कोल्हापूर – कॉम्रेड गोविंद पानसरे यांना पंचगंगेच्या घाटावर कुठलेही धार्मिक विधी न करता अखेरचा निरोप देण्यात आला. त्यांना त्यांची सून आणि नातवाने अग्नी दिला. दसरा चौकातून निघालेली अंत्ययात्रा सायंकाळी सहा वाजता पंचगंगेच्या काठावर आली. कम्युनिस्टांनी अंत्ययात्रेला ‘संघर्षयात्रा’ म्हटले होते. पंचगंगेच्या काठी कार्यकर्त्यांनी पुरोगामी विचारांची शपथ ग्रहण केली आहे. येथे ज्येष्ठ सामाजिक कार्यकर्ते बाबा आढाव, बी.जी.कोळसे पाटील, ज्येष्ठ पत्रकार अनंत दीक्षित यांनी शोकसभेत भाषण केले. तसेच शाहीर संभाजी भगत आणि शितल साठे यांनी क्रांतिगीत गाऊन त्यांना श्रद्धांजली अर्पण केली.
सुरुवातीला त्यांचे पार्थिव अंत्यदर्शनासाठी दसरा चौकात ठेवण्यात आले होते. येथे हजारो लोकांनी त्यांना श्रद्धांजली अर्पण केली. येथे भावूक वातावरण होते. त्याचबरोबर शहिद कॉम्रेड गोविंद पानसरे अमर रहेच्या घोषणा दिल्या गेल्या. कार्यकर्ते आणि पानसरे यांच्या विचारांवार श्रद्धा असलेले लोक मोठ्या संख्येने हजर होते. यात कामगार, कष्टकरी, विद्यार्थी, कॉम्युनिस्ट कार्यकर्ते, घरकामगार महिलांची संख्या मोठी होती. बहुतेक कार्यकर्ते आणि महिला या लाल रंगाचे झेंडे घेऊन उभे होते. दुपारी दिड ते साधारण तीन वाजता पर्यंत अंत्यदर्शन घेण्यात आले. त्यानंतर अंत्ययात्रा पंचगंगेच्या दिशने निघाली. दरम्यान, माजी न्यायमुर्ती बी.जी.कोळसे पाटील यांनी पानसरेंवर शासकीय इतमामात अंत्यसंस्कार का नाही? असा सवाल केला.
पानसरे यांचे शुक्रवारी रात्री 10.45 वाजता ब्रीच कँडी हॉस्पिटलमध्ये उपचारादरम्यान निधन झाले. त्यांच्यावर 16 फेब्रुवारी रोजी गोळ्या झाडण्यात आल्या होत्या. शनिवारी सकाळी मुंबईत त्यांचे पार्थिव अंत्यदर्शनासाठी ठेवण्यात आले. त्यानंतर 10.30 वाजता एअर अॅम्ब्युलन्सद्वारे कोल्हापूरला आणले गेले. यावेळी मुंबई विमानतळावर शासनाचा एकही प्रतिनिधी नव्हता. त्यांचे पार्थिव मुंबई विमानतळावर तासभर रखडल्याचा आरोप आमदार कपिल पाटील यांनी केला.
भारतीय कम्युनिस्ट पक्षाने (भाकप) शनिवारी कोल्हापूर बंद पुकारला होता तर, रविवारी महाराष्ट्र बंदची हाक दिली आहे. यात सर्व डाव्या पक्षांसह भारिप-बहुजन महासंघ, रिपब्लिकन पक्ष, काँग्रेस, राष्ट्रवादी काँग्रेस देखील बंद मध्ये सहभागी असणार आहे.
कॉम्रेड पानसरे यांच्या अंत्यविधीसाठी शासनाचा एकही प्रतिनिधी उपस्थित नव्हता. पानसरेंवरील हल्ल्यानंतर पाच दिवसांनी त्यांचे निधन झाले. अद्याप पर्यंत त्यांच्या मारेकर्‍यांचा सुगावा लागलेला नाही. यामुळे कार्यकर्त्यांमध्ये संतप्त भावना आहेत. त्यामुळे कायदा आणि सुव्यवस्थेचा प्रश्न निर्माण होण्याची शक्यता लक्षात घेऊन मंत्रिमंडळातील कोणीही पानसरेंच्या अंत्ययात्रेत सहभागी होणार नाही, अशी शक्यता सुत्रांनी वर्तवली होती.
कोल्हापूरमध्ये शनिवारी भाकपचे राज्यस्तरीय अधिवेशन होणार होते. या अधिवेशनाचे कॉम्रेड पानसरे अध्यक्ष असणार होते. त्यांच्यावर 16 फेब्रुवारी रोजी हल्ला झाल्यानंतरही अधिवेशन रद्द करण्यात आले नाही. आज त्याच अधिवेशनाचे त्यांच्या शोकसभेत रुपांतर झाले. अधिवेशनासाठी मुंबईसह नाशिक, औरंगाबाद, पुणे येथून मोठ्या प्रमाणात कार्यकर्ते आले होते. दुर्दैवाना त्या सर्वांना पानसरे यांच्या अंत्ययात्रेत सहभागी व्हावे लागले.
कार्यकर्त्यांच्या भावना तीव्र
भाकपच्या अधिवेशनानिमीत्त राज्यभरातून कार्यकर्ते कोल्हापूरमध्ये आले आहेत. कॉम्रे़ड पानसरेंच्या निधनाची बातमी कळाल्यापासून कार्यकर्त्यांना भावना अनावर होत आहेत. कार्यकर्त्यांनी आजच महाराष्ट्र बंदची हाक देण्याची इच्छा व्यक्त केली होती. मात्र भाकप नेते डॉ. भालचंद्र कांगो यांनी रविवारी महाराष्ट्रात बंद पाळण्यात येईल असे सांगितले आहे.
महाराष्ट्राचा तालिबान होत चालला – भालचंद्र नेमाडे
महाराष्ट्राचा तालिबान होत चाललाय त्याला वेळीच रोखायला पाहिजे. आता महाराष्ट्राला पुरोगामी म्हणण्याची लाज वाटत असल्याची खंत ज्ञानपीठ विजेते लेखक भालचंद्र नेमाडे यांनी व्यक्त केली आहे.
दाभोलकरांची हत्या होऊन दीड वर्ष झाले तरी त्यांचे मारेकरी का पकडले जात नाही? असा सवाल करुन नेमाडे यांनी राज्यातील सरकार आणि पोलिसात अपात्र माणसे असल्याचे म्हटले आहे. कॉम्रेड पानसरेंच्या हत्येनंतर महाराष्ट्राला पुरोगामी कसे म्हणावे असा सवाल त्यांनी केला. ते म्हणाले आता या राज्याला पुरोगामी म्हणण्याची लाज वाटत आहे.
आभाळ फाटले
आमच्या डोक्यावरचे आभाळ फाटले आहे. बोटभर चिंधीने आम्ही ते सांधू शकणार नाही, अशी प्रतिक्रिया शेतकरी कामगार पक्षाचे नेते एन.डी.पाटील यांनी व्यक्त केली. दाभोलकरांच्या हत्येला दीड वर्ष झाले तरी मारेकरी मोकाट आहे. तेव्हा आम्ही म्हणालो होतो, सामाजिक समतेच्या लढ्यातील हे शेवटचे बलिदान आहे. दुर्दैवाने दीडवर्षात कॉम्रेड गोविंद पानसरेंसारखा योद्धा आम्ही गमावला. आता कार्यकर्त्यांचे सांत्वन करण्यासाठी आमच्याकडे शब्द नाहीत. महाराष्ट्र सरकारकडे राजकीय इच्छाशक्ती नसल्याने राज्यात हे घडत आहे, अशी तीव्र प्रतिक्रिया एन.डी. पाटील यांनी व्यक्त केली.

मुंबई – डॉ. नरेंद्र दाभोलकर आणि कॉ. गोविंद पानसरे यांच्या हत्येनंतर राज्यातील पुरोगामी आणि सामाजिक चळवळीतील नेत्यांच्या सुरक्षेचा प्रश्न ऐरणीवर आला आहे. त्यामुळे यापुढील काळात अशा चळवळीतील नेत्यांना सरकारने संरक्षण द्यावे, अशी मागणी काँग्रेसचे प्रदेशाध्यक्ष माणिकराव ठाकरे यांनी मुख्यमंत्री देवेंद्र फडणवीस यांच्याकडे पत्राद्वारे केली आहे.
कॉ. पानसरे यांच्या हत्येने महाराष्ट्राच्या पुरोगामी प्रतिमेला तडा गेला आहे. या घटनेमुळे राज्यात प्रतिगामी आणि सनातनी विचारधारा डोके वर काढत असल्याचे दिसते. या पार्श्वभूमीवर पुरोगामी आणि सामाजिक चळवळीतील; तसेच पीडित, शोषितांसाठी आवाज उठवणाऱ्या सर्वच नेत्यांना संरक्षण देण्याची आवश्यकता आहे. त्यामुळे राज्य सरकारने तातडीने अशा नेत्यांच्या सुरक्षेचा आढावा घेऊन त्यांना संरक्षण देण्यासाठी ठोस पावले उचलावीत, असे ठाकरे यांनी पत्रात म्हटले आहे.
विचारांशी लढाई विचारानेच झाली पाहिेजे, अशी भूमिका घेऊन स्वस्थ बसणे योग्य नाही. धर्म आणि संस्कृती रक्षणाच्या नावाने गुंडगिरी सुरू आहे. देशात वैचारिक दहशतवाद थैमान घालत आहे. या सर्व प्रवृत्तींना रोखले नाही, तर आगामी काळात देशाला गंभीर परिणाम भोगावे लागतील, अशी भीतीही त्यांनी व्यक्त केली.
कॉ. पानसरे यांच्या मारेकऱ्यांना तत्काळ अटक करावी, अशी मागणीही त्यांनी केली. आवश्यकता भासल्यास या प्रकरणाचा तपास सीबीआयकडे सोपवावा; तसेच भविष्यात अशा घटनांची पुनरावृत्ती टाळायची असेल तर, सनातन व प्रतिगामी विचारधारेचे समर्थन करणाऱ्या संघटनांवर तातडीने कठोर कायदेशीर कारवाई करावी, अशी त्यांची मागणी आहे.

नवी दिल्ली- राजधानी दिल्लीत एका नायजेरियन महिलेवर सामूहिक बलात्कार केल्याची धक्कादायक घटना उघडकीस आली आहे. पिडीत महिलेने या प्रकरणी तक्रार दाखल केल्यानंतर पोलिसांनी चार जणांना ताब्यात घेतले आहे.
पिडीत महिला दक्षिण दिल्लीतील छत्तरपूर येथून घरी जाण्यास निघाली होती. यावेळी गाडीत बसलेल्या राकेश, सनी, दीपक आणि जॉन्सन यांनी या महिलेला लिफ्ट देऊ केली आणि तिनेही ती स्वीकारली.
यादरम्यान या चौघांनी परिस्थितीचा फायदा घेत तिच्यावर चालत्या कारमध्ये सामूहिक बलात्कार केला आणि त्यानंतर तिला गाडीबाहेर फेकून दिले. चिला बॉर्डरजवळील पोलीस ठाण्यापासून काही अंतरावर तिला गाडीतून फेकून दिले आणि ते चौघेही पसार झाल्याची माहिती पोलिसांनी दिली.
दरम्यान, पिडीत महिलेला लिफ्ट दिल्याचे आरोपींनी मान्य केले आहे मात्र तिच्यावर बलात्कार केल्याचा आरोप त्यांनी फेटाळून लावला आहे.

यवतमाळ, दि. २० – खुनाच्या प्रयत्नात असलेल्या पाच आरोपींना दोन तलवारीसह अटक करण्यात आली. ही कारवाई स्थानिक गुन्हे शाखेच्या पथकाने अशोकनगर, पाटीपुरा येथे केली. अंकुश दामोधर रामटेके (३०), रा. पाटीपुरा, आकाश वसंता वानखडे (२३) रा. आष्टा, संजय शंकर शेळके (३०) रा. नागपूर, मंगेश गुलाब नंदपटेल (२८) रा. अशोकनगर यांच्यासह विधीसंघर्ष ग्रस्त बालक अशा पाच जणांना अटक करण्यात आली. तर पोलिसांच्या कारवाईची कुणकुण लागल्याने सय्यद टकल्या व प्रितम उर्फ प्राजी दामोधर रामटेके (३५) दोघेही रा. अशोकनगर हे फरार झाले.
काही इसम अशोकनगरातील सय्यद टकल्या याच्या घरी घातक शस्त्रासह बसून असल्याची टीप सहाय्यक पोलीस निरीक्षक कडून यांना मिळाली. त्यावरून पोलीस अधीक्षक संजय दराडे, पोलीस निरीक्षक संजय पुजलवार यांच्यामागर्दशनात सापळा रचण्यात आला. स्थानिक गुन्हे शाखेच्या पथकाने धाड टाकताच पाच जणांना अटक केली. गादीखाली ठेवून असलेल्या दोन तलवारी जप्त केल्या. सदर इसम खून करण्याच्या बेतात होते, अशी माहिती पोलीस सूत्राने दिली. आरोपीविरुद्ध शहर पोलीस ठाण्यात गुन्हा नोंद करण्यात आला आहे. ही कारवाई सहाय्यक पोलीस निरीक्षक कडू, ऋषी ठाकूर, अमोल चौधरी, किरण पडघण, शहजाद खान, ओमप्रकाश यादव, भीमराव सिरसाट, वासू साठवणे, मो.शकील, सचिन घुगे, गणेश देवतळे, रेवन जागृत यांनी केली.

यवतमाळ, दि. २० – इयत्ता बारावीच्या परीक्षेला उद्यापासून सुरूवात होणार असून, टर्निंग पॉर्इंट ठरणाºया परीक्षेला जिल्ह्यातील २२ हजार विद्यार्थी सामोरे जाणार आहे. एकूण ९९ परीक्षा केंद्रावर परीक्षा घेण्यात येणार आहे. चिटोरेबहाद्दरांना रोखण्यासाठी यंदाही कॉपीमुक्त अभियान राहणार आहे. त्यासाठी १५६ बैठे पथकांसह सात भरारी पथकाचा वॉच राहणार आहे.
करिअर कशात करायचे, यासाठी बारावीची परीक्षा महत्वाची ठरते. मायमराठीच्या पेपरने सुरू होणारी परीक्षा २२ हजार विद्यार्थी देणार आहे. गैरमार्गाशी लढा उपक्रमातंर्गत कॉपीमुक्त अभियान राबविण्यात येत आहे. कुठेही अनुचित प्रकार घडू नये, यासाठी विशेष खबरदारी घेण्याच्या सूचना शिक्षण विभागाकडून करण्यात आल्या आहेत. परीक्षा केंद्रावर अनुचित प्रकार आढळल्यास केंद्रप्रमुख, संचालक, पर्यवेक्षक यांना जबाबदार धरण्यात येईल. तसेच शाळेची मान्यता रद्द करण्याचा इशारा जिल्हाधिकारी राहुल रंजन महिवाल यांनी दिला आहे. परीक्षा सुरू होण्यापूर्वीपासून तर संपेपर्यंत प्रत्येक केंद्रावर बैठे पथकाचा ठिय्या राहणार आहे. त्यासाठी १५६ पथकांची निर्मिती करण्यात आली आहे. सोबतच सात भरारी पथकही राहणार आहे. ही पथके अकस्मात कुठल्याही परीक्षा केंद्रावर भेट देऊ शकतात. भारनियमनामुळे विद्यार्थ्यांना पेपर सोडविण्यासाठी अडचणींचा सामना करावा लागू नये म्हणून जनरेटरची व्यवस्था करण्याचे निर्देश यापूर्वीच देण्यात आले आहे. कॉपी आढळल्यास केंद्र प्रमुख, संचालक, पर्यवेक्षक यांच्यावर कारवाईची कुºहाड कोसळणार असून, शाळांची मान्यता रद्द करण्याचा इशारा देण्यात आल्याने संस्थाचालकांचे धाबे आतापासूनच दणाणले आहे.

मुंबई-(सतिष राठोड /महाराष्ट्र न्यूज नेटवर्क) – मुख्यमंत्री व राज्याचे वित्तमंत्री हे विदर्भाहून अाहेत,त्यामुळे याचा पडसाद राज्याचा बजेटवर दिसेल.विजय केळकर समितीच्या अाग्रहानुसार विदर्भासाठी महत्वाची घोषणा होणार अाहे,अशी माहिती वित्त विभागाच्या सुत्रांनि दिली अाहे.तसेच या बजेटमध्ये एलबीटी रद्द होण्याचे संकेत अाहेत,बजेटमध्ये अारोग्य,शिक्षण,जलसिंचन,रस्ते, या विषयावर विशेष भर देण्यात येणार असून,९ मार्च पासून सुरु होणार्या विधानसभा अधिवेशनामध्ये १७ ते १९ मार्च दरम्यान बजेट मांडण्यात येईल.राज्याचे वित्तमंत्री सुधीर मुनगंटीवार यांची बजेट मांडण्याची पहिलीच वेळ अाहे,तसेच महसुल वाढविण्यासाठी नविन कर लावणे किंवा जुन्या करात वाढ करण्याच्या एैवजी सरकारी खर्च कमी करण्यावर जोर देणार असल्याची माहिती प्राप्त झाली अाहे.

इलाहबाद, दि. १९ – छेडछाडीला विरोध करणा-या तरुणीची गोळी घालून हत्या करण्यात आली असून, आरोपींवर गुन्हा दाखल करण्यात आला आहे.
एटा तालुक्यातील नगला गोपाल गावात संध्याकाळी एक तरुणी वहिनी सोबत नैसर्गिक विधी करता जात असताना भुवनेश व राजू या गाव गुंडांनी तिचा रस्ता अडवत अश्लील चाळे करण्यास सुरवात केली. या दोघांना विरोध करत ही तरुणी घरी पळून जाण्यात यशस्वी झाली. परंतू, राजू व भुवनेश यांनी इतर चौघांना सोबत घेऊन तरुणीच्या घरी जात तिच्यावर जबरदस्ती करण्याचा प्रयत्न केला असता तिच्या वडिलांनी या गावगुंडांना विरोध केला. या झटापटी दरम्यान भुवनेशने गावठी पिस्तुलामधून झाडलेली गोळी पिडित तरुणीच्या मानेला लागली असता त्या तरुणीला स्थानिक रुग्णालयात दाखल करण्यात आले असता तिथल्या डॉक्टरांनी आग्रा येथील रुग्णालयात त्वरीत हलवण्यास सांगितले. आग्रा येथे रुग्णालयात पोहोचण्यापूर्वीच या पीडित तरुणीने प्राण सोडला असल्याचे पोलिसांनी सांगितले आहे. तसेच राजू व त्याच्या अन्य सहका-यांवर गुन्हा दाखल करण्यात आल्याचेही पोलिसांनी सांगितले आहे.