औरंगाबाद – आठ महिन्यापूर्वी विवाह ठरला. साखरपुडाही पार पडला. ३ डिसेंबर रोजी विवाह करण्याचे निश्चित झाले. तरुणीकडील लोकांनी मंगल कार्यालय ठरविले. पाहुणे आले, नवरदेवाची, वऱ्हाडाची वाट पाहणे सुरू होते. मात्र, ऐनवेळी त्यांच्याकडून लग्नाला येत नसल्याचे कळविण्यात आले. शहरातील २७ वर्षाच्या तरुणीसोबत हा दुर्देवी प्रकार घडला असून वधूपक्षाच्या तक्रारीवरून जवाहरनगर पोलिस ठाण्यात नवऱ्या मुलासह कुटुंबावर फसवणुकीचा गुन्हा दाखल करण्यात आला आहे.
गारखेडा भागात राहणाऱ्या मनिषा (वय २७, नाव बदललेले आहे) या तरुणीला मुंबई येथील अश्विन उल्हास हासनाळे यांनी एप्रिल महिन्यात लग्नासाठी मागणी घातली होती. त्यावेळी त्याचे वडील उल्हास हासनाळे हे देखील उपस्थित होते. १५ जून रोजी त्यांचा औरंगाबादला साखरपुडाही पार पडला. ३ डिसेंबर रोजी गारखेडा भागातील एका मंगल कार्यालयात विवाहाचे आयोजन करण्यात आले. मनिषाच्या कुटुंबाने लग्नाची सर्व तयारी केली. लग्नपत्रिका छापून नातेवाईकांना वाटण्यात आल्या. २ डिसेंबर रोजी मनिषाच्या वडिलांनी उल्हास हासनाळे यांना लग्नासाठी औरंगाबादला निघाल्याबाबत विचारणा केली. यावेळी नवरा मुलगा अश्विनला बरे वाटत नसून तो हॉस्पिटलला गेल्याची थाप मारण्यात आली. वारंवार संपर्क करूनही हासनाळे कुटुंबियांनी टाळाटाळ केली. ३ डिसेंबरपर्यंत वाट पाहून, संपर्क करुनही हासनाळे कुटुंब लग्नासाठी न आल्याने हा विवाह सोहळा अखेर रद्द करावा लागला. विवाहासाठी लागलेला पाच ते सहा लाखाचा खर्च यावेळी व्यर्थ गेला. या प्रकरणी मनिषाने दिलेल्या तक्रारीवरून आरोपी नवरा मुलगा अश्विन, त्याचे वडील उल्हास, आई पुष्पा, भाऊ हेमंत, बहीण क्रांती त्र्यंबके, क्रांतीचा पती, आत्या अलका शिंदे व अश्विनचे काका यांच्याविरुद्ध फसवणुकीचा गुन्हा दाखल करण्यात आला आहे.
अश्विनचा यापूर्वी विवाह झालेला होता. ही बाब त्याने मनिषाच्या कुटुंबियांपासून लपवून ठेवली होती. त्यांना माहित झाल्यावर त्याने पहिल्या पत्नीचे चारित्र्य वाईट असून सारखे फीटस् येत असल्याने घटस्फोट घेतल्याची माहिती दिली.

नवी दिल्ली – कोळसा खाणवाटप घोटाळ्यात अखेर माजी पंतप्रधान आणि कोळसा मंत्री मनमोहन सिंग हेही चौकशीच्या फेऱ्यात अडकले आहेत. उद्योगपती कुमार मंगलम बिर्ला यांच्या हिंदाल्को कंपनीला कोळसा खाण बहाल केल्याप्रकरणी अधिक चौकशीची आवश्यकता अधोरेखित करताना कोर्टाने मनमोहन यांचा जबाब नोंदवण्याचे निर्देश सीबीआयला दिले.
विशेष न्यायालयाने हिंदाल्को प्रकरणात तपास संस्थेने दिलेला क्लोजर रिपोर्ट आज फेटाळून लावला. हिंडाल्कोप्रकरणी कुमार मंगलम बिर्ला, माजी कोळसा सचिव पी. सी. पारेख व संबंधितांची आणखी खोलात जाऊन चौकशी करण्याची गरज आहे तसेच या खाणवाटपावेळी कोळसा मंत्री राहिलेले माजी पंतप्रधान मनमोहन सिंग यांचाही जाब नोंदवण्यात यावा, असे न्यायालयाने नमूद केले. याप्रकरणी पुढील सुनावणी २७ जानेवारी रोजी होणार आहे. २००५ मध्ये बिर्ला यांच्या हिंदाल्को कंपनीला ओडिशात तालाबीरा दोन आणि तीन अशा दोन खाणींचे वितरण करण्यात आले. त्यावेळी कोळसा खात्याचा प्रभार माजी पंतप्रधान मनमोहन सिंग यांच्याकडे होता. त्यामुळेच याप्रकरणात मनमोहन यांच्या अडचणी वाढण्याची शक्यता निर्माण झाली आहे. दरम्यान, याआधी २५ नोव्हेंबर रोजी जेव्हा याप्रकरणी सुनावणी झाली होती तेव्हा मनमोहन यांची चौकशी का करण्यात आली नाही?, असा सवाल विशेष न्यायाधीश भरत पराशर यांनी सीबीआयला केला होता. कोळसा खाणवाटप गैरव्यवहारात हिंदाल्को कंपनीच्या कुमार मंगलम बिर्ला यांच्या सहभागाबाबत स्पष्टीकरणाची मागणीदेखील विशेष न्यायालयाने केली होती.

मुंबई, दि. १५ –  मुंबई सेंट्रल रेल्वे स्टेशनजवळील इमारतीला भीषण आग लागली आहे. रेल्वे कर्मचा-यांच्या वसाहतीतील १५ मजली इमारतीतील चौथ्या मजल्याला मोठी आग लागली असून अग्निशमन दलाच्या आठ गाड्या घटनास्थळी दाखल झाल्या आहेत. आगीत अडकलेल्या ८ जणांना बाहेर काढण्यात यश मिळाले असून बचावकार्य व आगीवर नियंत्रण मिळवण्याचे प्रयत्न सुरू आहेत.

बेळगाव – टाइम्स ऑफ इंडियाचे ज्येष्ठ पत्रकार एन. डी. शिवकुमार (३९)यांचे हृदय विकाराच्या तीव्र झटक्याने सोमवारी निधन झाले. शिवकुमार हे बंगलोरहून बेळगावला कर्नाटक विधिमंडळाच्या अधिवेशनाचे वार्तांकन करण्यासाठी आले होते. टाइम्स ऑफ इंडियामध्ये ते सह संपादक म्हणून सेवा बजावत होते.
शनिवारी अधिवेशनाला सुट्टी असल्यामुळे शिवकुमार आपल्या मित्रासमवेत महालक्ष्मीचे दर्शन घेऊन कोल्हापूरहून परतले होते. रविवारी ते गोकाकचा धबधबा पाहण्यास गेले होते. त्यांना अन्नातून विषबाधा झाल्यामुळे जुलाबाचा त्रास सुरु झाला. त्यांनी के एल ई हॉस्पिटलमध्ये जावून उपचार करून घेतले. उपचारासाठी दवाखान्यात दाखल होण्याचा सल्ला त्यांना डॉक्टरनी दिला पण त्यांनी त्याला नकार दिला. खोलीवर परतल्यावर काही वेळाने त्यांची तब्येत अधिक बिघडली. लगेच त्यांना दवाखान्यात नेण्यात आले. पण डॉक्टरनी ते मृत झाल्याचे घोषित केले. मुख्यमंत्री सिद्धरामय्या यांच्यासह अनेक मंत्र्यांनी हॉस्पिटलमध्ये जावून त्यांचे अंत्यदर्शन घेतले. एन. डी. शिवकुमार यांच्या पश्चात पत्नी जयलक्ष्मी आणि तीन वर्षाची मुलगी साहित्या असा परिवार आहे.

यवतमाळ , दि. १५ (विशेष प्रतिनिधी)- झरी तालुक्यातील मुधाडी (गिट्टी) जंगलक्षेत्रात लाकूड चोरीचे प्रमाण गेल्या काहीमहिन्यापासून वाढले आहे. लाकूड चोरट्यांच्या टोळीला जेरबंद करण्यासाठी गेलेल्या वनरक्षकाच्या पथकावर प्राणघातक हल्ला करण्यात आल्याची घटना रविवारी रात्री घडली.
किष्टन्ना पुल्लेनवार, सुभाष पिकनिकवार, दिनेश भोयर, महादेव सरोदे या जामणी रेंजच्या वनरक्षकांसह वनकामगार सोनू दडांजे जखमी झाले. लाकूड चोरटे मुधाडी जंगलक्षेत्रात लाकूड कटाई करीत असल्याची गुप्त माहिती पथकाला मिळाली. त्यावरून त्यांनी रविवारी रात्री ९ वाजतापासून सापळा   रचला होता. रात्री २ वाजताच्या सुमारास सहा जण सागवान चौपट डोक्यावर घेवून येताना दिसले. लाकूड चोरटे जवळ येताच वनपथकाने दोघांना पकडले. सागवान खाली टाकून वनपथकावरच हल्ला चढविला. कर्मचाºयांनी बॅटरीचा प्रकाश चोरट्यांच्या चेहºयावर टाकल्याने त्यांची ओळख पटल्याचे वनरक्षक सांगत आहे. चोरट्यांच्या हल्ल्यात वनरक्षक व कर्मचारी जखमी झाले असून त्यांना उपचारासाठी रुग्णालयात दाखल करण्यात आले. या घटनेची तक्रार वनपरिक्षेत्र अधिकारी यशवंत नागुलवार यांनी पाटण पोलीस ठाण्यात दिली. त्यावरून पोलिसांनी भीमराव आत्राम, सोनू टेकाम, कपलू टेकाम याच्यासह अन्य तिघांविरुध्द गुन्हा नोंद केला आहे.

एक अधिक एक अकरा काव्य संग्राहाचे प्रकाशन
यवतमाळ, दि. १५ (प्रतिनिधी) – कविता ही शिकून येत नसत कवितेचा झरा हा काळजात जिवंत असावा लागतो. हे जसे खरे आहे. तसेच प्रत्येकात एक कवी असतो. मात्र त्याला जिवंत ठेवणारी संवेदनशिलता बोबट होऊ न देण्याची गरज असते. एक अधिक एक अकरा या काव्या संग्रहातील कवितेत हा जो जिवंतपणा आहेत. तो मला भावला असे प्रतिपादन ज्येष्ठ कवी शंकर बडे यांनी केली. मनिष काळे लिखीत काव्य संग्रहाच्या प्रकाशन सोहळ््यात ते बोलत होते.
राळेगाव पंचायत समिती सभागृतात हा प्रकाशन सोहळा रविवारी पार पडला. यावेळी कार्यक्रमाच्या अध्यक्षस्थानी माजी विधानसभा उपाध्यक्ष प्रा. वसंत पुरके, श्रमिक पत्रकार संघटनेचे जिल्हाध्यक्ष नितीन पखाले, गुरूदेव सेवा मंडळाचे जिल्हाध्यक्ष विलास भोयर, पंचायत समिती सभापती बेबीताई जवादे, तहसिलदार सुरेश कव्हळे, उपसभापती सुरेश मेश्राम, प्रा. सदानंद चौधरी उपस्थित होते. यावेळी बोलताना प्रा. वसंत पुरके म्हणाले की, काव्य संग्रहातील शेतकरी, खंत, जमान, बळी इत्यादी कवितावर मार्मिक भाष्य केले. सोबतच एक अधिक एक अकरा या शिर्षकाचे विश्लेशन केले. तर नितीन पखाले यांनी पत्रकारीता व साहित्यावर भाष्य केले. तहसिलदार सुरेश कव्हळे यांनी शेतकरी आत्महत्योबाबत चिंता मनोगतातून व्यक्त केली. यावेळी राजू रोहणकर, राजेश काळे यांनीही विचार मांडले. या सोहळ््याला डॉ. के. एस. वर्मा, महेश शेंडे, प्रा. पिंपरे, फिरोज लाखाणी, संजय दुरबुडे यांचेसह अनेक मान्यवर उपस्थित होते. कार्यक्रमाचे संचालन कैलास राऊत यांनी केले.

यवतमाळ , दि. १४ (प्रतिनिधी) – दोन दिवसाच्या ढगाळी वातावरणानंतर आज रविवारी सायंकाळी ८ वाजता दरम्यान शहरात पावसाच्या सरी कोसळल्या. अवकाळी पाऊस राज्याच्या विविध भागात हजेरी लावत आहे.अवकाळी पाऊस व काही ठिकाणी झालेल्या गारपीटीमुळे वातावरणात गारवा पसरला होता. ढगाळी वातावरणानंतर सायंकाळी पावसाच्या सरी कोसळल्याने आल्हाददायक वातावरण निर्माण झाले होते.

यवतमाळ, दि. १४ (प्रतिनिधी)- महाराष्ट्र राज्य विधी सेवा प्राधिकरणाच्या निर्देशानुसार जिल्हा विधी सेवा प्राधिकरणाच्यावतीने आयोजित करण्यात आलेल्या राष्ट्रीय लोक अदालतमध्ये विविध विभागाशी संबंधीत ६४३९ प्रकरणे निकाली निघाली.
सदर लोकअदालत जिल्हा न्यायालय, जिल्हा ग्राहक तक्रार निवारण मंच, कामगार व औद्यागिक न्यायालय तसेच जिल्ह्यातील सर्व तालुका न्यायालयामध्ये आयोजित करण्यात आली होती. या लोकअदालतमध्ये एकूण २२,१६८ प्रकरणे निकाली काढण्यासाठी ठेवण्यात आली होती. निकाली निघालेल्या प्रकरणांमध्ये आपसी समझोत्याने भुसंपादन प्रकरणे, नगर परिषदेची कर अपिलाची प्रकरणे निगोशिएबल इस्टयुमेंट अ‍ॅक्टच्या कलम १३८ नुसार असलेले प्रकरणे, मोटार अपघात वाहन कायद्याची प्रकरणे, वैवाहिक वादांची प्रकरणे, बँकाची प्रकरणे, कामगार विवाद प्रकरणे, ग्राहक तक्रारी व दिवाणी प्रकरणांचा समावेश आहे.
या लोकअदालतीत अधिकाधिक प्रकरणे निकाली काढण्यासाठी अनेक पक्षकारांनी उत्स्फुर्तपणे आपला सहभाग नोंदविला होता. सदर लोकअदालत यशस्वी करण्यासाठी जिल्ह्यातील सर्व न्यासाधिश, न्यायालीन कर्मचारी, वकील, जिल्हाधिकारी कार्यालय तसेच लोकअदालतीच्या पॅनलवरील सामाजिक कार्यकर्त्यांनी सहकार्य केले असल्याची माहिती जिल्हा विधी सेवा प्राधिकरणाचे सदस्य सचिव न्या. अग्रवाल यांनी दिली.

यवतमाळ, दि. १४ (प्रतिनिधी) – अज्ञात वाहनाने दिलेल्या धडकेत दोघांचा मृत्यू झाल्याची घटना घाटंजी तालुक्यातील गांधीनगर फाटा  व बाभूळगाव तालुक्यातील नांदुरा येथे घडली.
भरधाव वाहनाने दिलेल्या धडकेत सुरेश नैताम (३५) रा.   झटाळा असे मृतकाचे नाव आहे. तो एमएच२९ /ई ४४९१ क्रमांकाच्या दुचाकीने सासूरवाडीला गेला होता. अज्ञात वाहनाने दुचाकीला मागाहून धडक दिल्याने गंभीर जखमी झाला. सुरेशला उपचारासाठी यवतमाळ येथील शासकीय रुग्णालयात दाखल केले असता डॉक्टरांनी मृत घोषित केले. सुरेश यवतमाळात गॅरेजमध्ये मेकॅमिकम्हणून काम करीत होता. त्याच्या पश्चात पत्नी, दीड वर्षाची मुलगी व बराच मोठा आप्त परिवार आहे. या घटनेमुळे हळहळ व्यक्त होत आहे.
बाभूळगाव तालुक्यातील नांदुरा येथे अज्ञात वाहनाने दुचाकीला दिलेल्या धडकेत गजानन टेकाम गंभीर जखमी झाला. त्याला उपचारासाठी रुग्णालयात भरती करण्यात आले होते. मात्र उपचाराला प्रतिसाद न मिळाल्याने अखेर मृत्यू झाला. या घटनेची तक्रार संजय राणे यांनी बाभूळगाव पोलीस ठाण्यात दिली. त्यावरून वाहनधारकाविरुद्ध गुन्हा नोंद करण्यात आला आहे.

नवी दिल्ली दि. १४ (प्रतिनिधी)- अमलीपदार्थांची नशा (ड्रग्ज) ही चिंतेची बाब बनली असून भारतातील तरुण पिढी मोठ्या प्रमाणावर याला बळी पडलेली पाहायला मिळते. मात्र तुमची ही नशा सैनिकांच्या जीवावर बेतते याचा विचार कधी केला आहे का?, असा सवाल पंतप्रधान नरेंद्र मोदी यांनी आपल्या ‘मन की बात’ या कार्यक्रमात बोलताना केला. ड्रग्जला आळा घालण्यासाठी नरेंद्र मोदींनी जनतेला आकाशवाणीवरून आवाहन केलं.
ड्रग्ज ही भयंकर समस्या असून यामध्ये अडकलेल्या लोकांना बाहेर काढणे आवश्यक आहे. नशेच्या आहारी गेलेल्या अनेकांना हे माहीत आहे का की, त्यांनी नशेसाठी खर्च केलेला पैसा हा दहशतवाद्यांकडे जातो. दहशतवादी संघटना यातून आपलं जाळं पसरवत आहेत आणि त्या पैशातून शस्त्रास्त्र जमवून हल्ले करतात. दहशतवाद्यांशी दोन हात करताना जेव्हा सैनिकांचा बळी जातो त्यामागे नशेबाजांचा पैसा असतो. तेव्हा नशेच्या आहारी जाऊन दहशतवाद्यांना मदत करू नका, असे नरेंद्र मोदी म्हणाले.
ड्रग्जच्या आहारी जाण्यामागे ‘D-डिस्ट्रक्शन, डेवस्टेशन आणि डार्कनेस (3D) ‘ ही कारणे आहेत. मात्र या सगळ्यात पालकांची भूमिका महत्वाची आहे. तसेच पालकांनी आपल्या पाल्याविरोधात नाही तर त्याच्या सवयी विरोधात, ड्रग्ज विरोधात लढले पाहिजे. त्याला समजून घेतले पाहिजे आणि समजावून सांगितले पाहिजे. त्यांनी आपल्याला पाल्याला ध्येय दिले पाहिजे तर तो या मार्गाला वळणार नाही, असेही नरेंद्र मोदी यांनी यावेळी स्पष्ट केले.
सरकारतर्फे आपण या संदर्भात एक हेल्पलाइन सुरू करण्याचा विचार करतो आहोत. जेणेकरून तरुणांना या व्यसनातून बाहेर येण्यास मदत होईल, असेही ते म्हणाले. ड्रग्ज मुक्त भारत करण्यासाठी सोशिअल मीडियावरील लोकांनाही त्यांनी आवाहन केले की, यासंदर्भात जागृतता पसरावी म्हणून ‘#drugfreeindia’ असा हॅश टॅग वापरावा. असे केल्यास तो एक लोकशिक्षणाचा भाग ठरेल, असेही मोदी म्हणाले. तसेच सेलिब्रेटी, सामाजिक कार्यकर्ते, नेते, धार्मिक-अध्यात्मिक क्षेत्रात मोठे कार्य करणाऱ्या व्यक्ती या साऱ्यांनी देखील आपल्या संवादातून ड्रग्जचे गंभीर परिणाम आणि त्याच्या विरोधात लढा देण्यासाठी शक्य तेव्हा विचार द्यावेत, असे आवाहन केले.