नवी दिल्ली – भारतातील सर्वोच्च नागरी सन्मान समजला जाणाऱ्या ‘भारतरत्न’ पुरस्काराची आज घोषणा करण्यात आली. हिंदू महासभेचे नेते, काँग्रेसचे माजी अध्यक्ष व बनारस हिंदू विद्यापीठाचे संस्थापक पंडित मदनमोहन मालवीय (मरणोत्तर) व माजी पंतप्रधान अटलबिहारी वाजपेयी यांना हा सन्मान जाहीर झाला आहे. राष्ट्रपती प्रणव मुखर्जी यांच्या अधिकृत ट्विटर अकाउंटवरून ही माहिती देण्यात आली. येत्या २६ जानेवारी रोजी हा पुरस्कार प्रदान करण्यात येणार आहे.
केंद्रीय मंत्रिमंडळाच्या आज झालेल्या बैठकीत वाजपेयी व मालवीय यांच्या नावावर शिक्कामोर्तब करण्यात आले. सरकारचा हा निर्णय राष्ट्रपती मुखर्जी यांना कळविण्यात आला. त्यानंतर ‘मालवीय व वाजपेयी यांना भारतरत्न जाहीर करताना मला आनंद होत आहे’ असे ट्वीट राष्ट्रपतींच्या ट्विटर अकाउंटवरून करण्यात आले.
केंद्रात भाजपची सत्ता आल्यानंतर मदनमोहन मालवीय यांना ‘भारतरत्न’ देण्याचे आश्वासन खुद्द नरेंद्र मोदी यांनी प्रचारादरम्यान दिले होते. त्यामुळे हे नाव निश्चितच मानले जात होते. मालवीय यांच्यासोबत वाजपेयी यांनाही सर्वोच्च पुरस्काराने गौरविले जावे, अशी मागणी होती होती. बहुतांश राजकीय पक्षांनीही वाजपेयी यांच्या नावास पाठिंबा दर्शवला होता. त्याची योग्य दखल मोदी सरकारने घेतली.वाजपेयी व मालवीय या दोघांचाही उद्या, २५ डिसेंबर रोजी जन्मदिवस आहे. हा दिवस ‘गुड गव्हर्नन्स डे’ म्हणून साजरा करण्याची घोषणा सरकारने याआधीच केली आहे. त्या पार्श्वभूमीवर ‘भारतरत्न’ची झालेली घोषणा महत्त्वपूर्ण मानली जात आहे. आजवर देशातील ४३ महनीय व्यक्तींना ‘भारतरत्न’ने गौरविण्यात आले आहे. आता वाजपेयी व मालवीय यांचे नावही या मानकऱ्यांच्या यादीत जोडले गेले आहे.

नवी दिल्ली- लोकसभेत बहुमत असूनही अनेक विधेयकांवर राज्यसभेत विरोधकांनी मोदी सरकारचे मनसुबे हाणून पाडल्याने अखेर सरकारला अनिश्चितकाळासाठी संसदेचे हिवाळी अधिवेशन स्थगित करावे लागले. मात्र विरोधकांच्या गोंधळामुळे लोकसभा अध्‍यक्ष सुमित्रा महाजन यांनी हे अधिवेशन अनिश्चितकाळासाठी स्थगित केल्याचे संसदीय कामकाज मंत्री एम. वेंकय्या नायडू यांनी सांगितले.
या हिवाळी अधिवेशन काळात विरोधी पक्षाने देशहीत न पहाता, अदूरदर्शीपणा दाखवत राज्य सभेत प्रत्येक वेळी विरोध केल्याने सरकारला महत्त्वाची विधेयके मंजूर करता आली नाहीत, असा आरोप नायडू यांनी केला.
राज्यसभेत काँग्रेससह तृणमूल काँग्रेस, जनता दल युनायटेड आणि समाजवादी पक्षाच्या सदस्यांनी विविध विधेयकांवरून मोदी सरकारच्या निर्णयाला तीव्र विरोध केला. राज्यसभेच्या कामकाजाचा आढावा घेतला तर २४ नोव्हेंबरपासून सुरु झालेल्या या हिवाळी अधिवेशनात कामकाजाच्या २२ दिवसातील १६ दिवस विरोधकांनी गोंधळ घालून कामकाजात व्यत्यय आणल्याने कोणतेही कामकाज झाले नाही. तर लोकसभेतही पाच दिवस कोणतेही कामकाज होऊ शकले नाही.
लोकसभेत मागच्या अधिवेशन काळात १२ तर यावेळी १८ विधेयके मंजूर करण्यात आली. तर राज्य सभेत फक्त १२ विधेयकांनाच मंजूरी देण्यात आली. लोकसभेने मंजूर केलेली सहा विधेयके मात्र राज्यसभेत मंजूर झाली नाहीत, असे ते म्हणाले.
आमचे लोक सभेत बहुमत आहे. मात्र राज्य सभेत विरोधकांची संख्या जास्त आहे. यामुळे आम्ही ठोस निर्णय घेण्याचे ठरवले तरी त्याचे राजकारण करुन राज्य सभेत जाणीवपूर्वक विरोध केला जातो, असा आरोप नायडू यांनी केला आहे.

यवतमाळ , दि. २३ – अखिल भारतीय भिक्खू संघ, बौध्द उपासक उपासिका संघ याच्या संयुक्त विद्यमाने २४,२५,२६ जानेवारी २०१५ रोजी बौध्द धम्म संस्कार संमेलनाचे आयोजन केले आहे.
विशाखा बुध्द विहार अंबिका नगर येथे पार पडणाºया तिन दिवशीय कार्यक्रमाची सुरूवात २४ जानेवारी रोजी सकाळी ९ वाजता भदंत प्रियदर्शी यांच्या हस्ते धम्मध्वज वंदनेने होणार आहे. सकाळी ९.३० वाजता बुध्द पुजा त्रिरत्न वंदना, ध्यान साधना व धम्मदेसना होणार आहे. या कार्यक्रमाच्या अध्यक्षस्थानी भदंत बुध्दघोष महास्थवीर तर प्रमुख पाहुणे म्हणून विनयबोधीप्रिय महास्थवीर, भदंत चंद्रमणी थेरो, भदंत सच्चक थेरो, भदंत सारीपुत्त, भदंत अश्वजीत, भदंत काश्यप उपस्थित राहणार आहे. दुपारी १ वाजता उद्घाटन समारंभ होणार असून उद्घाटक म्हणून भदंत सदानंद महाथेरो, अध्यक्ष धम्मानंद महाथेरो, प्रमुख अतिथी भदंत सुयोग, भदंत नागसेन, विशेष अतिथी भदंत करुणाबोधी, भदंत सारीपुत, प्राचार्य नरेंद्र शेंडे हे उपस्थित राहणार आहे. प्रास्ताविक राजा गणविर तर संचालन भदंत गुणानंद करणार असून आभार वंदना उरकुडे माननार आहे. दुपारच्या सत्रात बौध्दधम्मात शील, सदाचार, उपोसथव्रत व संस्कार विधीचे महत्व तसेच डॉ. बाबासाहेब आंबेडकरांना अपेक्षीत जाती विहीन बौध्द समाज निर्माण करण्यासाठी बौध्दांची जनगणना व बौध्दांना संगठीत करण्यासाठी उपाय योजना या विषयावर धम्मदेसना होणार आहे.
२५ जानेवारी रोजी सकाळी ९ वाजता सामुहिक बुद्घ पुजा वंदना, ध्यान साधना व धम्मदेसना, दुपारी १२ वाजता चार मार्ग फळ किंवा श्रावक संघातील चार युगल आणि पुरूष पुद्गल म्हणजे काय या विषयावर धम्मदेसना होणार आहे. तसेच बुध्द काळातील बौध्द उपासक-उपासिकांचे धम्मप्रचार-प्रसारामध्ये योदान व आजच या काळातील बौध्द उपासक-उपासिकांचे धम्मप्रचार-प्रसारामध्ये योगदान आणि बुध्द धम्मातील दहा पारामिता या विषयावरही भदंत धम्मदेसना देणार आहे. २६ जानेवारी रोजी सकाळी ९ वाजता सामुहिक बुध्द पुजा वंदना, ध्यान साधना व धम्मदेसना आणि दुपारी १२ वाजता समारोप होणार आहे. समारोपीय कार्यक्रमाच्या अध्यक्षस्थानी अखिल भारतीय भिक्खु संघाचे संघानुशासक भदंत सदानंद महाथेरो हे राहणार असून प्रमुख पाहुणे म्हणून भदंत सुमंगलबोधी थेरो, भदंत आनंद थेरो, भदंत उपाली, भदंत सारीपुत, भदंत नागरुप, भदंत धम्मपाल उपस्थित राहणार आहे. दुपारी २ वाजता स्मृतीचिन्हे व बक्षीस वितरण करण्यात येणार आहे. या कार्यक्रमाचा लाभ घ्यावा असे आवाहन संयोजक शंकर धनकुलवार, धिरज वाणी, संयोजिका मंगला गणविर, वंदना उरकुडे, मुख्य आयोजक अखिल भारतीय भिक्खू संघाचे जिल्हाध्यक्ष भदन्त विप्पसी महाथेरो, भदन्त राहुल, निमंत्रक राजा गणविर, स्वागताध्यक्ष अरुणा सुखदेवे यांनी केले आहे.

यवतमाळ, दि़२३- वणी येथील पंचशील नगरमध्ये वास्तव्यास असलेल्या २२ वर्षीय तरुणीला लग्नाचे आमीष दाखवून तिघांनी लैंगीक अत्याचार केल्याची तक्रार वणी पोलीसात देण्यात आली़ यावरुन तीघांवर गुन्हा नोंद करण्यात आला आहे़
येथील तरुणीला लग्नाचे अमीष दाखवून गत एक वर्षापासून मारेगांव येथील शेख गड्डू(लहान) शेख सत्तार, सुनेरा शेख सत्तार व शेख गूड्डू(मोठा) शेख सत्तार हे तीघे वारंवार शरीर संबंध प्रस्थापित करीत होते़ यातून युवतीला गर्भधारणा झाली़ येथील खाजगी दवाखाण्यात गर्भपात करण्यात आला़ त्यानंतर तीने शारीरीक संबंधासाठी नकार दिल्यामुळे त्यांनी तीला जीवे मारण्याची धमकी दिली़ हतबल झालेल्या पिडीत तरुणीने वणी पोलीस स्टेशन गाठून आरोपी विरोधात तक्रार दाखल केली़ यावरुन पोलीसांनी गुन्हे नोंद केले आहे़

यवतमाळ, दि. २३ – औरंगाबाद येथील सिड्स कंपनीने शेतकºयाला बोगस बियाणे विक्री केल्याचा प्रकार दिग्रस तालुक्यात नुकताच उघडकीस आला असताना, दारव्हा तालुक्यातील शेतकºयाला बोगस बियाणे देवून फसवणूक केल्याची बाब समोर आली आहे. याप्रकरणी जनरल मॅनेजर विष्णू जोशीविरुद्ध गुन्हा नोंद करण्यात आला असून, शेकडो शेतकºयांची फसवणूक करण्यात आल्याचे बोलले जात आहे.
बियाण्याची निर्मिती केल्यानंतर त्याची उगवण क्षमता तपासण्यासाठी गुणवत्ता नियंत्रण विभागाला पाठवावे लागते. मात्र औरंगाबादच्या कंपनीने जिल्ह्यात विक्री केलेल्या कापूस बियाण्याची उगवण क्षमता तपासण्यात आले नसल्याचे दारव्हा व दिग्रस तालुक्यात बियाणे न उगवल्याच्या प्रकारावरून समोर आले आहे. दिग्रस तालुक्यातील शेतकºयाने बियाण्याची पेरणी केल्यानंतर ते उगवलेच नसल्याची तक्रार केली होती. याप्रकरणात बियाणे दोषपूर्ण असल्याचे सिध्द झाल्यानंतर जनरल मॅनेजरविरुध्द गुन्हा नोंद करण्यात आला. दरम्यान दारव्हा तालुक्यातील शेतकºयानेही बियाणे उगवले नसल्याची तक्रार जिल्हा गुणवत्ता नियंत्रण कार्यालयाकडे केली होती. तपासणीनंतर बियाणे बोगस असल्याचे उघड झाले असून, जिल्हा गुणवत्ता नियंत्रण अधिकारी सुभाष उलेमाले यांच्या तक्रारीवरुन दारव्हा पोलिसांनी याप्रकरणी ३ लाख ७ हजार २७० रुपयांच्या फसवणूकीचा गुन्हा नोंद केला आहे. जिल्ह्यात २०१२ मध्ये या कंपनीने शेकडो शेतकºयांना बोगस बियाणे देवून फसवणूक केल्याचे बोलले जात असून, याप्रकाराची चौकशी करून शेतकºयांना नुकसान भरपाई देण्याची मागणी होत आहे.

यवतमाळ, दि. २३ – लाडखेड पोलीस स्टेशन अंतर्गत येणाºया कामठवाडा येथे पेट्रोल टाकून जीप पेटवून दिल्याची घटना घडली. शिवशंकर मधुकर ठोकळ (४०) व अन्य चार रा. चाणी अशी आरोपींची नावे आहे. शिवशंकर ठोकळ याने संगणमत करून गैर कायद्याची मंडळी जमवून एम. एच. २९ एच ३१५७ क्रमांकाची जीप पेट्रोल टाकून जाळली व फिर्यादीचे नुकसान करून जिवे मारण्याची धमकी दिली. याबाबत तक्रार देण्यात आली असून, पोलिसांनी याप्रकरणी गुन्हा नोंद करून तपास सुरू केला आहे.

व्हिएन्ना : वाघ, सिंह अथवा हत्ती यासारखे जंगली प्राणी दूरवरून पाहिले तरी आपला भीतीने थरकाप उडतो; पण केवळ तीन वर्षांचा थिओडोर हा कधी झोपलेल्या चित्त्यावर बसून मस्ती करतो. तर कधी हत्तीच्या सोंडेशी खेळ करतो. तर कधी पाणगेंड्याशीही गट्टी करतो.निश्चितपणे तुम्हाला प्रश्न पडला असणार की, तीन वर्षांचा चिमुरडा अत्यंत खतरनाक प्राण्यांशी कसा काय खेळू-बागडू शकतो; पण यासाठी आणखी भुवया उंचावण्याची गरज नाही. ही आहे फोटोशॉपची कमाल. ऑस्ट्नियातील व्हिएन्नामध्ये राहणाऱ्या डॅनिएल बेबिकने फोटोग्राफीत अनेक एक्स्पेरिमेंट करताना असे काही भन्नाट फोटो तयार केले आहेत की, ते पाहून नक्कीच तोंडात बोटे घालण्यास भाग पडते. एक दिवस डॅनिएलला काही तरी वेगळे करण्याची इच्छा झाली. तिने प्राणीसंग्रहालयात काढलेले फोटो घेतले. त्यानंतर तिने फोटोशॉपच्या मदतीने हिंस्त्र प्राण्याच्या फोटोत आपल्या तीन वर्षांच्या मुलाचा फोटो मिक्स केला. या कल्पनेतून तयार झालेले फोटो आश्चर्यचकित करणारे ठरले. असे प्रयोग तिने वेगवेगळ्या प्राण्यांच्या फोटोंच्या बाबतीत केले.

सांगली – ‘तुम्ही भाजपचे सरकार सत्तेवर आणले, आता त्याचे परिमाण सोसा,’ असे म्हणत काँग्रेसचे ज्येष्ठ नेते आणि माजी मंत्री पतंगराव कदम यांनी येथील ऊस उत्पादक शेतकऱ्यांवर आगपाखड केली. सांगली आणि कोल्हापूर जिल्ह्यातील साखर कारखान्यांनी दिलेल्या पहिल्या उचलीत मोठा फरक आहे. हा अन्याय दूर करावा, अशी मागणी करण्यासाठी काही शेतकरी कदम यांच्याकडे गेले होते. यावेळी कदम यांनी संबधित शेतकऱ्यांना असे सुनावले.
सांगली जिल्ह्यातील साखर कारखान्यांनी १९०० रुपये प्रतीटन या प्रमाणे पहिला हप्ता देण्याची तयारी दर्शविली असताना कोल्हापूर जिल्ह्यातील साखर कारखान्यांनी मात्र २५०० रुपयावर दर जाहीर केला आहे. दोन दिवसांत एफआरपीप्रमाणे दर दिला तर ठीक, अन्यथा आम्ही ऊस तोडी बंद करू, असा इशारा देणारे निवेदन भिलवडी भागातील ऊस उत्पादक शेतकऱ्यांनी कदम यांना दिले.
सांगली जिल्ह्यातील साखर उतारा आणि ऊसाची प्रत कोल्हापूरपेक्षा चांगली आहे. असे असताना कोल्हापूर जिल्ह्यातील साखर कारखाने सांगलीपेक्षा अधिक ६०० ते ७०० रुपये इतका ऊस दर देत आहेत. त्यामुळे सांगली जिल्ह्यातील ऊस उत्पादक शेतकरी अस्वस्थ झाला आहे.
केंद्राच्या एफआरपीकायद्याप्रमाणे यंदा ९.५ टक्के साखर ऊताऱ्यासाठी प्रतिटन २२०० रुपये एफआरपी आहे. त्यानंतरच्या प्रत्येक १ टक्का उताऱ्याला २२० रुपये द्यावे लागणार आहेत. जिल्ह्यातील बहुतांशी साखर कारखान्यांची एफआरपी २३५० रुपयांपेक्षा अधिक आहे. जिल्ह्यातील सरासरी एपआरपी २८८० रुपये आहे. त्यामुळे याप्रमाणे दर द्यावाच लागणार आहे.
दरम्यान, ऊस गाळपानंतर १४ दिवसांच्या आत ‘एफआरपी’ कायद्यानुसार पहिली उचल न दिलेल्या साखर कारखान्यांची मालमत्ता जप्तीचा प्रस्ताव साखर सहसंचालकांनी साखर आयुक्तांकडे पाठविला असल्याचे सांगण्यात येते.

राळेगाव, दि. २२ – येथील पत्रकार विवेक अशोक राऊत याचे २२ डिसेंबर रोजी पहाटे ३ वाजता यवतमाळ येथील रुग्णालयात मृत्यू झाला. ते ४१ वर्षाचे होते. त्याच्या मागे पत्नी, दोन मुली व बराच मोठा आप्त परिवार आहे. यावेळी अत्ययात्रेदरम्यान माजी विधानसभा उपाध्यक्ष प्रा. वसंत पुरके, माजी जिल्हा परिषद अध्यक्ष प्रविण देशमुख, जिल्हा मध्यवर्ती बँकेचे अध्यक्ष मनिष पाटील याच्यासह राजकीय पक्षाचे पदाधिकारी, नातेवाईकांनी श्रध्दांजली अर्पण केली.