आर्णी (यवतमाळ), दि. २२ – शेतात असलेल्या बैलावर झडप घालून फडशा पाडण्यात आल्याची घटना माळेगाव येथील गौरी नारायण चव्हाण यांच्या शेतात घडली.
वाघ बैलाचा फडशा पाडत असल्याचे दिसताच महिलेने आरडा ओरड केल्यानंतर वाघ पळून गेला. या घटनेची माहिती वनपाल अधिकारी चव्हाण मिळताच त्यांनी घटनास्थळ गाठून पंचनामा केला. यापूर्वी गावातील संतोष पोहरे, नाना चौधरी यांच्यावर शेतात जात असताना अस्वलाने हल्ला चढून गंभीर जखमी केले होते. मागील दोन महिन्यापूर्वी केळझरा, सावळी, नाईकनगर, भानसरा या परिसरात शेतकºयांना शेतात वाघाच्या पायाचे ठसे दिसले होते. वन विभागाच्या अधिकाºयांनी त्या ठशाचे निरीक्षण करून पट्टेदार वाघ असल्याचा अंदाज व्यक्त केला होता. वनविभागाने महिला शेतकºयाला नुकसान भरपाई देवून वाघाचा बंदोबस्त करावा, अशी मागणी होत आहे.

जयपूर -सत्ताधारी पक्षाच्या आमदाराचा मुलगा शिपाई पदाच्या नोकरीसाठी अर्ज करतोय हे ऐकल्यावर भारतात कोणालाही धक्काच बसेल. पण ही सत्यघटना आहे. राजस्थानमध्ये भाजप आमदार हिरालाल वर्मा यांचा मुलगा हंसराज याने राजकारणात प्रवेश करण्याऐवजी चक्क अजमेर कृषी उत्पन्न बाजार समितीच्या चतुर्थ श्रेणीत शिपाई पदाच्या नोकरीसाठी अर्ज केला आहे.
आठवी पास हंसराज याला स्वतःच्या राजकीय सामर्थ्याचा गैरवापर करुन मोठे करण्याऐवजी कुवतीनुसार योग्य ती नोकरी करण्याची सूचना हिरालाल वर्मा यांनी केली होती. या सूचनेनुसार हंसराजने सरकारी नोकरीसाठी नियमानुसार अर्ज केला आहे. सलग दोनवेळा टोंक जिल्ह्यातून आमदार झालेल्या हिरालाल वर्मा यांनी मुलगा पात्रतेच्या सर्व परीक्षा उत्तीर्ण होऊन शिपाई झाल्यास आनंद वाटेल असे सांगितले.
प्रत्येक व्यक्तीने त्याच्या कुवतीनुसार प्रामाणिकपणे काम करावे असा विचार करणा-या हिरालाल वर्मा यांनी मुलाच्या प्रयत्नांचे कौतुक केले आहे. सध्या हंसराज निवाई येथे एका खासगी दवाखान्यात दरमहा पाच हजार रुपये पगाराची नोकरी करत आहे. सरकारी नोकरी मिळाल्यास त्याच्या वैयक्तिक आर्थिक सुरक्षेत वाढ होईल. महत्त्वाचे म्हणजे ही प्रगती हंसराज स्वतःच्या प्रयत्नांनी करेल त्यामुळे मुलाच्या अर्जाचे पुढे काय होते याकडे वडील या नात्याने मी उत्सुकतेने बघत असल्याचे हिरालाल वर्मा म्हणाले.

नवी दिल्ली – देशाचे राजकारण हलवून सोडणा-या हाशीमपूर हत्याकांड प्रकरणात २८ वर्षानंतर निकाल आला असून, दिल्लीच्या तीस हजारी न्यायालयाने शनिवारी सबळ पुराव्याअभावी १६ आरोपींची सुटका केली.
अतिरिक्त सत्र न्यायाधीश संजय जिंदाल यांनी उत्तर प्रदेश पोलिस दलातील पीएसीच्या १६ जवानांची हत्येच्या आरोपातून सुटका केली. हाशीमपूर हत्याकांडात ४० हून अधिक मुस्लिमांची हत्या झाली होती.
१९८७ साली मेरठ शहरात दंगल उसळलेली असताना शोध मोहिमे दरम्यान पीएसीच्या जवानांनी हाशीमपूरयेथून मुस्लिमांना ताब्यात घेतले होते. या प्रकरणी १९९६ साली गाझियाबादच्या मुख्य न्याय दंडाधिका-यांसमोर आरोपपत्र दाखल करण्यात आले होते.
हत्याकांडात बळी पडलेल्यांचा कुटुंबियांनी निष्पक्ष सुनावणी व्हावी यासाठी सर्वोच्च न्यायालयात याचिका दाखल केली होती. सर्वोच्च न्यायालयाच्या आदेशानुसार सप्टेंबर २००२ मध्ये हे प्रकरण सुनावणीसाठी दिल्ली तीस हजारी न्यायालयात वर्ग करण्यात आले होते. १९ आरोपींपैकी तिघांचा सुनावणी दरम्यान मृत्यू झाला.

माहुर (नांदेड) दि. २१ – जे वकळ एकाते त्यावर विश्वास ठेऊ नका. जे केवळ धर्मग्रंथात लिहीले आहे. म्हणून त्यावर विश्वार ठेऊ नका जे बुध्दीला पटते त्यावर विश्वास ठेवा. बुध्दीप्रमाणे वाद हीच बुद्घधम्माची शिकवण आहे असे प्रतिपादन समता परिषदेचे अध्यक्ष अप्पाराव मैंद यांनी केले.
बौद्घभूमि परिसर माहुर येथे आज शनिवारी २१ मार्च रोजी आयोजीत पाचव्या धम्म परिषदेच्या उद्घाटन प्रसंगी ते बोलत होते. सकाळी भदंत बी. अश्वजीत यांच्या मार्गदर्शनाखाली धम्मफेरी काढण्यात आली. पंचशिल धम्मध्वारोहनानंतर कार्यक्रमाची सुरूवात झाली. सुरूवातीला वामनदादा कर्डक संगीत अकादमी किनवट द्वारा प्रा. सुरेश पाटील यांनी अभिवादन गित सादर केले. उद्घाटन समारंभाच्या प्रास्तविकातून गोकुलदार वंजारे यांनी धम्माचे आचरण साधे मानव जिवन जगण्यास अत्यंत उपयुक्त असल्याचे सांगितले. तर जेतवनचे सदस्य प्राचार्य के.व्ही. मुनेश्वर यांनी बौद्घ धम्म दु:ख निवारण्याचा मार्ग असल्याचे सागितले. माहुरचे माजी नगराध्यक्ष प्रा. राजेंद्र केशवे यांनी बाबासाहेबांचे विचार घराघरात पोहोचवण्यासाठी वाचण संस्कृतीवर भर देऊन प्रबोधनात्मक कार्यक्रमात उपस्थित राहणे गरजेचे असल्याचे सांगितले. यावेळी डॉ. नरेंद्र दाभोळकर , कॉ. गोविंद पानसरे, शाहीर साबळे यांना आदरांजलीचा ठराव पारीत करण्यात आला. या कार्यक्रमाचे संचालन उत्तम कानिंदे यांनी तर आभार श्रीरंग जगताप यांनी मानले. सयोजन व्ही.के. सिरसाट यांनी केले होते. यावेळी जयवंत पाटील, नगर परिषद सभापती राज गंधेवाड, धम्म परिषदेचे अध्यक्ष प्रकाश गायकवाड, निमंत्रक गोविंद मगरे, स्वागताध्यक्ष मनोज किर्तने, मिलींद सर्पे उपस्थित होते. यावेळी भदंत प्रा. सुमेथबोधी महाथेरो, भदंत विपशी स्थवीर, भदंत धम्मवश थेरो, भदंत अश्वजीत, भदंत राहुल आचार्य यांनी धम्मदेसना दिली. संचालन सुरेश पाटील यांनी तर आभार प्रल्हाद भवरे यांनी मानले.

यवतमाळ. यवतमाळ शहरातील सर्व पत्रकारांना सूचित करण्यात येत आहे कि, यवतमाळ जिल्हा श्रमिक पत्रकार संघटनेची निवडणूक येत्या 27 मार्च रोजी दुपारी 12.30 वाजता येथील पत्रकार भवनात होईल. त्यामुळे ज्या पत्रकारांनी सदस्यता शुल्क 150 रुपये देऊन सदस्यत्व घेतले नाही, त्यांनी 27 मार्चच्या दुपारी 12 वाजे पर्यंत सदस्यत्व घेवुन पदाधिकारी निवडीच्या प्रक्रियेत भाग घ्यावा. 27 च्या 12 वाजेनंतर सदस्यत्व घेता येणार नाही याची नोंद वी. कारण या वेळेच्या अर्धा तासानंतर निवडणूक होणार आहे. त्यामुळे खालील ठिकाणी सदस्यत्व शुल्क भरून आपल्या नावाची नोंदणी करून घ्यावी ही नम्र विनंती.
बीरेंद्र चौबे मो.नं. 9890417177 (नवभारत कार्यालय, तिरंगा चौक यवतमाळ)
नागेश गोरख मो. नं. 9423131710 (हिन्दूस्थान कार्यालय, चिंतामणी
कॉम्प्लेक्स, दारव्हा रोड, यवतमाळ)

मुंबई – चैत्र शुद्ध प्रतिपदा म्हणजेच गुढीपाडवा. हिंदू नववर्षातील पहिला दिवस. पुराणात सांगितलेल्या साडेतीन मुहूर्तांपैकी एक मुहूर्त. राज्यभरात गुढीपाडव्याचा सण जल्लोषात, मोठ्या उत्साहात साजरा केला जात आहे. मुंबई आणि उपनगरांमध्ये नववर्षानिमित्त शोभायात्रा उत्साहात पार पडत आहेत.
हिंदू नववर्षाआरंभी राष्ट्रपती प्रणव मुखर्जी आणि पंतप्रधान नरेंद्र मोदी यांनी नागरिकांना गुढीपाडव्याच्या शुभेच्छा दिल्या. ट्विटरच्या माध्यमातून त्यांनी या शुभेच्छा दिल्या. महाराष्ट्रातील माझ्या मित्रपरिवाराला गुढीपाडव्याच्या खूप खूप शुभेच्छा. तुम्हाला हे वर्ष भरभराटीचे, आरोग्यदायी आणि आनंदी जावो असे पंतप्रधानांनी ट्विटवर म्हटले आहे.
गुढीपाडव्यासोबतत राष्ट्रपती आणि पंतप्रधानांनी उगडी, चेती चंद, नवरेहच्याही नागरिकांना शुभेच्छा दिल्या.

अॅडलेड, दि. २० – विश्वचषकाच्या उपउपांत्य फेरीमध्ये ऑस्ट्रेलियाने पाकिस्तानचा सहा गडी आणि ९७ चेंडू राखून सहज पराभव केला आहे. आता सेमी फायनलमध्ये २६ मार्च रोजी कांगारुंची गाठ भारताशी पडणार आहे. कप्तान स्मिथ आणि शेन वॅटसनने प्रत्येकी अर्धशतक झळकावले आणि २१४ धावांचे लक्ष्य लिलया पार केले. वॅटसन व नंतर मॅक्सवेल या दोघांचाही एकेक झेल वहाबच्या गोलंदाजीवर पाकच्या क्षेत्ररक्षकांनी टाकला, अन्यथा सामन्यात अधिक रंगत आली असती. चार बळी घेत पाकिस्तानच्या फलंदाजीचा कणा मोडणा-या हेझेलवूडला समानावीराचा किताब देण्यात आला.
वर्ल्डकपमधील तिस-या क्वार्टर फायनलमध्ये पहिली फलंदाजी करताना ऑस्ट्रेलियाच्या भेदक मा-यासमोर पाकिस्तानची फलंदाजी कोसळली आणि पाकिस्तानचा डाव २१३ धावांवर आटोपला. ऑस्ट्रेलियासमोर विजयासाठी २१४ धावांचे माफक आव्हान असले तरी पाकची गोलंदाजी काही चमत्च्याकार करेल का याची उत्सुकता होती.
पाकिस्तानने नाणेेफेक जिंकून प्रथम फलंदाजी करण्याचा निर्णय घेतला. परंतु सर्फराज अहमद आणि अहमद शेहजाद ही सलामीची जोडी अवघ्या २४ धावांमध्येच तंबूत परतली. सर्फराज १० तर शेहजाद ५ धावांवर बाद झाला. यानंतर हारिस सोहेल व कर्णधार मिसबाह उल हक या जोडीने पाकचा डाव सावरण्याचा प्रयत्न केला. मात्र मिसबाह ३६ धावांवर असताना बाद झाला. यानंतर हारिस सोहेल ४१ धावांवर बाद झाला. उमर अकमल, शाहिद आफ्रिदीही स्वस्तात माघारी परतले. वहाब रियाझ आणि एहसान आदिल या तळाच्या फलंदाजांनी १६ व १५ धावांची खेळी करत पाकिस्तानला २०० चा टप्पा गाठून दिला. शेवटी ४९.५ षटकांत २१३ धावांवर पाकिस्तानचा डाव संपुष्टात आला.
ऑस्ट्रेलियातर्फे जॉस हॅझलवूडने सर्वाधिक चार विकेट घेतल्या. मिशेल स्टार्क व ग्लॅन मॅक्सवेलने प्रत्येकी दोन तर मिशेल जॉन्सनने एक विकेट घेतली. या सामन्यामध्ये पाकिस्तानचे सर्व फलंदाज झेलबाद झाले. आता ऑस्ट्रेलियाला घरच्या मैदानावर नमवत भारत फायनलमध्ये प्रवेश करतो याकडे तमाम भारतीयांचे लक्ष लागले आहे.

शिर्डी- श्री साईबाबा संस्थान ट्रस्टच्या साईबाबा रुग्णालयात औषध खरेदीत घोटाळा झाल्याचे उघडकीस आले असून याप्रकरणी तीन कर्मचा-यांना निलंबित केले आहे.
मच्छिंद्र थोरात (मटेरीयल मॅनेजर), प्रकाश दिघे (फार्मासिस्ट), आणि दिलीप अदिच्च्या उर्फ शर्मा (स्टोअर मॅनेजर) अशी या तिघांची नावे असल्याचे कार्यकारी अधिकारी राजेंद्र जाधव यांनी सांगितले.
याप्रकरणी संस्थानकडे तक्रार मिळाल्यानंतर औषधांचा साठा आणि रेकॉर्डची तपासणी केली असता प्राथमिक टप्प्यात औषधसाठा तसेच टेंडरींगमध्येही तफावत असल्याचे आढळून आल्याने या तिघांना निलंबित केले आहे.
श्रीरामपूर येथील स्पिरीट पुरवठा करणा-या कंत्राटदारानेही रुग्णालयात स्पिरीट पोहचवण्यासाठी संस्थानच्या वाहनांचा दुरुपयोग केल्याचेही निदर्शनास आले आहे. संस्थानच्या वार्षिक ताळेबंद तपासणीनंतरच या घोटाळ्याचा मुख्य सूत्रधार कोण आहे, ते उघड होईल, असेही जाधव यांनी सांगितले.
दरम्यान, आरटीआय कार्यकर्ते संदीप कुलकर्णी यांनी याप्रकरणी सखोल चौकशी करण्यास सांगितले आहे. यात हलगर्जीपणा केल्यास उच्च न्यायालयात खटला दाखल करु असे कुलकर्णी यांनी सांगितले.

नवी दिल्ली- काळ्या पैशाला आवर घालणारे विधेयक शुक्रवारी अर्थमंत्री अरुण जेटली यांनी लोकसभेत सादर केले. यामध्ये परदेशात काळा पैसा दडवणा-यांवर कायदेशीर कारवाईच्या कडक उपाययोजना असून यात तीन ते १० वर्षापर्यंत तुरुंगवास आणि २५ लाख ते एक कोटी रुपये दंडाची तरतूद करण्यात आली आहे.
बेनामी परदेशी उत्पन्न आणि मालमत्ता (नवीन कर तरतूद) विधेयक, २०१५ यामध्ये ज्यांच्याकडे परदेशी मालमत्ता आहे अशांना पहिल्या वेळेस तीन ते १० वर्षाची शिक्षा किंवा कर आणि दंड भरून कायदेशीर कारवाईतून सुटण्याचा मार्गही सुचवण्यात आलेला आहे. हे विधेयक मंजूर झाल्यास हा कायदा एक एप्रिल २०१६ पासून लागू होण्याची शक्यता आहे.

मेलबोर्न, दि. १९ – रोहित शर्माच्या (१३७) दमदार शतकानंतर गोलंदाजांच्या भेदक कामगिरीमुळे भारताने बांग्लादेशचा १०९ धावांनी पराभव करत विश्वचषकाच्या सेमीफायनलमध्ये प्रवेश केला आहे. भारताच्या ३०३ धावांच्या आव्हानाचा पाठलाग करताना बांग्लादेशचे सर्व फलंदाज १९३ धावांवर बाद झाले. उमेश यादवने ४ तर शमी व जडेजाने प्रत्येकी २ आणि मोहित शर्माने १ बळी टिपत बांग्लादेशच्या फलंदाजांचा धुव्वा उडवला. विश्वचषक स्पर्धेत भारताने हा सलग सातवा सामना जिंकला असून कर्णधार धोनीच्या नेतृत्वाखाली भारतीय संघाचा हा शंभरावा विजय आहे. उद्या ऑस्ट्रेलिया विरुद्ध पाकिस्तानच्या सामन्यात जो संघ जिंकेल त्या संघाशी भारताची सेमी फायनलमध्ये गाठ पडेल.
तत्पूर्वी रोहित शर्मा व सुरेश रैनाच्या खेळीच्या आधारे भारताने बांग्लादेशसमोर विजयासाठी ३०३ धावांचे आव्हान ठेवले. भारताने ५० षटकांत सहा गडी गमावत ३०२ धावा केल्या. शेवटच्या षटकांमध्ये रविंद्र जडेजाच्या फटकेबाजीने भारताने ३०० चा टप्पा ओलांडला. भारताने नाणेफेक जिंकून प्रथम फलंदाजी करण्याचा निर्णय घेतला. सलामीवीर रोहित शर्मा व शिखर धवन या दोघांनी चांगली सुरुवात करुन दिली. भारताच्या ७५ धावा झाल्या असताना बांग्लादेशच्या गोलंदाजांना ही जोडी फोडण्यात यश आले. शिखर धवन ३० धावांवर यष्टीचित झाला. यानंतर विराट कोहली ३, अजिंक्य रहाणे १९ धावांवर बाद झाला. भारताची स्थिती २८ षटकांत ३ बाद ११५ अशी झाली यानंतर रोहितने सुरेश रैनासोबत शतकी भागीदारी कर भारताचा डाव सावरला.या जोडीने १२२ धावांची भागीदारी रचली. सुरेश रैना ६५ धावांवर बाद झाला. रोहित शर्माने वन डे कारकिर्दीतील ७ वे तर वर्ल्डकपमधील पहिले वहिले शतक ठोकले. वर्ल्डकपमध्ये फॉर्ममध्ये नसल्याने टीका करणा-या टीकाकारांनाही रोहितने त्यांच्या बॅटने चोख प्रत्युत्तर दिले.
शेवटच्या पाच षटकांमध्ये फटकेबाजी करण्याच्या प्रयत्नात रोहित शर्मा १३७ तर कर्णधार महेंद्रसिंग धोनी ६ धावांवर बाद झाला. रविंद्र जडेजाने १० चेंडूत ४ चौकार ठोकून २३ धावांची छोटी पण महत्त्वाची खेळी केली. ५० षटकांत रुबेल हुसैन यॉर्कर टाकून जडेजा व आर. अश्विनला फटकेबाजीची संधीच दिली नाही व भारताचा डाव ५० षटकांत ३०२ धावांवर रोखण्यात त्याला यश आले. बांग्लादेशतर्फे तास्कीन अहमदने सर्वाधिक ३ विकेट घेतल्या. मशरफे मोर्तझा, रुबेल हुसैन व शकीब अल हसन या तिघांनी प्रत्येकी एक विकेट घेतली.