर्टवर शोककळा पसरली आहे. मलेशिया एअरलाइन्सच्या या विमानात १४ देशांमधील २२७ प्रवासी होते, त्यात दोन चिमुरड्यांचाही समावेश होता. त्यापैकी सर्वाधिक १५२ प्रवासी चीनचे नागरिक होते. मलेशियाचे ३८, इंडोनेशियाचे १२, ऑस्ट्रेलियाचे सात आणि भारताचे पाच जण बीजिंगला निघाले होते. चंद्रिका शर्मा आणि सिरेगर फिर्मन चंद्रा यांच्यासोबतच क्रांती प्रल्हाद शिरसाट, चेतना कोळेकर आणि विनोद कोळेकर हे पाच जण अपघातात बेपत्ता झालेत.

नवी दिल्ली- भ्रष्टाचाराचे आरोप असलेले कर्नाटकचे माजी मुख्यमंत्री आणि काही दिवसांपूर्वीच भाजपमध्ये पुन्हा प्रवेश केलेल्या बी.एस. येड्डीयुरप्पा यांना लोकसभेची उमेदवारी देण्यात आली आहे. लोकसभा निवडणुकीसाठी भाजपने शनिवारी ५२ जणांची यादी जाहीर केली.
भाजपने दुस-या यादीत कर्नाटक, ओदिशा, त्रिपूरा, केरळ, आसाम आणि पश्चिम बंगाल या राज्यातील उमेदवारांचा समावेश आहे. कर्नाटकमधून शिमोगा लोकसभा मतदारसंघातून येड्डीयुरप्पा निवडणूक लढवणार आहेत. त्यांच्यासह माजी मुख्यमंत्री डी.व्ही.सदानंद गौडा यांना इशान्य बंगळूरूमधून, अनंत कुमार यांना दक्षिण बंगळूरूमधून उमेदवारी देण्यात आली आहे. तर पत्रकार आणि राजकारणी चंदन मित्रा यांना पश्चिम बंगालमधील हूगळी लोकसभा मतदारसंघातून उमेदवारी देण्यात आली आहे.लोकायुक्तांनी भ्रष्टाचाराचे आरोप केल्यानंतर येड्डीयुरप्पा यांनी एक ऑगस्ट २०११मध्ये मुख्यमंत्रीपदाचा राजीनामा दिला होता. त्यानंतर त्यांनी भाजपमधून बाहेर पडून कर्नाटक जनता पक्षाची स्थापना केली होती. कर्नाटकमध्ये झालेल्या विधानसभा निवडणुकीत त्यांनी भाजपविरोधात निवडणूक लढवली होती.भाजपने २७ फेब्रुवारी रोजी ५४ जणांची यादी जाहीर केली होती. भाजपजी तिसरी यादी १३ मार्च रोजी जाहीर केली जाण्याची शक्यता आहे.