नवी दिल्ली – दिल्ली विधानसभा निवडणुकीच्या मतदानासाठी आता अवघे काही तास शिल्लक आहेत. गेल्या अनेक दिवसांपासून राजधानी दिल्लीत राजकीय वातावरण तापलेले आहे. सगळ्यांच पक्षांकडूनच आरोपप्रत्यारोपांच्या फैरी झाडल्या जात आहे. पक्षांमध्ये जोरदार शाब्दिक द्वंद सुरु आहे. गेल्या अनेक दिवसांपासून धडाडणा-या या प्रचाराच्या तोफा आज थंडावणार आहे.
निवडणुकीसाठी प्रचाराचा आजचा शेवटचा दिवस आहे. प्रचाराच्या अखेरच्या दिवशी सर्वच पक्षांतील मोठे नेते जोरदार प्रचार करत आहेत. भाजपाचे राष्ट्रीय अध्यक्ष अमित शहा यांची जेजे कॉलनी येथे प्रचारसभा होणार आहे तर आम आदमी पक्षाचे प्रमुख अरविंद केजरीवाल मदनापूर खादर आणि सदार बझार येथे सभा घेणार आहेत. तर काँग्रेसचे उपाध्यक्ष राहुल गांधी यांचा रोडशोही होणार आहे.
२०१३ मध्ये ४९ दिवसांचे सरकार चालवल्यानंतर आम आदमी पक्ष पुन्हा एकदा विधानसभा निवडणुकीसाठी सज्ज झाला आहे. तर लोकसभा आणि विविध राज्यांतील विधानसभा निवडणुकीत भरघोस यश मिळवणारा भाजपा विधानसभा जिंकण्याच्या दृष्टीने तयारीत आहे. दिल्लीची सत्ता पुन्हा काबीज करण्यासाठी काँग्रेसनेही जोरदार तयारी केली आहे.
येत्या सात फेब्रुवारीला विधानसभेसाठी मतदान होत आहे. तर १० फेब्रुवारीला मतमोजणी होणार आहे.

कोल्हापूर – कोल्हापूरच्या लाचखोर महापौर तृप्ती माळवी यांना गुरुवारी लाचलुचपत प्रतिबंधक विभागाकडून अटक कऱण्यात आली.रुग्णालयातून डिस्चार्ज मिळाल्यानंतर एसीबीने त्यांना अटक केली.
३० जानेवारी रोजी माळवी यांना १६ हजार रुपयांची लाच मागितल्याच्या आरोपावरुन लाचलुचपत प्रतिबंधक विभागाने ताब्यात घेतले होते. शिवाजी पेठेत राहणा-या संतोष पाटील यांची जमीन महापालिकेने ताब्यात घेतली होती. या जागेचा ताबा पुन्हा मिळवण्यासाठी संबंधित कागदपत्रावर महापौरांची स्वाक्षरी आवश्यक होती.
या कागदपत्रावर स्वाक्षरी करण्यासाठी माळवी यांनी स्वीय सहायकअश्विन गडकरी यांच्या मार्फत चाळीस हजारांची लाच मागितली. अखेर संतोष पाटील सोळा हजार रुपये देण्यास तयार झाले.या प्रकरणी पाटील यांनी लाचलुचपत प्रतिबंधक विभागाकडे तक्रार दाखल केली असता विभागाने सापळा रचून माळवी आणि त्यांचे पीए अश्विन गडकरी यांना ताब्यात घेतले होते.
त्यानंतर दुस-याच दिवशी प्रकृतीच्या कारणास्तव माळवी यांना रुग्णालयात दाखल कऱण्यात आले होते. आज रुग्णालयातून डिस्चार्ज देण्यात आल्यानंतर एसीबीने त्यांना अटक केली.

तैपेई– ५३ प्रवाशांना घेऊन जाणारे ट्रान्स एशियाचे प्रवासी विमान बुधवारी सकाळी तैवानची राजधानी तैपेईमधील कीलुंग नदीत कोसळले. या अपघातात २२ जण ठार झाल्याची माहिती तैवानच्या प्रसार माध्यमांनी दिली आहे. तर १५ प्रवासी जखमी झाले आहेत. या अपघातात अद्याप २१ प्रवासी बेपत्ता आहेत.

तैपेईच्या संघसन विमानतळावरुन ट्रान्स एशियाचे एटीआर ७२ हे विमान किनमेन बेटाच्या दिशेने निघाले होते. यावेळी विमान पुलाला धडकले आणि कीलुंग नदीत कोसळले. या दुर्घटनेतील १५ लोकांना आतापर्यंत सुरक्षितरित्या बाहेर काढण्यात आले आहे. मात्र इतर २१ प्रवासी तसेच क्रू मेंबर्सबाबत कोणतीही माहिती उपलब्ध होऊ शकलेली नाही, अशी माहिती तैवानच्या सेंट्रल न्यूज एजेन्सीने दिली आहे. दरम्यान, घटनास्थळी बचाव पथक दाखल झाले असून बचावकार्य वेगाने सुरु आहे.

महिन्याभरापूर्वी तैवानच्या ट्रान्स एशिया एटीआर ७२ या विमानालाच अपघात झाला होता. यामध्ये ४८ जण ठार झाले होते तर १० जण जखमी झाले होते.

दिग्रस , दि. ३  – भरधाव बस बाभळीच्या झाडावर आदळल्याने झालेल्या अपघातात ११ प्रवासी जखमी झाल्याची घटना २ फेब्रुवारीच्या रात्री ११.३० वाजता दरम्यान हरसूल फाट्यानजीक घडली.
लातूर डेपोची बस एम.एच २०/ बिएल २९५३ नागपूरकडून परळीकडे जात असतांना दिग्रस तालुक्यातील हरसुल फाट्याजवळ अपघात झाला.प्रत्यक्षदर्शींनी दिलेल्या माहितीनुसार नागमोडी वळण असल्याने चालकाचे वाहनावरील नियंत्रण सुटले. त्यामुळे हा अपघात झाला. बसमधील ११ प्रवाशी जखमी झाले त्यापैकी तिघांची प्रकृती गंभीर असल्याने त्यांना उपचारासाठी जिल्हा रुग्णालयात दाखल करण्यात आले. जखमींमध्ये सोमसिंग उमला पवार रा. सिंगद (४५), युनुस महमद गोंडील रा.दिग्रस (५५), विजय अंबादास इंगळे रा.पुसद, अ.रहेमान शे.इब्राहीम दिग्रस चाँदनगर (५५), सूरज सोपानराव दराडे रा. परळी वैजनाथ (३२), गणेश अविनाश तंवर रा.हिवळणी (३०), अमर देवराव वरारकर रा.पालम (३८), कोमल प्रताप चव्हाण रा.कळसा (४५), सुधाकर श्रीराम कांबळे रा.धुंदी उमरखेड (५४), राजेश क्रिष्णा राठोड रा.धुंदी (४३), उदल स्वरूपचंद पडवाळ रा. सेवानगर (४५) यांचा समावेश आहे. जखमींना उपचाराकरीता दिग्रस ग्रामिण रूग्णालय येथे उपचारासाठी आणण्यात आले होते प्रकृती चिंताजनक असल्याने प्राथमिक उपचार करून डॉक्टरांनी त्यांची जिल्हा रूग्णालयात रवानगी केली. या प्रकरणी दिग्रस पोलीसांनी चालकाविरुद्ध गुन्हा नोंद केला आहे.

तीन दिवसीय यवतमाळ ग्रंथोत्सवाचा समारोप
यवतमाळ, दि.3 : मराठी भाषेच्या माध्यमातून मराठी साहित्य दुरपर्यंत पोहोचले आहे. हे साहित्य   संस्कृतीचे दर्शन घडविण्यासोबतच मानवाच्या मेंदुची भुख भागविण्याचे काम करीत असल्याचे प्रतिपादन आ.मदन येरावार यांनी केले.
नगर भवन येथे आयोजित तीन दिवसीय यवतमाळ ग्रंथोत्सवाच्या समारोप कार्यक्रमाप्रसंगी ते बोलत होते. कार्यक्रमास प्रमुख पाहुणे म्हणून आर्णी येथील जेष्ठ साहित्यिक कवी प्रा.कलीम खान, जेष्ठ वऱ्हाडी कवी शंकर बडे, शिक्षणाधिकारी चिंतामण वंजारी, प्रा.डॉ.आशा देशमुख, कवी योगानंद टेंभुर्णे, जिल्हा माहिती अधिकारी मंगेश वरकड, जिल्हा ग्रंथपाल नितीन सोनोने उपस्थित होते. वाचनाशिवाय पर्याय नाही. त्यामुळे वाचकांना वाचनाची सवय लावण्यासोबतच त्यांना चांगले आणि दर्जेदार ग्रंथ उपलब्ध करून देणे आवश्यक आहे. त्यासाठी ग्रंथ महोत्सवासारखे कार्यक्रम उपयोगी ठरणार आहे. ग्रंथ माणसाची दृष्टी व्यापक करते. मानवी मेंदुची भुख भागविण्यासोबतच ग्रंथ गुरुची भुमिका निभावत असते. त्यामुळे प्रत्येकाने ग्रंथ वाचनाची सवय लावावी, असे आ.येरावार यांनी सांगितले. यावेळी आपले मनोगत व्यक्त करतांना प्रा.कलीम खान यांनी ग्रंथ माणसाच्या जिवनातील आवश्यक बाब असल्याचे सांगितले. पुर्वी इलेक्ट्रानिक प्रसिध्दी माध्यमांचा भडीमार झाल्याने वर्तमानपत्र बंद होतील, अशी भाकीते केली जात होती. उलट वर्तमानपत्रे वाढीस लागली. त्याचप्रमाणे संगणकाच्या युगात कोणतीही माहिती तातडीने उपलब्ध होवू शकत असली तरी पुस्तकांचेही महत्व कधीही कमी होणारे नाही, असे कलीम खान म्हणाले. यावेळी शिक्षणाधिकारी वंजारी व कवी योगानंद टेंभुर्णे यांच्यासह अन्य मान्यवरांचीही भाषणे झाली. कार्यक्रमास कवी, साहित्यिक, लेखक, विद्यार्थी, शिक्षक मोठ्या संख्येने उपस्थित होते.

नवी दिल्ली दि. ३ –  पेट्रोल आणि डिझेलचे दर आणखी कमी झाले आहेत. पेट्रोल प्रतिलिटर २.४२ रुपये आणि डिझेल २.२५ रुपयांनी स्वस्त झालं आहे. आज मध्यरात्रीपासून नवे दर लागू होतील. पेट्रोल, डिझेलचे दर कमी झाल्याचा फायदा सत्ताधारी भाजपला दिल्ली विधानसभा निवडणुकीत होऊ शकतो, असं बोललं जातंय.
आंतरराष्ट्रीय बाजारात कच्च्या तेलाचे दर प्रति बॅरल ४५ अमेरिकी डॉलरने घसरलेत. त्यामुळे पेट्रोल आणि डिझेलच्या दरात आणखी कपात होईल, असा अंदाज आधीच लावण्यात आला होता. गेल्या जूनपासून आंतरराष्ट्रीय बाजारात कच्च्या तेलाच्या दरात घसरण सुरूच आहे.

मुंबई दि. ३ – तुम्ही ‘मिनरल वॉटर’ पीत असाल तर सावधान! कारण जे पाणी तुम्ही ‘आरोग्यवर्धक’ समजता, त्याच पाण्यामुळे तुम्हाला कॅन्सर होऊ शकतो, अशी धक्कादायक माहिती ‘भाभा रिसर्च सेंटर’ने नुकत्याच केलेल्या संशोधनातून समोर आली आहे.
परिणामी हे पाणी ‘पाणी न ठरता विष’ ठरणार असल्याने या पाण्यावर बंदी आणावी, अशी मागणी मुंबई महापालिकेतील नगरसेवकांनी केली आहे. मुंबईकरांसह सर्वानाच आता या पाण्याची सवय लागल्याने १० ते १५ रुपये अशा चढय़ा दरात हे पाणी विकले जात आहे. हे पाणी बाटलीबंद करून विकले जात असल्याने या पाण्यात प्लास्टिकमधील ब्रोनेट, क्लोराइड इत्यादी रसायनांचा अंश असतो.
या रसायनांमुळे कॅन्सरसारखा आजार उद्भवू शकतो. याशिवाय किडनीवरही विपरीत परिणाम होण्याची शक्यता ‘भाभा रिसर्च सेंटर’ने केलेल्या संशोधनातून समोर आली आहे. त्यामुळे या पाण्यावर बंदी आणावी, अशी मागणी काँग्रेसचे नगरसेवक परमिंदर भमरा यांनी ठरावाच्या सूचनेद्वारे केली आहे.
दरम्यान, बाटलीबंद पाणी प्यायल्यानंतर या बाटल्या कुठेही फेकल्या जातात. प्लास्टिक नष्ट होत नसल्यामुळे घातक कचरा तयार होतो. प्लास्टिकच्या बाटल्या नष्ट होण्यास ७०० वर्षापेक्षाही अधिक काळ लागत असल्याचेही ‘भाभा रिसर्च सेंटर’च्या संशोधन अहवालात नमूद करण्यात आले आहे.
त्यामुळे बाटलीबंद पाण्याच्या विक्रीवर मुंबईत कडक निर्बंध घालावेत, अशी मागणी परमिंदर भमरा यांनी ठरावाच्या सूचनेद्वारे महापौरांकडे केली आहे. याबाबत राज्य सरकारकडूनही योग्य ती कार्यवाही व्हावी, यासाठी महापालिकेच्या वतीने प्रयत्न केला जावा, असे त्यांनी म्हटले आहे.
बाटलीबंद पाणी महिलांसाठी अतिशय घातक!
बाटलीबंद पाणी महिलांसाठी सर्वाधिक धोकादायक आहे. गर्भाशयाजवळ होणारी फायब्रॉईडची गाठ अशाच पाण्याच्या सेवनामुळे होत असल्याचे स्त्रीरोगतज्ज्ञांचे मत आहे. ८० ते ९० टक्के महिला फायब्रॉईडच्या गाठीमुळे त्रस्त असल्याचे त्यांचे म्हणणे आहे.

नेर, दि. २ – बसस्थानकावरील प्रवाशांचे पॉकीट उडविणाºया घटनांमध्ये वाढ झाली आहे. येथील बसस्थानकावर चोरी करण्याच्या बेतात असलेल्या पाकीटमार टोळीतील पाच महिलांना नागरिकांनी पकडून पोलिसांच्या स्वाधिन केले.
पद्मा राहुल हांडे (४०), सुनीता सुनील लोंडे (३०), सुनीता कन्ना नाडे (४०), चंदा प्रविण हातागडे (२३), शिला अनील हातागडे (२२) सर्व रा. झोपडपट्टी नागपूर अशी आरोपी महिलांची नावे आहे. नेरसह यवतमाळ येथील बस्थानकावर गर्दीचा फायदा घेऊ न प्रवाशी महिलेचे पर्समधून दागिणे व रोख लंपास केल्याच्या घटना घडल्या आहे. तसेच पुरुषांच्या खिशातील पॉकीट उडविले आहे. दोन दिवसापूर्वी यवतमाळ येथून नेर येथे बसमध्ये प्रवास करणाºया प्रतिभा गणेश जयसिंगपूर (३०) या महिलेचे १० ग्रॅम सोने व पाचशे रुपये रोख उडविले होते. याप्रकरणी यवतमाळ येथील वडगाव रोड पोलिसांनी गुन्हा दाखल केला आहे. दरम्यान आज जयसिंगपूरे ही महिला बसस्थानावर गेल्या होत्या. अशातच बसमध्ये लक्ष ठेऊन असलेल्या काही महिला दिसताच त्याच्यावर लक्ष ठेवले. त्यानंतर त्या चोरी करण्याच्या प्रयत्नात असतानाच पाचही महिला चोरट्यास पकडून पोलिसांच्या स्वाधिन केले. त्यानंतर नेर पोलिसांनी पाचही महिला आरोपींना वडगाव रोड पोलिसांना पाचारण करून त्याच्या ताब्यात दिले. या महिलांकडून आणखी चोरीचे गुन्हे उघडकीस येण्याची शक्यता पोलिसांनी वर्तविली आहे.

दिग्रस,दि. २ (किशोर कांबळे ) – खेळण्याबागळण्याच्या दिवसात आईने दुसरे लग्न केल्यानंतर आपल्या मुलाला सोबत घेऊन जाते. आईसोबतच मुलाचे नावही तेथे बदलविण्यात येते. तब्बल ३९ वर्ष झाल्यानंतर त्याला एक दिवस आपल्या खºया वडीलाचे नाव माहित झाले. त्यानंतर आपल्या नावासमोर वडीलांचे नाव लागावे म्हणून दिवाणी न्यायालयात प्रकरण दाखल केले. न्यायालयाने सदर व्यक्तीला त्याच्या खºया वडीलाचे नाव द्यावे असा निर्वाळा दिल्याने अखेर मुरलीचा ‘विकास’ होऊन त्याला ४० वर्षाने वडीलाचे नाव मिळाले. मुरलीधर थावरा पवार रा. सेवानगर या इसमाला आता वडील नरसिंग चव्हाण यांचे नाव मिळाले.
मुरलीधरची आई कौसल्याबाई या महिलेचे दोन विवाह झाले होते. पहिल्या पतीचे नाव नरसिंग मोहनसिंग चव्हाण तर थावरा पवार असे दुसºया पतीचे नाव आहे. या महिलेचे थावरा पवार याच्यासोबत वास्तव्य करीत आहे. मुरलीधर हा एक वर्षाचा असताना त्याच्या आईने दुसरे लग्न करून त्यालाही सोबत नेले होते. दरम्यान शाळेत नाव टाकतांना मुरलीधरचे वडील म्हणून थावरा पवार यांच्या नावाची नोंद करण्यात आली. दरम्यान १४ जानेवारी २०१४ रोजी तिळसंक्रांतीच्या दिवशी क्षुल्लक कारणावरून वाद झाल्याने थावरा याने तू माझा मुलगा नसल्याचे मुरलीधरला म्हटले. त्यावर मग माझा बाप कोण या बाबतच विचारणा केली असता नरसिंग मोहनसिंग चव्हाण रा. रोहडा ता. पुसद हा असल्याचे सांगितले. त्यावरून मुरलीधर पवार याने दिग्रस येथील दिवाणी न्यायालयात प्रकरण दाखल करून माझे खरे वडील नरसिंग चव्हाण यांचे नाव देण्यात यावे अशी मागणी केली. दिवाणी न्यायाधिश (कनिष्ट स्तर) एन.के. वाळके यांच्या न्यायालयात याप्रकरणातील दोन्ही पक्षाची बाजू ऐकूण घेतली. यामध्ये मुरलीधर हा नरसिंग चव्हाण व कौसल्याबाई यांचा मुलगा असून त्याचे जन्मनाव विकास असल्याचे उघड झाले. त्यावरून न्यायालयाने मुरलीधर याचे नाव विकास नरसिंग चव्हाण असल्याचे जाहिर केले. या निकालाने मुरलीधर (विकास) याला ४० वर्षानंतर खºया वडीलाचे नाव मिळाले आहे. मुरलीधरच्या बाजूने अ‍ॅड. गिरीष दळवी यांनी काम पाहिले. (साभार दै. पुण्य नगरी)

नवी दिल्ली – दिल्ली विधानसभा निवडणूक अवघ्या पाच दिवसांवर आली असताना, दिल्ली भाजपामधील अंतर्गत नाराजी पुन्हा एकदा समोर आली आहे. दिल्लीच्या भाजपाच्या मुख्यमंत्रीपदाच्या उमेदवार किरण बेदी यांच्या कारभाराला कंटाळून त्यांचे प्रचार प्रमुख नरेंद्र टंडन यांनी सर्व पदांचा राजीनामा दिला.
किरण बेदी यांच्या हुकूमशाही प्रवृत्तीशी आपण जुळवून घेऊ शकत नाही. बेदी आणि त्यांचे सहकारी आपला अपमान करतात. त्यामुळे त्यांच्यासोबत काम करणे कठिण आहे असे नरेंद्र टंडन यांनी भाजपा अध्यक्ष अमित शहा यांना पाठवलेल्या पत्रात म्हटले आहे.
नरेंद्र टंडन हे अनिल जैन यांच्या अध्यक्षतेखालील प्रचारसमितीमध्ये होते. बेदी यांच्या पक्षप्रवेशानंतर त्यांच्या प्रचाराच्या व्यवस्थापनाची अतिरिक्त जबाबदारी टंडन यांच्याकडे सोपवण्यात आली होती असे भाजपामधील सूत्रांनी सांगितले.
टंडन यांच्या राजीनाम्याचा पक्षाच्या निवडणूक तयारीवर कुठलाही परिणाम होणार नाही तसेच त्यांची कामगिरी फारशी प्रभावी नव्हती अशी सारवासारव भाजपाने केली आहे. मात्र या घटनेने पुन्हा एकदा भाजपामधील अंतर्गत अस्वस्थता समोर आली आहे. किरण बेदी यांच्या भाजपा प्रवेशानंतर चार दिवसातच त्यांना मुख्यमंत्रीपदाचे उमेदवार बनवल्याने भाजपामध्ये आधीपासूनच नाराजी आहे.