मुंबई- पाकिस्तानी कलाकारांना भारतात कार्यक्रमाची संधी दिल्यामुळे शिवसेनेच्या कार्यकर्त्यांनी भारत-पाक संयुक्त बँडची घोषणा करणारी पत्रकार परिषद मंगळवारी प्रेस क्लबमध्ये उधळून लावण्याचा प्रयत्न केला.
प्रचंड पोलिस बंदोबस्त असूनही शिवसेनेच्या कार्यकर्त्यांनी ‘पाकिस्तानी कलाकारांनो चालते व्हा’, ‘वंदे मातरम्’ अशा घोषणा देत पत्रकार परिषद उधळून लावण्याचा प्रयत्न केला. याप्रकरणी पोलिसांनी १५ जणांना ताब्यात घेतले आहे.भारत आणि पाकिस्तान यांच्यात संबंध सुधारण्यासाठी ‘मीकाल हसन बँड’ हा वाद्यवृंद प्रेस क्लबमध्ये भारतीय कलाकारांसोबत कार्यक्रम सादर करणार होते. या संदर्भात पाकिस्तानी कलाकारांची पत्रकार परिषद आयोजित करण्यात आली होती.भारत व पाकिस्तान यांचे संबंध सुधारावेत यासाठी प्रेस क्लबने या संयुक्त बँडचे आयोजन केले आहे. शिवसेनेच्या भूमिकेबाबत प्रेस क्लबचे अध्यक्ष गुरबिर सिंग यांनी राज्याचे गृहमंत्री आर. आर. पाटील आणि संयुक्त पोलिस आयुक्त (कायदा व सुव्यवस्था) सदानंद दाते यांना माहिती दिली होती. या कार्यक्रमाचा निषेध करत शिवसेनेच्या कार्यकर्त्यांनी पाकिस्तानी कलाकारांच्या विरोधात मोर्चा काढणार असल्याची पूर्वसूचना पोलिसांना होती, त्यामुळे पुरेसा बंदोबस्त ठेवण्यात आला होता. तरीही याठिकाणी निषेध व्यक्त करत शिवसेनेच्या कार्यकर्त्यांनी गोंधळ घातल्याने पोलिसांनी प्रेल क्लबचा मुख्य दरवाचा बंद केल्याचे सिंग यांनी सांगितले.
मात्र यामुळे पाकिस्तानी टिव्ही कलाकार बेगम नवाईश अली, बीग बॉसमधील कलाकार वीणा मलिक आणि गेल्या वर्षी दिल्ली येथे झालेल्या सिंधी सुफी संगित महोत्सवात भाग घेतलेले काही कलावंत या परिषदेच्या निमित्ताने आले आहेत. ते सर्वजण सुखरुप असल्याचे सिंग यांनी सांगितले. पाकिस्तानी कलाकारांना व खेळाडूंना विरोध करण्याची शिवसेनेची ही जुनीच भूमिका असल्याचेही त्यांनी सांगितले. निवडणुकांच्या पार्श्वभूमीवर शिवसेनेने केलेली ही स्टंटबाजी असल्याची टीका काँग्रेस व राष्ट्रवादीच्या नेत्यांनी केली आहे.

नवी दिल्ली- भारताचा महान क्रिकेटपटू सचिन तेंडुलकर आणि एच-इंडेक्स ऑफ १०० मध्ये पोहचणारे पहिले भारतीय शास्त्रज्ञ चिंतामणी नागेश रामचंद्र राव यांना मंगळवारी राष्ट्रपती प्रणव मुखर्जी यांच्या हस्ते भारतरत्न या देशाच्या सर्वोच्च नागरी पुरस्काराने सन्मानित करण्यात आले. राष्ट्रपती भवनच्या दरबार हॉलमध्ये हा पुरस्कार प्रदान करण्यात आला. या कार्यक्रमाला पंतप्रधान मनमोहन सिंग, संपुआ अध्यक्ष सोनिया गांधी, संरक्षण मंत्री ए. के. अँटोनी उपस्थित होते. या पुरस्कार सोहळयाला सचिनची पत्नी अंजली, त्याची दोन मुले अर्जून-सारा आणि नागेश रामचंद्र राव यांचे कुटुंबियही उपस्थित होते. कोट्यवधी क्रिकेट चाहत्यांना आनंदाचे अनेक क्षण देणारा सचिन हा सर्वोच्च नागरी पुरस्कार पटकावणारा पहिला भारतीय क्रीडापटू आहे.

यवतमाळ – शहरातील चापमनवाडी येथील सत्कार स्विटमार्टच्या गोडाऊनला आग लागल्याने संपूर्ण साहित्य जळून खाक झाले असून पाच लाखाचे नुकसान झाले.
सत्कार स्विटमार्टचे संचालक भगवानदास लोहाणा याचे चापमनवाडीत श्रीनाथ फु्रट प्रॉडक्टे गोडाऊन आहे. दरम्यान काल मध्यरात्री १२.४५ वाजता या गोडाऊनला अचानक आग लागली. पाहता पाहता आगीने रौद्ररुप धारण करून आतमधील सर्व साहित्य कवेत घेतले. यामध्ये पॉलीथीन, पॅकींग रोल, कार्टुन बॉक्स, पॉकीट, मटेरीयल,  नमकीन पॉकीट, दरवाजे, खिडक्या, टेबल आदी पाच लाख रुपयाचे साहित्य जळुन खाक झाले. या घटनेची माहिती मिळताच नगर परिषद अग्निशन दलाचे दिलावर खॉ, यशवंत पाटील यांनी घटनास्थळी दाखल होऊन पाण्याचा मारा करून  ही आग आटोक्यात आणली. काही वेळातच ही आटोक्यात आल्याने शेजारी असलेल्या घराचे कुठलीही हानी झाली नाही.

ठाणे : देशाच्या शेवटच्या घटकाला न्याय मिळाला पाहिजे असा घटनेत उल्लेख आहे. शहापूर तालुक्यातील खेड्या-पाड्यातून तसेच दुर्गम भागातील लोकांना कमी खर्चात आणि कमी वेळात न्याय मिळावा यासाठी न्यायालयाची इमारत प्रेरणादायी ठरावी, अशी अपेक्षा मुंबई उच्च न्यायालयाचे न्यायमुर्ती भुषण गवई यांनी व्यक्त केली.
शहापूर येथील न्यायालयाच्या नवीन इमारत उदघाटन प्रसंगी न्या.गवई बोलत होते. प्रमुख जिल्हा सत्र न्यायाधीश किशोर सोनवणे समारंभाच्या अध्यक्ष स्थानी होते. न्या. प्रतिभा शेजवळ-काळे, ॲड.जगदीश घोरपडे, ॲड.प्रमोद पाटील, आमदार दौलत दरोडा यांची यावेळी उपस्थिती होती. शहापूर येथे सुंदर आणि सर्वसोईने अद्ययावत इमारत उभारण्याबद्दल त्यांनी बांधकाम विभागाच्या अधिकाऱ्यांना धन्यवाद दिले. डॉ.बाबासाहेब आंबेडकर यांनीही या न्यायालयात काही काळ काम केले असल्याने या न्यायालयास वेगळे महत्व प्राप्त झालेले आहे. घटनेमुळे नागरिकांना अनेक अधिकार मिळाले आहेत. पत्रकार आणि कर्तव्यदक्ष अधिकारी एकत्र आल्यामुळे एक सुंदर वास्तु निर्माण झाली असल्याचे न्या.गवई यांनी सांगितले. 30 वर्षाच्या अथक प्रयत्नामुळे न्यायालयाची इमारत पूर्ण झाली. त्यामुळे एक वेगळा आनंद सर्वांना मिळाला आहे, असे सांगून न्या.सोनवणे म्हणाले की, या ठिकाणी वरिष्ठस्तर न्यायालय सुरु करणे गरजेचे आहे. पत्रकारांचे हित आणि त्यांच्या सोईसाठी इमारत उभारली असून या ठिकाणी स्वच्छता राखावी. या इमारतीत पक्षकार, वकील, पोलीस यांच्यासाठी वेगवेगळे कक्ष असून संगणीकरणामुळे पक्षकारांना प्रवेशदारावर सर्व माहिती उपलब्ध होणार आहे. ॲड.प्रमोद पाटील आणि जेष्ठ पत्रकार अरविंद भानुशाली यांनीही यावेळी मनोगत व्यक्त केले. दिप प्रज्वलीत करुन आणि फीत कापून इमारतीचे उदघाटन झाले. पाटेकर आणि त्यांच्या सहकाऱ्यांनी स्वागत गीत सादर केले शेवटी न्या. प्रतिभा शेजवळ-काळे यांनी आभार मानले. या कार्यक्रमास अधिक्षक अभियंता अनिल गायकवाड, कार्यकारी अभियंता संजय सोळंकी, तहसीलदार शहापूर, ठाणे जिल्ह्यातील न्यायीक अधिकारी, वकील आणि कर्मचारी उपस्थित होते.

रत्नागिरी – देशाचा समतोल विकास करण्यासाठी ग्रामीण भागातील अर्थव्यवस्था मजबूत करणे आवश्यक असून, सरकारमार्फत याच उद्देशाने विविध विकास योजनांची अंमलबजावणी करण्यात येत आहे, असे प्रतिपादन केंद्रीय अवजड उद्योग मंत्री प्रफुल्ल पटेल यांनी येथे केले.
स्वा. सावरकर नाटय़गृह येथे अन्न सुरक्षा योजना प्रारंभ आणि राजीव गांधी जीवनदाय योजनेंतर्गत हेल्थ कार्ड वाटप कार्यक्रमप्रसंगी ते बोलत होते. रत्नागिरीचे पालकमंत्री उदय सामंत, जिल्हा परिषद अध्यक्षा मनीषा जाधव, जिल्हाधिकारी राजीव जाधव, मुख्य कार्यकारी अधिकारी विजय काळमपाटील, अतिरिक्त मुख्य कार्यकारी अधिकारी हरीश जगताप, जिल्हा पुरवठा अधिकारी उमेश बिरारी, जिल्हा शल्य चिकित्सक डॉ. एल. डी. नारोळे, जिल्हा आरोग्य अधिकारी डॉ. राजेंद्र खंडागळे, रमेश कीर आदी उपस्थित होते.
पटेल म्हणाले की, सरकारी कृषीक्षेत्राच्या विकासासाठी आखलेल्या धोरणांचे चांगले परिणाम दिसून येत आहेत. देशातून तीन लाख कोटींचा कृषी माल निर्यात करण्यात येत आहे. भारत जगातील पहिल्या क्रमांकाचा तांदूळ निर्यातक देश आहे. बासमती एवढीच कोकणातील हापूसला जगातून मागणी आहे. शेतक-यांनी नवे तंत्रज्ञान स्वीकारले असून, त्याचे चांगले परिणाम ग्रामीण भागात दिसून येत आहेत.
शेतक-यांना प्रोत्साहन देण्यासाठी शासनाने कृषि कर्जमाफी योजना राबवली आहे. कर्जवाटपात लक्षणीय वाढ करून एकूण आठ लाख कोटीचे कृषि कर्ज वाटप करण्यात येत आहे. तांदूळाच्या हमीभावातही लक्षणीय वाढ करण्यात आलेली आहे. या सर्व प्रगतीचा लाभ सामान्य माणसाला मिळवून देण्यासाठी शासनाने अन्न सुरक्षा कायद्याची अंमलबजावणी सुरू केली आहे, असे ते म्हणाले. जनतेच्या आरोग्याची काळजी घेण्यासाठी राजीव गांधी जीवनदायी आरोग्य योजनेचा लाभही ग्रामीण तसेच शहरी भागातील सामान्य जनतेला देण्यात येत असल्याचे त्यांनी सांगितले. रेशन दुकानदार आणि ग्रामपंचायत स्तरावरून शासनाच्या कल्याणकारी योजनांची माहिती जनतेला करून दिल्यास प्रगत भारताचे चित्र साकार होईल, असा विश्वास पटेल यांनी व्यक्त केला.
जिल्ह्याच्या विकासाबाबत ते म्हणाले की, कोकणातील जिल्ह्यांच्या शेजारील जिल्ह्यांप्रमाणे विकास होणे आवश्यक आहे. त्याचबरोबर इथल्या निसर्गसंपदेचा लाभ विकासाच्या दृष्टीने करून घेणे गरजेचे आहे. पर्यावरणाचा विकास आणि स्थानिकांच्या गरजांचा विचार करताना पर्यटन क्षेत्राच्या दृष्टीने असलेल्या क्षमतेचाही विचार होणे गरजेचे आहे. अशा विविध क्षेत्रांतील विकासाला चालना देण्यासाठी शासन प्रयत्नशील असल्याचे त्यांनी सांगितले. कोकणातील मत्स्यव्यवसायाला चालना देण्यासाठीदेखील विविध योजना राबविण्यात येत असल्याचे पटेल यांनी सांगितले. जिल्ह्यातील ११ लाख जनतेला अन्न सुरक्षा तर १४ लाख जनतेला राजीव गांधी जीवनदायी आरोग्य योजनेचा लाभ मिळणार असल्याचे जिल्हाधिकारी राजीव जाधव यांनी सांगितले.

नवी दिल्ली- सर्वसामान्य जनतेला दिलासा देण्यासाठी देशातील गॅस प्रकल्पातील गॅसचा पुरवठा सीएनजी कंपन्यांना पुरवण्याचा निर्णय केंद्र सरकारने घेतला आहे. त्यामुळे सीएनजीच्या भावात किलोमागे १५ रुपये तर पाइप गॅसच्या भावात पाच रुपयांनी घट होणार आहे, अशी घोषणा केंद्रीय पेट्रोलियम मंत्री वीरप्पा मोईली यांनी केली.
सध्या शहरातील घरगुती व वाहनांसाठी सध्या देशातील गॅस प्रकल्पातून निर्माण होणारा ८० टक्के गॅसचा पुरवठा केला जातो. आता या क्षेत्रासाठी १०० टक्के गॅस पुरवठा केला जाईल. या निर्णयाचा फायदा दिल्ली व अहमदाबादसारख्या शहरातील नागरिकांना मिळू शकेल. मात्र, पेट्रोकेमिकल्स, पोलाद आणि तेल शुद्धीकरण कारखान्यांना लागणा-या गॅसच्या पुरवठ्यात कपात करण्यात येणार आहे.
सध्या सीएनजी तयार करण्यासाठी महागडा एलएनजी गॅस वापरला जातो. देशाअंतर्गत गॅसचा पुरवठा केल्याने आपोआपच गॅसच्या किंमती कमी होऊ शकतील. सर्वसामान्य व्यक्तींना दिलासा देण्यासाठी आम्ही हा निर्णय घेतला आहे, असेही मोईली म्हणाले.
देशाअंतर्गत गॅस प्रकल्पातून मुंबईला गॅसचा पुरवठा केला जात असल्याने तेथील भाव कमी होणार नाहीत. दिल्ली व अहमदाबादमध्ये सीएनजीसाठी महागडा एलएनजी वायू वापरला जातो. तेथे या निर्णयाचा फायदा होणार आहे.

नवी दिल्ली- दिल्लीतील आम आदमी पक्षाच्या सरकारने जनलोकपाल विधेयकाला मंजुरी दिली आहे. सोमवारी दिल्ली सरकारच्या मंत्रिमंडळाच्या बैठकीत या विधेयकाला मंजुरी देण्यात आली. हे विधेयक १६ फेब्रुवारी रोजी दिल्ली विधासभेत सादर केले जाणार आहे.

वीज निर्मिती व वीज पुरवठ्यासाठी राज्य सक्षम -राजेंद्र मुळक
यवतमाळ दि. 02 : राज्याला साडे चौदा हजार मेगावॅट वीजेची आवश्यकता आहे. या तुलनेत चौदा हजार दोनशे पन्नास मेगावॅट वीज निर्मिती होत असल्यामुळे राज्य वीज निर्मिती व वीज पुरवठ्यासाठी सक्षम आहे असे प्रतिपादन वित्त, उर्जा व सिंचन राज्यमंत्री राजेंद्र मुळक यांनी केले.
आर्णी तालुक्यातील जवळा येथे आज सामाजिक न्यायमंत्री शिवाजीराव मोघे यांच्या प्रमुख उपस्थितीत 132 के.व्ही. उपकेंद्राचे भुमीपूजन करण्यात आले यावेळी राज्यमंत्री मुळक बोलत होते. आर्णीचे नगराध्यक्ष अनिल आडे, पांढरकवड्याचे नगराध्यक्ष शंकर बडे, पं.स.सभापती राजीव विरखेडे, उपसभापती सारनाथ खडसे, बाजार समितीचे सभापती जीवन जाधव, जि.प.सदस्य देवानंद पवार, सोनबा मंगाम, विद्युत पारेषणचे मुख्य अभियंता भाऊराव राऊत, वीज वितरणचे मुख्य अभियंता श्री. बोरकर, आदी मान्यवरांची विशेष उपस्थिती होती.
राज्यात आता विज दर कमी झाले आहेत, असा उल्लेख करून राज्यमंत्री मुळक म्हणाले, वीजभार नियमन समस्या राहिली नाही, मात्र ज्या भागात वीज चोरीचे प्रमाण. वीज बिलाची रक्कम थकीत आहे तिथेच भारनियमन केले जाते. पेट्रोल, डिझेल, जसे ग्राहकाला रोखीने घ्यावे लागते तसेच विद्युत हे देखील इंधन आहे. वीजनिर्मितीसाठी कोळसा रोखीने घ्यावा लागतो म्हणून वीज निर्मिती करता यावी यासाठी वीज ग्राहकांनी बिलाची रक्कम नियमीतपणे भरावी तसेच वीज चोरीच्या अपप्रवृत्तीला आळा घालावा असेही आवाहन त्यांनी केले.
निम्न पैनगंगा प्रकल्प क्षेत्रातील पुर्नवसन व इतर बाबींसाठी 150 कोटीची तरतूद 2014-15 च्या अर्थसंकल्पात करण्यात येईल. राज्य आर्थिकदृष्ट्याही सक्षम असून मुख्यमंत्री पृथ्वीराज चव्हाण यांच्या नेतृत्वात औद्योगिक, कृषी व इतर क्षेत्रात राज्य देशात अग्रेसर आहे. त्यामुळेच विविध विकासाच्या योजना राबविल्या जात आहेत. जवळा येथे उभारण्यात येणाऱ्या 132 के.व्ही. उपकेंद्राचे काम दर्जेदार व मुदतीत पुर्ण करावे. तसेच या केंद्राच्या उभारणीसाठी लागणाऱ्या कालावधीत या परिसरातील वीजेच्या समस्या सोडविण्यासाठी पर्याय व्यवस्था करावी अशा सूचनाही ऊर्जा राज्यमंत्र्यांनी केल्या.
जवळा येथे उभारण्यात येणाऱ्या वीज उपकेंद्रामुळे याच भागातील शेतकरी व नागरिकांच्या समस्या सुटतील असा विश्वास सामाजिक न्यायमंत्री शिवाजीराव मोघे यांनी व्यक्त केला. निम्न पैनगंगा प्रकल्पासाठी वन कायद्यासह इतर येणाऱ्या अडचणी मुख्यमंत्री व इतर जेष्ठ मंत्र्यांच्या पुढाकाराने सोडविण्यात आल्या असून या प्रकल्पाला अंतिम मंजूरी मिळाली आहे. या प्रकल्प क्षेत्रातील पुर्नवसनासाठी 150 कोटी रुपयाची निधी शासनाकडून उपलब्ध व्हावा अशी अपेक्षा श्री. मोघे यांनी यावेळी व्यक्त केली.
कार्यक्रमाचे प्रास्ताविक वीज पारेषण कंपनीचे मुख्य अभियंता भाऊराव राऊत यांनी केले. कार्यक्रमास सरपंच मुक्ता बेले, तालुका समन्वय समितीचे अध्यक्ष साजीद बेग, उपविभागीय अधिकारी भागवत डोईफोडे, अधिक्षक अभियंता वासुदेव खाडे, श्री.जाधव, कार्यकारी अभियंता सुरेश पाठक, सुनील शेरेकर, रुपेश फरकाडे, श्री. तगलपल्लेवार, तहसिलदार नरेंद्र दुबे, प्रतिष्ठीत नागरिक भरत राठोड, बाळासाहेब शिंदे, डॉ. चव्हाण, नाना पाटील, तसेच परिसरातील नागरिक मोठ्या संख्येने उपस्थित होते. उपस्थितांचे आभार अधिक्षक अभियंता वंदन मेंढे यांनी मानले. सूत्र संचालन जयंत वाघमारे यांनी केले.

ठाण्यात कॉन्स्टेबलची आत्महत्त्या
ठाणे – रेल्वे पोलिस ठाण्यातील महिला कॉन्स्टेबलने पोलिस ठाण्यातच पिस्तुलाने स्वत:वर गोळी झाड़ून आत्महत्त्या केल्याची घटना रविवारी घडली.
महिला कॉन्स्टेबल वैशाली पिंगट यांनी सकाळी साडेआठच्या सुमारास पिस्तुलाने स्वत:वर गोळी झाड़ून आत्महत्त्या केल्याची माहिती पोलिसांनी दिली. आत्महत्त्येपूर्वी त्यांनी लिहिलेली चिठ्ठी पोलिसांनी ताब्यात घेतली आहे. मात्र आत्महत्येचे कारण अद्याप समजलेले नाही. याप्रकरणी पुढील तपास चालू आहे.

कूपनलिकेत पडलेल्या चिमुरडय़ाची सुटका
अहमदनगर : ‘देव तारी, त्याला कोण मारी’ या म्हणीचा प्रत्यय श्रीरामपूर तालुक्यातील नागरिकांना आला.. येथील खैरी निमगाव शिवारातील एका कूपनलिकेमध्ये अडकलेल्या चिमुरडय़ाला सुखरूपणे बाहेर काढण्यात स्थानिक प्रशासनाला यश आले आहे. येथील पटारे यांच्या वस्तीवर ऊस तोडणी कामगार काम करत असताना विलास निकम या ऊस तोडणी कामगाराचा १८ महिन्यांचा चिमुकला शेजारीच शेतात असलेल्या
एका कूपनलिकेमध्ये पडला होता. या मुलाचा ३ वर्षाचा भाऊ बरोबर खेळत होता. त्याने आपला भाऊ खड्डय़ात पडल्याचे पाहून त्याने आईवडिलांना सांगितले. यानंतर तातडीनं या ठिकाणी मदत कार्य सुरू झाले.
दीडशे फूट खोल असलेल्या या कूपनलिकेमध्ये हा मुलगा तीस फुटांवर अडकला होता. गावकरी आणि स्थानिक प्रशासनाने तातडीने या ठिकाणी मदकार्य सुरू केले. मुलाला ऑक्सिजनचा पुरवठाही करण्यात आला. तीन डोझरच्या सहाय्याने मुलाची सुटका करण्याचे प्रयत्न सुरू होते. अखेर रात्री उशिरा या चिमुकल्याला सुखरूप बाहेर काढण्यात यश आले. सध्या त्याला प्राथमिक उपचारासाठी रुग्णालयात दाखल करण्यात आले आहे.