मुंबई, दि. १३ – राजकारणात प्रवेश करताना व निवडणूक लढवताना प्रत्येक जण जनतेचा सेवक असतो. पण सेवकाचा पुढे सम्राट कसा होतो हे जनतेने बघितले आहे असे सांगत शिवसेना पक्षप्रमुख उद्धव ठाकरे यांनी भाजपावर कटाक्ष टाकला आहे.
दिल्ली विधानसभा निवडणुकीत भाजपाचा दारुण पराभव झाल्याने शिवसेनेच्या गोटात काहीसे आनंदाचे वातावरण असून राज्यातील मंत्रिमंडळात शिवसेना व भाजपा नेत्यांमध्ये पुन्हा संघर्ष सुरु झाला आहे. शिवसेना पक्षप्रमुख उद्धव ठाकरे यांनी शुक्रवारी सामनाच्या अग्रलेखात भाजपावर टीका केली. नरेंद्र मोदी हे स्वतःला प्रधान सेवक म्हणवून घेतात, आता केजरीवाल स्वतःचे काय बारसे करुन घेतात हे बघायला हवे असे उद्धव ठाकरे यांनी म्हटले आहे. राजकारणात येताना व निवडणूक लढवताना प्रत्येक जण ‘सेवक’ असतो पण त्यानंतर तो सम्राट कसा होतो हे जनतेने बघितले आहे. त्यामुळे केजरीवाल दिल्लीत काय काम करतात याकडे लक्ष लागले आहे असा चिमटाही त्यांनी काढला.
ओबामा दिल्लीत आले तेव्हा नरेंद्र मोदींनी ३० – ३५ लाख रुपयांचा कोट घातल्याची चर्चा होती. आता अरविंद केजरीवाल यांचा मफलरही ब्रँडेड होऊ नये असा टोला ठाकरे यांनी लगावला आहे. विशेष म्हणजे उद्धव ठाकरेंनी पश्चिम बंगालचे माजी मुख्यमंत्री ज्योती बसू, बुद्धदेव भट्टाचार्य आणि विद्यमान मुख्यमंत्री ममता बॅनर्जी यांचे साध्या राहणीमानासाठी कौतुक केले आहे. समाज अनुकरणवादी असून प्रत्येक ‘हिरो’ने जपून पाऊल टाकावे, सेवक तर सर्वच जण असून सेवकपणाचा अतिरेक करु नका. जनता हीच जनार्दन असून जनता पाठिशी आहे या अहंकारातून सर्वांनीच बाहेर पडावे असा उपदेशाचा डोसही उद्धव ठाकरेंनी भाजपा नेतृत्वाला पाजला आहे.

यवतमाळ, दि. १२ – मुलाला का मारले याबाबत जाब विचारण्यासाठी गेलेल्या व्यक्तीचा खून करणाºया हातोला येथील चार आरोपींना जन्मठेपेची शिक्षा ठोठावली. दारव्हा येथील जिल्हा व सत्र न्यायाधिश संजय देशमुख यांनी आज गुरुवारी हा निकाल दिला.
संतोश बहिरट, पंडीत बहिरट, रवी बहिरट, शिवाजी बहिरट सर्व रा. हातोला अशी शिक्षा झालेल्या आरोपींची नावे आहे. नोव्हेंबर २०११ मध्ये हातोला येथील मृतक विठ्ठल पंडीत खामकर यांचा मुलगा आशिष खामकर यास आरोपी संतोष, पंडीत याने मारहाण केली होती. याचा जाब विचारण्यासाठी मृतक विठ्ठल खामकर गेले होते. यावेळी संतोष, पंडीत, रवी व शिवाजी या चौघांनीही चाकुने भोसकुन विठ्ठल याचा खून केला होता. याप्रकरणी दारव्हा पोलिसांनी आरोपीविरूद्घ भादंवि कलम ३०२ अंतर्गत गुन्हा दाखल केला केला. त्यानंतर आरोपींना अटक करून प्रकरण न्यायप्रविष्ठ केले. येथील जिल्हा व सत्र न्यायाधिश संजय देशमुख यांच्या न्यायालयात या प्रकरणाची सुनावणी पार पडली. सरकारी पक्षाच्या वतीने एकुण ११ साक्षीदार तपासले. यामध्ये आरोप सिद्घ झाल्याने चारही आरोपींना जन्मठेप व प्रत्येकी १० हजार रुपये दंड ठोठावला. दंडाची रक्कम मृतकाची पत्नी सुनीता खामकर यांना देण्याचे आदेश दिले. तर सुभाष राठोड यास खोटी साक्ष दिल्याच्या कारणावरून नोटीस काढण्यात आली आहे. सरकारी पक्षाच्या वतीने अ‍ॅड. अविनाश शेटे यांनी काम पाहिले.

महागांव, दि. १२ – प्रवाशी घेऊन जाणारा आॅटो गतिरोधकावर उलटल्याने चालक ठार झाल्याची घटना आज गुरूवारी सकाळी ७ वाजता खडका फाटयावर घडली.
प्रमोद प्रकाश गायकवाड (२२) रा. खडका असे मृतकाचे नाव आहे. तो अ‍ॅटो चालवुन आपल्या कुटुंबाचा उदर निर्वाह करत होता. नेहमी प्रमाणे आज सकाळी ७ वाजता आॅटो घेवुन खडका फाट्यावर जात होता. अशातच पुसद-माहुर रस्त्यावर शेतामध्ये पाणी सोडण्यासाठी नाली खोदण्यात आली. नाली बुजविण्यात आल्यानंतर तेथे गतिरोध प्रमाणे रस्ता झाल्याने अ‍ॅटो उलटला. यामध्ये जखमी झालेल्या गायकवाड यांना पुसद येथील रुग्णालयात दाखल केले. मात्र उपचारा दरम्यान मृत्यू झाला. याप्रकरणी पोलिसात तक्रार दिली.

हैदराबाद, दि. १२ – स्वाइन फ्लू या संसर्ग आजारामुळे हैदराबादमध्ये एकाच दिवशी सहा जणांचा मृत्यू झाल्याची घटना समोर आली आहे. अधूनमधून जाणवणा-या स्वाइन फ्लूने देशभरात चांगलेच डोके वर काढले असून मुंबई, पुणे, गुजरात, राजस्थान आणि हैदराबादमधील अनेकांना स्वाइन फ्लूची लागण झाल्याने मृत्यू ओढावल्याच्या घटना समोर आल्या आहेत. गुरुवारचा दिवस ख-या अर्थाने स्वाइन फ्लू डे ठरला. गुरुवारी हैदराबादमध्ये सहा जणांचा मृत्यू झाला. हैदराबादमध्ये वर्षभरात स्वाइन फ्लूने बळी जाण्याची संख्या ५९ वर पोहाचली आहे. हैदराबादमधील गांधी हॉस्पिटलमध्ये चार जणांचा तर दोन जणांचा पालिका रुग्णालयात मृत्यू झाल्याची माहिती प्रशासनाकडून देण्यात आली आहे. दरम्यान, आज दुपारी जोधपूरमध्ये एका ७० वर्षीय स्वित्झर्लंड महिला पर्यटकाचा स्वाइन फ्लूची लागण झाल्याने मृत्यू झाला.
देशाच्या अनेक भागात स्वाइन फ्लूने डोके वर काढले असून मुंबईत एकाच दिवशी ३ जणांचा मृत्यू झाल्याचे सांगण्यात येत असून महाराष्ट्रात आत्तापर्यंत १०० जणांचा बळी गेला आहे. राजस्थानच्या ३३ जिल्हयात याची लागण झाली आहे. १४०४ लोकांना तपासणी केल्यानंतर लागण झाल्याचे निष्पन्न झाले. १ जानेवारीपर्यंत ११७ जणांचा बळी गेल्याची माहिती प्रशासनाकडून देण्यात आली. जयपूरमध्ये २१, अजमेर १९, बारमार ११, नागौर ०९, जोधपूर ०८, चितौडगड ०७, बानसवारा ०६, कोटा ०५, बिकानेर आणि टोंक प्रत्येकी ०४, सिकार आणि भिलवाडा प्रत्येकी ०३, डौसा, झूनझूनू, पाली, बुंदी आणि उदयपूर प्रत्येकी २, तर भारतपूर, चुरु, जैसलमेर, श्रीगंगांर, हनुमानगड, डुंगरपूर आणि अल्वर येथे प्रत्येकी एकचा बळी गेल्याचे आकडेवारीवरुन स्पष्ट झाले आहे.

यवतमाळ, दि. १० – यवतमाळ वनवृत्तातील वनक्षेत्रातील बिबट असूरक्षित असल्याचे गेल्या काही घटनांवरून स्पष्ट झाले आहे. दारव्हा वनपरीक्षेत्रात एकाच महिन्यात दोन मृतावस्थेत आढळल्याची घटना ताजीच असताना, आज मंगळवारी बोरजई शिवारात बिबटला विष पाजून मारण्यात आल्याची घटना उघडकीस आल्याने वनविभागाची लक्तरे वेशीवर टांगल्या गेली आहे. मारोती अ‍ैईसकर , गणेश खडके असे अटकेतील आरोपींची नावे आहे.
वनसंपदनेने नटलेल्या जिल्हा जंगलाने व्यापलेला आहे. त्यामुळेच यवतमाळ, पुसद व पांढरकवडा अशा तीन वनवृत्ताची विभागणी करण्यात आली आहे. यवतमाळ वनवृत्तातील आठ वनपरीक्षेत्रापैकी, यवतमाळ, हिवरी, दारव्हा या रेंजमधिल राखीव वनात सागवान झाडे मोठ्या प्रमाणात आहे. सागवान वृक्षांसोबतच वन्यप्राण्यांचे देखील वनात वास्तव असून, बिबटची संख्या देखील लक्षनिय आहे. त्यामुळे या वनपरीक्षेत्रावर तस्करांचा नेहमीच डोळा असतो. यवतमाळ वनपरिक्षेत्रात मध्यतंरी बिबट मृत्यूची तीन घटना घडल्या होत्या. बिबटच्या मृत्यूचे गुढ वनविभाग उकलण्यात अपयशी ठरले असताना, गेल्या महिन्याभरात दारव्हा वनपरीक्षेत्रात बिबट मृत्यूची मालिका सुरू आहे. दोन बिबट मृत्यूची चौकशी सुरू असताना, आज मंगळवारी चाणी बिटमधिल बोरजई शिवारात बिबट मृतावस्थेत पडून असल्याची वनविभागाला माहिती मिळाली. महिन्याभरात बिबट मृत्यूची घटना घडल्याने उपवनसंरक्षक प्रमोदचंद लाकरा यांनी घटनास्थळी भेट दिली. उपविभागीय वनअधिकारी राहुल गवई, वनपरीक्षेत्र अधिकारी नाल्हे व क्षेत्रसाहाय्यक धोत्रे यांच्या चौकशी दरम्यान बिबटला विष पाजून मारण्यात आल्याची माहिती पुढे आली. यामध्ये मारोती अ‍ैईसकर , गणेश खडके या दोघांना अटक करण्यात आली आहे. मात्र यापूर्वी दोन घटनेतील बिबट मृत्यूचे गुढ वनअधिकाºयांनी उकलले नसून, वनविभागाच्या दुर्लक्षितपणामुळे बिबटच्या सुरक्षितेतचा प्रश्न ऐरणीवर आला आहे.

यवतमाळ, दि. १० – गेल्या चार दिवसापासून बेपत्ता असलेल्या इसमाचा मृतदेह काल सोमवारी कोपरी शिवारातील पुलाखाली अर्धवट जळालेल्या अवस्थेत आढळल्याने खळबळ उडाली होती. जादूटोण्याच्या कारणावरून हा खून झाला असल्याचे पोलीस तपासात समोर आले असून, आज मंगळवारी दोन आरोपींना अटक करण्यात आली आहे. नितीन धुर्वे रा. सावंगी पेटका, पवन एबंडवार रा. अंतरगाव असे अटकेतील आरोपींची नावे आहे.
राळेगाव तालुक्यातील सावंगी पेरका येथील गणेश मेश्राम गेल्या काही दिवसापासून बेपत्ता होता. याबाबत त्याच्या भावाने ६ फेब्रुवारीला भाऊ बेपत्ता असल्याबाबतची तक्रार पोलीस स्टेशनला नोंदविली होती. पोलीस व कुटूंबियाकडून गणेशचा शोध घेण्यात येत असताना, दरम्यान काल ९ फे बु्रवारीला कोपरी शिवारातील पुलाखाली मृतदेह काही लोकांना आढळून आला. याबाबतची माहिती पोलिसांना मिळाल्यानंतर त्यांनी घटनास्थळ गाठून मृतदेह ताब्यात घेतला. चौकशी दरम्यान मृतदेह गणेशचाच असल्याची ओळख पटली. गणेशच्या खूनाचे रहस्य उलगडण्याचे मोठे आव्हाण पोलिसांपुढे असताना, आज स्थानिक गुन्हे शाखेला गणेशचा खून जादूटोण्याच्या कारणातून झाल्याची माहिती मिळाली. हा धागा धरत पोलिसांनी तपासाची चक्रे फिरवित नितीन धुर्वे, पवन एबंडवार याला अटक केली आहे. गळा आवळून खून केल्यानंतर पूरावा नष्ट करण्याच्या उद्देशाने मृतदेह जाळून पुलाखाली फेकल्याची कबूली आरोपींनी दिली. हि कारवाई जिल्हा पोलीस अधिक्षक संजय दराडे यांच्या मार्गदर्शनाखाली स्थानिक गुन्हे शाखेचे संजय पुजलवार, सुगत पुंडगे, संजय दुगवे, सचिन दुंगे, साजिद शेख, आशिष चौबे, योगेश डगवार, सतीश गजभिये आदींनी केली.

नवी दिल्ली – विधानसभा निवडणुकीत भरघोस यश मिळवत आम आदमी पक्षाचे अरविंद केजरीवाल पुन्हा एकदा दिल्लीच्या तख्तावर बसण्यास सज्ज झाले आहेत.
वर्षभरापूर्वी दिल्लीकरांची माफी मागत अरविंद केजरीवाल यांनी मुख्यमंत्रिपदाचा राजीनामा दिला होता. त्यानंतर वर्षभरानंतर केजरीवाल पुन्हा दिल्लीत सरकार स्थापन करणार आहेत. १४ फेब्रुवारीला रामलीला मैदानात शपथविधी सोहळा होणार असून यावेळी अरविंद केजरीवाल मुख्यमंत्रिपदाची शपथ घेतील.
‘१४ फेब्रुवारीला रामलीला मैदानात अरविंद केजरीवाल मुख्यमंत्रिपदाची शपथ घेतील’ असे ‘आप’चे नेते आशुतोष यांनी सांगितले. या निवडणुकीत केजरीवाल यांनी नवी दिल्ली मतदारसंघातून भाजपाच्या नुपूर शर्मा यांचा तब्बल ३१ हजार ५८३ मतांनी पराभव केला.
२०१३ मध्ये झालेल्या विधानसभा निवडणुकीत ‘आप’ने काँग्रेसच्या पाठिंब्याच्या जोरावर दिल्लीत सत्ता स्थापन केली होती. २८ डिसेंबर रोजी रामलीला मैदानात केजरीवाल यांनी दिल्लीचे सातवे मुख्यमंत्री म्हणून शपथ घेतली होती. त्यानंतर ४९ दिवसांचे सरकार चालवल्यानंतर जनलोकपाल विधेयकाच्या मुद्याचे भांडवल करुन केजरीवाल सरकारने राजीनामा दिला होता.

राळेगणसिद्धी- दिल्ली विधानसभा निवडणुकीत स्पष्ट बहुमत मिळवणा-या आम आदमी पक्ष आणि नेते अरविंद केजरीवाल यांचे ज्येष्ठ समाजसेवक अण्णा हजारेंनी अभिनंदन केले. तसेच पंतप्रधान नरेंद्र मोदींवरही त्यांनी यावेळी टीका केली.
दिल्लीत भाजपाला मिळालेले हे अपयश हा तर पंतप्रधान मोदींचा पराभव आहे. मोदींनी दिल्लीतील नागरिकांची विश्वासार्हत गमावली. ते भ्रष्टाचार रोखण्यात अपयशी ठरले, असे हजारे यांनी यावेळी सांगितले.
दिल्ली निवडणुकीत आप ६०हून अधिक जागांवर आघाडीवर असल्याने आपला स्पष्ट बहुमत मिळाल्याचे चित्र आहे. दिल्लीत मिळालेल्या अभूतपूर्व यशाबद्दल केजरीवालांचे अभिनंदन. मात्र मुख्यमंत्री असो वा नसो, त्यांनी केलेले आंदोलन विसरता कामा नये. भ्रष्टाचारविरोधी चळवळीमुळेच केजरीवालांना नागरिकांचा विश्वास संपादन कऱण्यात यश मिळाले आहे. त्यामुळे यापूर्वी केलेली चूक केजरीवाल यांनी पुन्हा करु नये, असे अण्णा म्हणाले.