बिजिंग- गुगल सर्चनंतर आता चीनमध्ये जी-मेलची सेवाही बंद करण्यात आली आहे. अर्थात यावेळी चीनने सरकारी आदेशाद्वारे बंदी न लादता वेगळ्या मार्गाचा अवलंब केला आहे.
चीनमधील जीमेल सेवेचा वापर जवळजवळ शून्य झाला आहे. याचा कारणामुळे सरकारने जीमेल सेवा बंद करण्याचा निर्णय घेतला आहे.
याआधी चीनने २००९मध्ये गुगल सर्च बंद केले होते. त्यानंतर चीनमधूनच जी-मेल हॅक होण्याचे प्रकार केले जात होते. जेनेकरुन इंटरनेट युझर्स जी-मेलचा वापर बंद करुन देशातील अन्य ई-मेलचा वापर करतील.
गेल्या काही महिन्यांपासून चीनमध्ये जी-मेलचा वापर मर्यादीत होता किंवा काही ठिकाणी तर तो पूर्णपणे बंद होता. चीनने आपल्या फायरवॉलचा उपयोग करुन देशातील जी-मेल सेवा जवळ जवळ बंद करुन टाकली आहे. अर्थात चीनने जी-मेल बंद केल्याचा सर्वाधिक त्रास चीमधील विदेशी कंपन्यांना होणार आहे. ज्यांच्याकडून जी-मेलचा सर्वाधिक वापर केला जातो.

मुंबई – भारतातील मोठ्या शहरांमध्ये सध्या विवाहपूर्व शरीरसंबंध ठेवण्याचे प्रमाण वाढत असून लग्नाचे आश्वासन देऊन ठेवलेले शरीरसंबंध म्हणजे बलात्कार ठरत नाही असे मत मुंबई हायकोर्टाने मांडले आहे.
नाशिकमधील वकिल असलेल्या एका प्रेमीयुगुलाचे प्रकरण मुंबई हायकोर्टात आले आहे. यातील तरुणीने तिच्या प्रियकरावर लग्नाचे आमीष दाखवून बलात्कार केल्याचा आरोप केला होता. या तरुणाने मुंबई हायकोर्टात अटकपूर्व जामीनासाठी अर्ज केला होता. ‘१९९९ पासून आमचे प्रेमसंबंध होते. आम्हा दोघांचा धर्म वेगळा असल्याने तिच्याशी लग्न करता आले नाही. मात्र दोघांमध्येही संमतीने शरीरसंबंध निर्माण झाले होते’ असा युक्तीवाद संबंधीत तरुणाने कोर्टासमोर केला होता. दोन्ही बाजूचा युक्तीवाद ऐकल्यावर हायकोर्टाने विवाहपूर्व शरीरसंबंध आणि बलात्काराच्या घटना याविषयी मत मांडले आहे. सध्या प्रेमसंबंधांमध्ये लग्नापूर्वीच शरीरसंबंध ठेवण्याचे प्रमाण लक्षणीयरित्या वाढत आहे. मुंबई, पुणे सारख्या मेट्रो शहरांमध्ये तर यासाठी संमतीच मिळू लागली आहे. शहरातील उच्चशिक्षीत तरुणींनी विवाहपूर्व शरीरसंबंधांचे परिणाम आणि त्यांच्या शारीरिक गरजा लक्षात ठेवणे गरजेचे असल्याचे हायकोर्टाने म्हटले आहे. विवाहपूर्व शरीरसंबंध ठेवण्याचा एखाद्या तरुणीचा निर्णय हा तिच्या संमतीने होता की नाही हे परिस्थितीजन्य पुराव्याच्या आधारे ठरु शकते असे सांगत कोर्टाने उदाहरणही दिले आहे. पहिले लग्न लपवून ग्रामीण भागातील अशिक्षित तरुणीला लग्नाचे आमीष दाखवून तिच्यासोबत शरीरसंबंध ठेवणे हा बलात्कार ठरु शकतो असे हायकोर्टाने स्पष्ट केले. संबंधीत प्रकरणातील तरुणी ही उच्चशिक्षीत असून शरीरसंबंधांसाठी तिचीही संमती असल्याचे प्रथमदर्शनी दिसत असल्याचे स्पष्ट करत हायकोर्टाने संबंधीत तरुणाला जामीन मंजूर केला.

यवतमाळ, दि. २८ – महाराष्ट्र नवनिर्माण सेनेची अवस्था मावळ्याविना सेना अशी झाली आहे. संस्थापक अध्यक्ष राज ठाकरेंच्या निकटवर्तीय नेत्यांच्या एककल्ली कारभारामुळे मनसे हा पक्ष दुभंगत चालला असून, आता जिल्ह्यातही मनसेला प्रचंड मोठे खिंडार पडले आहे. जिल्हा उपाध्यक्ष संजय बोक्से यांच्यासह शेकडो मनसे सैनिकांनी पक्षनेतृत्त्वाच्या कार्यपद्धतीला कंटाळून शुक्रवारी कॉंग्रेसमध्ये प्रवेश घेतला. कॉंग्रेस प्रदेशाध्यक्ष माणिकराव ठाकरे यांच्या निवासस्थानी हा सोहळा पार पडला.
मुंबईसह मोठ्या शहरात रोजगारानिमित्त आलेल्या परप्रांतीयांच्या दबंगखोरी विरोधात राज ठाकरे यांनी बिगुल फुंकला होता. मराठी भाषेच्या अस्मितेचे रक्षण व्हावे म्हणून त्यांनी २००५ मध्ये महाराष्ट्र नवनिर्माण सेनेची स्थापना केली. २००९ च्या विधानसभेत तब्बल १३ आमदार मनसेचे निवडून आलेत. अल्पावधीतच या पक्षाला यश मिळाले असताना राज ठाकरे यांच्या जवळील निकटवर्तीय नेत्यांनी मनमानी करीत पक्षाची प्रतीमा मलीन केली. परिणामी २०१४ च्या नुकत्याच झालेल्या लोकसभा, विधानसभा निवडणुकीत या पक्षाचा जणू सफायाच झाला. जिल्ह्यात या पक्षाच्या पदाधिकारी कार्यकर्त्यांनी प्रचंड मेहनत घेऊन खेडोपाडी पक्षाची पाळेमुळे रूजविली. त्यामध्ये मनसेचे जिल्हा उपाध्यक्ष संजय बोक्से यांनी गावोगावी कार्यकर्त्यांची मोठी फळी निर्माण केली. मात्र पक्षातील नेतृत्वामुळे दिवसेंदिवस पक्षाचा सफाया होत असल्याचे पाहून अखेर त्यांनीही मनेसला रामराम ठोकला. शुक्रवारी कॉंग्रेसचे प्रदेशाध्यक्ष आ. माणिकराव ठाकरे यांचे निवासस्थानी बोक्से यांनी त्यांच्या शेकडो समर्थकांसह कॉंग्रेसमध्ये प्रवेश घेतला. यावेळी कॉंग्रेसचे नेते अरूण राऊत, जि.प. उपाध्यक्ष बाळासाहेब मांगुळकर, जि.प. सदस्य राहुल ठाकरे, रवी ढोक, अनिल गायकवाड आदी उपस्थित होते. बोक्से यांचेसोबत कॉंग्रेसमध्ये प्रवेश घेणाºयांमध्ये जांभोºयोच नितीन बागेकार, वाटखेडचे महेंद्र अगलदरे, खैरगावचे सरपंच गणेश चव्हाण, ईचोरीचे माजी सरपंच विष्णू मुरमुरे, आकपुरीचे शाखा अध्यक्ष योगेश खरात, बारडचे दिलीप फुपरे, बोरीसिंहचे गजानन वायखळे, महादेव नागोसे, शाखा प्रमुख किशोर शेठे, दिलीप चिंतावार, रुईचे योगेश महल्ले, वडगावचे सचिन गुल्हाणे, हिवरीचे अमोल चौधरी, सालोटचे गजानन बोंडे, रोहटेकचे उमेश पेंदोर, उमरसºयाचे अरूण भिसे, साचखेडचे नितीन उईके, हातोल्याचे दिलीप आडे, लाडखेडचे राजेश विरुळकर, शाखाध्यक्ष नीलेश वानखेडे, पाथ्रडदेवीचे उमेश केवदे, धवळसरचे उमरेश रोहनकर, भोसाचे सुरेश वाघमारे, चौधºयाचे अविनाश राठोड, सावरगडचे संजय गोडे, यांचेसह ४०० कार्यकर्त्यांनी कॉंग्रेसमध्ये प्रवेश केला.

मुंबई – काँग्रेस पक्षाचा 129 वा स्थापना दिवस दि. 28 डिसेंबर 2014 रोजी उत्साहात साजरा करण्यात आला.प्रदेश कार्यालय टिळक भवन येथे काँग्रेस स्थापना दिनानिमित्त ध्वजारोहण करण्यात आले. याप्रसंगी महाराष्ट्र प्रदेश काँग्रेस कमिटीचे अध्यक्ष आ.श्री माणिकराव ठाकरे, माजी केंद्रीय मंत्री व माजी मुख्यमंत्री श्री सुशीलकुमार शिंदे, मुंबई विभागीय काँग्रेस कमिटीचे माजी अध्यक्ष श्री कृपाशंकर सिंह, महाराष्ट्र प्रदेश काँग्रेस सेवादलचे प्रदेशाध्यक्ष श्री चंद्रकांत दायमा, माजी मंत्री श्री नसीम खान, डॉ.श्री नितीन राऊत, प्रदेश सरचिटणीस श्री यशवंत हाप्पे, श्री राजेश शर्मा यांच्यासह अनेक पदाधिकारी व कार्यकर्ते उपस्थित होते. कार्यक्रमाला आ.श्री माणिकराव ठाकरे आणि श्री सुशीलकुमार शिंदे यांनी संबोधित केले. याप्रसंगी राष्ट्रीय एकात्मतेची शपथ घेण्यात आली.

नवी दिल्ली – दिल्लीत थंडीचा कडाका अद्यापही कायम असून गेल्या पाच वर्षातील सर्वात कमी तापमानाची नोंद रविवारी दिल्लीत झाली. रविवारी दिल्लीतील तापमानाचा पारा २.६ अंश सेल्सियसपर्यंत घसरला.
कडाक्याच्या थंडीमुळे दिल्लीतील जनजीवन विस्कळीत झाले असून वाहतूकीवरही मोठा परिणाम झाला आहे. दाट धुक्यामुळे ३५५ विमाने तसेच ७० रेल्वे वाहतूकीवर याचा परिणाम झाला.
सकाळी साडेवाजता दिल्लीत २.६ अंश सेल्सियस तापमानाची नोंद झाली. वातावरणात ९७ टक्के आर्द्रता होती तर ५० मीटर अंतरापर्यंत दाट धुके पसरले होते, अशी माहिती वेधशाळेच्या अधिका-यांनी दिली. गेल्या पाच वर्षातील तापमानाने गाठलेला हा नीचांक आहे. २६ डिसेंबर १९४५ मध्ये दिल्लीत सर्वात कमी १.१ अंश सेल्सियस तापमानाची नोंद झाली होती, असे अधिका-यांनी सांगितले.
दाट धुक्यामुळे दिल्लीतील हवाई तसेच रेल्वेवाहतूकीवरही मोठा परिणाम झाला आहे. ५५ विमानांचे उड्डाण उशिराने होत आहे. तर तीन आंतरराष्ट्रीय विमानांचे मार्ग बदलण्यात आले आहेत. तर ७० रेल्वेच्या वाहतूकीच्या वेळापत्रकात बदल करण्यात आले आहेत. चार रेल्वेगाड्या रद्द करण्यात आल्या आहेत तर सहा रेल्वेगाड्यांच्या वेळा बदलण्यात आल्या आहेत.

अकोला : राज्यातील शेतकऱ्यांच्या आत्महत्यांवर नेमका उपाय सापडत नसून, १०० टक्के आत्महत्या थांबतील यासाठी सध्यातरी कोणता मार्ग दिसत नाही, अशी अगतिकता कृषिमंत्री एकनाथ खडसे यांनी अकोला येथे व्यक्त केली. शेतकऱ्यांचे नैराश्य घालविण्यासाठी शेतीपूरक जोडधंद्याशिवाय तरणोपाय नाही, असेही ते म्हणाले.
डॉ. पंजाबराव देशमुख कृषी विद्यापीठाने आयोजित केलेल्या कृषी प्रदर्शनाच्या उद्घाटनप्रसंगी कृषिमंत्री खडसे बोलत होते. दुष्काळामुळे नापिकी आल्याने राज्यात शेतकरी आत्महत्या वाढल्या आहेत. विदर्भ-मराठवाड्यातील आत्महत्येचे लोण आता पश्चिम महाराष्ट्रापर्यंत पोहोचले आहे.
शेतकऱ्यांना ४० शेळ्या व २ बोकड देणार असून अनुसूचित जाती, जमातींच्या शेतकऱ्यांना निशुल्क गायींचे वाटप केले जाईल. सूक्ष्म, संरक्षित सिंचनास शेततळ्यांची योजना नव्याने राबविण्यात येईल. याकरिता २० लाखांचे अनुदान शेतकऱ्यांना दिले जाणार आहे. शेततळ्यातून पाणी घेण्यासाठी सौरऊर्जेवरील पंपदेखील देण्यात येतील. यासाठी ४.१० लाखांचे अनुदान दिले जाईल. सूक्ष्म सिंचन योजनेचे साहित्य घेण्यासाठी अनुदान वाढवून दिले जाणार असून, आठ दिवसांत हे अनुदान त्यांना मिळेल. जिथे शेत तिथे रस्ता तयार करण्याचे आदेश दिले आहेत. माती परीक्षणाचा अहवाल कृषी कार्ड शेतकऱ्यांना घरपोच दिले जाणार असल्याचे खडसे यांनी सांगितले.

यवतमाळ : डॉक्टरच्या हलगर्जीपणामुळे अंधत्व आलेल्या भूमिका राय या प्रकरणाचा सखोल तपास करावा, असा आदेश प्रथम श्रेणी न्यायदंडाधिकारी एम.एस. तिवारी यांनी वडगाव रोड पोलिसांना दिला आहे.
येथील डॉ. संजीव जोशी यांनी केलेला चुकीचा औषधोपचार आणि हलगर्जीपणा यामुळे भूमिकाला कायमचे अंधत्व आल्याची तक्रार तिचे वडील सुजीत राय यांनी मार्च २0१२ मध्ये नोंदविली होती. याप्रकरणात वडगाव रोड पोलिसांनी फिर्यादीनुसार तपास न करता आरोपीचा बचाव व्हावा, अशा पद्धतीने आरोपपत्र दाखल केले, असा आरोप राय यांनी केला आहे. दरम्यान त्यांनी क्रिमिनल प्रोसिजर कोडचे कलम १७३(८) नुसार फर्दर इन्व्हेस्टिगेशन करण्याचे दिशानिर्देश करण्यात यावे, असा विनंती करणारा अर्ज न्यायालयात दाखल केला होता. शिवाय या डॉक्टरसंदर्भात इतर बाबींचीही चौकशी करावी, अशी मागणी केली होती. यानुसार न्यायालयाने फेरचौकशीचे आदेश दिले आहे. पुरवणी अहवाल दोन महिन्याच्या आत सादर करावा, असे न्यायालयाने म्हटले आहे. डॉ. संजीव जोशी यांनी वैद्यकीय कागदपत्रांमध्ये खोडतोड करून पोलिसांनी तपास यंत्रणेची दिशाभूल केली. याविषयी अक्षर तज्ज्ञांचे मत या मुद्यावर दिशानिर्देश देण्याची विनंती केली होती. राय यांची बाजू अँड. वीरेंद्र दरणे यांनी मांडली.

यवतमाळ – आर्णी येथील दत्तरामपूर ले आऊटच्या बंद मंदिराच्या बाहेर अज्ञात तरुणाचा मृतदेह आढळल्याने खळबळ उडाली आहे. आज शनिवारी सकाळी हा प्रकार उघडकीस आला असून खून केल्याचा संशय पोलिसांनी व्यक्त केला आहे.
दत्तरामपूर येथील मिलिंद संभाजी भारती यांच्या ले आऊटमधून गणपत वाघमारे हा शेतात जात होता. अशातच मंदिराच्या बाहेर एका तरुणाचा मृतदेह आढळून आला. या बाबतची माहिती पोलिसांना मिळताच घटनास्थळ गाठून पंचनामा करून मृतदेह शवविच्छेदनासाठी पाठविला. सदर तरुण ३० ते ३२ वर्षाचा असून त्याच्या जवळ कोणताही पुरावा आढळला नाही. त्याने निळ््या रंगाचा जिन्स पॅन्ट, पांढºया रंगाचा कापडी बेल्ट लावलेला आहे. कथीया रंगाचा शर्ट त्याने परिधान केला असून त्याच्या हातावर निलेश असे नाव नोदवून आहे. अद्यापपर्यंत मृतकाची ओळख पटली नसून तरुणाचा खून करून फेकून देण्यात आल्याचा संशय पोलिसांनी व्यक्त केला आहे. याप्रकरणी पोलिसांनी अकस्मात मृत्यूची नोंद केली असून ओळख पटविण्यासाठी मृतदेह ठेवण्यात आला आहे. अधिक तपास ठाणेदार हनुमंत गायकवाड यांच्या मार्गदर्शनाखाली सुरू आहे.

यवतमाळ – वणी येथील यात्रा मैदानाजवळ असणाºया पठान टिंम्बरमार्टला रात्री ११.३० वाजता अचानक आग लागल्यामुळे लाकडी फर्नीचरासह तिथे असलेले लाकूड-फाटे पूर्णत: जळून खाक झाले असून अंदाजे २५ लाख रुपयाचे नुकसान झाले आहे़
दिपक टॉकीज परिसरातील यात्रा मैदानाजवळ पठान टिंम्बरमार्ट हे फर्नीचर तथा लाकडी साहित्याचे दुकान आहे़ या दुकानाला रात्रीच्या सुमारास अचानक आग लागली़ यामुळे संपूर्ण साहित्य आगीच्या भक्षस्थानी सापडले़ ही बाब नगर परिषदेचे सभापती विजय नागपूरे यांना कळताच त्यांनी तात्काळ अग्नीशामक दलाला पाचारण केले़ आगीला विझविण्यात रात्री उशीरा यश आले असून नेमकी आग कशामुळे लागली याचा तपास सुरु आहे़