यवतमाळ :  येथून वर्धेकडे जाणाºया दाम्पत्याची दुचाकी अडवून चाकुच्या धाकावर एक लाख २५ हजाराचे दागिन्यासह रोख रक्कम लुटल्याची घटना आज जवाहर नगरजवळ घडली. अमोल मोहन पांडे (३२) रा. सेवाग्राम वर्धा हे पत्नी व मुलीला घेऊन बलवंत मंगल कार्यालयात लग्नसमारंभासाठी आले होते. लग्न समारंभ आटोपून ते दुचाकीने वर्धेकडे जात होते. अशातच जवाहर नगरजवळ तोंडाला कापड बांधून आलेल्या तीन जणांनी पांडे यांना हात दाखवून दुचाकी थांबविली. त्यानंतर चाकुचा धाक दाखवून पांडेच्या पत्नीच्या गळ््यातील सोन्याचे दागिने अंगठी असे ४५ ग्रॅम सोने व १ हजार २०० रुपये रोख असा एकुण एक लाख २५ हजाराचा मुद्देमाल घेऊन पोबारा केला. पांडे यांनी शहर पोलीस ठाणे गाठून याबाबतची तक्रार नोंदविली. याप्रकरणी पोलिसांनी तीन्ही चोरट्याविरूद्घ भादंवि कलम ३९२, ३४ अंतर्गत गुन्हा दाखल केला असून तपास सुरु आहे.

पांढरकवडा (यवतमाळ) : पाटणबोरी येथील बसस्थानकावर आज पहाटे पिंपरी बोरी येथील एका इसमाचा मृतदेह आढळल्याने खळबळ उडाली आहे. विश्वनाथ शामराव कदम (४५, रा. पिंपरी बोरी ) असे मृतकाचे नाव आहे. मुळ नांदेड जिल्ह्यातील हिमायतनगर येथील तो रहिवासी असून पोटाची खळगी भरण्यासाठी चार वर्षापासून पिंपरी येथे आला होता. अशातच काही वर्षापूर्वी त्याने बाजीराव बाबाची दिक्षा घेतली व सत्संगामध्ये सहभाग घेत असल्याचे गावकºयांनी सांगितले. १८ फेबु्रवारी रोजी नंदिग्राम एक्सप्रेसने हिमायत नगरवरून पिंपरी येथे जाण्याकरीता पाटणबोरी बसस्थानकावर थांबला होता. दरम्यानान आज बुधवारी पहाटे त्याचा मृतदेह आढळल्याने खळबळ उडाली आहे. हृदयविकाराचा झटका, थंडीने कुडकुडून, आत्महत्या किंवा घातपाताने त्याचा मृत्यू झाला या दिशेने पोलिस तपास करीत आहे. या घटनेची माहिती मिळताच पोलिसांनी घटनास्थळ गाठून पंचनामा करून मृतदेह शवविच्छेदनासाठी पाठविला. मृतकाच्या मागे पत्नी, मुलगा दशरथ, मुलगी वर्षा व बराच मोठा आप्त परिवार आहे.

मिरपूर : तुम्ही जर क्रिकेटप्रेमी असाल, तर २ मार्च या तारखेवर आत्ताच फुल्ली मारून ठेवा… कारण, या दिवशी आशिया कप स्पर्धेत भारत – पाकिस्तान यांच्यात घमासान युद्ध रंगणार आहे. मिरपूरच्या मैदानावर हा महासंग्राम होणार आहे.
भारत आणि पाकिस्तान या पारंपरिक प्रतिस्पर्ध्यांचा सामना म्हणजे क्रिकेटप्रेमींसाठी पर्वणीच असते. परंतु, तणावपूर्ण राजकीय संबंधांमुळे या दोन संघांमधील तुंबळ युद्ध हल्ली फारसं बघायला मिळत नाही. त्यामुळे जेव्हा-जेव्हा ही संधी येते, तेव्हा तिचं सोनं करण्याचा प्रत्येक क्रिकेटप्रेमी कसोशीनं प्रयत्न करतो. आता, येत्या २ मार्चला हा योग जुळून येणार आहे. गेल्या वर्षी डिसेंबर-जानेवारी महिन्यात भारत-पाकिस्तानमध्ये तीन सामन्यांची वनडे मालिका झाली होती. त्यात पाकिस्ताननं टीम इंडियाला २-१ नं पराभूत केलं होतं. त्यानंतर, वर्षभराच्या प्रतीक्षेनं आता हे दोन तुल्यबळ संघ आमने-सामने उभे ठाकणार आहेत. आशिया कप स्पर्धेत २ मार्चला टीम इंडियाचे वीर आणि पाकचं सैन्य विजयासाठी शर्थ करेल.
आशिया कपचं वेळापत्रक
२५ फेब्रुवारी – पाकिस्तान वि. श्रीलंका – फतुल्लाह , २६ फेब्रुवारी – बांगलादेश वि. भारत – फतुल्लाह , २७ फेब्रुवारी – अफगाणिस्तान वि. पाकिस्तान – फतुल्लाह , २८ फेब्रुवारी – भारत वि. श्रीलंका – फतुल्लाह , १ मार्च – बांगलादेश वि. अफगाणिस्तान – फतुल्लाह , २ मार्च – भारत वि. पाकिस्तान – मिरपूर , ३ मार्च – अफगाणिस्तान वि. श्रीलंका – मिरपूर , ४ मार्च – बांगलादेश वि. पाकिस्तान – मिरपूर , ५ मार्च – अफगाणिस्तान वि. भारत – मिरपूर , ६ मार्च – बांगलादेश वि. श्रीलंका – मिरपूर , ८ मार्च – अंतिम सामना – मिरपूर
(सर्व सामने भारतीय प्रमाणवेळेनुसार दुपारी दीड वाजता सुरू होतील.)

ठाणे : पत्नीचे शेजारील तरुणासोबत असणारे अनैतिक संबंध तसेच त्याच्यासोबत पळून गेल्याने नालासोपारा येथे राहणाऱ्या श्रीधर शेट्टी याने आपल्या दोन मुलींची हत्या करुन स्वत: आत्महत्या केल्याची खळबळजनक घटना घडली आहे. पत्नीच्या बाहेरख्यालीपणाला वैतागून पतीने हे धक्कादायक कृत्य केल्याचे तपासात समोर आले आहे.
‘मेरी औरत साथ देती तो मैं ऐसा कदम नहीं उठाता.’ आत्महत्येपूर्वी श्रीधरने घरामधील भिंतीवर असे लिहल्याचे तपासात आढळून आले आहे. श्रीधरची पत्नी त्याला काही दिवसांपूर्वीच सोडून दुसऱ्या युवकासोबत पळून गेल्याने मानसिक तणावाखाली येऊन मुलींची हत्या करुन त्याने आपले स्वत:चे देखील आयुष्य संपवले.श्रीधर शेट्टी (वय, ४२) याची पत्नी सोनाली हि शेजारी राहणाऱ्या तेजस अनूप दोशी याच्यासोबत पळून गेली. मात्र १६ फेब्रुवारीला ती घरी परत आली. त्यानंतर पती-पत्नीमध्ये जोरदार भांडण झालं. ‘माझं तेजसवर प्रेम आहे आणि मी त्याच्यासोबत राहणार आहे.’ असा हट्टच सोनालीने धरला. या भांडणानंतर श्रीधरने आपल्या मुलींना सोडून घरात निघून जाण्यास सोनालीला सांगितलं. त्यानंतर सोनाली तेजससोबत राहू लागली. मात्र या दरम्यान श्रीधर पूर्णपणे खचून गेला. पोलिसांच्या मते, मंगळवारी १८ फेब्रुवारीला सोनाली आणि तेजस पुन्हा कुठेतरी बाहेर निघून गेले. याने श्रीधर जास्तच अस्वस्थ झाला. त्यानंतर रात्री ८ ते ९ च्या दरम्यान त्याने आपल्या दोन्ही मुली श्रद्धा (वय, ९) साहिध्या (वय, ५) यांची उशीने दाबून हत्या केली त्यानंतर त्याने आत्महत्या केली.

खेड- शहरातील महाडनाका परिसरात बांधकाम सुरु असलेली तीन मजली इमारत दुपारी कोसळली. या दुर्घटनेत तीन कामगार ठार झाले आहेत. तर अद्याप काही कामगार ढिगा-याखाली अडकले आहेत.
खेड शहरातील जगबुडी नदीच्या जवळ असलेल्या गुलमोहर पार्कमध्ये तीन मजली इमारतीचे बांधकाम सुरु होते. या इमारतीच्या पहिल्या आणि दुस-या मजल्याचे काम सुरु होते. सोमवारी दुपारी साडेतीनच्या सुमारास इमारतीचे चारही स्लॅब कोसळले. ढिगा-याखाली नऊ कामगार अडकले आहेत. त्यापैकी चार जणांना बाहेर काढण्यात यश आले आहे. त्याच्यावर कळंबणी उपजिल्हा रुग्णालयात उपचार सुरु आहेत. त्यापैकी दोघांची प्रकृती गंभीर आहे. ढिगा-याखाली अडकलेल्यांमध्ये दोन महिलांचा समावेश आहे. या ठिकाणी १५ कामगार काम करत होते. त्यापैकी नऊ जण इमारतीमध्ये होते. तर अन्य इमारतीच्या परिसरात रेती उचलण्याचे काम करत होते. घटनास्थळी पोलिस, नागरीक आणि क्रेनच्या सहाय्याने मदत सुरु आहे

नवी दिल्ली- सार्वत्रिक निवडणुकांच्या पार्श्वभूमीवर केंद्रीय अर्थमंत्री पी. चिदंबरम यांनी सोमवारी संसदेत अंतरिम अर्थसंकल्प सादर केला. युपीए-दोन सरकारच्या कार्यकाळातील हा शेवटचा अर्थसंकल्प आहे. चार महिन्यांसाठी अंतरिम अर्थसंकल्प सादर होत असताना तेलंगण समर्थक व विरोधकांचा गदारोळ सुरू होता. या अर्थसंकल्पात कोणतीही करवाढ झालेली नाही. मात्र अबकारी करात घट केल्याने फ्रीज, टीव्ही, देशी बनावटीचे मोबाईल, छोट्या कार, सुगंधी तेल आणि साबण स्वस्त झाले आहे.

   
यवतमाळ – आपल्या कर्तव्यातून  प्रत्येकाच्या मनात वेगळा ठसा निर्माण करणारे फार थोडे अधिकारी पोलीस दलात आढळून येतात. केलेला निर्धार न बदलता त्यानुसार काम करणे पोलीस दलात मोठे जिकरीचे काम, पण हे अवघड काम वडगाव रोडचे ठाणेदार विपीन हसबनिस यांनी पार पाडले. त्यामुळे आश या कर्तव्यदक्ष, निर्भीड  पोलीस अधिकार्याला निरोप देतांना अधिकारी व कर्मचाºयांनी मने हेलावली होती. यावेळी अधिकारी व कर्मचाºयांनी रथात बसवून वाहन दोरखंडाने ओढून  परिसरातून मिरवणूक काढून निरोप दिला.येथील वडगाव रोडचे ठाणेदार विपीन हसबनिस यांची सोलापूर ग्रामीण येथे बदली झाली. त्यानिमित्य अधिकारी व कर्मचाºयांच्या वतीने सत्कार व निरोप समारंभाचे आयोजन आज सायंकाळी केले होते. या कार्यक्रमाच्या अध्यक्षस्थानी यवतमाळचे उपविभागीय पोलीस अधीकारी राहुल मदणे तर प्रमुख पाहुणे म्हणून नायब तहसीलदार पठाण, नगरसेवक दत्ता कुळकर्णी, सहा. पोलीस निरीक्षक विजय राठोड, संजय शिरभाते उपस्थित होते. यावेळी  ठाणेदार विपीन हसबनीस यांचे  जिल्हा श्रमिक पत्रकार संघाचाचे अध्यक्ष तथा दै. पुण्य नगरीचे संपादकीय विभाग प्रमुख नितीन पखाले यांच्यासह उपस्थित मान्यवरांनी स्वागत गेले. हसबनीस यांनी १७ फेबु्रवारी २०१३ रोजी वडगाव रोड ठाण्याचा पदभार घेतला असून एक वर्ष पूर्ण झाले. हसबनीस यांच्यासारखे अधिकारी अजून काळ राहाला पाहिजे होते. त्याच्यासोबत काम करण्याची स्फुर्ती मिळते. भाऊ – बहिण समजून त्यांनी प्रत्येकाची अडचण समजून घेत, सोडविली. शहरातील सर्वात जास्त गुन्हेगारी टोळ््या असून क्राईमरेटही मोठ्या प्रमाणात आहे. तरीही त्यांनी कायदा व सुव्यवस्थेचा प्रश्न उद्भवू न देता कम्युनिटी पोलिसींगचे कार्य करून जनसामान्यात वेगळी छाप निर्माण केल्याचे मनोगत उपस्थित मान्यवरांनी व्यक्त केले.  यावेळी फुलांनी सजविलेल्या पोलीस वाहनामधून हसबनीस यांची परिसरातून मिरवणूक काढून दोरखंडाने वाहन ओढून नेत निरोप दिला. या कार्यक्रमाचे संचालन पोलीस उपनिरीक्षक नरेश पिंपळकर यांनी केले. यावेळी पोलीस उपनिरीक्षक नरेश रणधिर, पोलीस उपनिरीक्षक मंगला वाकोडे, पोलीस उपनिरीक्षक भारती गुरनुले यांच्यासह सर्व अधिकारी,  कर्मचारी उपस्थित होते.

यवतमाळ – जिल्हा पोलीस दलातील  १४ पोलीस निरीक्षक,११ पोलीस उपनिरीक्षकांच्या  बदल्याची यादी आज गृहविभागाने जाहिर केली. यामध्ये १८ ठाणेदारांचा समावेश असून कमाईचे ठाणे मिळविण्यासाठी पोलिस अधिकाºयाने धडपड सुरु केली आहे. राज्य निवडणूक आयोगाने लोकसभा निवडणूकीची आचार सहिता जाहिर होण्यापूर्वी १५ फेबु्रवारी पर्यंत पोलीस अधिकाºयांच्या बदल्या करण्याचे आदेश दिल्याने ह्या बदल्या करण्यात आल्या.
जिल्हयात २९ पोलीस ठाणे असून  १४ पोलिस निरीक्षक व ११ पोलीस उपनिरीक्षकांच्या बदल्याची यादी आज जाहिर झाली. त्यामध्ये १८ ठाणेदारांचा समोवश असून कंसात बदलीचे ठिकाण नमुद केले आहे. राळेगावचे ठाणेदार पोलीस निरीक्षक मलिकार्जुन इंगळे (चंद्रपूर), कळंबचे बाळु गायगोले (नागपूर ग्रामीण), वडगाव रोडचे बिपीन हसबनीस (सोलापूर ग्रामीण), नेरचे ज्ञानेश्वर कडू (अमरावती शहर), बाभुळगावचे प्रमोद डोंगरे (नागपूर शहर), घाटंजीचे ओमप्रकाश अंबाडकर (बुलढाणा), पुसद ग्रामीणचे वैजनाथ लटपटे (अमरावती शहर), पुसद शहरचे सुरेंद्र गंदम (बिड), मारेगावचे  दत्तात्रय नाळे (सातारा), मुकुटबनचे अनिल किनगे (अमरावती शहर), यवतमाळ ग्रामीणचे दिनकर ठोसरे (एसीबी), पांढरकवड्याचे अनिरुद्घ अढाव (अकोला), डिएसबीचे सुधाकर अंभोरे (चंद्रपुर), दिग्रसचे वाघु खिल्लारे (अकोला), वडगाव जंगलचे दिनेशचंद्र शुक्ला, लाडखेडचे ज्ञानेश्वर घुगे, बिटरगावचे सारंग नवलकर, पारवाचे पंजाब वंजारी (अमरावती परिक्षेत्रांतर्गत) यांचा बदलीमध्ये समावेश आहे. तसेच एटीएस पथकाचे प्रमुख दिलीप वडगाव यांच्यासह पोलीस उपनिरीक्षक  सतीश उपाध्याय, प्रकाश लवंगे, प्रेमप्रकाश माकोडे, सुनील वानखडे, शैलेश शेळके, प्रकाश डांबरे यांच्याही अमरावती परिक्षेत्रांतर्गत बदली झाली. राज्य निवडणूक आयोगाने लोकसभा निवडणूकीची आचार सहिता जाहिर होण्यापूर्वी १५ फेबु्रवारी पर्यंत पोलीस अधिकाºयांच्या बदल्या करण्याचे आदेश दिल्याने गृह विभागाने जिल्ह्यात एकाच ठिकाणी तीन वर्ष कार्यकाळ पूर्ण झालेल्या पोलिस अधिकाºयांच्या बदल्या केल्या. जिल्हयातील बहुतांश पोलीस ठाण्यातील ठाणेदारांच्या बदल्या झाल्या असून ठाणेदार म्हणून नवीन चेहºयांना संधी मिळण्याची संधी आहे. तर दुसरीकडे काही पोलीस अधिकारी कमाईचे पोलीस ठाणे मिळविण्यासाठी राजकीय पक्षाच्या पुढाºयांच्या माध्यमातून प्रयत्न करीत असल्याची चर्चा पोलीस वर्तुळात सुरु आहे.

काठमांडू –  नेपाळमध्ये एका प्रसिद्ध पर्यटन स्थळावरून पर्यटकांना घेऊन येणारे छोटे विमान जंगलात कोसळल्याने विमानातील सर्वजण मरण पावल्याची भीती व्यक्त करण्यात येत आहे. यात १५ प्रवासी आणि ३ क्रू मेंबर्सचा समावेश होता. नेपाळी एअरलाइन्सच्या मालकीचे १९ आसनी ट्विन ओट्टर या विमानाने आज दुपारी १२.४० वाजता पोखरा येथील विमानतळाहून उड्डाण केले होते. परंतु उड्डाणानंतर केवळ १५ मिनिटात हे विमान रडारवरून अदृष्य झाले. अर्घाखांची जिल्ह्यातील खिदीमच्या जंगलात हे विमान कोसळल्याचे सांगण्यात येते. या अपघातात विमानातील सर्व प्रवासी मरण पावले असल्याची भीती व्यक्त करण्यात येत आहे. विमानत १४ नेपाळी नागरिक व एक डॅनिश नागरिकाचा समावेश होता.जंगलातील अपघात स्थळाचा शोध लागला असून बचावकार्य सुरु करण्यात आल्याचे सांगण्यात येते. ढिसाळ सुरक्षा व्यवस्थेच्या कारणावरून गेल्यावर्षी डिसेंबर महिन्यात युरोपियन युनियनने नेपाळमधील सर्व विमान कंपन्यांना काळ्या यादीत टाकले होते.

सोपोर – जम्मू-काश्मीरमधील सोपोरमध्ये रविवारी सकाळी सुरक्षापथके आणि दहशतवाद्यामध्ये चकमक झाली. सुरक्षापथकांनी या दहशतवाद्याला कंठस्नान घातले.
हिजबुल मुजाहिद्दीन संघटनेचा हा दहशतवादी असल्याची माहिती पोलिसांनी दिली. शफी शेख असे या दहशतवाद्याचे नाव असून, तो या भागातील एका घरात लपून बसला होता. ठार झालेला दहशतवादी हिजबुलच्या प्रमुख दहशतवाद्यांपैकी एक होता असे पोलिसांनी सांगितले.पोलिस आणि लष्कराच्या जवानांनी संयुक्तरित्या ही कारवाई केली. सोपोरमधल्या एका गावात हा दहशतवादी आल्याची माहिती मिळाल्यानंतर पोलिसांनी कारवाई केली. या गावात अजूनही एक दहशतवादी असावा असा सुरक्षापथकांचा कयास आहे. या दहशतवाद्याला शोधण्यासाठी शोधमोहिम सुरु आहे.