यवतमाळ,दि. १९ – शहरालगत असलेल्या भोसा येथील ले-आऊटमधिल तब्बल सात प्लॉटची विक्री करणाºया आणखी दोघांना वडगावरोड पोलिसांनी गजाआड केले आहे. शेख सलीम शेख हुसेन रा. सावरगड जि. गडचिरोली व अशोक बापूराव लव्हाने रा. शिरपूर अशी अटकेतील आरोपींची नावे आहे. आरोपींची संख्या आता सातवर गेली असून, त्यांना न्यायालयाने आज गुरुवारी २३ पर्यंत पोलीस कोठडी सुनावली आहे.
शहरालगत असलेल्या भोसा ग्राम पंचायतीमध्ये ले-आऊट असून, त्याचा मालक वर्धा येथे वास्तव्यास आहे. याचा फायदा उचलून रवी उर्फ खन्ना सुरणकर, सचिन लडके, धनराज रेवते, नंदू थोटे, गुणवंत हनखोरे यांनी संगणमत करून प्लॉट विक्रीचा बेत आखला. त्यासाठी ओळखपत्र, बनावट दस्ताऐवज तयार करून एक दोन नव्हे तर चक्क सात प्लॉटची विक्री सुद्घा केली. याबाबतची माहिती मालकाला झाल्यावर त्याने पोलीस स्टेशन गाठून तक्रार केली. पोलिसांनी पाचजणांना अटक करून न्यायालयात हजर केले. न्यायालयाने यातील तीन आरोपींना १९ पर्यंत तर दोघांना २३ पर्यंत पोलीस कोठडी सुनावली होती. चौकशीत शेख सलीम शेख हुसेन रा. सावरगड जि. गडचिरोली व अशोक बापूराव लव्हाने रा. शिरपूर या दोघांची नावे समोर आल्यावर पोलिसांनी काल बुधवारी या दोघांना अटक केली. त्यांच्याकडून गुन्ह्याची कबूली देण्यात आली आहे. त्यांना आज वडगावरोड पोलिसांनी न्यायालयात हजर केले होते. पोलिसांनी पाचजणांना २३ पर्यंत पोलीस कोठडी देण्यात यावी, असा अर्ज न्यायालयात केला होता. न्यायालयाने त्यांना पोलीस कोठडी सुनावली असून, प्लॉट विक्रीचे घबाड बाहेर येण्याची शक्यता वर्तविण्यात आली आहे.

मुंबई- ‘चला बुध्द धम्माच्या वाटेवर’ या चळवळीचे प्रणेते व ओबीसी समाजाचे नेते हनुमंत ऊपरे (वय 63) यांचे आज सकाळी मुंबईत निधन झाले. मागील महिन्यात उपरे यांच्या मेंदुत रक्तस्त्राव (ब्रेन ह्यमरेज) झाल्याने ते कोमात होते. त्यांच्यावर शस्त्रक्रियाही करण्यात आली होती. मुंबईतील ब्रीच कॅण्डी रूग्णालयात त्यांच्यावर उपचार सुरु होते. उपरे यांच्यावर उद्या दुपारी त्यांच्या मूळगावी बीडजवळील नानलगाव फाटा येथे बौध्द पद्धतीने अंत्यविधी होणार आहे.
सत्यशोधक ओ.बी.सी. परिषदेचे अध्यक्ष म्हणून उपरे यांनी सामाजिक क्षेत्रात आपल्या कामाचा ठसा उमटवला. उपरे यांनी भारिप बहुजन महासंघाचे प्रदेशाध्यक्ष म्हणूनही काम पाहिले होते. सामाजिक प्रश्नांवर, दलित, ओबीसी यांच्या सामाजिक, राजकीय व आरक्षण विषयाबाबत त्यांनी भरीव काम केले.

मुंबई – नारायण राणे यांच्या संभाव्य उमेदवारीमुळं चर्चेत आलेल्या वांद्रे येथील विधानसभा मतदारसंघाच्या पोटनिवडणुकीसाठी शिवसेनेने येथील दिवंगत आमदार प्रकाश (बाळा) सावंत यांची पत्नी तृप्ती सावंत यांना उमेदवारी दिली आहे.
बाळा सावंत यांच्या निधनामुळं ही पोटनिवडणूक होत आहे. मागील विधानसभा निवडणुकीत भाजपशी युती नसतानाही बाळा सावंत यांनी येथून ४१,३८८ मते मिळवत दणदणीत विजय मिळवला होता. दुसऱ्या क्रमांकावर भाजपचे कृष्णा पारकर हे होते. त्यांना २५, ७९१ मते मिळाली होती. मात्र, आता होणाऱ्या पोटनिवडणुकीत उमेदवार न देण्याचा निर्णय भाजपनं घेतल्यामुळं शिवसेनेचं पारडं जड असल्याचं बोललं जात आहे.
राणे लढणार का?
वांद्र्यातून काँग्रेसनं नारायण राणे यांना लढण्याची ऑफर दिली आहे. राणे त्या दृष्टिनं चाचपणीही करत आहेत. मागील निवडणुकीत या मतदारसंघात काँग्रेसचा उमेदवार चौथ्या क्रमांकावर फेकला गेला होता. काँग्रेसच्या उमेदवाराला जेमतेम १२ हजार मतं मिळाली होती. नवख्या एमआयएमनं २३,९७६ मतं मिळवत काँग्रेसला धक्का दिला होता. हे चित्र पाहता राणे यांनी निवडणूक लढविली तरी ती त्यांना सहजसोपी नसेल. मतांचं मोठं अंतर पार करण्याचं आव्हान त्यांच्यापुढं असेल. राणे हे आव्हान स्वीकारणार का, याबाबत उत्सुकता आहे.

मेलबोर्न, दि. १९ – रोहित शर्माचे दमदार शतक आणि सुरेश रैनाच्या अर्धशतकाच्या आधारे भारताने बांग्लादेशसमोर विजयासाठी ३०३ धावांचे आव्हान दिले आहे. भारताने ५० षटकांत सहा गडी गमावत ३०२ धावा केल्या असून शेवटच्या षटकांमध्ये रविंद्र जडेजाच्या फटकेबाजीने भारताने ३०० चा टप्पा ओलांडला.
वर्ल्डकपमधील बादफेरीत गुरुवारी भारत विरुद्ध बांग्लादेश यांच्यात सामना सुरु आहे. भारताने नाणेफेक जिंकून प्रथम फलंदाजी करण्याचा निर्णय घेतला. सलामीवीर रोहित शर्मा व शिखर धवन या दोघांनी चांगली सुरुवात करुन दिली. भारताच्या ७५ धावा झाल्या असताना बांग्लादेशच्या गोलंदाजांना ही जोडी फोडण्यात यश आले. शिखर धवन ३० धावांवर यष्टीचित झाला. यानंतर विराट कोहली ३, अजिंक्य रहाणे १९ धावांवर बाद झाला. भारताची स्थिती २८ षटकांत ३ बाद ११५ अशी झाली यानंतर रोहितने सुरेश रैनासोबत शतकी भागीदारी कर भारताचा डाव सावरला.या जोडीने १२२ धावांची भागीदारी रचली. सुरेश रैना ६५ धावांवर बाद झाला. रोहित शर्माने वन डे कारकिर्दीतील ७ वे तर वर्ल्डकपमधील पहिले वहिले शतक ठोकले. वर्ल्डकपमध्ये फॉर्ममध्ये नसल्याने टीका करणा-या टीकाकारांनाही रोहितने त्यांच्या बॅटने चोख प्रत्युत्तर दिले.
शेवटच्या पाच षटकांमध्ये फटकेबाजी करण्याच्या प्रयत्नात रोहित शर्मा १३७ तर कर्णधार महेंद्रसिंग धोनी ६ धावांवर बाद झाला. रविंद्र जडेजाने १० चेंडूत ४ चौकार ठोकून २३ धावांची छोटी पण महत्त्वाची खेळी केली. ५० षटकांत रुबेल हुसैन यॉर्कर टाकून जडेजा व आर. अश्विनला फटकेबाजीची संधीच दिली नाही व भारताचा डाव ५० षटकांत ३०२ धावांवर रोखण्यात त्याला यश आले. बांग्लादेशतर्फे तास्कीन अहमदने सर्वाधिक ३ विकेट घेतल्या. मशरफे मोर्तझा, रुबेल हुसैन व शकीब अल हसन या तिघांनी प्रत्येकी एक विकेट घेतली.

मुंबई- महाराष्ट्रातील जनतेला मोठमोठी स्वप्ने दाखवत सत्तेवर आलेल्या भाजपा-शिवसेना युतीच्या सरकारचा पहिला अर्थसंकल्प म्हणजे घोषणांचा अवकाळी पाऊस ठरला आहे. भाजपा नेत्यांच्या नावाने नवीन योजना, मोठमोठय़ा घोषणा आणि सवंग शेरोशायरी करीत अर्थमंत्री सुधीर मुनगंटीवार यांनी विधानसभेत सादर केलेल्या या अर्थसंकल्पात १ ऑगस्टपासून राज्यात एलबीटी रद्द करण्याची घोषणा आहे. मात्र त्यासाठी लागणारा पंधरा हजार कोटींचा निधी कसा उपलब्ध करणार याचा कुठेही खुलासा नाही. ३ हजार ७५७ कोटी रुपये तुटीचा हा अर्थसंकल्प राज्यातील जनतेची पूर्णपणे निराशा करणारा असल्याची प्रतिक्रिया अनेक मान्यवरांनी व्यक्त केली आहे.
निवडणूक काळात वाट्टेल ती आश्वासने देऊन सत्तेवर आलेल्या भाजपा सरकारच्या पहिल्याच अर्थसंकल्पाकडे राज्यातील जनतेचे लक्ष लागले होते. विधान परिषदेत राज्यमंत्री दीपक केसरकर यांनी एखादा निबंध वाचून एकदाची आपल्यावरची जबादारी पार पाडावी, असा अर्थसंकल्प वाचून टाकला. तर सुधीर मुनंगटीवार यांनी मात्र शेरोशायरीच्या नादात दोन तास सभागृहात भाषण केले. २०१५-१६च्या अर्थसंकल्पामध्ये जमा १ लाख ९८ हजार २३० कोटी आहे. तर महसुली खर्च २ लाख १ हजार ९८८ कोटी अंदाजित केला आहे. परिणामी ३ हजार ७५७ कोटी रुपये महसुली तूट येणार आहे. अनावश्यक खर्चात बचत करून व महसुली वसुली अधिक प्रभावीपणे करून ही तूट मर्यादित करू, असे अर्थमंत्र्यांनी म्हटले असले तरी नेमक्या कोणत्या प्रभावी उपाययोजना करणार याचा स्पष्टपणे कुठेही उल्लेख केलेला नाही.
अनेक योजनांची नावे बदलून त्यांना भाजपा आणि जनसंघांच्या नेत्यांची नावे देण्यात आली आहेत. तर पंतप्रधान ग्रामसडक योजनेच्या धर्तीवर राज्यात मुख्यमंत्री ग्रामीण मार्ग योजना जाहीर केली आहे. त्यासाठी ३ हजार कोटी या वर्षी राखून ठेवण्यात येणार असून पुढे प्रतिवर्षी १ हजार कोटींचा निधी देण्यात येईल, असेही त्यांनी जाहीर केले. खासदारांनी गाव दत्तक घेण्याच्या पंतप्रधान मोदी यांच्या घोषणेच्याच धर्तीवर आमदार आदर्श ग्राम योजनाही त्यांनी जाहीर केली. सिंचन प्रकल्पाचे तांत्रिक व वित्तीय नियोजन करून प्रकल्प अंमलबजावणीचा कालबद्ध कार्यक्रम राबविण्यासाठी जलसंपदा विभागास ७ हजार २७२ कोटी रुपयांचा निधी, स्वच्छ भारत अभियानासाठी ८१० कोटी, मुंबई मेट्रो-३ साठी १०९.६० कोटी, नागपूर मेट्रोसाठी- १९७.६५ कोटी. तर पुणे मेट्रोकरिता २६८ कोटी निधीची घोषणा करण्यात आली.
सर्वसामान्य जनतेच्या प्रवासाचे साधन असलेल्या एसटी गाडय़ांची खरेदी व एसटी स्थानके दुरुस्तीसाठी केवळ ४१४ कोटी रुपये देण्यात येणार आहे. बांधकामाधीन रेल्वे प्रकल्पांसाठी ६८.६० कोटी रुपये व विमामनतळ विकासाकरिता ९१ कोटी रुपये निधी देण्याचेही अर्थमंत्री सुधीर मुनगंटीवार यांनी जाहीर केले. राज्यातील पर्यटनात वाढ होण्यासाठी मार्गस्थ सुविधांसाठी ५० कोटी, वन पर्यटन व जैविक विविधता संरक्षण करण्यासाठी महाराष्ट्र राज्य पर्यटन विकास मंडळाची स्थापना, प्रत्येक जिल्ह्यात उत्तमराव पाटील वन उद्यान निर्मिती, महिला बचत गटांच्या उत्पादित वस्तूंसाठी कायमस्वरूपी पुण्योक अहिल्याबाई होळकर बाजारपेठ अशा अनेक घोषणाही त्यांनी केल्या. राज्याच्या विविध भागात सुरू असलेल्या योजनांवर नियंत्रण ठेवण्यासाठी मंत्रालयीन स्तरावर स्वतंत्र नियंत्रण कक्ष निर्माण करण्यात येईल, अशी घोषणाही त्यांनी केली.
या अर्थंसंकल्पातील ठळक वैशिष्ट्ये
शेतक-यांसाठी जलयुक्त शिवार योजना सरकारने हाती घेतली आहे
राज्यासाठी ५४ हजार ९९९ कोटींची य़ोजना
सावकारी कर्जातून शेतक-यांची मुक्तता करणार
जीवनावश्यक वस्तूंवरील सवलत ३१ मार्च २०१६ पर्यंत कायम
एक ऑगस्ट २०१५ पासून एलबीटी रद्द करणार
मूल्यवर्धित करात वाढ केल्याने एलबीटी रद्द
राज्यात देशी मद्य महाग होणार
शेतक-यांच्या आत्महत्या चिंताजनक बाब
दुष्काळग्रस्तांसाठी चार हजार कोटींची मदत केली
साखळी सिमेंट बंधा-यासाठी ५०० कोटी
शेतक-यांसाठी कृषी समृद्ध योजना
शेतक-यांसाठीच्या कृषी समृद्धी योजनेसाठी ५० कोटींची तरतूद
कृषी पंपासाठी एक हजार ३९ कोटींचे अनुदान, सात हजार ५४० सौर कृषीपंप बसवणार
दोन लाख २३ हजार शेतक-यांना कर्जमुक्तीचा फायदा
यवतमाळ जिल्ह्यात मोतीराम लहाने कृषी समृद्धी योजना
सूक्ष्म सिंचनासाठी अर्थसंकल्पात ३३० कोटींची तरतूद
गारपिटीपासून संरक्षणासाठी द्राक्षे उत्पादक शेतक-यांना नेटशेडसाठी अनुदान
शेतीचा विकास चार टक्क्यांवर आणण्यासाठी सरकार कटिबद्ध
मुंबई, कोकणमध्ये जेट्टी उभारण्साठी १२० कोटींची तरतूद
मुख्यमंत्री ग्रामीण मार्ग योजनेची घोषणा, योजनेसाठी ३५० कोटींची तरतूद
ग्रामीण रस्त्यांसाठी दोन हजार ४१३ कोटींची तरतूद
आमदार आदर्श गाव योजनेची घोषणा
पाच वर्षात एक हजार गावे आदर्श होतील
प्रत्येक आमदाराने तीन गावे आदर्श बनवावू
जलविद्युत प्रकल्पासाठी ९०० कोटींची तरतूद
वीजदर कमी करणे राज्य शासनाचा उद्देश
घरकुल योजनेसाठी २०० कोटींची तरतूद
पं. दीनदयाल उपाध्याय घरकुल योजना, दोन लाख १७ हजार भूमीहीनांना होणार फायदा
राज्य सरकार एक लाख घरांची उभारणी कणार
मुंबई मेट्रोसाठी १०९ कोटी ६० लाखांची तरतूद
नागपूर मेट्रोला १९८ कोटींची तरतूद
पुणे मेट्रोला १७५ कोटींची तरतूद
बस स्थानकांचे नूतनीकरण, नवीन बस खरेदीसाठी १२५ कोटी देणार
२०२० पर्यंत सर्वांना घरे देणार
पाणीपुरवठा आणि मलनिस्सारण योजना राबवणार
राज्य महामार्गांसाठी तीन हजार कोटींची तरतूद
मिहान प्रकल्पासाठी २०० कोटींची तरतूद
मेक इन महाराष्ट्र नवा उपक्रम सुरु कऱणार
रत्नागिरीतील जयगड बंदर रेल्वेला जोडणार, त्यासाठी ६८ कोटी ६० लाखांची तरतूद
राज्यातील तीर्थक्षेत्रांसाठी १२५ कोटींचा अतिरिक्त निधी
कोल्हापूर, अमरावती, कराडमध्ये विमानतळ, ९१ कोटींची तरतूद
डॉ. बाबासाहेब आंबेडकरांच्या नागपूरमधील स्मारकासाठी १० कोटींची तरतूद
रायगडावर रायगड महोत्सव सुरु कऱणार
मुंबईमध्ये मोफत वायफाय सुविधा
उद्योग क्षेत्रासाठी तीन हजार १५० कोटींची तरतूद
वस्त्रोद्योगासाठी ५९ कोटी ६६ लाख
किल्ले संवर्धनासाठी ५० कोटींची तरतूद
राज्यांतील जिल्ह्यात हायटेक रोपवाटिकेसाठी ११ कोटींचा निधी
प्रमोद महाजन कौशल्य विकास योजनेची घोषणा
महाराष्ट्र प्राणी संग्रहालय प्राधिकरण सुरु करणार
प्रत्येक जिल्ह्यात कौशल्य विकास केंद्राची स्थापना, १६१ कोटी ८४ लाखांची तरतूद
सागरी किनारा पर्यटनासाठी ४१ कोटी
राज्यात मुलींच्या वसतिगृहासाठी ११२ कोटी ५२ लाखांचा निधी
कुशल महाराष्ट्र, रोजगारयुक्त महाराष्ट्र बनवणार
जे.जे. सोबतच इतर कला महाविद्यालयांच्या आधुनिकीकरणासाठी १० कोटी
शालेय शिक्षणासाठी एक हजार ६९० कोटी
औरंगाबादमध्ये स्कूल ऑफ प्लानिंग अँड आर्किटेक्चरची स्थापना करणार
राज्यातील सार्वजनिक व्यायामशाळांसाठी ५० कोटींची तरतूद
मुलींच्या वसतिगृहांच्या संरक्षक भिंतीसाठी २५ कोटींचा निधी, तीन वर्षात बांधणार
आरोग्य संस्थांच्या बांधकामांसाठी ३८९ कोटी ९२ लाखांची तरतूद
जे.जे. रुग्णालयाच्या नव्या बांधकामाला परवानगी, रुग्णालयात एक हजार खाटा उपलब्ध करणार
राज्य सरकारची माझी कन्या भाग्यश्री योजनेसाठी २०० कोटींची तरतूद
औरंगाबाद, नाशिक, नागपूरमध्ये सीसीटीव्ही कॅमेरे बसवणार
राज्यातील मुस्लिम बहुल ४४० गावांसाठी २५ कोटींची तरतूद
सायबर गुन्हे रोखण्यासाठी १८ कोटींची तरतूद
७० नवजात शिशू रुग्णवाहिका घेणार
इंदूमिलमध्ये डॉ. आंबेडकरांचे स्मारक, १०० कोटींची तरतूद
राज्यातील लोककलांच्या माहितीच्या संगणकीकरणासाठी ७० लाखांची तरतूद
रेशन दुकाने बायोमेट्रिक करण्यासाठी १०३ कोटी
राज्यातील २०६ हुतात्मा स्मारकांच्या नुतनीकरणासाठी २५ कोटींची तरतूद
बाळासाहेब ठाकरे अध्ययन केंद्रासाठी पाच कोटी
औरंगाबादमध्ये गोपीनाथ मुंडे यांचे स्मारक उभारणार
माहिती व तंत्रज्ञान विभआगासाठी १० कोटींचा निधी
अरबी समुद्रात शिवस्मारक बांधणार
९५६ दुर्मिळ ग्रंथांचे डिजीटलायझेशन होणार, मोडी लिपीतील ग्रंथाची जोपासना
कर संकलनाची पद्धत सुकर करणार, एक लाख १८ हजार ६४० कर संकलनाचे उद्दिष्ट
कर संकलन पद्धतीचे संगणीकरण
एक एप्रिलपासून राज्यात जीएसटी लागू करणार
परमवीर चक्र विजेत्यांचे मुंबईत स्मारक बांधणार
संजय गांधी आणि श्रावणबाळ योजनेसाठी एक हजार ४५१ कोटी ५० लाखांची तरतूद
पोलीस वसाहतींमध्ये आधुनिक सुविधा पुरवणार
कर्करोगावरील उपचारासाठींच्या औषधांवरील कर माफ
एलईडी बल्ब, महिलांच्या पर्स स्वस्त होणार
देशी बटर, व्हाइट खारी बटर, बेदाणे स्वस्त
मासिक पगार १० हजार रुपये असणा-या महिलांना व्यवसायिक कर नाही

नवी दिल्ली : ज्या रस्त्याच्या बांधकामासाठी १०० कोटींपेक्षा कमी खर्च झाला आहे व ज्यांचा खर्च टोलमधून वसूल झाला आहे, असे देशातील ६२ टोल प्लाझा मागील काही महिन्यांत बंद करण्यात आल्याची माहिती देतानाच महामार्गांची गुणवत्ता उत्तम ठेवण्यासाठी यापुढे सिमेंटचेच रस्ते बांधण्याची घोषणा केंद्रीय परिवहन मंत्री नितीन गडकरी यांनी लोकसभेत केली.
सिमेंट रस्त्यांमुळे खर्च वाढणार नसून, किमान १२० रुपये प्रति बॅग या दराने सिमेंट मिळणार असल्याने रस्त्यांची किंमत सुमारे २५ ते ३० टक्क्यांनी कमी होईल, असे त्यांनी स्पष्ट केले.
लोकसभेत प्रश्नोत्तराच्या तासानंतर गडकरी यांनी त्यांच्या विभागाने सुरू केलेल्या नवीन वेब पोर्टलची माहिती दिली. जागतिक पातळीवरील नवे तंत्र रस्ते निर्माणासाठी वापरण्यात येईल, असे सांगून रस्त्यांची गुणवत्ता व त्यांचे जीवनमान वाढविण्यासाठी सिमेंट रस्त्यांचा निर्णय घेतला आहे. देशातील ३६ सिमेंट कंपन्यांचे १०३ प्लांट आहेत. तेथून सिमेंट घेतले जाईल. त्यामुळे वाहतूक खर्चाचा बोजा व पर्यायाने किंमत कमी होईल. या पोर्टलवर आलेल्या निविदांनुसार किमान दर १२० रुपये प्रतिबॅग असून, कमाल दर १५७ रुपये ठरला आहे. राज्य सरकारे, महापालिका, सार्वजनिक क्षेत्रातील उपक्रमांसाठी हा दर कायम आहे. आपल्या विभागाने यासाठी प्रथम पुढाकार घेतल्याने पायाभूत योजनांसाठी सिमेंट वापरण्यात येणार असल्याने यापुढे ३० टक्क्यांपर्यंत प्रकल्पांची किंमत कमी होईल.