जयपूर – कौटुंबिक वादातून १७ दिवसाच्या मुलाचे गुप्तांग कापल्याची धक्कादायक घटना जयपूरमध्ये घडली आहे. पिडीत मुलाच्या आईवडिलांनी या क्रूरकृत्यासाठी कुटुंबातील व्यक्तींवरच संशय व्यक्त केला असून याप्रकरणी पोलिसांनी तपासही सुरु केला आहे.
जयपूरमध्ये राहणारे  अखिल जैन हे कामानिमित्त बाहेर गावी गेले होते. तर त्यांची पत्नी  पारुल या आंघोळीसाठी गेल्या होत्या. या दरम्यान त्यांचा १७ दिवसांचा मुलगा जोरजोरात रडू लागला. यामुळे घाबरुन पारुल बाहेर आल्या असता त्यांना मुलाचे गुप्तांग कापल्याचे आढळले. यानंतर पारुल व त्यांच्या सास-यांनी रक्तबंबाळ अवस्थेतील चिमुरड्याला तातडीने रुग्णालयात दाखल केले. मात्र मुलगा खूपच लहान असल्याने त्याच्यावर शस्त्रक्रिया करता येत नसल्याचे डॉक्टरांनी सांगितले. पाच वर्षानंतरच ही शस्त्रक्रिया करणे शक्य असल्याचे डॉक्टरांनी स्पष्ट केले आहे. कुटुंबातील काही जणांनी तुमचे वैवाहीक जीवनच उध्वस्त करु अशी धमकी दिल्याचे अखिल जैन यांनी पोलिसांना सांगितले आहे. पोलिसांनी या आधारे तपास सुरु केला असून प्रकरण अतिशय संवेदनशील असल्याने चौकशीनंतरच पुढील कारवाई करु असे जयपूर पूर्वच्या पोलिस उपायुक्तांनी सांगितले.

नेर – शेतकºयांचे व्यथित मन व पिकांची भिषण अवस्था विरोधी पक्षनेते आ. एकनाथ शिंदे यांनी आज अनुभवली. सत्तेत असो अथवा नसो,शिवसेना सदैव तुमच्या पाठीशी उभी आहे. धिर ठेवा आत्महत्या करू नका, अशा शब्दात दुष्काळग्रस्त शेतकºयांना आवाहन केले.
आज विरोधी पक्षनेते आ. शिंदे यांनी तालुक्यातील लोणी, नेर, कोलुरा या दुष्काळग्रस्त गावातील शेतीची पाहणी करून शेतकºयांशी संवाद साधला. शेतकºयांना न्याय मिळवून दिल्याशिवाय स्वस्थ बसणार नाही, अशा शब्दात शेतकºयांचे सात्वन केले. आ. शिंदे यांनी प्रफुल्ल कावरे यांच्या शेतीची पाहणी केली. त्यांनी चार एकरात पिकांची पेरणी केली होती. मात्र तूर व सोयाबीन वन्यप्राण्यांनी फस्त केली. वनविभागाच्या अधिकाºयांची भेट घेवून त्यांच्याकडून कोणताही प्रतिसाद मिळत असल्याचे सांगितले. लोणी येथे मोहन आडे यांनी खरीप हंगामातील पिकांची कैफीयत मांडली. शासन शेतकºयांना जाणीवपूर्वक त्रास देत असल्याने शेतकरी आत्महत्या करण्यास प्रवृत्त होत असल्याचा आरोप केला. नेर येथे परमानंद अग्रवाल यांच्या निवास्थानी विरोधी पक्षनेते आ. शिंदे यांनी शेतकºयांच्या व्यथा जाणून घेतल्या. यावेळी रवींद्र राऊत, नरेंद्र खोब्रागडे, गजानन तंबाखे यांनी सततची नापिकी, पिकांना मिळत नसलेला हमीभाव, कर्ज, भारनियमन यामुळे शेतकºयांच्या आत्महत्या वाढत असल्याचे सांगितले. कोलुरा येथे प्रभाकर शिरगवरे यांच्या कपाशीची पाहणी केली. सोनवाढोणा येथील केदारेश्वर हरडे या शेतकºयाने दहा दिवसापासून डिपी बंद असल्याचे सांगितले. सोयाबीनने दगा दिला. पत्नीचे दागिने गहान ठेवून गव्हाची पेरणी केली. मात्र डि.पी. बंद असल्याने पुन्हा ५० हजाराचे नुकसान झाले असे सांगून अश्रूंना मोकळी वाट करून दिली. यावेळी आ. शिंदे यांच्यासह उपस्थितांचे डोळे पाणावले होते. यावेळी आ. संजय राठोड, आ. प्रताप सरनाईक, आ. सुनील राऊत, आ. संजय रायमुलकर, आ. बाळू धानोरकर, , माजी आ. संजय बंड, माजी आ. श्रीकांत मुनगिनवार, माजी आ. विश्वास नांदेकर, नगराध्यक्ष पवन जयस्वाल,पं.स.सभापती भरत मसराम, बाबू पाटील जैत, परमानंद अग्रवाल, संजय दारव्हटकर, गजानन भोकरे, भाऊराव ढवळे, नामदेव खोब्रागडे, रेखा शेटे, मिना खांदवे, प्रशांत मासाळ, नितीन कराळे, प्रवीण राठोड, निखिल जैत, किशोर अरसोड, भास्कर तुपटकर, निलेश शेटे, उपविभागीय अधिकारी मनोहर कडू, तहसीलदार संदीप अपार, बीडीओ गौतम भगत, मनोहर झंझाळ यांच्यासह विविध विभागाचे अधिकारी उपस्थित होते.

नेर – तालुक्यातील दगडधानोरा येथील सहाय्यक शिक्षक एक वर्षापासून शाळेतील विद्यार्थीनींसोबत अश्लील चाळे करीत असल्याची घटना आज उघडकीस आली. विद्यार्थी व शिक्षकाच्या पवित्र नात्याला काळीमा फासणाºया घटनेमुळे खळबळ उडाली आहे.
मुलींनी घडलेला प्रकार पालकांना सांगितल्यानंतर महिलांनी शाळा गाठून शिक्षकाला जाब विचारला. त्यावर शिक्षकाने माफी मागून शाळेतून पळ काढला.
दगडधानोरा येथे जि.प. प्राथमिक शाळा असून १ ते ४ पर्यंत वर्ग आहे. लक्ष्मण पिलावन रा. अमरावती हा शिक्षक कार्यरत आहे. सदर शिक्षक १ वर्षापासून १३ विद्यार्थीनींसोबत अश्लील चाळे करीत होता. या बाबत कुणाला सांगितल्यास नापास करण्याची भिती मुलींना सतावत होती. हा त्रास वाढत गेल्याने अख्ोर मुलींनी सुरू असलेला प्रकार पालकांना सांगितला.  आज दुपारी २ वाजताच्या महिलांनी शाळेत धडक दिली. मुख्याध्यापकांनी मध्यस्थी करून घटनेबद्दल शिक्षकाला माफी मागण्यास सांगितले. या घटनेची माहिती मिळताच पं.स.सभापती भरत मसराम, विस्तार अधिकारी एन.एन. तांबेकर, गणेश मेंढे यांनी शाळेला भेट दिली. तोपर्यंत शिक्षकाने शाळेतून पलायन केले होते. विस्तार अधिकारी एन.एन. तांबेकर यांनी ५ विद्यार्थीनींचे बयाण नोंदविल्याचे सांगितले. पालकांनी तक्रार देण्यासाठी पोलिसात धाव घेतली असून वृत्तलिहेस्तोवर गुन्हा करण्यात आला नव्हता. या घटनेमुळे पालकात तीव्र संतापाची लाट उसळली आहे.
शिक्षकावर कडक कारवाई- मसराम
या घटनेची तक्रार मिळताच शिक्षण विभागाच्या अधिकाºयांना घेवून शाळा गाठली. मात्र तोपर्यंत शिक्षक पसार झाला होता. पीडित मुलींचे बयाण घेतले असून, शिक्षकावर कडक कारवाई करण्यात येणार असल्याची माहिती पं.स.सभापती भरत मसराम यांनी दिली.

चाळीस वर्षांच्या प्रबोधन यात्रेचा सन्मान
अमरावती – राष्ट्रसत तुकडोजी महाराज आणि संत गाडगेबाबांच्या प्रबोधनकारी विचार पंरपरेचे शिलेदार, सप्तखंजिरीवादक सत्यपाल महाराज यांना आम्ही सारे फाऊंडेशनचा ‘आम्ही सारे कार्यकर्ता पुरस्कार’ अमरावती येथे एका अविस्मरणीय सोहळ्यात प्रदान करण्यात आला़ चाळीस वर्षांपासून अव्याहतपणे सुरू असलेल्या या प्रबोधन यात्रेचा गौरव बघण्यासाठी अमरावती येथील संत ज्ञानेश्वर सांस्कृतिक सभागृहात अलोट गर्दी झाली होती़
आदर्श ग्राम हिवरे बाजारचे शिल्पकार, सरपंच पोपटराव पवार यांच्या हस्ते सत्यपाल महाराजांना १ लाख रूपयांचा धनादेश व सन्मानचिन्ह देऊन गौरविण्यात आले़ सत्यपाल महाराजांची वृद्ध आई सुशीलाबाई व वडिल विश्वनाथ चिंचोळकर प्रामुख्याने उपस्थित होते़ यावेळी व्यासपीठावर आ़ बच्चू कडू, आ़ हर्षवर्धन सपकाळ, आ़ ख्वाजा बेग, आ़ प्रा़ वीरेंद्र जगताप, चंद्रकांत वानखडे, आम्ही सारे फाऊंडेशनचे अध्यक्ष, ‘पुण्य नगरी’चे कार्यकारी संपादक अविनाश दुधे व डॉ़ गजानन नारे उपस्थित होते़
सत्काराला उत्तर देताना सत्यपाल महाराज आपल्या खास वºहाडी शैलीत म्हणाले की, तुम्ही नेहमीच आयकता माझं, रात्रंदिवस पब्लिकमध्ये राह्यतो मी, पैशावर प्रेम केलं नाही बाबू नाहीतर सत्यपाललेबी रामपाल होता आलं असतं, मी वर्तमानपत्र वाचून कीर्तन करतो, पोथी वाचून नाही़ कारण आता पोथी वाचाचा टाईम नाही, आता ग्रामगीता, गाडगेबाबा, तुकाराम अन् डॉ़ आंबेडकर सांगायचा टाईम आहे़ सत्यपाल महाराज पुढे बोलताना म्हणाले की, शिक्षण काळाची गरज आहे़ संततीसाठी संपत्ती जमवू नका, पण चांगल्या विचारांची संतती निर्माण करा, आपल्या आयाबहिणींनी गाडगेबाबा वाचले असते तर आज समाजात रामपाल जन्मला नसता़ तत्पूर्वी सत्यपाल महाराजांना कार्यकर्ता पुरस्कार देण्याची पार्श्वभूमी अविनाश दुधे यांनी प्रास्ताविकातून मांडली़ ते म्हणाले, समाज जागृतीचे सत्यपाल महाराजांचे कार्य हे कार्यकर्ता प्रवृत्तीतून आणि राष्ट्रसंत व गाडगे महाराजांना अभिप्रेत असलेल्या प्रबोधनकाराच्या वृत्तीतून झाले आहे़ बुलडाण्याचे आ़ हर्षवर्धन सपकाळ यांनी ग्रामस्वराज्य आणि सत्यपाल महाराजांच्या कार्याविषयी आपले विचार मांडले़ ते म्हणाले, गावातील सामान्य माणूस देश चालविण्यास उत्सुक आहे़ त्याचा सहभाग निश्चित झाला पाहिजे़ विकासाच्या प्रक्रियेत जन भागिदारी निर्माण व्हावी म्हणून राज्याच्या राजधान्यांमध्ये केंद्रीत झालेली सत्ता ग्रामसभांकडे कशी जाईल व ग्रामसभा ग्रामस्वराज्याकडे कशी जाईल, याचा विचार व्हायला हवा़ या दृष्टीने सत्यपाल महाराजांचे प्रबोधन समाजात आवश्यक आहे़ आ़ ख्वाजा बेग यांनीही सत्यपाल महाराजांच्या कार्याचा गौरव केला़ ‘सांगा कुणी त्यांना पेरू नका धर्मात्मे, शेतात इथल्या आता माणसे पिकावयास हवी’ असे म्हणत त्यांनी या देशात हिंदू, मुस्लिम, बौद्ध व सर्वधर्मिय बहुसंख्य झाले़ फक्त भारतीय तेवढा अल्पसंख्यांक राहीला़ सत्यपाल महाराजांनी या भारतीयाला बहूसंख्य करावे़ असे आ़ बेग म्हणाले़  तर सत्यापासून दूर जाणाºया समाजाला सत्याच्या जवळ नेणारे सत्यपाल महाराजांच्या वाणीने महाराष्ट्र ऊजळून निघाला आहे़ सत्यपालांच्या वाणीतून रोज गाडगेबाबा व तुकोबा भेटायला येतात, हे महाराष्ट्र सौभाग्य असल्याचे आ़ बच्चू कडू म्हणाले़ चंद्रकांत वानखडे यांनी सुद्धा आपल्या भाषणात सत्यपाल महाराजांच्या प्रबोधनकारी वृत्तीचा गौरव केला़
कार्यक्रमाला सत्यपाल महाराजांची पत्नी नंदाताई, पुत्र डॉ़ धर्मपाल, सून व नातवंडासहीत सर्व कुटुंबीय उपस्थित होते़ या अविस्मरणीय सोहळ्याला आचार्य हरिभाऊ वेरूळकर, प्रदेश काँग्रेसचे सरचिटणीस संजय खोडके, सोमेश्वर पुसदकर, आशुतोष शेवाळकर, किशोर बोरकर, रविकांत तुपकर, डॉ़ अतुल यादगिरे, संजय वानखडे, अमर हबीब, डॉ़ संजय बाहेकर, रामेश्वर अभ्यंकर, विजय विल्हेकर, गजानन घोंगडे, शरद वानखडे, निरज आवंडेकर, नितीन पखाले, संजय पवार, ज्ञानेश्वर रक्षक, प्रदिप पाटील, नितीन चौधरी  यांच्यासह ‘आम्ही सारे’चे पदाधिकारी व शेकडो गुरूदेवभक्त व सत्यपाल महाराजांचे चाहते उपस्थित होते़
अखेरपर्यंत मी कार्यकर्ताच – सत्यपाल महाराज
कार्यकर्ता पुरस्कार देऊन आपण मला कार्यकर्ता ठरविले़ मी अखेरपर्यंतच कार्यकर्ता राहील़ असे सत्यपाल महाराजांनी सत्काराला उत्तर देताना म्हटले़ पुरस्कारात मिळालेल्या एक लाख रूपयाच्या सहायाने एक रूग्णवाहिका विकत घेणार असल्याचे त्यांनी जाहीर केले़ ‘लहानपणी कितीही चांगलं गाणं म्हणलं तरी एक रूपया मिळत नव्हता, आज तुया लेकराले एक लाखाच पुरस्कार मिळाला’असे त्यांनी त्यांच्या वृद्ध आईकडे बघून म्हटले़ तेव्हा महाराजांचा कंठ दाटून आला व सभागृहसुद्धा गहिवरले़

मुंबई – राज्यात अवघ्या एका वर्षात ‘आॅनर किलिंग’चे तब्बल २२० प्रकार घडल्याचे भीषण वास्तव समोर आहे आहे. राज्याच्या ग्रामीण भागांत आंतरजातीय प्रेम आणि विवाहाला तीव्र विरोध असल्याचे स्पष्ट झाले आहे. राज्य गुन्हे अन्वेषण विभागाच्या अहवालात ही धक्कादायक माहिती उजेडात आली आहे. २०१२मध्ये राज्यात २ हजार ७१२ जीवे मारण्याच्या घटना घडल्या होत्या. २०१३मध्ये २ हजार ५१२ व्यक्तींचे खून झाले होते. त्यात २०१२च्या तुलनेत ७.३७ टक्क्यांनी घट झाली होती. परंतु, पोलिसांनी केलेल्या गुन्ह्यांच्या वर्गीकरणातून सर्वाधिक बळी आॅनर किलिंगमधून गेल्याचा निष्कर्ष निघाला आहे. त्याखालोखाल वैयक्तिक वैरामुळे २०७, मालमत्तेच्या वादातून १६२, हुंडाबळी ठरलेल्या विवाहिता ८१, वैयक्तिक हितासाठी ६७ जणांच्या हत्या झाल्याचे अहवालात नमूद करण्यात आले आहे.खून झालेल्यांमध्ये पुरुषांची संख्या १ हजार ६९० तर महिलांची संख्या ८९५ आहे. वयोगटाच्या वर्गीकरणानुसार ३१ ते ५० वर्षे वयोगटातील पुरुषांची संख्या ६७३ आहे.१९ ते ३० या वयोगटातील महिला व मुलींची संख्या सर्वाधिक ४१२ इतकी नोंदविण्यात आली आहे.

पिंपरी – दवाखान्यातून घरी परतणाऱ्या तीन सुरक्षारक्षक महिला शुक्रवारपासून बेपत्ता झाल्याचा प्रकार हिंजवडी भागात उघडकीस आला आहे. या तिघींचे अपहरण झाल्याचा संशय कुटुंबीयांनी व्यक्त केला असून, पोलिसांनी बेपत्ता झाल्याची नोंद करत तंत्रज्ञांच्या मदतीने तपास सुरू केला आहे.
प्रतिभा प्रकाश हजारे (वय २५, रा. ओझरकरवाडी, मूळ रा. नवलिहाळ, जि. बेळगाव), मंगला सिद्धार्थ इंगळे (वय २६, रा. ओझरकरवाडी, मूळ रा. वाशीम) या विवाहितांसह विद्या दशरथ खाडे (वय २४, रा. ओझरकरवाडी, मूळ रा. सातारा) अशी बेपत्ता झालेल्या तिघींची नावे आहेत. या प्रकरणी प्रतिभा हजारे यांचे पती प्रकाश बाबू हजारे (वय ३०, रा. ओझरकरवाडी) यांनी हिंजवडी पोलिस ठाण्यात तक्रार दिली आहे.

मुंबई – महाराष्ट्राचे माजी मुख्यमंत्री व ज्येष्ठ काँग्रेस नेते बॅरिस्टर अब्दुल रेहमान अंतुले यांचे आज मुंबईतील ब्रीच कँडी रुग्णालयात प्रदीर्घ आजाराने निधन झाले. ते ८५ वर्षांचे होते. अंतुले यांच्या निधनामुळे महाराष्ट्राने एक अभ्यासू आणि प्रचंड निर्णयक्षमता असलेला ‘धडाकेबाज’ नेता गमावल्याची भावना व्यक्त होत आहे.
किडनीच्या विकाराने त्रस्त असलेल्या अंतुले यांच्यावर गेल्या महिनाभरापासून उपचार सुरू होते. मात्र, उपचारांना ते प्रतिसाद देत नव्हते. त्यांची प्रकृती दिवसेंदिवस खालावत गेली. काही दिवसांपूर्वी ते पूर्णपणे बेशुद्धावस्थेत गेले होते. अखेर आज सकाळी साडेदहाच्या सुमारास त्यांची प्राणज्योत मालवली. अंतुले यांचे पार्थिव आज मुंबईतील निवासस्थानी अंत्यदर्शनासाठी ठेवण्यात येणार असून रायगड जिल्ह्यातील आंबेत या मूळ गावी त्यांच्यावर अंत्यसंस्कार होणार आहेत.
अंतुले यांचा जन्म ९ फेब्रुवारी १९२९ रोजी रायगड जिल्ह्यातील आंबेत गावी झाला. मुंबई विद्यापीठातून पदवी शिक्षण पूर्ण केल्यानंतर लंडन येथे वकिलीचे शिक्षण घेऊन त्यांनी बॅरिस्टर ही पदवी मिळवली. पुढे ही पदवीच त्यांची ओळख बनली. १९६२ साली ते पहिल्यांदा महाराष्ट्र विधानसभेवर निवडून गेले. तेव्हापासून १९७६ पर्यँत ते विधानसभेवर होते. त्या दरम्यान राज्याच्या मंत्रिमंडळात त्यांनी अनेक खात्यांचे मंत्रिपदे सांभाळली. १९७६ ते १९८० या काळात ते राज्यसभेवर होते.