यवतमाळ , दि. १५ – भरधाव बसच्या गिअरबॉक्समध्ये बिघाड निर्माण झाल्याने झालेल्या अपघातात ३५ प्रवाशी जखमी झाल्याची घटना आज दुपारी ४.३० वाजता दरम्यान अर्जुना घाट परिसरात घडली. यात रुद्रेश प्रवीण शिंदे, ज्योती प्रवीण शिंदे रा. आर्णी, लक्ष्मण तानबा गोल्हर, तुकाराम सोमला जाधव, शशिकला गोल्हर, जान्हवी गोल्हर, मंदा राजू गायधने रा. लोणी, अंबादास तळपदे, मंगेश डवले रा. पहापळ, प्रमोद खत्रे, वंदना खरतडे रा. आष्टी, लता तिडके रा. मांगलादेवी यांच्यासह अन्य प्रवाशी जखमी झाले.
मोर्शी-माहूर बस क्रमांक एम.एच. ४०/ एन ८९६७ आर्णीकडे जात होती. दरम्यान अर्जुनाघाट परिसरात बसच्या गिअरबॉक्समध्ये बिघाड झाला. यामुळे बसचालकाचे वाहनावरील नियंत्रण सुटले व ही बस दहा फूट खड्यात कोसळली. यामुळे बसमधील ३५ प्रवाशी जखमी झाले. जखमींना तत्काळ उपचारासाठी कै. वसंतराव नाईक शासकीय वैद्यकीय महाविद्यालयात दाखल करण्यात आले. याप्रकरणी ग्रामीण पोलीस ठाण्यात चालकाविरुद्घ गुन्हा नोंद करण्यात आला आहे.

अॅडलेड- विश्वचषकातील सलामीच्या सामन्यात भारताने परंपरागत प्रतिस्पर्धी पाकिस्तानवर ७६ धावांनी सहज विजय मिळवला. सलग सहाव्यांदा भारताने पाकिस्तानला विश्वचषकात धूळ चारली. विश्वचषकात पाकिस्तानविरुद्ध आतापर्यंत झालेल्या पाच लढतीत भारताने बाजी मारली होती. धोनी ब्रिगेडने विश्वचषकातील हा इतिहास कायम राखला.
गेल्या काही दिवसांपासून भारतीय संघाच्या कामगिरीबाबत सर्वच स्तरातून चिंता व्यक्त केली जात होती. फलंदाजी ही भारताची जमेची बाजू. मात्र त्यातही गेल्या काही सामन्यांमध्ये सातत्य दिसून येत नव्हते. अशा परिस्थितीत पाकिस्तानला हरवणे तितकेसे सोपे नव्हते. मात्र धोनी आणि सहका-यांनी ही किमया साधली.
शतकवीर विराट कोहली, शिखर धवन आणि सुरेश रैना या त्रिकुटाने दमदार फलंदाजीचे प्रदर्शन करत भारताला तीनशे धावांचा टप्पा गाठून दिला. विराट कोहलीचे शतक सामन्यातील मोठे वैशिष्ट्य ठरले. विश्वचषकात पाकिस्तानविरुद्ध शतक झळकावणारा विराट हा पहिला भारतीय फलंदाज ठरला. यासोबतच त्याने एकदिवसीय कारकिर्दीतील २२ वे शतक पूर्ण केले. त्याने १२६ चेंडूत आठ चौकांराच्या मदतीने १०५ धावा केल्या. त्याला उत्तम साथ लाभली ती शिखर धवन आणि सुरेश रैनाची. त्यांच्या जोरावर भारताने पाकिस्तानसमोर ३०१ धावांचे आव्हान ठेवले. मात्र पाकिस्तानला हे आव्हान पेलवले नाही आणि त्यांचा डाव २२४ धावांत संपुष्टात आला. पाकिस्तानचा कर्णधार मिसबा उल-हकने ७६ धावा करत पाकिस्तानला विजयाच्या दिशेने नेण्याचा प्रयत्न केला. मात्र त्याचे हे प्रयत्न अपुरे पडले आणि पाकिस्तानचा ७६ धावांनी पराभव झाला. मोहोम्मद शामीने पाकिस्तानच्या चार फलंदाजांना तंबूत धाडत भारताच्या विजयात मोलाचा वाटा उचलला.
कर्णधार महेंद्रसिंग धोनीने नाणेफेक जिंकत प्रथम फलंदाजीचा निर्णय घेतला आणि भारतीय फलंदाजांनी तो निर्णय सार्थ ठरविला. सराव सामन्यात बांगलादेशविरुद्ध सरस कामगिरी करणारा रोहित शर्मा या सामन्यात चमक दाखवू शकला नाही. तो १५ धावांवर बाद झाला. त्यानंतर विराट आणि धवनने खेळपट्टीवर जम बसवत धावांची टांकसाळ उघडली. शिखरने सलामीला फलंदाजी करत ७३ धावांची खेळी केली. त्याने विराटसह १२९ धावांची भागीदारी केली. शिखर बाद झाल्यानंतर विराटने रैनासोबत तिस-या विकेटसाठी ११० धावांची भागीदारी साकारली. ४५ व्या षटकात विराट बाद झाला. त्यानंतर लगेचच रैनाही बाद झाला. हे दोघेही बाद झाल्यानंतर भारताचा डाव एकदम कोसळला. अखेरच्या पाच षटकात भारताने केवळ २७ धावा करत पाच गडी गमावले. पाकिस्तानच्या सोहेलने ५५ धावांत सर्वाधिक पाच बळी घेतले.

पालकमंत्री संजय राठोड यांच्या हस्ते शुभारंभ
यवतमाळ – बंजारा समाजाचे जगतगुरू संत सेवालाल महाराज यांची २७६ वी जयंती आज रविवारी शहरात उत्साहात साजरी झाली. येथील बंजारा टिचर्स असोशिएशन व समाजबांधवांनी स्थानिक आर्णी मार्गावरील राजीवनगरमधून काढलेल्या शोभायात्रेस व मोटाससायकल रॅलीस जिल्ह्याचे पालकमंत्री संजय राठोड यांनी हिरवी झेंडी दाखवून उद्घाटन केले. यावेळी राजुदास जाधव, प्रा. पी.पी. पवार, शेखर राठोड, महेश राठोड, देवीदास राठोड, डी.एस.चव्हाण, प्रा. राजेश चव्हाण, शंकर आडे, ए.के. राठोड आदी उपस्थित होते.
आर्णी मार्गावरून निघालेल्या या शोभायात्रेत समाजबांधवांसोबत पालकमंत्री संजय राठोड हे स्वत: सहभागी झाले होते. ही रॅली जिल्हा परिषदेजवळ पोहोचल्यानंतर येथे असलेल्या माजी मुख्यमंत्री कै. वसंतराव नाईक यांच्या पुतळ्यास ना. संजय राठोड यांच्यासह समाजबांधवांनी माल्यार्पण करून अभिवादन केले. शोभायात्रेदरम्यान मार्गात असलेल्या सर्व महामानवांच्या पुतळ्यांस व प्रतिमेस माल्यार्पण करून अभिवादन करण्याचा नवीन पायंडा संत सेवालाल महाराजांच्या जयंतीनिमित्त बंजारा समाजबांधवांनी पाडला. शोभायात्रेत स्त्री भ्रुण हत्या, शेतकरी आत्महत्या, व्यसनमुक्ती आदी विषयांवरील देखाव्यासंह बंजारा वेशभूषेतील चिमुरडे लक्षवेधी ठरले. जयंती उत्सवानिमित्त राजीव नगरमध्ये दिवसभर विविध कार्यक्रमांसह सायंकाळी महाप्रसादाचे आयोजनही करण्यात आले. संत सेवालाल जयंती उत्सवात शेकडो बंजारा समाजबांधव सहभागी झाले होते.

युवा साहित्य संमेलनाचे थाटात उद््घाटन
वर्धा – जीवनातील वेदना आणि सुंदरता कळली तर दज्रेदार साहित्याची निर्मिती होऊ शकते. त्याकरिता अंत:करणातून वाचन करावे लागते, असे प्रतिपादन बिर्‍हाडकार अशोक पवार यांनी केले.
यशवंतराव दाते स्मृती संस्था आणि विदर्भ साहित्य संघ यांच्या संयुक्त विद्यमाने दोनदिवसीय युवा राज्यस्तरीय साहित्य संमेलनाचे आयोजन अनेकांत स्वाध्याय मंदिरात करण्यात आले आहे. या संमेलनाच्या अध्यक्षस्थानावरून अशोक पवार बोलत होते. संमेलनाचे उद््घाटन संजय भास्कर जोशी यांच्या हस्ते करण्यात आले. व्यासपीठावर आ. डॉ. पंकज भोयर, विदर्भ साहित्य संघाचे कार्याध्यक्ष वामन तेलंग, डॉ. रवींद्र शोभणे, सरचिटणीस शोभा उबगडे, शाखाध्यक्ष व संमेलनाचे संयोजक संजय इंगळे तिगावकर, यशवंतराव दाते स्मृती संस्थेचे अध्यक्ष प्रदीप दाते, कार्यवाह राजेंद्र मुंढे, सरकार्यवाह डॉ. स्मिता वानखेडे यांची उपस्थिती होती.
बिर्‍हाडकार अशोक पवार म्हणाले, १९९५ साली परभणीतील अखिल भारतीय मराठी संमेलनातून माझ्या लेखनाची बीजे रोवली गेली. कसदार लेखक होण्यासाठी वैयक्तिक पातळीवर त्याची किंमत मोजावी लागते. अपार मेहनत आणि परिश्रम तसेच वाचनाच्या माध्यमातून कसदार साहित्याची निर्मिती करता येते. त्यासाठी प्रत्येकाने वाचन केले पाहिजे. उपेक्षित साहित्यानेच मराठी साहित्य समृद्ध केले आहे. भारतात कृषी साहित्य पहिल्यांदा प्रेमचंद यांनी लिहिले. महात्मा फुले यांनी शेतकर्‍यांचा आसूड लिहिले. परंतु वर्तमानात कृषी साहित्याचे लेखन अनुभवातून होत नसून ते शहरात बसून होत असल्याची खंत त्यांनी व्यक्त केली.
जात, धर्म, पंथाच्या बाहेर जाऊन लेखकाने तटस्थपणे लिखान व विचार केल्यास, वेदनेची जाणीव ठेवून सुंदरतेचा संगम घातल्यास निश्‍चितच अस्सल साहित्याची निर्मिती होते, असा विश्‍वास अशोक पवार यांनी व्यक्त केला. प्रत्येक तरुणाने अभ्यासपूर्ण वाचन करावे, असा सल्ला देऊन समाजातील वास्तव चित्र त्यांनी मांडले.
संमेलनाचे उद्घाटक संजय भास्कर जोशी यांनी नेहमीप्रमाणे आपल्या भाषणाची सुरुवात ‘ताल’ने केली. त्यांनी संमेलनात तबल्याचा दादरा ताल यावर विश्लेषण करीत प्रत्येकाने उत्सव, अनुभव, अभ्यास, तटस्थ लेखन, उत्तम वाचन आणि दाद देणे हे सहा ताल नेहमीच लक्षात ठेवल्यास महान साहित्यकृती निर्माण होते, असे सांगून संमेलनाचे उद््घाटन झाल्याचे जाहीर केले. प्रास्ताविक रवींद्र शोभने व प्रदीप दाते यांनी केले. संचालन शुभदा फडणवीस यांनी केले. आभार संजय इंगळे तिगावकर यांनी मानले. संमेलनात प्रसिद्ध लेखक भालचंद्र नेमाडे यांचे ज्ञानपीठ पुरस्कार मिळाल्याबद्दल अभिनंदन करण्यात आले. प्रारंभी स्वामी विवेकानंद यांच्या प्रतिमेला सूतमाला अर्पण करून दीपप्रज्वलनाने संमेलनाची सुरुवात करण्यात आली. आयोजकांच्या वतीने मान्यवरांचे रोपटे, स्मृतिचिन्ह, शाल व श्रीफळ देऊन स्वागत करण्यात आले.? वर्धा – राज्यस्तरीय युवा साहित्य संमेलनात बोलताना संमेलनाध्यक्ष बिर्‍हाडकार अशोक पवार. व्यासपीठावर उद्घाटक संजय भास्कर जोशी, आ. डॉ. पंकज भोयर, प्रदीप दाते, संजय इंगळे तिगावकर व इतर मान्यवर. बाजूच्या छायाचित्रात दीपप्रज्वलन करताना संजय भास्कर जोशी.

मारेगाव (यवतमाळ), दि. १४ – शाब्दीक वाद झाल्याने रागाच्या भरात काठीने मारहाण करून इसमाचा खून करण्यात आला. ही घटना मारेगाव तालुक्यातील देवाळा येथे आज दुपारी १ वाजता दरम्यान घडली. दिलीप जैतू येडमे (४०) असे मृताचे नाव आहे. याप्रकरणी गोपाळा रामचंद्र बोकडे (५०) यास अटक करण्यात आली.
दिलीप व गोपाळा यांच्यात शाब्दीक वाद निर्माण झाला. त्यामुळे रागाच्या भरात दिलीपच्या डोक्यावर काठीने प्रहार केला. डोक्याला गंभीर इजा झाल्याने घटनास्थळीच दिलीपचा मृत्यू झाला. या घटनेमुळे देवाळात एकच खळबळ उडाली. नागरिकांनी गोपाळा यास दोराने बांधून ठेवले. तसेच घटनेची माहिती मारेगाव पोलिसांना देण्यात आली. पोलीस निरीक्षक उमेश पाटील, सहाय्यक पोलीस निरीक्षक दत्तात्रय मदने, मंगेश भोयर, श्री. एफ. पाटील, जमादार भांदीकर, चव्हाण, आडे, राठोड , मोहाडे यांनी घटनास्थळ गाठले. आरोपीविरुद्ध गुन्हा दाखल करून गोपाळा यास अटक करण्यात आली. मृतकाच्या पश्चात पत्नी, मुलगा, मुलगी व बराच मोठा आप्त परिवार आहे.

बारामती, दि. १४ – शरद पवार आणि मी वेगवेगळी विचारधारा असलेल्या पक्षात असलो तरी देशाचा विकास हेच आमचे ध्येय आहे असे विधान पंतप्रधान नरेंद्र मोदी यांनी बारामतीमध्ये केले आहे. शरद पवार आणि माझ्यात महिन्यातून दोन ते तीन वेळा चर्चा होत असते असे मोदींनी उघड केले आहे.
पंतप्रधान नरेंद्र मोदी शनिवारी राष्ट्रवादी काँग्रेसचे अध्यक्ष शरद पवार यांच्या बारामती दौ-यावर आले आहेत. शरद पवारांच्या कृषी शाळेतील एका कार्यक्रमात नरेंद्र मोदी उपस्थित होते. विधानसभा निवडणुकीत बारामतीतील सभेत शरद पवारांवर तिखट शब्दात हल्लाबोल करणा-या नरेंद्र मोदींनी आज शरद पवारांचे कौतुक केले. शरद पवार केंद्रात कृषीमंत्री असताना मी त्यांच्याकडून गुजरात कृषी विकासाविषयी माहिती घ्यायचो, आमच्या कामात काही त्रुटी आहेत हे मी त्यांच्याकडून जाणून घ्यायचो असे मोदींनी सांगितले. मी गुजरातचा मुख्यमंत्री असताना केंद्र सरकारमध्ये माझी मदत करणारे शरद पवार हे एकमेव मंत्री होते अशी आठवणही त्यांनी याप्रसंगी सांगितली. शरद पवारांकडून खुप काही शिकण्यासारखे आहे असेही त्यांनी सांगितले. वादसंवादातूनच लोकशाही पुढे सरकते, पण दुर्दैवाने दोन विभिन्न पक्षाचे दिग्गज नेते एकत्र आले की ती बातमी ठरते असा टोलाही त्यांनी प्रसारमाध्यमांना लगावला. बारामतीत गती व मती असल्यानेच या शहराचा विकास झाला असे मोदींनी नमूद केले. साखर निर्याती आणि अॅंग्रो टेक्नोलॉजीवर भर देण्याची गरज असून ठिंबक सिंचन सारख्या पद्धतीद्वारे शेतीमध्ये पाण्याची नासाडी टाळून शेतीचा विकासही करता येईल असे मोदींनी स्पष्ट केले. तर राजकारण फक्त दोन दिवसांपुरते करायला हवे, उर्वरित ३६३ दिवस देशाच्या विकासाकडे बघायला हवे असे शरद पवार यांनी सांगितले.

नवी दिल्ली – दिल्ली विधानसभा निवडणुकीत घवघवीत यश मिळवणा-या आम आदमी पक्षाचे संयोजक अरविंद केजरीवाल शनिवारी ऐतिहासिक रामलीला मैदानावर दुस-यांदा मुख्यमंत्रीपदाची शपथ घेणार आहेत.
जनलोकपाल विधेयकाच्या मुद्यावरुन अरविंद केजरीवाल यांनी मुख्यमंत्रीपदाचा राजीनामा दिल्यानंतर बरोबर वर्षभराने केजरीवाल पुन्हा मुख्यमंत्रीपदाची शपथ घेणार आहेत. अरविंद केजरीवाल यांच्याबरोबर आणखी सहा जण मंत्रीपदाची शपथ घेतील.
वित्त, ऊर्जा ही महत्वाची खाती केजरीवाल आपल्याकडे ठेवतील अशी शक्यता आहे. केजरीवाल यांचे विश्वासू मनीष सिसोदीया उपमुख्यमंत्रीपदाची शपथ घेऊ शकतात. सार्वजनिक बांधकाम खाते, शहर विकास आणि शिक्षण ही महत्वाची खाती सिसोदीयांकडे येण्याची शक्यता आहे.
जितेंद्र सिंह तोमर – कायदा
संदीप कुमार – महिला आणि बाल कल्याण
मनीष सिसोदीया – सार्वजनिक बांधकाम खाते, शहर विकास आणि शिक्षण
सत्येंद्र जैन – आरोग्य आणि उद्योग
असीम अहमद खान – अन्न
गोपाळ राय – वाहतूक आणि कामगार

जोधपूर, दि. १३ – एका अल्पवयीन मुलीवर बलात्कार केल्याच्या आरोपाखाली अटकेत असलेल्या आसाराम बापूच्या एका भक्ताने साक्षीदारावर चाकूने हल्ला केल्याची घटना शुक्रवारी जोधपूरमध्ये घडली. या हल्यात साक्षीदार जखमी झाला असून त्याच्यावर रुग्णालयात उपचार करण्यात येत आहे.
बलात्कार प्रकरणाचा तपास सध्या जोधपूर कोर्टात सुरू आहे. शुक्रवारी सुनावणीनंतर राहुल के सच्चान हा साक्षीदार कोर्टाच्या बाहेर पडताच सत्यनरीन या तरुणाने हातातील चाकूने सच्चान याच्यावर हल्ला चढवला. सच्चान यांच्या पाठीत दोनदा चाकूने वार केल्याने सच्चान जखमी झाला. पोलिसांनी तात्काळ सच्चानला सरकारी हॉस्पिटलमध्ये दाखल केल्याची माहिती पोलीस उपआयुक्त (कायदा आणि व्यवस्था )कैलाश संधू यांनी दिली. आपल्यावर हल्ला करणारा हा आसाराम यांच्या आश्रमातील मदतनीस असल्याचे राहुल सच्चान यांनी सांगितले. हल्ला करणा-या व्यक्तीला पोलिसांनी ताब्यात घेतले असून त्याची चौकशी करण्यात येत असल्याचे संधू यांनी सांगितले. दरम्यान, अल्पवयीन मुलीवर बलात्कार केल्याच्या आरोपावरुन आसाराम यांना सप्टेंबर २०१३ साली अटक करण्यात आली असून त्यानंतर जोधपूरच्या सेंट्रल जेलमध्ये रवानगी करण्यात आली आहे.

अटक टाळण्यासाठी मागीतली लाच
महागांव, दि. १३ – विवाहीतेचा छळ करणाºया सहा आरोपींची अटक टाळण्यासाठी लाच ९ हजार रुपये लाच स्विकारणाºया जमादाराला आज रंगेहात पकडले. यवतमाळ येथील लाचलुचपत प्रतिबंधक विभागाच्या पथकाने आज ही कारवाई केली.
जमादार विष्णू सखाराम कोरडे (४५), वसंता रामजी घोडेकर (५८) अशी लाचखोरांची नावे आहे. गजानन उत्तम राठोड रा. पिपरी इजारा याच्या भावाचे लग्न टाकळी येथील एका मुली सोबत एक वर्षापुर्वी झाले होते. काही दिवस संसार सुखात सुरू होता. दरम्यान शुल्लक कारणावरूण पती-पत्नीमध्ये भांडण होत होते. त्यानंतर सासरच्या सहा जणांनी शारीरीक व मानसिक छळही सुरु केला होता. याप्रकरणी महागाव पोलिसांनी गुन्हे दाखल केले होते. याप्रकरणी गजानन राठोड यांचे आई-वडील, भाऊ, पत्नी यांना गुन्हयामध्ये लॉकअप मध्ये टाकत नाही, हातकडी लावुन न्यायालयात नेत नाही, जमानत करूण देतो या कामासाठी मुडाणा बिटचे जमादार विष्णू कोरडे यांनी तक्रारदार गजानन राठोड यांच्याकडे ९ हजार रुपये लाचेची मागणी केली होती. ठरल्याप्रमाणे आज शुक्रवारी जनता हाऊस जवळील रोहीदास टी सेंटर येथे वसंता घोडेकर यांच्या मार्फत रक्कम स्विकारली. यावेळी लाचलुचपत प्रतिबंधक विभागाच्या पथकाने सापळा रचुन जमादारसह पैसे स्विकारणाºया इसमास रंगेहात अटक केली. ही कारवाई उपअधीक्षक सतिश देशमुख व पथकाने केली.

यवतमाळ दि.13 : गेल्या खरीप हंगामात चांगले पर्जन्यमान न झाल्याने जिल्ह्यावर दुष्काळाचे संकट ओढवले. जिल्ह्याची उत्पादन क्षमता घसरली. पर्यायाने शेतकऱ्यांना मोठ्या प्रमाणवर नुकसान सोसावे लागले. शासनाने दुष्काळात सापडलेल्या शेतकऱ्यांना मदत देण्याची घोषणा केली होती. त्याप्रमाणे जिल्ह्यातील 2 लाख 24 हजार शेतकऱ्यांना या मदतीचे वितरण करण्यात आले आहे. जिल्ह्याला पहिल्या टप्यात दि. 8 जानेवारी रोजी मदत वितरीत करण्यासाठी 122 कोटी 80 लक्ष रुपये प्राप्त झाले होते. गेल्या काही दिवसांपासून सदर निधींचे वाटप मोठ्या प्रमाणवर सुरु आहे. दुसऱ्या टप्यात जिल्ह्याला नुकतेच 121 कोटी 61 लाख रुपये प्राप्त झाले आहे. दोन्ही टप्पे मिळून जिल्ह्यास एकूण 244 कोटी 41 लाख रुपये प्राप्त झाले असून आतापर्यंत यातील 120 कोटी रुपये 2 लाख 24 हजार शेतकऱ्यांना वितरीत करण्यात आले आहे.
जिल्ह्यात एकूण 4 लाख 47 हजार इतके शेतकरी दुष्काळी मदतीस पात्र असून त्यांना मदत वितरीत करण्यासाठी 625 कोटी रुपयांची आवश्यकता आहे. त्यापैकी बहुतांश निधी प्राप्त झाला असून त्याचे वाटप शेतकऱ्यांचा बँक खात्यात रक्कम जमा करुन सुरु आहे. आतापर्यंत यवतमाळ तालुक्यातील 14052 शेतकऱ्यांना 8 कोटी, कळंब 12178 शेतकऱ्यांना 6 कोटी 75 लाख, बाभुळगाव 10932 शेतकऱ्यांना 5 कोटी 91 लाख, आर्णी 12974 शेतकऱ्यांना 7 केाटी 80 लाख, दारव्हा 15278 शेतकऱ्यांना 9 कोटी 6 लाख, नेर 13552 शेतकऱ्यांना 7 कोटी 60 लाख, दिग्रस 10972 शेतकऱ्यांना 5 कोटी 98 लाख, पुसद 18443 शेतकऱ्यांना 9 कोटी 51 लाख रुपयांची मदत वितरीत करण्यात आली आहे. उमरखेड तालुक्यतील 15363 शेतकऱ्यांना 7 कोटी 17 लाख, महागाव 13658 शेतकऱ्यांना 6 कोटी 98 लाख, राळेगाव 15265 शेतकऱ्यांना 8 कोटी 34 लाख, घाटंजी 16042 शेतकऱ्यांना 8 कोटी 43 लाख, केळापूर 162777 शेतकऱ्यांना 6 कोटी 82 लाख, झरीजामणी 9280 शेतकऱ्यांना 5 कोटी 84 लाख, वणी 17720 शेतकऱ्यांना 9 कोटी 27 लाख तर मारेगाव तालुक्यातील 12234 शेतकऱ्यांना 6 कोटी 10 लाख याप्रमाणे 2 लाख 24 हजार शेतकऱ्यांना 120 कोटी रुपयांच्या मदतीचे वितरण करण्यात आले आहे.